1. Ucat Mosian yokanacapajj take ucanac lurapcän uca khepatjja, jupanacajj mä kawkhanir irpasaw pʼekechir awquipan ucar cut-tapjjäna. Ucatsti, Nefi oraker sarañataquiw achictʼasipjjäna, ajllit jakenacamp cunanactejj istʼapcän ucanac yatiyiri, uqhämat Lamanat sarakeri jilanacapar Diosan arup churiri,

2. Inas jupanacarojj Dios Tatitupat yatiñar puriyapjjerist –sasa. Uqhämaraqui, awquinacapan ñankha luräwinacapan ñankhätap inas jupanacar iyawsayapjjerista, inas Nefi jakenacar uñisiñanacapat jupanacar kollapjjaraquirista, Dios Tatitupan cusisiñar puriyatäpjjañapataqui, jupanac pur sumancañanacapataqui, Dios Tatitupajj jupanacar churcän uca oraken chʼajjwanacan jan jucʼamp utjañapataquiraqui – sasaw awquipat mayipjjäna.

3. Jupanacajj khespiyasiñan sapakat maynir yatiyatäñap munapjjäna. Mä jaken chhaktañapjj janipiniw munapcänti; uqhämaraqui mä jaken wiñay tʼakhesïw catokañapat lupʼïwinacajja, lakhakeyasaw qhathat-tayäna.

4. Tatitun Ajayupajj uqhäm jupanac taypin irnakäna, cunalaycutejj jupanacajj takenits jucʼamp ñankha juch luririnacäpjjänwa. Tatitojj jan wati qhuyapayäwipanjja, jupanacar khespiyañan asquïtap amuyäna. Ucampis jupanacajj ajayun wal tʼakhesipjjäna, ñankha luräwinacap laycu, wiñayatac jakonucutäñat ajjsarasaraqui.

5. Ucat jupanacajj Nefi oraker sarapjjañapatac walja uruw awquipar achictʼapjjäna.

6. Mosia pʼekechiristi yokanacapar Laman jakenac taypir ar yatiyir sarañapataquis jan sarañapataquis Tatituruw jisctʼäna.

7. Tatitusti Mosiarojj sänwa: Sarapjjam sam; waljaniw jupanacan arunacapar iyawsasajj wiñay jacäwinïpjjani. Nayajj yokanacamar Laman jakenacan amparanacapat antutayä.

8. Ucat Mosiajj jupanacan mayitanacaparjam lurir sarañapataquiw jaysäna.

9. Jupanacasti Laman jakenac taypin ar yatiyañataquejja, wasaranjam sarapjjäna. Nayasti, jupanacan sarnakäwinacapat khepjjaruw kellkä.

10. Uqhämasti, Mosia pʼekechiritaquejja, janiw qhitis utjcänti, marcar sarayañapatac ut-tʼayañataquejja, cunalaycutejj yokanacapatjja, janiw qhitis uc catokañjj munirjamacänti.

11. Ucat bronce tʼalpha lekʼetanacjjar kellkatanacsa, Nefin tʼalpha lekʼetanacapsa, Diosan camächitanacaparjam sarayas imcän ucanac aptasajja, Limhin marcapan catjat Limhin amparapan jupar catuyatäcän uca kori tʼalpha lekʼetanacar kellkat sarnakäwinac arsuyas kellkayatapatjja–

12. Ucanac marcapan jachʼa llaquisitap laycojj arsuyäna, cunalaycutejj marcapajj uca tucqhat jakenacat walpin yatiñ munapjjäna.

13. Jichhajja, jupajj uca kellkatanacar uca pä arco purap thiy kalampiw arsuyäna.

14. Ucanacasti nayrapachat waquichatäsajja, mitat mitar arunac amuyayañataquiw catuyatäna.

15. Cawquïr jakenacatejj uca orak catupcaspa ucanacaruw Tatitun marcapan ñankha ajjtcäñ luratanacap uñstayañatac jupan amparapan ucanacajj imatäna.

16. Qhititejj ucanac catqui ucajja, nayrapach luräwirjamajja, uñjiri satänwa.

17. Mosian uca kellkatanac arsuyañ tucuyatapatsti, ucajj tucqhat jakenacan sarnakäwinacapat khanañchäna, jupanacajj tucqhatäpcän ucapachata, Tatitojj jakenacan arup cunaymanar pejjtuntcäna, ucat take orakjjan chʼeketatatäpcaraquïn ucapach jachʼa torre luräwcamawa. Jïsa, uqhämarac ucapachata, Adanajj utjayatäcän ucapachcamaw khanañcharaquïna.

18. Uca sarnakäwinacajj Mosian jakenacaparojj wal llaquisiyäna. Jupanacasti llaquisiñan phoktʼatäpjjänwa. Ucampis uca sarnakäwinacajj walja yatïw jupanacar churäna, ucat cusisipjjaraquïna.

19. Uca sarnakäwinacatsti acat khepar kellkatäniwa, cunalaycutejj uca sarnakäwinacat kellkatäc ucanacat take jakenacan yatiñapajj asquiwa.

20. Jichhasti cunjämatejj nayajj sapcsma, Mosia pʼekechirin ucanac luratapatjja, jupajj bronce tʼalpha lekʼetanacamp take imcän ucanacampi Alman Alma sat yokaparuw catuyäna. Takpach uca kellkatanacsa, uca arsuyirinacsa ucanacar imañapataqui nayrakatar sarayañataqui jakenacan sarnakäwinacap kellkañataqui, cunjämatejj Lehejj Jerusalenat mistcän ucapachat mitat mitar catuyatäcäna, uqhäm catuyañapataquiw camächit churas ucanac jupar catuyäna.