1. Mosian awquipan aruparjama, takpach uca oraken yatiynokasitap khepatjja, jakenacajj takpach uca orakenjja, cuna arunactejj Benjamin pʼekechirejj jupanacar arscan ucanac istʼiriw kollan utar maqhatañatac tantachasipjjäna.

2. Jupanacajj waljanïnwa; waljanïtap laycusti, janiw jaqhutäcänti. Jupanacajj uca orakenjja jachʼaptapjjataynawa, waljaniruw miratatapjjaraquitayna.

3. Uqhämaraqui, uywa tamanacapat jilïr kallunac apapjjäna, loktäwinacs naqhat loktäwinacs Moisesan leyiparjam loktañataquiw apapjjaraquïna.

4. Uqhämaraqui, Tatit Diosapar yuspagar churañataqui, cunalaycutejj jupaw Jerusalen oraketjj irpsunïna, timanacapar amparanacapat khespiyäna, asqui jakenacaruw yatichiripäñapataquejj ajllïna, uqhämaraqui jupanacan pʼekechiripäñataquejj mä asqui jakeruw ajllïna, ucaw Zarahemla orakenjj sumancaña ut-tʼayäna; Diosan camächitanacapar phokhañanacapataquiw yaticharaquïna, jupanacan cusisipjjañapataqui, Diosataquis take jakenacataquis munasiñan phoktʼatäñapataqui.

5. Jupanacajj kollan utar jutapcän ucapachajj chʼujllanacap uca ankäjjan familcam familcamaw ut-tʼayasipjjäna. Familianacansti mä chachajj warmipamp yokanacapamp phuchanacapampi. Ucanacansti yokanacapamp phuchanacapamp jilïrit sullcacamaw utjapjjäna. Sapakat familiasti yakh yakhänwa.

6. Jupanacasti chʼujllanacap kollan uta muytatawjan ut-tʼayapjjäna. Sapa jaken chʼujllapan puncupasti kollan ut uñtatänwa, uqhämat jupanacajj ucancapjjäna, ucat Benjamin pʼekechirin arunacap istʼañataqui.

7. Janiw Benjamin pʼekechirejj kollan ut mankhan jupanacar yatichirjamäcänti, jupanacan waljanïtap laycu; ucat jupajj mä saytʼu pucar lurayasïna, marcapan jupanacar arsut arunacap istʼañanacapataqui.

8. Jupasti pucarjjat marcapar parlañ kalltäna; ucampis waljanïtap laycojja, janiw takpachanejj arunacapar istʼapcänti. Ucat cuna arunactejj jupajj arscän ucanac kellkayäna, ucat cawquïritejj jan arupar istʼcän ucanac taypiruw uca kellkat arunac apayäna, jupanacan arunacap catokapjjañapataqui.

9. Acanacaw jupan arsutäc uca kellkayat arunacajja: Jilanaca, kawkhanitejj tantachasipcta ucjpachaniruw, jichhür arsupcäm aca arunac istʼapjjañam munta, janiw nayajj cuna arunactejj arsupcäm ucanacar jan cunäcaspas uqhäm amuyasiñanacamataquit jawsthapinipcsma; antisasinsa nayar istʼas yäkañanacamataquiwa, jinchunacam jistʼaras istʼañanacamataqui, chuymanacam jistʼaras amuyasiñanacamataqui, amuyunacam jistʼarañanacamataqui Diosat jan amuyatäc ucanac jumanacar uñtʼayatäñanacamataqui.

10. Jumanacar acar jutañanacamatac jawsayatajjajj janiw nayar ajjsarañanacamataquïquiti, janiraquiw nayajj mä acapach jaket jucʼampïquirists uqhäm lupʼiñanacamataquis jawsayapcaracsmati.

