1. Ucatsti Limhejj jakenacampiw Nefi marcar cut-tapjjäna. Ucatsti wastat uca oraken sumancañamp utjañ kalltapjjaraquïna.

2. Walja urunac sarakatatjja, Laman jakenacajj wastat Nefi jakenacataquejj colerasiñ kalltapjjäna. Jupanacasti orak thiyanacaruw jutañ kalltapjjaraquïna.

3. Ucampis janiw jupanacarojj jiwayañ munapcänti, pʼekechiripan Limhir lurat juramentop laycu. Ucampis ajanunacat tʼajjlljapjjäna, khoruchasisaw nuqhunakapjjäna, uqhämaraqui jathi kʼepinac kʼepiyapjjäna. Tarma asnorjamaw jupanacarojj anaquipjjaraquïna.

4. Take ucanacasti Tatitun arupar phokhañatac luratänwa.

5. Nefi jakenacan tʼakhesitanacapajj sintipunïnwa. Janiraquiw cunjämats Laman jakenacan amparapat antutayasirjamäpcänti, cunalaycutejj Laman jakenacajj take toket muyuntapjjäna.

6. Ucatsti, jakenacajj tʼakhesitanacap laycuw pʼekechiritac tokesiñ kalltapjjäna. Jupanacasti Laman jakenacamp nuwasir sarañ munapjjaraquïna. Pʼekechirirusti tokesitapampejj walpin tʼakhesiyapjjäna. Ucat jupajj jupanacan munañanacaparjam lurañataquiw antutäna.

7. Jupanacasti wastat tantachasisin jirut lekʼsutanacamp isintasisaw Laman jakenacar uca orakepat alis-sur sarapjjäna.

8. Ucatsti Laman jakenacajj jupanacaruw atipapjjäna. Khepar cutjtayasaw waljanir jiwarayapjjaraquïna.

9. Limhin jakenacap taypinsti jachʼa llaquimpi jaqhusiñampiw utjäna. Ijma warmejj chachapat jachäna; yokamp phuchampejj tatapat jachäna; jilasti jilapat jacharaquïna.

10. Uca orakenjj walja ijmanacaw utjäna. Jupanacasti Laman jakenacamp ajjsarañ mantayasisajja, urutjam urutjamaw walpun jachapjjäna.

11. Jupanacan jan tucusir jachäwinacapaw Limhin jiltʼir jakenacaparojj Laman jakenacaru colerasiñ amtayäna. Jupanacasti wastat nuwasir sarapjjaraquïna. Ucampis wastat khepar cutjtayanitapjjäna, waljaniraquiw jiwarayatapjjäna.

12. Ucat jupanacajj wastat quimsïr cutejj Laman jakenacamp nuwasir mistupjjaraquïna. Ucatsti uqhämaraquiquiw wastat tʼakhesipjjaraquïna. Cawquïrinacatejj jan jiwarayatäpcän ucanacajja, Nefi marcaruw wastat cut-tapjjäna.

13. Jupanacasti lakʼarus tucupcaspajj uqhämaw chuymanacap llampʼuptayapjjäna. Mitʼan yucurusti jaysapjjänwa. Timanacapan munañaparjamaquiw sarnakjjapjjäna, nuwatas, maysat maysar ananakatasa, jathi kʼepinacamp tʼakhesiyatasa.

14. Jupanacasti jiscʼarupuniw tucupjjäna, Diosar take chuymamp artʼasisa. Ur jornalaw tʼakhesïwinacapat antutayañapatac Diosar artʼasipjjäna.

15. Jupanacan ñankha luräwinacap laycusti Tatitojj janiw jancʼas artʼäwinacaparojj istʼcänti. Ucampis Tatitojj artʼäwinacapar istʼänwa. Ucat Laman jakenacan chuymanacapar ucapachat koñaptayañ kalltäna. Jupanacasti Limhin jakenacapan kʼepjam jachʼa llaquinacap ucapachat sujartayañ kalltapjjaraquïna. Ucampis Tatitojj mitʼanïtapat antutayañan jan walitapjj amuyänwa.

16. Ucat jupanacajj cʼachhat cʼachhat uca oraken jachʼaptapjjäna. Yarananac jucʼamp yapuchapjjäna, uywa tamanac ucapachat jucʼamp uywañ kalltapjjaraquïna, jupanacan jan mankʼat tʼakhesiñapataqui.

17. Warminacajj chachanacat sipan jucʼamp jilänwa. Ucat Limhi pʼekechirejj sapa mayni chacharuw mayïna, ijmanacampir wawanacapampir mankʼañ churapjjañapataqui, uqhämat mankʼatjam jan jiwarapjjañapataqui. Ucatsti uqhäm lurapjjäna walja chachanacan jiwarapjjatap laycu.

18. Limhin jakenacapajj waquisitarjamaw mayachthapisisin utjasipjjäna, uywa tamanacaps yarananacaps imasipjjaraquïnwa.

19. Pʼekechiristi janiraquiw marca perkanac ankäjjarojj jan arjjatirinacaparojj sarcaraquïnti. Jupajj Laman jakenacan amparapar jaltʼañ ajjsarayasïna.

