1. Almajj Noe pʼekechirin nuwasir jakenacapan jupanacjjar jutañapat Tatitun yatiyatäsaw, jakenacapar ucjjat yatiyi, ucat uywa tamanacap anthapipjjäna, yarananacapat apthapisipjjäna ucat wasarar mist-tapjjäna, Noe pʼekechirin nuwasir jakenacapamp arctata.

2. Tatitusti jupanacarojj chʼam churäna; Noe pʼekechirin jakenacapan jupanacar tucqhañatac jan catjañapcama.

3. Jupanacasti quimsakallk uruw wasaran sarapjjäna.

4. Ucat jupanacajj mä orak catjapjjäna, uca orakesti jiwaquïnwa, sumänwa, kʼoma uman orakeraquïnwa.

5. Jupanacasti chʼujlljam carpanacap ut-tʼayasaw ucsarojj yapuchañ kalltapjjäna, ucapachat utanac utachañ kalltapjjaraquïna; jïsa, jupanacajj suma trabajirïpjjänwa, wal lurapjjaraquïna.

6. Jakenacasti Alman pʼekechirïñap munapjjäna; cunalaycutejj jupajj jakenacapan munatänwa.

7. Ucampis jupajj jupanacarojj sänwa: Jiwasanacan pʼekechirinïñasajj janiw waquisquiti; aqhäm siw Tatitojja: Janiw mä janchejj yakhat jucʼampïcaspas uqhäm amuyätati, mä jakejj janiraquiw chuymapan yakhats jilät siscaspati. Ucat jumanacarojj sapjjsma, pʼekechirinïñamajj janiw waquisquiti.

8. Ucampis asqui jakenacaquitejj pʼekechirimäpjjaspajja, pʼekechirinïñamajj sumäspawa.

9. Ucampis Noe pʼekechirin sacerdotenacapampin ñankhätap amtasipjjam. Naya pachpaw sipitanjam catuntatäyätjja, Tatitun uñjataparjam ajjtcañ walja luräwinac luraraquïyäta. Ucanacaw tʼakhesiñamp juchat cutiquipstayitu.

10. Ucampis walja tʼakhesitajj khepatjja, Tatitojj artʼäwinacajjarojj istʼänwa, mayisitanacajjarus phokharaquïnwa. Uqhämaraqui amparapan apnakatätwa, waljan jumanacaru jupan chekapat yatïwir puriyañataqui.

11. Ucampis janiw ucat jachʼar aptatäcti; nayajj janiw jachʼar aptañatac uscutäcti.

12. Jichhajj nayajj sapjjsmawa: Noe pʼekechirin tʼakhesiyatäpjjäyätawa, jupampin sacerdotenacapampin mitʼanipäpjjäyätawa. Jupanacasti ñankharuw puriyapjjäyätam; ucat ñankhan phalanacapamp ñachʼantatäpjjäyätajja.

13. Jichhasti, Diosan chʼamapan uca phalanacat jumanacar antutayatap laycu, Noe pʼekechirimpin jakenacapampin amparanacapats ñankhan phalanacapats antutayatap laycusa, jumanacar antutayapctam uca antutäwit jan jithektasiñanacam nayajj munta. Jumanacan jan qhitirus jumanacjjar pʼekechirïñapatac jaysañam munaraquirista.

14. Janitejj jupajj Diosan jakëcani, jupan thaquipan sarnakcani, camächitanacapar phokhcaraquinejja, janiw qhitirus yatichirimäñapataquis yatiyirimäñapataquis jaysapcätati.

15. Uqhäm Almajj marcaparojj yatichäna; chʼajjwanacan jupanac taypin jan utjañapataqui, sapakat maynin jake masipar jupa pachparjam munañapataqui.

16. Almajj iyawsir tamar ut-tʼayirïtap laycojja, jupanacan jilïr sacerdotepänwa.

17. Janitejj Alma toke Diosat ucjj catokcänjja, janiw qhitis yatichañataquis yatiyañataquis chʼaman cancañ catokcänti; Almajj takpach jupanacan sacerdotenacapampir yatichirinacapampiruw ut-tʼayäna. Janiw qhiti jan asqui jakes ut-tʼayatäcänti.