11. Nayajj jumanacjamätwa, janchins amuyunsa take cunayman usunacaw usuyitaspa; ucampis aca jakenacan ajllitätwa, awquijjan yakhachatätwa, Tatitun amparaparaquiw sarayirïñajjataquis, pʼekechirïñajjataquis aca marcajjar uchitu. Nayasti Tatitun taket sipan jucʼamp chʼamapamp imatätwa, Tatitojj churquitu take uca chʼamachʼasiñamp amuyump chʼamajjamp jumanacar lokañajjataqui.

12. Nayajj jumanacaruw sapjjsma: Jichhacamajj jacäwijjan jumanacar lokañatac jaytatätwa, jumanacatjj janiw kors kollks yakha cʼajquir cunaymananacs mayipcsmati.

13. Janiraquiw jumanacar carcelarojj catuntayapcaracsmati; janiw jumanac pur jakenac catuntañam muncti. Janiw jiwayañs lunthatañs wachokañs lurayapcsmati; janiw cuna ñankha luräwinacs lurayapcaracsmati, antisasinsa Tatitojj camächit churapctam take ucanacan camächitanacapar phokhañ yatichapjjsma.

14. Naya pachaw quipca amparajjamp irnakta jumanacar lokañajjataqui, impuesto apthapïwinacas cunayman chʼama mutüwinacas jan utjañapataqui. Takpach aca nayan arsutanacajjatjja, jumanacajj jichhürun ircatirinacäpjjtawa.

15. Ucampis jilanaca, janiw nayajj suma jakët sañajjataquit ucanac lurctjja, janiraquiw jumanacar juchañchañataquis ucanac lurcaracti; antisasinsa jichhüru Dios nayrakatan jan juchan uñjasitajj yatiñanacamataquiw ucanac arsupjjsma.

16. Nayajj jumanacarojj sapjjsmawa: Nayajj jumanacaruw jacäwijjan loktjja sasinjja, ucampejj janiw nayajj suma jakët sañ muncti. Cunalaycutejj Diosaruquiw lokta.

17. Uqhämaraqui jumanacan sum amuyañ yatekapjjañamataquiw ucanac arsupjjsma. Jake masinacamatac cunanacs lurarapipcta ucqhajja, Diosamataquiquiw uc lurapjjtajja; uc yatekañanacamataquiw ucanac arsupjjsma.

18. Nanacan pʼekechirejja – sasin nayar sapjjesta. Naya pʼekechiritejj jumanacar lokañajjatac irnaktjja, janit jumanacajj jake masimar lokas irnakapjjañamäqui?

19. Nayajj jacawijjan jumanacatac irnakasaw sarnakta; uc lurasasti Diosaruw lokaracta. Uca luratajjat naya pʼekechirimarutejj yuspagarañamajj waquischispajja, alajjpach pʼekechirimar yuspagarañanacamajj kawkha jucʼampispasa?

20. Jilanaca, jumanacaruw sapjjsma: Qhititejj jumanacar utjayapctam imapcaractam, jacañs churasipcaquiractam, cusisiyapcaractam, sumancañ jumanac pur utjañap churapcaractamjja, jumanacatejj uca Diosar take chuymamp chʼamapatjam yuspagarañamp jachʼar aptañamp churapjjasmajja,

21. Nayajj sapjjsmawa: Jumanacatejj lokapjjäta, qhititejj kalltatpach utjayapctam ucaru, ucatsti urut urur imapctam, jacapjjañamatac saman churapctam munatamarjam onjjtapjjañamatac, lurapjjañamatac yanapapctam, ucatsti acatjamat uywapcaractam ucarutejj take chuymamp lokapjjäsmajja, janiw ucampejj uqhäm asquinac luratapatjj lokañ tucuyapcasmati.

22. Ucampis jupan camächitanacapar phokhañac mayipjjtamjja. Uqhämaraquiw jupajj aqhäm sas arsupjjtam: Nayan camächitanacajjar phokhapjjätajja aca orakenjj jachʼaptapjjätawa. Jupasti janiw cunapachas cuntejj arsqui ucjj turcquiti. Ucat jumanacatejj camächitanacapar phokhapjjätajja, jupajj qhuyapayapjjätamwa, jachʼaptayapjjaraquïtamwa.

