1. Mosia pʼekechirejj ucanac lurcän uca khepatjja, uca orak tokenacar take jakenac taypiru, jupanacan pʼekechir ajllisiñanacapatac yatjjatiriw qhitäna.

2. Jakenacasti sapjjänwa: Nanacajj Aaron yokaman pʼekechirijjäñap sarayirijjäñap munapjjta.

3. Ucampis Aaronajj Nefi orakeruw saräna, ucat pʼekechirejj marcar sarayañapataquejj janiw jupar churcänti; Aaronas janiraquiw uc muncasapänti. Janiraquiw Mosian cawquïr yokapas marcar sarayäñjj catokañ muncänti.

4. Ucat Mosia pʼekechirejj wastat jakenac taypir qhitäna; jïsa, mä kellkat jupanacar apayäna. Uca kellkatajj aqhäm sänwa:

5. Nayan munat marcajja, jan ucajj nayan munat jilanacajja, (uqhäm jumanacat amuyasta), nayajj jumanacan acanac sum amuyasiñam munta: Jumanacajj pʼekechir munapjjtajja.

6. Nayajj jumanacaruw sapjjsma: Qhitirutejj chekpach sarayäwejj wactʼqui ucajja, janiw munquiti, janiraquiw uc catokañ munquiti.

7. Jichhasti, yakhatejj jupa lant ut-tʼayatäspajja, nayajj jumanac pur chʼajjwanacan utjañapat ajjsarta. Uqhämaraqui qhitirutejj sarayäwejj wactʼqui, inas uca yokajjajj cut-tanis coleraschispa. Ucat jupajj yakhepanac jupa toker inas apakarac-chispa, ucatsti nuwasïwinacamp chʼajjwanacamp jumanac taypin luraychispa. Ucanacasti walja wil wartäwinacampi Tatitun luräwip ñankhar tucuyasa, walja jakenacan almanacap tucqhaspa.

8. Jichhajj jumanacaruw sapjjsma: Acanacat wali sum yatjjatasajj amuyasipjjañäni, cunalaycutejj janiw jiwasanacan yokajjar tucqhañasajj waquisquiti. Yakhajj jupa lant ut-tʼayatäcasp ucqhajja, janiraquiw jupar tucqhañasajj waquiscaraquispati.

9. Yokajjajj jachʼa jachʼa tucüwipar wastat cutekaspajja, arsut arunacapatjj armasispawa. Ucat jupajj marcar sarayañ cheka wactʼäwitjam cutekañ munaspa, ucasti jupampir aca marcampirojj walja juchanac lurayaspa.

10. Jichhasti, ucanac yatisajja, ucanac amuyapjjañäni, uqhämaraqui aca jakenacan sumancañapataquïcan uc lurapjjañäni.

11. Ucat jiwañajjcamaw nayajj jumanacan pʼekechirimayä, ucampis taripirinac leyisarjam aca marcar taripañapatac ut-tʼayapjjañäni; aca marcan luräwinacap machakaptayapjjañäni. Suma amuytʼan taripir jakenac taripiritac ut-tʼayapjjañäni. Diosan camächitanacaparjam aca marcar taripañataqui.

12. Mä jaken Diosan taripatätapajj jaken taripatätapat jucʼamp sumawa, cunalaycutejj Diosan taripäwinacapajj chekar uñjañjam asquipuniwa. Ucampis jakenacan taripäwinacapajj janiw asquicamäcapuniti.

13. Ucat asqui jakenacatejj pʼekechirinacamäspajja, jupanacasti Diosan leyinacap ut-tʼayapjjaspajja, jupan camächitanacaparjam aca marcar taripapjjaspajja, cunjämatejj Benjamin awquijjajj aca marcatac lurcän uqhäm luririnacatejj pʼekechirinacamäspajja, nayajj jumanacaruw sapjjsma: Uqhampunïspajja, pʼekechirinacan jumanacar sarayapjjañapajj asquïspawa.

14. Naya quipcaw take chʼamamp amuyumpejj utjquit ucanacampejj lurta, Diosan camächitanacap jumanacar yatichañataqui, aca oraken sumancañ ut-tʼayañataqui, nuwasiñanacan janirac utjañapataqui, janirac chʼajjwanacas lunthatañas lunthatjañas jiwayañas cuna ñankha luräwinacas utjañapataqui.

15. Qhitinacatejj ñankha luräwinac lurapcän ucanacaruw awquinacasan jiwasanacar churat leyinacaparjamajj mutuyta.

16. Jichhajj jumanacaruw sapjjsma: Take jakenacan jan asquïtap laycuw jan waquiscaspati pʼekechirin, jan ucajja pʼekechirinacan jumanacar sarayañapajja.

