1. Pʼekechirejj uca arunac istʼasinjja sacerdotenacaparojj sänwa: Aca jaker irpsusin jiwayapjjam. Jupajj lokhewa, cuna lurañasas jupamp utji?

2. Jupanacasti jacʼachasisin catuntañ munapjjäna. Ucampis jupajj jupanacataquejj saytʼasïnwa, ucat saraquïna:

3. Jan llamctʼapjjestati. Jumanacatejj llamctʼapjjetätajja, Diosajj jawkʼantapjjätamwa. Tatitojj yatiyañajjatac qhitanquitu, uca yatiyäw janïraw yatiycti. Janiraquiw cuntejj arsuñajjatac mayipquista ucs yatiyapcsmati. Ucat Diosajj janiw nayan jichpach tucqhatäñajj muncaniti.

4. Ucampis, Diosajj churquitu uca camächitanacar phokhañajjawa. Jumanacar chek satajj laycuw nayatac colerasipjjta. Ucat jucʼampi, Diosan arup arsutajj laycuw lokhëquirists uqhäm amuyapjjesta.

5. Abinadejj uca arunac arscän ucqhajja, Noe pʼekechirin jakenacapajj jupar llamctʼañ ajjsarapjjänwa. Tatitun Ajayupajj jupjjancänwa, ajanupajj walpin lliphipiraquïna. Sinai kollun Moisesajj Diosamp parlcän ucqhajja, cunjämatejj ajanupajj lliphipcänjja, uqhämaraquiw Abinadin ajanupajj lliphipiraquïna.

6. Abinadisti Diosan chʼamapampiw parläna, muncañ cancañapampiw parlaraquïna. Ucat jupajj aqhäm sas parlascaquïna:

7. Jumanacan nayar jan jiwayañatac chʼamanïtamjj amuyasipjjtawa, ucat yatiyäwijj tucuyä. Nayajj amuytwa, jumanacar ñankha luräwinacamat chek satajjatjja, chuymanacamaruw wactʼi.

8. Arunacajjasti muspharañamp colerasiñampiw phokhantapjjtam.

9. Ucampis yatiyäwijj tucuyä, cawqhar sarañajjas janiw nayataquejj cunäquisa. Nayatejj khespiyatäcä ucqhajja.

10. Ucampis ac nayajj sapjjsma: Cuntejj aca khepat nayar lurapquitätajja, jutirin cunatejj lurascan ucanacan chʼiwipjamäniwa.

11. Jichhajj nayajj Diosan jiltʼa camächitanacap leetʼarapipjjäma, cunalaycutejj ucanacan chuymanacam jan kellkatätap amuyta. Jacäwinacamat jilpachan ñankha luräwinac yatekapjjatam, yatichapjjatam amuyta.

12. Jichhajj amtasipjjätaw cuntejj jumanacar sapcäyäsm ucata: Janiw jumataquejj cunar uñtats amparamamp lurasïtati. Janiraquiw alajjpachanquiri, aynach orakenquiri, orak mankh umanquirir uñtats lurcaraquïtati.

13. Ucat jucʼampi: Janiw jumajj ucanacatac quilltʼasïtati, ucanacarus lokcaraquïtati. Naya Dios Tatitumajj ucanacat colerasir Diosätwa. Awquinacan ñankha luräwinacap laycuw wawanacar tʼakhesiyta, cawquïrinacatejj nayar uñisipquitu ucanacan wawapans wawaparu allchipans allchiparuw tʼakhesiyaracta.

14. Cawquïrinacatejj nayar munapquitu, camächitanacajj phokhapqui uca warank warankanacaruw qhuyapayta.

15. Janiw Dios Tatituman sutip inamay aytasïtati. Qhititejj Tatitun sutip inamay aytasquejja, Tatit nayrakatan janiw jan juchanejj jicjjatascaniti.