18. Ucat jupanacajj marcap sum uñjapjjäna. Ucatsti cunatejj asquïqui ucanacampiw marcarojj saytʼayapjjäna.

19. Jupanacajj uca orakenjj ucapachat walpin jachʼaptañ kalltapjjäna; uca orakerusti Helam sapjjänwa.

20. Ucat jupanacajj Helam oraken walpin jachʼaptas miratatapjjäna, mä marc lurapjjaraquïna. Ucasti Helam marca satänwa.

21. Ucampis Tatitojj jakenacapar yantʼañan asquïtap amuyi, jïsa, jupanacan llampʼütaps iyawsañaps yantʼiwa.

22. Take ucanacampi, qhititejj Tatitur jaysqui ucajj khep khepa urun aytatäniwa. Uqhämaraquiw aca marcampejj lurasïna.

23. Nayasti jumanacarojj jupanacan mitʼanïpjjatapat uñachayapjjäma. Janiw qhitis jupanacar antutaycasapänti, jan ucajj Dios Tatitupaquiwa, jïsa, Abrahanan Isaacan Jacobon Diosapaquiw jupanacarojj antutayi.

24. Ucat jupajj jupanacar antutayäna, jachʼa chʼamap jupanacar uñstayaraquïna; jupanacasti wal cusisipjjäna.

25. Jupanacajj Helam orakenjj Helam marcancapcän ucqhajja, marca jacʼa yapunac yapuchapcän ucqhajja, nuwasiri Laman jakenacajj uca orak thiyanacan uñstäna.

26. Ucat Alman jilanacapajj yapunacapat jaltasaw Helam marcan tantachasipjjäna; jupanacasti Laman jakenacan uñstatapat wal ajjsarapjjäna.

27. Ucampis Almajj jupanac taypir mantasaw jan ajjsarañanacapatac jupanacar aqhäm sas ewjjäna: Dios Tatitumat amtasipjjam, jupajj khespiyapjjätamwa.

28. Ucat ajjsarañanacap chhaktayapjjäna, ucatsti Tatitur mayisiñ kalltapjjäna, Laman jakenacan chuymanacapar llampʼuchañapataqui. Ucatsti jupanacampir warminacapampir wawanacapampir Laman jakenacan jan jiwarayañanacapataquiw Tatitut artʼasipjjäna.

29. Ucat Tatitojj Laman jakenacan chuymanacapar llampʼuptayäna. Almamp jilanacapampejj Laman jakenacan uc sarasaw amparanacapar catuyasipjjäna; Laman jakenacasti Helam orake catuntasipjjäna.

30. Cunalaycutejj Limhi pʼekechirin jakenacapar arcapcän uca Laman jakenacan nuwasir tamanacapajj wasaran waljüruw chhakatapjjäna.

31. Jupanacasti Amulon sat chekan Noe pʼekechirin sacerdotenacaparuw catjapjjäna; uca sacerdotenacasti Amulon oraken jacañ kalltapjjatayna, ucan yapuchañ kalltapjjaraquitayna.

32. Uca sacerdotenacan pʼekechiripasti Amulon satänwa.

33. Amulonasti Laman jakenacar achictʼänwa; uqhämaraqui Laman jakenacan phuchanacapäpcän uca jupanacan warminacap qhitapjjäna, chachanacapar jan tucqhañanacapatac achictʼiri.

34. Ucat Laman jakenacajj Amulonampir jilanacapampirojj qhuyapayapjjänwa. Warminacapïpan jupanacarojj jan tucqhapcänti.

35. Amulonamp jilanacapampejj Laman jakenacampiw mayachasipjjäna. Ucatsti Nefi orak thakasaw wasaranjam sarasipcäna, ucapachaw Almamp jilapampejj ucan utjapcän uca Helam orak jicjjatapjjäna.

36. Ucat Laman jakenacajj Almampir jilapampirojj sapjjäna: Jumanacatejj Nefi oraker sarqui uca thac uñachayapjjetätajja, jacäwimamp antutatäwimp jumanacar churapjjäma.

37. Almajj Nefi oraker thac uñachaycän uca khepatjja, Laman jakenacajj arsüwipar janiw phokhapcänti, antisas Helam orake thiyanacan arjjatirinacampiw muyuntayapjjäna, Almampir jilanacapampir uñjañapataqui.

38. Mayninacasti Nefi orakeruw sarapjjäna. Jupanacat yakhepasti Helam orakeruw cut-tapjjäna, ucatsti jupanacamp chicaw warminacapampir irpasjjapjjäna, khepar jaytanipcän uca arjjatirinacan wawanacaps irpjjapjjaraquïnwa.

39. Laman jakenacan pʼekechiripasti Amulonaruw jupan uca Helam orakenquir jakenacatac pʼekechirïñapatac sarayirïñapatac churäna, ucampis Laman jakenacan pʼekechiripan jan munañaparjam lurañatac chʼamajj janiw jupan utjcänti.