23. Cunalaycutejja, jupaw nayrakatajj jumanacar utjayapjjtam, utjasïwinacam jumanacar churapjjaractam. Ucatsti jumanacajj jupar manupjjtawa.

24. Ucjjarusti, jupajj camächitaparjam lurañam jumanacat mayipjjtam. Uqhäm lurapjjstajja, jichpachaw jupajj jumanacar qhuyapayapjjätam. Ucampejj jumanacar pagapquiristams uqhämawa. Jumanacasti jupar manüsipcactawa, wiñayaraquiw jupar manüpjjaraquïta; uqhämasti, cunatarac suma jakët sapjjsmasti?

25. Jichhajj jumanacaruw jisctʼapjjsma: Jumanac pachpatjj cuns sapjjasmati? Nayajj sapjjsmawa: Janiwa. Janiraquiw nanacajj orak lakʼjam sumäpjjtwa sapcasmasa; ucampis uca orak lakʼat luratäpjjtawa; ucampis jumanacar utjayapctam ucanquiw lakʼajja.

26. Nayarutejj pʼekechirijjaw sapc-chistajja, jïsa, naya pachpajja janiw jumanacat jucʼamp sumäcti. Nayajj lakʼat lurataraquïtwa. Nayan awquirquipstatajj uñjapjjaractawa. Nayajj aca jiwir janchjj oraker niy jaytanucurjamäjjtwa.

27. Ucalaycu, sapcsma uqhämaw nayajj Dios nayrakatan jan juchan sarnakas jumanacar lokapjjsma; ucat nayajj jichhajj jumanacar tantachayapjjaracsma, Diosajj jumanacjjat churquitu uca camächitanacarjam taripatäñajjatac saytʼcä ucapachajja, jan juchanïñajjataqui wilanacam isijjar jan chʼakjjatañapataquiraqui.

28. Nayajj sapjjsmawa: Wilanacam isijjat kʼomachañajjataquiw tantachayapjjsma. Uqhämaraqui nayajj amay imäwir niy sarakerjamäjjtwa; ucapachasti sumancañamp tucusiñajjataquiw uc luraracta, jan jiwquir ajayujjan alajjpach kʼochurinacamp chicachasiñapataqui cheka cancañan Diosar jachʼar aptas kʼochuñapataqui.

29. Sapjjaracsmawa: Nayajj janiw jucʼamp yatichirimäcäti, janiraquiw pʼekechirimäcäsa. Nayajj jumanacar uc yatiyañataquiw tantachthapiyapjjsma.

30. Cunalaycutejj jichhajj takpach janchijjas walpun qhathati, jumanacar parlañatac chʼamachascasajja. Ucampis Dios Tatituw chʼamachitu, jumanacar parlañajj munaraqui. Ucatsti jupaw camächit churitu: Mosiah yokajjan jichhürun jumanacan pʼekechirimäjjatapa, sarayirimäjjatap khanstayjjañataqui.

31. Jichhasti, jilanacajjay, cunjämatejj jichhacamajj lurapcta, uqhäm lurasipcaquim. Cunjämatejj nayan satanacajjar phokhapcta, awquijjan arunacapar phokhapcta, uqhäm jachʼaptapcaracta, ucatsti timanacaman amparapar puriñat khespiyatäpjjaractajja, uqhämaraquiw jiltapjjäta jumanacatejj yokajjan camächitanacaparu, jan ucajj cuna camächitanactejj Diosajj jupa toket churapcätam ucanacar phokhapjjätajja, aca orakenjj jachʼaptapjjaraquïtawa; timanacamasti janiraquiw jumanacar atipañ chʼamanïpcaraquiniti.

32. Ucampisa, Nayan munat jakenacajja! Ucatarac jumanac pur chʼajjwanacajj utjascaspa. Janirac alcatapjjamsa cuna ñankha ajayut-tejj Mosia awquijjajj arsqui uca ñankha ajayurojja.

