1. Ucat Noe pʼekechirin lokerinacapat jaltcän uca Almajj ñankha luräwinacapats juchanacapats cutiquipstänwa. Jupasti jakenac taypin sarnakasaw jamasat Abinadin arunacap yatichañ kalltäna.

2. Jupajj jutir cunaymaninacat yatichäna, jiwatanacan jactäwipata, Criston chʼamapata, tʼakhesïwinacapata, jiwäwipata, jactäwipata, alajjpachar maqhatäwipata, jakenacar cutsuyañat yaticharaquïna.

3. Cawquïrinacatejj arupar istʼañ munapcän ucanacaruw yatichäna. Jupasti jupanacarojj jamasatjam yatichäna, pʼekechirir jan yatiyatäñapataqui. Waljaniraquiw arunacapar iyawsapjjäna.

4. Cawquïrinacatejj jupar iyawsapcän ucanacajja, Mormon sat mä chekawjaruw sarapjjäna. Ucawjajj pʼekechirin sutiñchatänwa; cawqhantejj jachʼa lakʼonacajj yakhep pachanacajj walpin utjqui uca orak thiyancaraquïnwa.

5. Mormonanjja, mä kʼoma uma jals köñaw utjäna. Ucawjan Almajj utjasïna. Uma jacʼan chʼumjam jiscʼa kokanacaw utjaraquïna. Ucan urunacajj pʼekechirin thakayatanacat imantasïna.

6. Cawquïrinacatejj jupar iyawsapcän ucanacajja, arunacap istʼiriw sarapjjaraquïna.

7. Walja uru sarakatatsti, waljaniw Alman arunacapar istʼirejj Mormon chekan tantachasipjjäna. Cawquïrinacatejj jupan arupar iyawsapcän ucanacajja, jupar istʼiriw tantachasipjjäna. Jupasti jupanacarojj juchat cutiquipstañata, cutsuyañata, Tatitur iyawsañat yatiyäna.

8. Ucat jupanacarojj säna: Acajj Mormon köña umanacajja. (uqhäm satänwa). Jichhajja, niyaquitejj Diosan tamapar mantañ munapjjsta, ucatsti Diosan jakenacap sutichatäñ munapjjsta, jathi llaquinacan sujäñanacapatac jake masiman jathi llaquinacap kʼepiñ munapjjatam laycu;

9. Jïsa, jumanacatejj jachirinacamp jachañataquejj arsupjjasma; jïsa, qhitinacatejj chuymachayasiñ munapqui ucanacar chuymachañataqui, take pachan Diosat ircatirïñataqui, take cunana, cawqhancapcätatejj take ucawjana, jiwañcamasa, Diosamp cutsuyatäpjjañamataqui, ucatsti nayrïr jactirinacamp chic jaqhutäñataqui, wiñay jacañanïpjjañamataquiraqui.

10. Jichhajj nayajj jumanacaruw sapjjsma: Ucatejj chuymanacaman munatapächejja, cunas jarcʼapjjtam Tatitun sutipar bautizasipjjañamataquejja, cuna arusjäwirutejj jumamp mantapcta uc jupan nayrakatapan arsuñataqui; jupar lokapjjañamataqui, camächitanacapar phokhapjjañamataqui, jupan Ajayup jucʼamp jumanacjjar wartañapataqui?

11. Uca jakenacasti uca arunacar istʼasinjja, amparanacap cusisiñat ucsar acsar aytapjjäna, ucat artʼapjjaraquïna: Ucaw chuymanacajjan munatapajja.

12. Ucat Helamajj nayrïrinacat maynïnwa; Almasti jupar irpantasaw umar mantäna, ucat säna: Tatay Ajayumjj lokerimjjar warjjatanita, aca luräwi kollan chuymamp lurañajjataqui –sasina.

13. Uca arunac arscän ucapachaw Tatitun Ajayupajj jupampïna. Jupasti sänwa: Helam, take chʼaman Diosan chʼamapanïsaw bautis-sma, jiwañcam jupar lokañatac amtäwir mantatamat ircatiri. Tatitun Ajayupasti jumjjar warjjatatäpan, orak ut-tʼayäwit waquichatäqui uca Criston cutsuyäwip tokerac wiñay jacañajj jumar churaspan.

14. Ucatsti Almajj uca arunac arscän ucspachaw, Almamp Helamampejj panpachan umar chhakantapjjäna. Jupanacasti saythapisinjja cusisisaw umat mistsupjjäna, Ajayump phoktʼatäsina.

15. Ucat Almajj yakhar irpantasaw wastat umar mantäna, nayrïrirjamaraquiw jupar bautizäna, ucampis Almajj janiw jupa pachp uman chhaktayascänti.

16. Mormon chekar sapa mayni saririnacaruw uqhäm Almajj bautizäna; jupanacasti pä patac pusinjamänwa. Jupanacasti Mormon köña umanacan bautizatäsajj Diosan munasiñapampiw phoktʼatäpjjäna.

