1. Janit Isaiasajj sisqui: Qhitis nanacan yatiyäwijjarojj iyawsi, qhitirus Tatitun amparapajj uñstayata?

2. Jupajj jupan nayrakatapanjja, llullu aljamaw jiltani, waña oraken saphjamaw jilani. Janiw uynakanïquiti, janiraquiw jiwaquïcaraquisa. Jupar uñjapcañän ucapachajja, janiw jiwasanacan jupar munañasatac jiwaquïñapajj utjcaniti.

3. Jupajj jakenacan uñisitawa, alisnucutaraquiwa. Juparojj usuwa; tʼakhesïwir uñtʼaraquiwa. Jiwasanacasti ajanunacas jupat imantasipcsnas uqhäm lurapjjäyätan. Jupajj uñisitänwa, jiwasanacasti janiw jupar wakaychapctanti.

4. Chekpachan jupajj jiwasanacan tʼakhesïwinacas kʼepiraqui. Ucampis llaquisiyata, Diosan jawkʼantata tʼakhesiyatarac jicjjat-tan.

5. Ucampis jupajj jiwasanacan camächit pʼaquitanacas laycuw usuchatäna. Ñankha luräwinacas laycuw chʼojjñanokayatäna. Sumancañasan tʼakhesiyäwipajj jupjjancänwa. Jupan asutʼjat janchipampiw kollatäpjjtan.

6. Takpach jiwasanacajj ovejar uñtataw aywitatapjjtan. Jiwasanacajj sapakat mayniw quipca thaquisar saranucupjjtan. Tatitusti takpach jiwasanacan ñankha luräwinacas jupjjar kʼepjjarüna.

7. Juparojj jathjänwa, tʼakhesiyataraquïnwa, ucampis lacap janiw jistʼarcänti. Jupajj ovejar uñtat qharsüwir apatawa. Cunjämatejj mä ovejajj tʼawr yawiriripan nayrakatapan amuquejja, uqhämaraquiw jupajj lacap jan jistʼarcänti.

8. Jupajj carcelats taripäwits apsutänwa. Qhitis jathachatätapat yatiyani? Jupajj jaquirinacan orakepat phatʼsutänwa. Nayan marcajjan camächit pʼaquïwinacap laycuw tʼakhesiyatäna.

9. Ñankha jakenacamp chicäñataquiw sepulturap waquichäna, kamirinacamp chicaw jiwäwipan uñjasïna. Jupajj janiw cuna ñankhs lurcänti, janiraquiw lacapan cuna sallkjañas apjañas utjcaraquïnti.

10. Ucampis jupar chʼojjñanokayañajj Tatitutac waliquïnwa. Juparojj llacthapiyiwa. Cunapachatejj jumajj jupan almap juchat loktäwir tucuycät ucapachajja, jupajj jathanacaparuw uñjani. Jupajj urunacaparuw jucʼamp jiljjatayani. Tatitun cusisïwipasti amparapan jachʼaptaniwa.

11. Jupajj almapan chʼamtʼañap uñjani, ucampisti chuyma phokhatäniwa. Jupan yatiyäwip tokew asqui lokerijjajj waljanir jan juchan uñstayani, cunalaycutejj jupanacan ñankha luräwinacap kʼepini.

12. Ucat aytat jakenacamp chicaw juparojj tutejj churasini. Jupasti chʼamaninacampiruw luräwipatjam catokäwip jaljani, jupan almap jiwañcam churatap laycu. Jupasti camächit pʼaquirinacamp chicaw jaqhutäna. Waljanin juchanacap jupajj kʼepïna, camächit pʼaquirinacataquiw jupanac lantejj achicaraquïna.