1. Ucat waynanacat waljaniw Benjamin pʼekechirejj marcapar parlcän ucapach wawätanacap laycojj, jupan arunacap jan amuyapcänti. Jupanacasti janiraquiw awquinacapan sarnakäwinacaparojj iyawsapcänti.

2. Jiwatanacan jactäwipat arsut arunacarus Criston jutäwiparus janiw iyawsapcänti.

3. Jupanacan jan iyawsatap laycusti janiw Diosan arup amuyirjamapcänti, jupanacan chuymanacapajj kalaptayatäpjjänwa.

4. Jupanacajj janiw bautisasiñ munapcänti, janiraquiw iyawsiri tamaru mantañs munapcaraquïnti. Jupanacajj iyawsäwiparjam yakhaktat jakëpjjänwa. Ucat ucsarojja janchin juch lurir utjäwipan kamapjjaraquïna, jupanacan Dios Tatitupar jan artʼasiñ munapjjatap laycu.

5. Ucat Mosiajj marcar saraycän ucapachajja, janiw jupanacajj Diosan marcapan chicataparücänsa, ucampis jilanac pur pitusïwinac laycuw jupanacajj jucʼamp waljanir tucupjjäna.

6. Iyawsiri tamanquirinacat waljaniruw sallkjapjjäna, alek jachʼar aptäw arunacapampi; jupanacarusti walja juchanac lurayapjjaraquïna. Ucat cawquïr iyawsiri tamanquirinacatejj juch lurapcän ucanacarojja, waquisïn iglesian juch lurir jakenacapar tokenokañapajja.

7. Ucat uca juch luririnacajj sacerdotenacan nayrakatapar irpatäpjjänwa, yatichirinacasti sacerdotenacaruw catuyapjjäna. Sacerdotenacasti Alma jilïr sacerdoten nayrakataparuw jupanacarojj irpcatapjjaraquïna.

8. Mosia pʼekechiristi Almarojj iyawsiri tamjjar munañanïñ cancañ churäna.

9. Ucat Almajj janiw uca juch luririnacampejj camachtʼirjamäcänsa, ucampis jupanacjjat walja ircatirinacaw utjäna; jïsa, jakenacajj jupanacan ñankha luräwinacap contra saytʼasaw wal ircatapjjäna.

10. Janiw nayrajj iglesian uqhämanacajj utjcänti. Ucat Almajj chuymapan llaquisisaw pʼekechirin nayrakatapar jupanac irpantayäna.

11. Pʼekechirirusti sänwa: Acajj waljaniw juma nayrakatar irpanipcta ucanacajja. Jupanacasti jilanacapan juchat ircatatäpjjewa. Uqhämaraqui, jupanacarojj cunayman ñankha luräwinac lurir catjapjjäna; janiraquiw uca ñankha luräwinacat cutiquipstapcaraquiti. Ucat jupanacar juchanacaparjam taripañamataquiw juma nayrakatar irpcatapjjsma.

12. Ucampis Mosia pʼekechirejj Almarojj sänwa: Janiw nayajj jupanacar taripquirist-ti, juman amparamaruw taripatäñanacapatac catuysma.

13. Ucat Alman chuymapajj wastat llacthaptäna. Ucat Tatitur jisctʼäna, cuna lurañapatejj waquiscasp uc yatiñataqui, cunalaycutejj Dios nayrakatan janich wal lurcasp ucaw ajjsarayäna.

14. Ucat takpach chuymap Diosar catuyjjatap khepat Tatitun arupajj juparojj aqhäm sas juti:

15. Alma, jumajj qhuyapayatätawa. Uqhämaraqui cawquïrinacatejj Mormonan köña umanacapan bautisasipcän ucanacajj qhuyapayatäpjjaraqui. Jumajj Abinadi lokerijjan arunacaparuc iyawsatam laycuw qhuyapayatätajja.

16. Jupanacasti juman qhuyapayataraquiwa, arsut arunacamar iyawsapjjatap laycuquiraqui.

17. Uqhämaraqui, juman aca jakenac taypin iyawsiri tama ut-tʼayatam laycuw qhuyapayatäta; jupanacasti ut-tʼayatäpjjaniwa, marcajjäpjjaraquiniwa.

18. Jïsa, aca nayan sutijj apañ munir marcajj qhuyapayatawa, cunalaycutejj nayan sutijjat jawsatäpjjani; jupanacajj nayancapjjaraquiwa.

19. Juman juch lurirjjat nayar jisctʼir jutatam laycuw qhuyapayatäta.

20. Jumajj lokerijjätawa. Nayajj jumampiw arusjäw lurta, juman wiñay jacañanïñamataqui. Jumasti nayaruw loketäta, nayan sutijj-jjar sarasaw ovejanacajj anthapïta.

21. Cawquïrinacatejj arujjar istʼapcan ucanacajja, ovejajjäpjjaniwa. Jupanacarusti iyawsiri tamaruw catokäta; nayasti jupanacarojj catokaraquïwa.