17. Cunalaycutejj mä ñankha pʼekechirejj walja ñankha luräwinac lurayi. Ucatsti ucajj cunj jachʼa tucqhäwisa!

18. Jïsa, Noe pʼekechirit amtasipjjam, ñankhätapata ajjtcañ luräwinacapata marcapan ñankhätapat ajjtcañ luräwinacapat amtasipjjaraquim. Wali jachʼa tucqhañaw jupanacar purïna. Uqhämaraqui, ñankha luräwinacap laycuw jupanacajj mitʼanïñar puriyatäpjjaraquïna.

19. Janitejj take chuymamp Diosar cutiquipstatap laycojj take cun amuyir luriripajj chicanchcasapänjja, jupanacajj jichhacamas mitʼanïsipcaquisapänwa.

20. Ucampis jupanacan jupa nayrakatan chuymanacap llampʼuptayatap laycuw jupajj jupanacar khespiyäna; jupar wal artʼasipjjatap laycuw mitʼanïtatjj jupanacar antutayäna. Uqhämpun Tatitojj chʼamapamp jaken wawanacap taypin luri. Cawquïrinacatejj jupar alcatapqui ucanacarojja, qhuyapayäw amparap lokti.

21. Jichhajj nayaw sapjjsma: jan wal chʼajjwanacamp wil wartäwimpejj janiw ñankha pʼekechirirojj apakañjamäquiti.

22. Cunalaycutejj jupajj ñankha masinacaniwa, arjjatirinacaps jupamp chictʼat utjayaraqui. Jupat nayr asquin sarayapcän ucanacan leyinacap ina pampar tucuyi, uqhämaraqui Diosan camächitanacaparojj cayunacapamp taquisiraqui.

23. Jupasti quipca ñankhätaparjamaw leyinac ut-tʼayi, jakenac taypiruw ucanac apayaraqui. Ucat cawquïrinacatejj leyinacapar jan phokhapqui ucanacarojja, tucqhayiwa, cawquïrinacatejj jupar kallcatapqui ucanacataquejja, jupanacamp nuwasir tamanacap qhitani. Uqhämaraqui lurañäspajja, jupanacarojj tucqhaspawa. Uqhäm ñankha pʼekechirejj take asqui luräwinac ñankhar tucuyi.

24. Jichhajj nayajj sapjjsmawa: Uqhäm ajjtañanacan jumanacar puriniñapajj janiw walïquiti.

25. Ucat aca jakenacan aruparjam taripirinac ajllipjjam, awquinacasan jumanacar churatäqui, suma asquïqui, Tatitun amparapan jupanacar churatäcän uca leyinacarjam taripatäpjjañamataqui.

26. Jucʼa cutiquiw marcajj mayispa cunatejj cheka conträqui ucjja; ucampis marcat jucʼa jakequiw munaraqui cunatejj jan chekäc ucjja. Uqhämasti, jakenacan aruparjam marcatac luräwinac lurañ leyimatac ut-tʼayapjjäta ucaruw phokhapjjaraquïta.

27. Jakenacan arupatac ñankha luräw ajlliñ urutejj purinisp ucapachajja, Diosan taripäwinacapajj jumanacjjaruw puripjjätam; jichhacamajj aca oraker jachʼa tucqhäwinacamp sartʼcänjja, uqhämaw ucapachajj jumanacar jupajj sartʼapjjaraquïtam.

28. Jichhasti, taripirinacatejj utjapjjätam ucat jupanacajj leyirjam jan taripapcätamjja, jumanacajj jucʼamp jilïr taripirimpiw jupanacarojj taripayapjjasma.

29. Uca jilïr taripirinacamatejj chekaparjam jan taripapcanejja, jiscʼäc uca taripirinacam mä kawkhan tantachayapjjäta; jupanacasti jakenacan aruparjamaw jilïr taripirinacamar taripapjjani.

30. Nayasti jumanacarojj ucanac Tatitur ajjsarañamp lurapjjañamatac camächit churapjjsma, uqhämaraqui ucanac lurañanacamataqui, jan pʼekechirinïpjjañamataqui camächit churapjjaracsma. Uqhamästi aca jakenacatejj juchanacs ñankhanacs lurapjjanejja, ucanac laycuw mutuyäwejj quipca pʼekenacapjjar purini.

31. Nayajj jumanacaruw sapjjsma: Walja jakenacan juchanacapajj pʼekechirinacapan ñankha luratanacapan lurayatawa, ucat ñankha luräwinacapat mutuyäwejj pʼekechirinacan pʼekenacapjjar purini.