33. Cawquïritejj uca ajayur jaysañ munquejja, juparuw llaquisiñajj puriyatäni. Jupatejj uca ajayur jaysañ munani, juchanacapamp jiwaraquini ucajja, almap quipcataquiw juchañchatäñ umasqui. Cunalaycutejj jupajj luratapatjja wiñay tʼakhesiyäw catokani, quipca yatïwiparjam Diosan leyip pʼaquitap laycu.

34. Nayajj jumanacaruw sapjjsma: Wawanacamaquiw ucanacat jan yatichatäquejja. Takpachan jumanacaw alajjpachanquir Awquimar manütamjj yatipjjtajja. Uca manutjja take cunanacatejj jumanacan utjqui, jumanacamp-pach jupar churapjjañanacamawa. Uqhämaraqui kellkatanacat yatichatäpjjaractawa. Uca kellkatanacansti, kollan arjirinacan arjäwinacapajj Lehi awquisajj Jerusalen marcat mistuncäns ucapachcamaw utji.

35. Take cuntejj lakʼa achilanacasajj jichhacam arsupqui ucanacatjja, yatichatäpjjtawa. Uqhämaraqui, cuntejj Tatitojj jupanacar camächitjam churqui, ucanac jupanacajj arsupjje. Ucanacasti chekawa, asquiraquiwa.

36. Jichhasti, jilanacajja, jumanacaruw sapjjsma: Take acanac yatcasa, yatichatäcasatejj juch lurapjjätajja, ucatsti cunatejj arsutäc uca contra lurapjjäta, Tatitun Ajayupat jithektañcama, janirac uca suma amuyun thaquipanjam irpayasiñ munapcätajja, janiw qhuyapayatäpcätati, janiraquiw jachʼaptayatäpcatasa, imatäpcaraquïtasa.

37. Nayajj jumanacaruw sapjjsma: Qhititejj uqhäm lurqui ucajja, takenin uñjcataw khanpach Diosarojj cutcati. Ucatarac jupajj ñankha ajayur jaysañ muni, take asquinacansti timaparuw tucuraqui. Ucat Tatitojj janiw jupan utjcaspati, cunalaycutejj jupajj jan kollan utanacanjja, janiw jacquiti.

38. Ucat uca jakejj janitejj juchat cutiquipstcani, Diosan timapäscaquini, uqhämpach jiwaraquinejja, Diosan chekapäñaparjam taripañan mayïwinacapajj jupan jan jiwquir almaparuw amuyayani uca jaken juch lurirïtapa. Ucaraquiw Tatitun nayrakatapat jithektayani. Chuymaparojj juch lurirïtapaw phokhanti, aykoñamp llaquisiñampejj phokhantaraqui; ucasti jan jiwartʼaycay ninjamawa, nina lawrapasti wiñay wiñayaw lawri.

39. Jichhasti jumanacaruw sapjjsma: Qhuyapayäwejj janiw uca jakjjarojj cuna wactʼäwinïquisa. Ucat jupan khepa tucusïwipajja jan tucusquir tʼakhesiñawa.

40. Jichhajja, take juma chuymaninaca, uqhämaraqui arunacajj amuyapcta uca wawanaca, (cunalaycutejj nayajj khan arsupjjsma jumanacan amuyasiñanacamataqui); qhitinacatejj Diosan leyip pʼaquipqui ucanacan ajjsarcañ jicjjatasiñapat amtasiñamataquiw achictʼapjjsma!

41. Uqhämaraqui cawquïrinacatejj Diosan camächitanacapar phokhapqui ucanacan qhuyapayata, cusisit jicjjatasitapat amuyasiñanacam munaraquirista. Jupanacajj take cunanjja, acapach cunanacamp kollan cunanacamp qhuyapayatäpjjewa. Jupanacatejj tucuyañcam chekar arcapjjanejja, alajjpachan catokatäpjjaniwa, jan tucusquir cusisiñan Diosamp utjañapataqui. Ucanacan chekätapjj amtasipjjapunim, cunalaycutejj Tatituw ucjj arsu.