22. Cunalaycutejj acaw iyawsiri tamajjajja, qhititejj bautisascan ucajja, juchat cutiquipstañ bautismo catokani. Catokcan ucasti, sutijjar iyawsañapawa, ucarusti nayaw juchanacapat pampachä.

23. Cunalaycutejj nayätwa oraken juchanacap nayjjar catjjerejja. Nayaraquït jupanacar utjayirejja. Nayaraquït cawquïrinacatejj tucuyañcam iyawsapcan ucanacar cupïjjajjan mayawj churirejja.

24. Cunalaycutejj nayan sutijjat jawsatäpjjaniwa; jupanacatejj nayar uñtʼapjjetojja, jutapjjaniwa. Cupïjjajjansti wiñayataquiw mayawjajj jupanacatac utjani.

25. Payïri trompetajj tuctʼcan ucqhasti, nayar janipun uñtʼapquitan ucanacajja, sarthapisaw nayan nayrakatajjar saytʼapjjani.

26. Ucat nayan Dios Tatitupätajj yatipjjani. Nayan cutsuyiripätajj yatipjjaraquini; ucampis jupanacajj janiw cutsuyatäñ munapcänti.

27. Ucatsti nayajj jupanacarojj jan cunapach uñtʼiriw tucü. Jupanacasti supayampitac lokerinacampitac waquichat wiñay ninaruw sarapjjani.

28. Ucat nayajj sisma: Qhititejj nayan arujj jan catokcan ucarojja, janiw jumajj iyawsiri tamajjan catokcaraquïtati, cunalaycutejj khep khepa urunjja, janiw nayajj jupanacar catokcaraquïti.

29. Ucat jumar sisma: Saram; qhititejj nayjjar juch lurcan ucarojja, lurat juchanacaparjamaw taripäta. Ucat jupatejj juma nayrakatans naya nayrakatans juchanacap arsusinejja, take chuymamp nayar juchat cutiquipstquitanejja, jupan juchanacaparojj pʼampʼachätawa, nayasti uca juchanacapar pʼampʼacharaquïwa.

30. Jïsa, kawkha cutitejj jakenacajjajj nayar juchat cutiquipstapquitanejja, naya contra lurat juchanacaparuw pʼampʼachä.

31. Uqhämaraqui, jumanac purajj juchanacam pʼampʼachasipjjaraquïta. Nayajj jumanacar sapjjsmawa: Cawquïritejj jake masipan jupa contra jucha luratanacapat jan pʼampʼachcanejja, cunapachatejj jupajj cutiquipst-twa –siscan ucqhajja, ucajj juchañchañaruw puriyasini.

32. Ucat sisma: Saram; qhitinacatejj juchanacapat jan cutiquipstañ muncan ucanacajja, janiw marcajjamp jaqhutäcaniti. Ucasti jichhat ucsaruw phokhatäni.

33. Ucat Almajj uca arunac istʼcän ucqhajja, ucanacan imatäñapataquiw kellkäna. Uca igles jakenacar Diosan camächitanacaparjam taripañapataquiw ucjj kellkaraquïna.

34. Ucat Almajj uca ñankha luräwinac lurquir catjat jakenacarojj Tatitun aruparjamaw taripäna.

35. Qhitinacatejj juchanacapat arsusis cutiquipstapcän ucanacarojja, iyawsiri tamanquir jakenacamp chicaw Almajj jaqhuntäna.

36. Qhitinacatejj juchanacap jan arsusiñ munapcäna, ñankha luräwinacapat cutiquipstañ janirac munapcän ucanacarojja, janiw iyawsiri jakenacamp chic jaqhutäpcänti, sutinacapasti chhaktayataraquïnwa.

37. Ucatsti Almajj iyawsiri taman takpach luräwinacapjja, sarapar saraparuw uchäna. Ucapachat jupanacan wastat sumancañajj utjañ kalltäna, uqhämaraqui Dios nayrakatan sum uñjasis sarnakasa, waljanir catokasa, waljanir bautisasa. Ucapachat iyawsiri taman luräwinacapamp jachʼaptañ kalltapjjaraquïna.

38. Almampi iglesian jilïr masinacapampejj jan karisaw take cunan Diosan arup yatichasa, take cunayman tʼakhesïwinac tʼakhesisa, Diosan jan iyawsiri tamapanquirinacan arcanakatäsaw take ucanac lurapjjäna.

39. Jupanacajj jilanacaparojj toketatapjjänwa. Jupanac pachpasti toketatatäpjjaraquïnwa; sapakat maynejj juchanacaparjama jan ucasti, jucha luratanacaparjam Diosan arupamp toketatatäpjjänwa cunalaycutejj Diosajj, mayisiñanacapataqui take cunan yuspagarañanacapataquiw camächit churäna.