1. Abinadejj uca arunac arsusinjja, amparap loktäna, ucat säna: Tatitun khespiyañapar takpachan uñjapcan ucapachajj puriniwa. Take orake, familiaw ucjj sapa mayn uñjani. Ucatsti lajjras jakenacas Dios nayrakatan jupan taripäwinacapan asquïtap arsusipjjaraquini.

2. Ucat ñankhanacajj jakonucutäpjjani. Ucat jupanacataquejj awulliñajj utjani, uqhämarac jachaña, jaqhusiña, laca chʼaqha tʼurusiñajj utjaraqui. Ucanacasti Tatitun arupar jan yäkatap laycuwa. Ucat Tatitojj jupanacarojj jan cutsuyquiti.

3. Jupanacajj janchjamäpjjewa, ñankhäpjjaraquiwa. Supayasti jupanacjjar chʼamaniwa. Jïsa, cawquïr supayatejj nayrïr awquisar taycasarojj cʼarintqui uca nayrïr asïruwa; ucaw jupanacarojj tincuyäna. Uca tincutap laycusti takpach jakenacaw janchjamar tucupjje, uqhämarac ñankharu, janchin munañap luririr tucupjjaraqui, cunatejj asquïqui ñankhäqui uc uñtʼasa, supayar jaysasaraqui.

4. Uqhämat takpach jakenacajj chhakapjjäna. Janitejj Diosajj marcaparojj chhakat tincut utjäwipat cutsuycasapänjja, jupanacajj wiñayataquiw chhaktasapäna.

5. Ucampis amtasipjjam, cawquïritejj janchjam ñankha munañaparjam lurascaqui, ucatsti Diosar kallcatas juch luras sarnakqui ucajja, tincut utjäwipan kamascaqui. Supayasti jupjjarojj take chʼamaniwa. Ucat cutsuyañajj janis utjcaspas uqhämaw jupataquejja. Jupajj Diosan timapawa, supayasti Diosan timaparaquiwa.

6. Jichhasti, janitejj Cristojj oraker jutcasapänjja, (jutirin phokhasiñapacän ucanacajj niyas phokhascaspajj uqhämaw parlta), janiw cutsuyañajj utjcasapänti.

7. Janitejj Cristojj jiwañat jactcasapäna, jan ucajj, janitejj jiwañan ñachʼantañanacap tʼakjjcasapänjja, sepulturan jan atipäwinïñapataqui jiwañan jan michʼinïñapataquejja, janiw jactäwejj utjcasapänti.

8. Ucampis mä jacatatañaw utji. Ucat sepulturajj janiw atipäwinïquiti, jiwañan michʼintäwipajj Criston tʼunjatäjje.

9. Jupajj acapach oraken khanapa, jacañapawa. Uca khanasti jan tucuscayawa, jan jiwtʼaycayaraquiwa. Uqhämaraqui uca jacäwejj jan tucuscayaraquiwa, jiwañan jan jucʼamp utjañapataqui.

10. Aca jiwir janchejja jan jiwir janchiruw tucuni, aca thujsantañ cancañasti jan thujsantañ cancañaruw tucuraquini; ucatsti takeniw Diosan taripäwip nayrakatarojj irpatäni, asquïpas ñankhäpas uca luräwinacaparjam jupamp taripatäñataqui.

11. Uca luräwinacatejj asquïnejja, wiñay jacañ wiñay cusisiñ jactäwiruw sarani. Ucampis luräwinacatejj ñankhänejja, jan tucuscay tʼakhesiñ jactäwiruw sarani, jupanacjjar chʼamanïqui uca supayar catcatayatäpjjaraquiniwa. Ucasti tʼakhesir juchañchäwiwa.

12. Cunalaycutejj quipca munañaparjamaw sarnakapjje, qhuyapayasir munañap lurasa. Janipuniw cunapachas Tatiturojj mayisipquiti, amparanacap jupanacatac lokatatquipansa. Uca qhuyapayasiñaw amparanacap jupanacatac lokatatayi, ucampis janiw munapcänti. Jupanacajj ñankh lurapjjatanacapat ewjjatäpjjäna, ucampis janiw ucanac jaytanucupcänti. Juchat cutiquipstañanacapataquiw camächitajj churatäna, ucampis janiw cutiquipstapcänti.

13. Jichhasti, janit juchanacamat qhathatis cutiquipstapjjañamäqui? Janit Cristonac jupa tokequirac khespiyasipjjañaman utjatap amtasipjjañamäqui?

14. Uqhämasti, jumanacatejj Moisesan leyip yatichapjjstajja, uca leyin jutir cunanacan chʼiwipätap yatichapjjaraquim.

15. Wiñay awquïqui uca Cristo Tatit toket cutsuyañan jutañapjjat jupanacar yatichapjjaraquim. Uqhamäpan.