19ri Jalja
Inamay thakäwi – Gedeonan sartasitapa – Laman jakenacan chhuctʼanipjjatapa – Noe pʼekechirejj ninan jiwi – Limhi yokapajj impuest churir pʼekechiriwa.
1. Ucatsti pʼekechirin nuwasiri jakenacapajj inamayac Tatitun jakenacapar thakasinjja, cut-tjjapjjänwa.
2. Pʼekechirin nuwasiri jakenacapajj jucʼaquëjjänwa, jucʼaptayat laycu. Uqhämaraquiw jiltʼir jakenac taypinjja payar tʼakjjtañajj utjaraquïna.
3. Jucʼanïcan uca jakenacasti pʼekechiriruw ewjjsuñ kalltapjjäna, jupanac taypinsti mä jachʼa chʼajjwaw utjañ kalltaraquïna.
4. Jupanac taypin mä jakew utjäna, Gedeon sata. Jupajj chʼaman jakënwa, pʼekechirin timaparaquïnwa, ucat espadap aytasajja, colerataw pʼekechirir jiwayañatac jurament luräna.
5. Ucat jupajj pʼekechirimp nuwasïna. Pʼekechiristi atipjayasirjamäsajja, jaltjjänwa, kollan uta jacʼa saytʼu pucararuw maqhataraquïna.
6. Gedeonasti, arctänwa, ucatsti pʼekechirir jiwayañataquejj niy torrer maqhatañampïscan ucqhaw pʼekechirejj semlon orak tokerojj uñtäna, ucatsti Laman jakenacan nuwasiri tamapar orak thiyanacar niy mantantasinquir uñjäna.
7. Ucat pʼekechirejj chuymapan jachʼa llactʼasiñampiw aqhäm sas artʼäna: Gedeona, jan jiwayistati, Laman jakenacaw catuntistani, niyaw acancapjje, jupanacajj tucqhapjjestaniwa. Jïsa, marcajjaruw tucqhapjjani.
8. Ucampis uca pʼekechirejj janiw marcapat llaquiscänti, antisas jupan quipca jacäwipatac llaquisïna. Ucampis Gedeonajj janiw jupar jiwaycänti.
9. Pʼekechiristi Laman jakenacat jaltañanacapataquiw jakenacarojj arsüna. Jupa quipcaw jupanac nayrakat saräna, jupanacasti wasararuw warminacamp wawanacamp jaltjjapjjäna.
10. Laman jakenacajj jupanacarojj alisipjjänwa, uqhämaraquiw jupanacar catjasajj jiwayañ kalltapjjaraquïna.
11. Ucat chachanacan warminacapar wawanacapar jaytanucusin Laman jakenacat jaltañanacapataquiw pʼekechirejj säna.
12. Waljaniw jan jaytanucuñ munapcänti. Antisas jupanacamp tucusiriw kheparañ munapjjäna. Yakhepanacasti warminacapar wawanacapar jaytanucusaw jaltjjapjjäna.
13. Cawquïrinacatejj warminacapamp wawanacapamp kheparapcän ucanacajja, suma uynaktʼan phuchanacaparuw Laman jakenacan ucar qhitapjjäna jupanacar jan jiwayañanacapatac achictʼayañataqui.
14. Ucatsti Laman jakenacajj warminacan jiwaquïtapat muspharatap laycuw jupanacar qhuyapayapjjäna.
15. Ucat Laman jakenacajj jupanacar jan jiwaraycänti. Jupanacar catuntasaw Nefi oraker cut-tʼayapjjäna. Uqhämaraqui, jupanacatejj Noe pʼekechirir Laman jakenacan amparapar catuyapjjaspajja, uca orakenjj utjasipjjaspawa. Uqhämaraqui take yänacapat waquïscaspas uqhäm chicat churapjjañaparaquïna; koripats kollkepats take cʼajquirinacapatsa chicata. Uqhämat Laman jakenacan pʼekechiripar marat marar impuest churañäcaspas uqhäma.
16. Catuntatanac taypinsti Noen Limhi sat yokapaw ucancäna.
17. Limhisti awquipan jiwayatäñap janiw muncänti. Ucampis Limhejj asqui jakësajja, awquipan ñankha luräwinacapat yatïnwa.
18. Ucatsti Gedeonajj jakenacaruw jamasat wasarar qhitäna, pʼekechirimpir jupamp chictʼatäpcan ucanacampir thakayiri. Jupanacasti uca jakenacarojj wasaran catjapjjäna, ucampis pʼekechirimp sacerdotenacampejj janiw ucanacampïpcänti.
19. Jupanacajj chuymanacapan Nefi oraker cut-tapjjañapataquejj juramento lurapjjäna. Warminacapas wawanacapas jupanacamp kheparirinacas jiwarayatäpcaspajja, Laman jakenacar quipc lurasiñataqui jupanacamp tucusipjjañapataquiraquiw jurament lurapjjäna.
20. Pʼekechiristi jupanacan jan cut-tapjjañapataquiw säna: Jupanacasti pʼekechiritaquejj colerasipjjänwa, ucat jiwañapcamas ninamp jupar tʼakhesiyapjjaraquïna.
21. Uqhämaraqui sacerdotenacar jiwarayañatac catjañampïpcän ucqhajja, jupanacajj jaltjjapjjänwa.
22. Ucjjarusti jupanacajj Nefi oraker cut-tañampïscän ucqhaw Gedeonan jakenacaparojj jicjjatapjjäna; ucanacaraquiw jupanacarojj yatiyapjjäna, cunatejj warminacampir wawanacampirojj camächcan ucanaca. Ucatsti cunjämtejj Laman jakenacajj jupanacarojj oraken utjasiycän ucata, cunjämaractejj take cunatejj jupanacan utjcän ucanacat chicat churayapcäna impuestöcaspas uqhäma.
23. Uca jakenacajj Gedeonan jakenacaparojj pʼekechirir jiwayapjjatapat yatiyapjjäna. Sacerdotenacapan jucʼamp jaya wasarar jaltjjatapat yatiyapjjaraquïna.
24. Uca jiquisïw tucuyasinsti, Nefi orakeruw warminacapan wawanacapan jan jiwarayatätapat cusisisajj cut-tapjjäna. Uqhämaraqui pʼekechirir lurapcän ucat Gedeonar yatiyapjjäna.
25. Ucat Laman jakenacan pʼekechiripajj marcapan jan jupanacar jiwarayañanacapatac arusjäwir jupanacamp mantäna.
26. Uqhämaraqui Limhejj pʼekechirin yokapäsajja, marcar sarayañatac jakenacat catokasajja, Laman jakenacan pʼekechiripampiw mä arusjäw luräna, marcapan impuest churañapataqui; take yänacapat chicatpachsa.
27. Ucat Limhejj ucapachat marcapar sum ut-tʼayañ kalltäna, jakenacap taypin sumancañ ut-tʼayaraquïna.
28. Laman jakenacan pʼekechiripasti Limhin jakenacapar uca oraket jan mistuyañataquiw arjjatirinac uca orak thiyanacar muytayäna, jupanacan wasarar jan mistuñanacapataqui. Arjjatirinacaparusti Nefi jakenacat catokat impuestompiw kamayäna.
29. Limhi pʼekechiritaquejj pä maraw sumancañajj uca orakepan utjäna. Laman jakenacasti janiw jupanacarojj camachapcänsa, janiraquiw tucqhañs munapcaraquïnti.