1. Ucat Abinadejj jupanacar säna: Dios pachpaw jaken wawanacap taypir sarakanini, marcapar cutsuyaraquini. Ucanacat amuyasipjjañanacam munta.

2. Jupan, janchin utjasitap laycuw Diosan Yokap satäni. Awquin munañapar janchin yäkasina, Awquisa, Yokasa.

3. Diosan chʼamapan jathachasitätap laycojja, jupajj Awquiwa. Janchi laycusti Yokawa. Uqhämat Awquirus Yokarus tucu.

4. Ucanacasti mä Diosaquiwa. Ucasti wiñay alajjpachan acapachan Awquipawa.

5. Uqhämat janchejj Ajayur yäkasa, jan ucajj Yokajj Awquïr yäkasa mä Diosaquisajj yantʼata. Janiraquiw aca yantʼäwir jayscaniti, ucampis marcapan jupar jiscʼachañap munani, asutʼiñapa, uqhämarac alisnucuñapa, jan catokañapa, uñisnucuñapa.

6. Take ucanac khepatjja, walja jachʼa muspharcañanac jaken wawanacap taypin luratapatjja, jupajj Isaiasan arsüwiparjamaw irpatäni: Cunjämatejj ovejajj tʼawr yawiripan nayrakatapan amuquïquejj uqhämaw jupajj lacap jan jistʼarquiti.

7. Uqhämaw jupajj irpatäni cruzar chʼac-catatäni, jiwayataraquïni, janchisti jiwañcamas wayjjäsiscaquiniwa. Yokan munañapasti Awquin munañapar jakcat-tatawa.

8. Uqhämat Diosajj jiwañan phalanacap jiwar atipjasajj tʼakjje, jakenacan wawanacap lanti mayiñatac chʼam Yokar churasa.

9. Alajjpachar maqhatasasti qhuyapayir chuyman phokhantata, jaken wawanacapatac qhuyapayasiñamp phoktʼata, jupanacampin chekar uñjañampin taypipar saytʼasa, jiwañan phalanacap tʼakjasin jupanacan ñankha luräwinacaps camächit pʼaquïwinacaps jupa pachp catjjarusa, jupanacar cutsuyasa, chekapar uñjañan mayïwinacaparuw phokhäna.

10. Jichhajj jumanacaruw sapjjsma: Qhitis jathachatätapat yatiyani? Nayajj sapjjsmawa: jupan almapajj juchatac loktäwir tucuyatäcan ucapachaw jupajj sarakerinacapar uñjani. Jichhajj camsapjjtasa? Qhitis wawanacapäpjjani?

11. Nayajj jumanacaruw sapjjsma: Qhitinacatejj Diosan arjirinacapan arunacapar istʼqui. Jïsa, Tatitun jutäwipat yatiyapcän takpach uca kollan arjirinacan arunacapar istʼapcaraqui ucanacawa. Nayajj jumanacaruw sapjjsma: Take cawquïrinacatejj jupanacan arunacapar yäkapcäna, Tatitun marcapar cutsuyañapar iyawsapcäna, juchanacapar pʼampʼachañatac ucürur suyapcän ucanacaw jupan sarakerinacapajja, jan ucajja, jupanacaw Diosan khapak marcap tutjam catokerinacäpjje.

12. Ucanacan juchanacap jupajj catjjarüna. Ucanacataquiw jupajj jiwänjja, camächit pʼaquïwinacapat jupanacar cutsuyañataqui. Jichhasti, janit jupanacajj jupan sarakerinacapäpquejja?

13. Jïsa, janit arjirinacajj jupan sarakeripäcaraqui, cawquïrinacatejj jutir urunacat yatiyañatac lacap jistʼarapcäna, juch lurañarus janirac jalantapcaraquïna, sañ muntwa, takpach kollan arjirinacajj oraken utjañ kalltäwipatjja, janit jupanacajj jupan sarakerinacapäpquejja? Nayajj jumanacaruw sapjjsma: Jupanacajj jupan sarakeripäpjjaraquiwa.

14. Ucanacaw sumancañ yatiyirinacajja, asqui suma yatiyäwinac apanirinacajja. Khespiyañ yatiyirinacaraquiwa. Sionar Diosamaw sarayi! –sirinacaraquiwa.

