1. Benjamin pʼekechirejj marcapar uqhäm arscän uca khepatjja, jupajj jupanac taypiruw qhitäna, marcapan jupan arunacap iyawsataps jan iyawsataps yatjjatiri.

2. Take jupanacasti mä arutjamäcaspas uqhäm artʼapjjäna: Jïsa, nanacar arsupquist take ucanacarojj iyawsapjjtwa. Chekätaps phokhatäñaps yatipjjaractwa. Cunalaycutejj Take Chʼaman Tatitun Ajayupaw nanacarojj mayjar tucuyjjapjjetu, jan ucajj chuymanacajj turcjjaraqui, ñankh jan jucʼamp lurañ munañanacajjataqui, antisas asquinac jan tucuyasaw lurañ munjjapjjta.

3. Nanac pachpajj Diosan jan wati sumätap toksa, jupan Ajayupan khanañchäwinacap toksa, cunatejj jutcan ucat jachʼa uñjäwinïpjjaractwa. Waquisisp ucajja, take cunaymananacats Diosan arjapjjaraquiristwa.

4. Pʼekechirejj nanacar arsupquit ucanacar iyawsañanïtajjajj jachʼa yatïwiruw puriyapjjetu. Ucat jachʼa cusisiñamp cusisipjjta.

5. Nanacasti Diosajjan munañap lurañanacajjataquisa, take cunanactejj jupajj camächitjam churapquitani, jiwañcam ucanacar phokhapjjañanacajjataquisa, amtäwiruw Diosajjamp mantañ munapjjta, alajjpach qhitan aruparjam jan tuc-caya tʼakhesïwi jan nanacar puriyasipjjañanacajjataqui, Diosan colerasiñ kerupat jan umapjjañajjataquiraquiwa.

6. Cuntejj Benjamin pʼekechirejj jupanacat muncän ucanacajja, aca arunacawa. Ucat jupanacarojj säna: Cuna arunactejj nayajj istʼañ muncäyät uca arunac jumanacajj arsjjapjjtawa. Jumanacajj lurapcta uca amtäwejj asqui amtäwiwa.

7. Jichhasti, lurapcta uca amtäw laycuw, Criston wawanacapa, jupan yokanacapa, phuchanacapa satäpjjäta. Jichhürojj jupajj jumanacarojj kollanjam jathachapjjtamjja. Jupan sutipar iyawsatajj laycuw nanacan chuymanacajjajj turcatäjje – sasaw sapjjtajja. Uqhämasti jupat yuritäpjjtawa, yokanacaparus phuchanacaparus tucupjjaractawa.

8. Uca suti tokew khespiyatäpjjta. Janiraquiw yakha sutejj utjquiti uca tok khespiyasipjjañamataquejja. Janiw yakha sutejj khespiyasiñan puriñapatac churatäquiti. Ucat cawquïritejj jiwañcam yäkañatac amtäwir mantapcta, take jumanacan jupan sutip catjjarupjjañanacam munirista.

9. Qhititejj uqhäm lurcan ucajja, Diosan cupëjjapan jicjjatasini, cunalaycutejj uca jakejj cuna sutit-tejj jawsatäc uc yatini. Jupajj Criston sutip apani.

10. Ucatsti qhititejj Cristo suti jan catjjarqui ucajja, yakha sutit jawsatäñapawa. Ucat Diosan chʼekäjjapan jicjjatasini.

11. Uqhämaraquiw nayajj amtasipjjañam munirista: Mä sut churapjjäma; jumanacatejj juch lurapcät ucqhaquiw ucajj chhaktatäni. Acaw uca sutejja. Uqhämasti amuyasipjjam jan juch lurañanacamataqui, uca sutin chuymanacamat jan chhaktañapataqui.

12. Nayajj jumanacaruw sapjjsma: Uca sutit amtasipjjañam munirista, chuymanacaman wiñayatac kellkantat apapjjañamataqui, Diosan chʼekäjjapan jan jicjjatasiñanacamataqui, cuna arumpitejj jawsatäpcta uca arur uñtʼañanacamataqui, istʼañanacamataqui, cuna sutit-tejj jupajj jumanacar jawsapcätam uc uñtʼañanacamataquiraqui.

13. Cunjämatarac mä jakest uywiripar uñtʼaspa, janitejj jupar lokcaspa, jupatac jan uñtʼatäcaraquispa, chuymapan lupʼïwinacapata, amtäwinacapat jayanc-caraquisp ucasti?

14. Ucat jucʼampi, mä jakejj jake masipan asnop catusajj uc uywaspati? Nayajj jumanacarojja, janiw sapjjsmawa. Janiw uca asnor jupan tamap taypin mankʼaycaspati. Antisas asnorojj alisnucuniwa. Nayajj jumanacaruw sapjjsma: Janitejj cawquïr sutit-tejj jawsatäpcät uc yatipcät ucqhajja, uqhämaraquiw jumanacamp lurasini.

15. Ucat jumanacan thurtʼasipjjañama, jan maysar uñtapjjañam munirista. Asqui luräwinacan jilarquir lurirïpjjañam munirista, Cristo Take Chʼaman Dios Tatitun jumanacar jupanquirit sanampañapataqui, alajjpachar puriyatäñanacamataqui jan tucusir khespiyasiñs wiñay jacañs catokapjjañamataqui, alajjpachans acapachans take cun luririn suma amuyupa, chʼamapa, chekäpañapa, qhuyapayäwip toke. Uca luriristi taken Diosapawa. Uqhamäpan.