16. Samarañ urut amtasim, ucar kollanaptayañamataqui.

17. Sojjtüruw trabajäta, takpach luräwinacam phokharaquïta.

18. Ucampis pakallkör uruna, Dios Tatituman samarañ urupanjja, janiw cuna luräws lurcätati. Janiw jumasa, yokamasa, phuchamasa, chacha lokerimasa, warmi lokerimasa, vacanacamasa, jan uñtʼat korpachatamas lurcaniti.

19. Sojjta urun Tatitojj alajjpachs acapachs lamars take cunanacatejj ucanacancqui ucanac luräna. Ucat Tatitojj samarañ urur qhuyapayäna ucar kollanaptayaraquïna.

20. Dios Tatitumajj jumar churctam uca orakjjan urunacaman waljäñanacapataquejja, awquimar taycamar wakaycham.

21. Janiw jiwayätati.

22. Janiw wachokätati. Janiw lunthatätati.

23. Janiw jake masimat cʼarintas ircatätati.

24. Janiw jake masiman utap munapayätati. Janiraquiw jake masiman warmips chacha lokerips warmi lokerips vacaps asnops, jupanquiri cunayman yänacaps munapayaraquïtati.

25. Ucat Abinadejj uca arsüwinac tucuyjjasinjja, jupanacarojj sänwa: Aca jakenacarojja, uca camächitanacar phokheri, take ucanac lurañ yatichapjjtati?

26. Nayajj jumanacarojja, janiw yatichapctat sapjjsmawa. Uqhäm lurapjjasamänjja Tatitojj janiw nayarojj aca jakenacjjat ñankha yatiyirejj qhitanquitasapänti.

27. Jumanacajj Moisesan leyip tokew khespiyasiñajj juti –sapjjtawa. Nayasti jumanacarojj sapjjsmawa: Jumanacan Moisesan leyip imapjjañamajj waquisiscaquiwa. Ucampis jumanacaruw sapjjaracsma: Moisesan leyip imañan waquisitapajj mä uruw tucusjjani.

28. Uqhämaraquiw sapjjaracsma: Khespiyasiñajj leyi sap toketjj janiw jutquiti. Janitejj Dios pachpajj marcapan ñankha luräwinacapan juchanacapan tʼakhesiyäwipar phokhapcaspajja, uca Moisesan leyip utjquipansa jupanacajj chhakapjjapunispawa.

29. Nayajj jumanacaruw sapjjsma: Israelan wawanacapar leyin churatäñapajj waquisïnwa. Ucasti chʼama leyïñapänwa, cunalaycutejj jupanacajj jan altʼirinacäpjjänwa. Lakaw ñankh luräpjjäna, ucampis cʼachaquiw Dios Tatitupat amtasipjjäna.

30. Ucat jupanacarojj mä leyejj churasïna. Uca leyisti luräwinac phokhañatac leyïnwa. Uca leyirusti jupanacajj urutjam urutjam sum phokhapjjañapänwa, Diosapats jupatac wactʼir luratanacapats amtasipjjañapataqui.

31. Ucampis nayajj jumanacaruw sapjjsma: Take ucanacajj jutir pachan lurascan ucar uñtatänwa.

32. Jupanacajj ley amuyapjjänti? Nayajj jumanacaruw sapjjsma: Chuymanacapan chʼollkhëtap laycojja, janiw jupanacat takpachanejj ley amuyapcänti. Jupanacajj janiw amuyapcänti, cunjämtejj sapakat maynejj Diosan cutsuyäwip tokec khespiyatäqui ucjja.

33. Janit Moisesajj jupanacar Mesiasan jutäwipat yatiycänjja? Janit Diosan marcapar cutsuyañapat yatiycaraquïnjja? Uqhämaraqui, orakejj utjañ kalltcän ucapachatjja, janit jutir urunacat yatiyir sapa mayni arjirijj parlcänjja?

34. Janit jupanacajj sapcäna: Dios pachpaw jaken wawanacap taypir sarakanini, jake quipc uynak catuni, ucatsti orakenjj jachʼa chʼamampiw sarnakani –sasajja?

35. Janiraquit jupanacajj sapcäna: Jupajj jiwatanacat jactañ ut-tʼayani, jupa pachpaw tʼakhesiyataraquïni –sasajja?