17. Jupanacasti Diosan iyawsiri tamapa, jan ucajj Criston iyausiri tamapa, satäpjjän ucapachat ucsarojja. Ucat cawquïrinacatejj Diosan chʼamapamp bautizatäcän ucanacajja, Diosan iyawsir tamaparuw mantayatäna.

18. Ucat Almajj Diosan chʼamapanïsaw sacerdotenacar ut-tʼayäna; sapa pheska tuncanitjja, mä sacerdot ut-tʼayäna, jupanacar yatiyañataqui Diosan marcapan yänacapjjat yatichañataquiraqui.

19. Jupasti jupanacarojj mä camächit churäna, aqhäm sasa: Cuntejj nayajj yatichcta ucac yatichapjjäta, uqhämaraqui kollan arjirinacan lacapan arsutäcän ucanacaquiraqui.

20. Jïsa, jupanacarojj juchat cutiquipstañampit, marcapar cutsuyqui uca Tatitur iyawsañampit yatichañanacapataquiw camächit churäna.

21. Chʼajjwanacan jupanac pur jan utjañapataqui, antisas jupanacan mayac suyañanacapataqui mä sapa iyawsañanïpjjañapataqui, mä sapa bautizasïwinïpjjañapataqui, chuymanacapajj mayachatäñanacapataqui, jupanac pur munasipjjañapataquiw camächit churäna.

22. Uqhäm yatiyañanacapataquiw camächit churäna. Uqhämat jupanacajj Diosan wawanacapar tucupjjaraquïna.

23. Diosan samarañ urup kollanaptayas imañanacapataqui, Dios Tatitupar sapür yuspagarañanacapatac camächit churaraquïna.

24. Uqhämaraqui jupan ut-tʼayat sacerdotenacan jacapjjañapataquejja, quipca amparamp irnakañanacapataquiw camächit churaraquïna.

25. Sapa pakallk uruta mä ur yakhachapjjäna, uca urun jakenacar yatichañatac tantachasipjjañapataqui, Dios Tatitupar yupaychañanacapataqui. Uqhämaraquiw waquisitaparjam tantachasiñatac amtapjjaraquïna.

26. Sacerdotenacasti jacapjjañanacapataquejj janiw jakenacat mayipjjañapäcänti. Antisasinsa luräwinacapat Diosan qhuyapayañap catokapjjañapäna Ajayun jachʼaptapjjañapataqui, Diosat yatïwinïsa Diosan chʼamapamp munañan cancañapamp yatichañanacapataqui.

27. Uqhämaraqui Almajj iyawsiri tamanquir jakenacarojj yänacapat wajjtʼañanacapatac camächit churaraquïna; sapakat maynejj yänacaparjam wajjtʼañapänwa. Cawquïrintejj jiläcänjja, jupajj walj wajjtʼañapänwa; uqhämaraqui cawquïrintejj jucʼac utjaraquïnjja, jupajj jucʼaquirac wajjtʼañapäna; cawquïrintejj jan cunas utjcänjja, ucarojj wajjtʼatäñapänwa.

28. Uqhäm quipca munañaparjamas Diosar suma munañaparjamas yänacapat jan cunani sacerdotenanacarusa, take jan cunani jakenacarusa wajjtʼapjjañapäna.

29. Diosat camächit catokasaw Almajj uqhäm jupanacarojj säna: Jupanacasti Dios nayrakatan sum sarnakapjjäna, uqhämaraquiw cuntejj janchipataquis ajayupataquis waquiscän ucarjamaw jupanac purajj yänacapat wajjtʼasipjjäna.

30. Take ucanacaw Mormon sat chekawjan lurasïna, Mormon köña umanac jacʼana, Mormon umanacat jacʼa chʼuminsa. Cawquïrinacatejj ucawjan Khespiyiripat yatïwir puripcäna ucanacan nayranacapataquejja, cunja jiwaquis Mormon chekajja, Mormon köña umanacajja, Mormon chʼumejja. Jupanacasti cunja qhuyapayatäpjjesa, cunalaycutejj jachʼar aptäwinac Khespiyiripar wiñay kʼochupjjani.

31. Ucanacasti pʼekechirin jan yatiñapataquiw uca orak thiyanacan lurasïna.

32. Ucampis pʼekechirejj jakenac sarquir catjasajja, lokerinacaparuw jupanacar uñaker qhitäna. Ucat Tatitun arupar istʼañatac tantachasipcän ucürun jupanacat pʼekechirirojj yatiyatäna.

33. Pʼekechiristi sänwa: Almajj jakenacaruw nayar kallcatayañatac amtayasqui. Ucat nuwasir tamap jupanacar tʼunjirejj qhitäna.

34. Ucatsti Almamp Tatitun jakenacapampejja, pʼekechirin tamapan jutatapat yatiyapjjäna. Ucat chʼujllanacap apthapisaw familianacapampejj wasarar mistjjapjjäna.

35. Jupanacasti pusi patac pheska tuncanjamänwa.