1. Cunapachatejj Abinadejj ucanac arsuñ tucuycän ucqhajja, pʼekechirejj sacerdotenacaruw säna jupar irpsusin jiwayayapjjañapataqui.

2. Ucampis jupanac taypin mä jakew utjäna, Alma sutini, jupajj Nefin sarakeriparaquïnwa. Jupajj waynänwa, Abinadin arsut arunacaparuw iyawsaraquïna, cunalaycutejj cuna ñankhanacat-tejj Abinadejj jupanacar ircatcän ucanacat Almajj yatïna. Ucat jupajj Abinaditac achictʼañ kalltäna, pʼekechirin jan colerasiñapataqui, Abinadirusti sumac antutayañapataquiraqui.

3. Ucampis pʼekechirejj jucʼamp colerasïna, Almarusti jupanac taypit alisnucuyänwa. Uqhämaraquiw lokerinacaparojj Almar jiwayañatac arctayaraquïna.

4. Ucampis Almajj jupanacat jaltänwa, jupanacan jupar jan jicjjatañapataquiw imantasiraquïna. Jupasti walja uru imantasisinjja, Abinadin takpach arsut arunacap kellkäna.

5. Ucat pʼekechirejj arjjatirinacaparojj Abinadir catuntasaw muyuntayäna. Juparusti ñachʼantasaw carcelar jakontapjjäna.

6. Ucat quimsürurojja pʼekechirejj sacerdotenacapamp arustʼasisinjja, jupa nayrakataruw Abinadir wastat irpayanïna.

7. Ucat juparojj säna: Abinadi, jichhajj nanacajj cunat juchañchañataquis catjapjjsmawa. Jichhajj jiwañamaw waquisi.

8. Dios pachpaw jaken wawanacap taypir sarakanini, sistaw jumajja. Ucalaycu janitejj naya contra marcajj contra parlctas uca ñankha arunacamat, janiw chekäquit siscätajja, jiwayatäyätawa.

9. Ucat Abinadejj juparojj säna: Nayaw jumar sisma; janiw juma contra marcam contra arsut arunacajjan jan chekätap arsquirist-ti. Ucanacajj chekäwa, ucanacan chekätap yatiñamataquiw naya pachpajj amparanacamar puriyasinta.

10. Nayajj jiwañcamaw tʼakhesï, janiw arunacajjajj, cʼariw siscäti. Uca arunacajjajj jumatjj ircatätamwa. Nayarutejj jiwayitätajja, jan juchan wil wartäta. Ucasti khep khepa urun jumjjat ircataraquini.

11. Ucat Noe pʼekechirejj jupar antutayañampïna, arupat ajjsaratap laycu; Diosan taripäwinacapan jupjjar puriñapat ajjsararaquïna.

12. Ucampis sacerdotenacajj Abinad contraw arsupjjäna, juparusti juchañchañ kalltapjjaraquïna. Jupajj pʼekechiritaquiw ñankh arsu sapjjänwa. Uqhäm amtayataw pʼekechirejj jupa contrajj colerasi, ucatsti jiwayatäñapataquiw jup catuyaraquïna.

13. Ucat jupanacajj Abinadir catuntasajj ñachʼantapjjäna, ucat janchiparojj nina wiyanacampiw tʼakhesiyapjjäna. Jïsa, jiwayañcamaw tʼakhesiyapjjäna.

14. Nina lawrajj jupar nakhantañ kalltcän ucapachajja, jupajj jupanacarojj aqhäm sasaw artʼäna:

15. Cunjämtejj nayar lurapquista, uqhämaraquiw sarakerinacamajj waljanir ninamp jiwañan tʼakhesiyapjjani; ucsti Dios Tatitupan khespiyañapar iyawsatap laycüniwa.

16. Ucat ñankha luräwinacam laycuw jumanacajj take cunayman usunacamp tʼakhesiyatäpjjäta.

17. Take toket jawkʼantatäpjjätawa, take toket alisnakatäpjjäta, chʼeketatatäpjjaraquïtawa. Cunjämatejj lakʼo tamajj jachʼa ajjsarcañ lakʼonacan alisnakatäqui uqhäm alisnakatäpjjaraquitaw jumanacajja.

18. Uca urunjja jumanacajj thakatäpjjätawa. Timanacaman amparapajj catjapjjaraquïtamwa. Ucat nayjam ninan jiwañan tʼakhesipjjäta.

19. Diosajj uqhäm jupan jakenacapar tucqhirinacarojj tucqharaqui. Diosay ajayujj catokam!

20. Abinadejj uca arunac arsusaw liwitat-ti, ninamp jiwayataw tucusiwayi, jïsa, Diosan camächitanacapat jan jithektasitap laycuw jiwayat uñjasïna, jiwañapampisti arunacapan chekätap sanampawayi.