20. Laman jakenacan phuchanacap lunthatasin wasarar jaltapcän uca sacerdotenacar cunjämats catjañataquejja, jupajj marcaparuw take orakpachan uñchʼuquïyäna, cunalaycutejj uca sacerdotenacaw jupanacjjar jachʼa tʼunjäwin jutañapataquejj juchanïpjjäna.

21. Jupanacajj uca sacerdotenacar catjasajja, luräwinacaparjamaw tʼakhesiyañ munapjjäna. Uca sacerdotenacajj arumaw Nefi oraker jutasin marcanquirinacan yaranaps walja cʼajquir yänacaps apsupjjäna; ucat Limhin jakenacapajj jupanacar catjañatac suyantapjjäna.

22. Ucatsti, janiw jucʼamp nuwasïwinacajj Laman jakenacampi Limhin marcapampejj utjcänti, Ammonan jilanacapamp uca oraker puriniñapcama.

23. Pʼekechiristi arjjatirinacapamp marca ankancasaw Ammonampir jilanacapampirojj catjäna; jupanacajj Noen sacerdotenacapäcaspas uqhäm amuyasaw catuntayäna; jupanacarusti ñachʼantasaw carcelar jakontayäna. Jupanacatejj Noen sacerdotenacapäpjjasapänjja, jupanacarojj jiwayatasapänwa.

24. Ucampis jupanacan jan ucätapata, jan ucasti, Zarahemla oraket jutir jilanacapätap yatjjatasaw wali jachʼa cusisiñamp phoktʼat uñjasïna.

25. Ammonajj janïr jutcän ucapachajja, Limhi pʼekechirejj mä kawkha jakenac Zarahemla orak thaker qhitäna; ucampis jupanacajj janiw uca orakjj jicjjatapcänti, wasaran chhakjjapjjaraquïna.

26. Ucampis mä orak catjapjjäna. Ucansti jakenacajj utjapjjatapänwa; uca orakesti waña chʼaqhanacamp phokhantatänwa. Uca orakenjj jakenacajj utjatapänwa, ucat kʼala tucqhatäpjjataparaquiwa. Ucat jupanacajj uca orakejj Zarahemla orakëcaspas uqhäm amuyasaw Nefi oraker cut-tjjapjjäna. Mä kawkhür Ammonan janïr puritap nayr puripjjäna.

27. Jupanacasti mä kellkat jupanacamp chic apanipjjäna. Ucasti chʼaqhamp phokhantat orakenquir jakenacan kellkatapänwa, tʼalpha lekʼetanacjjar kellkataraquïnwa.

28. Limhejj Mosia pʼekechirin uqhäm kellkatanac arsuyañatac Diosan wajjtʼäwinïtapat Ammonan lacapat istʼasinjja, wastat cusisiñan phoktʼatäna; Ammonasti cusisiraquïnwa.

29. Ucampis Ammonamp jilanacapampejj walja jilanacapan jiwaratapat llaquisipjjäna.

30. Uqhämaraquiw llaquisipjjäna, Noe pʼekechirimpin sacerdotenacapampin marcar cunayman juchanaca, ñankha luräwinaca Dios contra lurayapjjatapata. Abinadin jiwatapat llaquisïpjjäna. Uqhämaraqui Almampit jupamp chic mistupcän ucanacampit llaquisipjjäna, cunalacyutejj jupanacaw Diosan chʼamap tokejj Diosan tamap ut-tʼayapjjäna, ucatsti Abinadin khanañchat arunacaparuw iyawsañ uchapjjäna.

31. Jupanacajj cawqharutejj sarapcän ucjj janiw yatipcänti, uqhäm sarjjapjjatapat wal llaquisipjjäna. Jupanacajj cusisisaw Almamp arquirinacapampejj mayachasipjjasapäna, cunalaycutejj jupanac pachpaw Diosar lokañataqui jupan camächitanacapar phokhañataquejj arusjäw jupamp lurapjjaraquïna.

32. Ammonan puritapat ucsarojja, Limhi pʼekechirejja, Diosampiw arusjäna; camächitanacapar phokhañataqui jupar lokañataqui. Uqhämaraquiw marcapanquirinacat waljanejj uqhäm lurapjjaraquïna.

33. Ucat Limhi pʼekechirimpi walja jakenacampejj bautizasiñ munapjjäna. Ucampis janiw qhitis uca orakenjj Diosat churata chʼaman cancañanïpcänti. Ammonasti jan suma lokerïcaspas uqhäm amuyasisinjja, janiw lurañ muncänti.

34. Ucat ucapachajja, janiw jupanacajj iyawsir tam ut-tʼayapcänti, antisas Tatitun ajayuparuw suyapjjäna. Wasarar jaltapcän uca Almamp jilanacapampjamaw jupanacajj tucuñ munjjapjjäna.

35. Jupanacajj bautizasiñ munapjjäna; Diosar take chuymamp lokañ munañapat uñachtʼayañataqui, ucampis bautizasiñjja suytʼasipcaquïnwa. Kheparuw bautizasitapat khanañchatäni.

36. Jichhasti, Limhi pʼekechirimp marcapamp Ammonamp jakenacapampejj mitʼanïtapats Laman jakenacan amparanacapats antutayasiñataquiquiw chʼamachasipjjäna.