15. Ucatsti, Cunj sumas cayunacapajja kollunac patjjanjja!

16. Ucat jucʼampis Cunj sumas cawquïrinacatejj kollunacjjan sumancañ yatiyasipqui ucanacan cayunacapajja!

17. Ucjjarusti cawquïrinacatejj jichhat ucsarojj wiñaycam sumancañ yatiyapcan ucanacan cayunacapajj kollunacjjan cunja jiwaquïnisa!

18. Nayajj jumanacaruw sapjjsma: Janiw ucajj takpachäquiti. Suma yatiyäwinac apanqui ucan cayunacapajj kollunacjjan cunja jiwaquiraquisa. Ucasti sumancañ ut-tʼayiri, marcapar cutsuyqui uca Tatituwa. Jïsa, marcapar khespiyasiñ churqui ucawa.

19. Oraken kalltäwipat jupan marcapatac waquichatäcän uca cutsuyäwipajj janitejj utjcasapänjja, nayajj jumanacaruw sapjjsma: Janitejj ucajj utjcaspajja, takpach jakenacaw chhaktañapäna.

20. Ucampis jiwañan phalanacapajj tʼakjjatäniwa. Yokasti marcaruw sarayani, jiwatanacjjarusti chʼamanïniwa. Ucat jiwatanacan jactäwip ut-tʼayi.

21. Jactäwejj utjaniwa, ucasti nayrïr jactäwïniwa; ucasti cawquïrinacatejj utjcäna, utjqui, utjcaraquini, Criston jactäwipcamajja, ucanacan jactäwipawa. Ucajj uqhäm satäniwa.

22. Jichhajj, takpach arjirinacan jactäwipa, cawquïrinacatejj jupanacan arunacapar iyawsapcän ucanacampi, cawquïrinacatejj Diosan camächitanacapar phokhapcän ucanacampiw nayrïr jactäwinjj jactapjjani. Uqhämasti jupanacaw nayrïr jactäwïpjje.

23. Jupanacar cutsuyqui uca Diosamp utjañatac jactayatäpjjaniwa. Uqhäm jiwañan phalanacap tʼakjjqui uca Cristo tokew wiñay jacäwinïpjjani.

24. Ucanacajj nayrïr jactäwin tutininacawa. Jupanacajj, Cristojj janïr jutcän ucapachajja, jan yatisa, khespiyasiñ jan yatiyatäsin jiwapcän ucanacawa. Uqhäm Tatitojj ucanacan cut-tayatäñapjj ut-tʼayi. Jupanacasti nayrïr jactäwin tutinïpjje, jan ucajja wiñay jacäwinïpjje, Tatitun cutsuyatäsina.

25. Jiscʼalalanacajj wiñay jacäwinïpjjaraquiniwa.

26. Ucampis amuyasipjjam, Dios nayrakatan ajjsarañamp qhathatipjjam, cunalaycutejj jumanacajj qhathatipjjätawa. Cawquïrinacatejj Tatitur kallcatasipqui, juchanacapan jiwapcaraqui ucanacarojj janiw Tatitojj cutsuyquiti. Cawquïrinacatejj oraken kalltäwipat juchanacapat jiwapcäna, munañaparjam Diosar kallcatasipcäna, Diosan camächitanacap yatis jan ucanacar phokhapcän ucanacajja, nayrïr jactäwinjja, janiw tutinïpcaniti.

27. Ucat janit qhathatiñanacamäqui? Khespiyañajj janiw uqhämanacarojj purquiti, cunalaycutejj Tatitojj janiw uqhämanacar cutsuyquiti. Janiraquiw Tatitojj uqhämanacar cutsuycaraquispati; jupajj janiw quipca arunacap mays uñtaycaspati. Chekar uñjañajj wactʼäwinïqui ucqhajja, janiw jupajj ucar jarcʼakcaspati.

28. Nayajj jumanacaruw sapjjsma: Tatitun khespiyañapajj sapa orakerus familiarus lajjrarus jakenacarus yatiyatäcan ucapachajj puriniwa.

29. Jïsa, Tatay, juman uñjirinacamajj jachʼat artʼapjjani. Mä arutjam kʼochupjjani, Tatitojj wastat Sionar cut-tayancan ucapachajja.

30. Cusisthapipjjam, mayachthapisis kʼochupjjam, juma Jerusalenan chʼusawjanacapa! Tatitojj jakenacaparojj chuymachiwa, Jerusalenarusti cutsuyiwa.

31. Tatitojj take orakenacan nayranacaparojj kollan amparap uñstayi, take orak thiyanacasti Diosasan khespiyäwiparojj uñjapjjaniwa.