32. Ucat uca jan quipcäñan aca oraken jucʼamp utjañap jan muncti. Nayan aca marcajj taypin uqhäm jan quipcäñjj janipuniw muncti. Nayajj aca oraken antutat orakëñap munta, jiwasanacan aca orak tutjam catokas jacañasajj Tatitun amuyuparjam asquïcan ucapachcamajja, jïsa, wawanacasatejj aca oraken jan utjcanejja, ucapachcamaw sapakat maynin lurañ wactʼäwinacapan quipcäñap munta.

33. Walja jucʼamp cunaymananac Mosia pʼekechirejj jupanacar asqui pʼekechirin take llaquisïwinacapat takpach jakenacan pʼekechiripar pisayasïwinacapata, take ucanacat khanañchasaw kellkäna.

34. Uqhämaraqui ucanacan jan utjañapataquiw jupanacar yatiyaraquïna; antisas uca llaquisïwinac takpach jakenacar sapakat maynin wactʼäwip apañapataqui.

35. Uqhämaraqui mä ñankha pʼekechirinïñan jupanacjjar sarayañapatac jan sumätanacapat yatiyaraquïna.

36. Uqhämaraqui uqhäm ñankha pʼekechirin takpach ñankha ajjtcañ luräwinacapata, nuwasïwinacapata, wil wartäwita, lunthatañata, lunthatjañata, kʼañusiñata, take cunayman jan yatiycay ñankha luräwinacata, ucanacan jan utjañapat yatiyasa, ucanacan Diosan camächitanacapatac ajjtcañätap arsusaw jupanacarojj yatiyäna.

37. Ucat Mosia pʼekechirejj ucanac jakenacar apaycän uca khepatjja, jupanacajj uca arunacan chekätap iyawsapjjäna.

38. Ucat janiw jucʼamp pʼekechir munapcänti, uqhämaraqui takpach uca orakenjj takenin quipca wactʼäwinïñap wal munapjjaraquïna; uqhämaraqui sapakat maynejj quipca juchanacapat uñtʼasiñ munapjjäna.

39. Ucat uca orakenjja, yakha yakha tamanacajj jupanacar churat leyirjam taripañapatac taripirinac ajllisiriw tantachasipjjäna. Uca jupanacar churat antutatäwip laycusti wal cusisipjjaraquïna.

40. Ucat Mosiar jucʼamp munapjjäna; jupanacan amuyunacaparjamajja, jupajj takpach yakha jakenacat sipans jucʼamp sumänwa, cunalaycutejj kamiriptañanac muniri, jïsa, jupajj janiw alm ñankhar tucuyir kamiriptañanac munir khoru sarayiricänti, ucat uqhäm jupanacajj jupat jan amuyapcänti. Jupajj janiw jupanacat take cunayman cʼajquir kamiriptañanac maycänti, janiraquiw wil wartäwits cusiscaraquïnti. Antisas jupajj uca orakenjj sumancañ ut-tʼayäna. Jakenacaparusti cunayman mitʼanïtat antutatäwip churäna; ucat jupajj jupanacatac jan tuptʼcay suma jakënwa.

41. Ucat taripirinac jupanacjjar sarayañataqui, jan ucajj leyirjam taripañapatac ut-tʼayapjjäna. Ucsti takpach uca oraken lurapjjäna.

42. Ucat Almaruw nayrïr jilïr taripiritac ut-tʼayapjjäna, awquipan iyawsiri tamanjj take luräwinacatac chʼamamp wactʼäwimp jupar churatap laycuw jupajj jilïr sacerdoteraquïna.

43. Ucatsti, Almajj Tatitun thaquipan sarnakäna, camächitanacapar phokhasasti, asqui taripäwinacampiw taripäna. Uca orakenjj jan tucusir sumancañaw utjaraquïna.

44. Uqhäm takpach Zarahemla oraken take Nefi jakenac sat jakenac taypina, taripirinacan sarayäwipajj ucapachat kalltäna. Almasti nayrïr jilïr taripirïnwa.

45. Ucat jupan awquipajj quimsakallk tunc payan maranïsaw Diosan camächitanacapar phokhañapcam jacasajj jiwjjäna.

46. Uqhämaraqui Mosiajj sojjta tunc quimsan maranïsaw, quimsa tunc quimsan sarayäwip marancasajja, jiwjjaraquïna. Ucampisti pheska patac llätuncan maraw Lehin Jerusalen marcat mistüwipat sarakjjäna.

47. Uqhämaw pʼekechirinacan Nefi jakenacjjar sarayäwipajj tucuyäna. Uqhämaraquiw iyawsiri tamaparu ut-tʼayqui uca Alman arunacapajj uqhäm tucusiraquïna.