1. Ucat Ammonampi Limhi pʼekechirimpi marcampejj arustʼañ kalltapjjäna, mitʼanïtapat antutayasiñanacapataqui; take jakenacaruw tantachayapjjäna. Ucjj jakenacan munañap yatiñataquiw lurapjjäna.

2. Janiw cunjämats catuntat uñjasiñatjja khespirjamäpcänti. Ucat jupanacajj wasararuquiw jaltjjapjjäna; warminacapampi, wawanacapampi, uywa tamanacapampi, chʼujllanacapampi; cunalaycutejj Laman jakenacajj sinti waljapjjänwa. Limhin marcapataquejj jupanacamp jan nuwascayapunïnwa, espad toke mitʼanïñat khespiñ munasa.

3. Ucat Gedeonajj pʼekechirin nayrakatapar jacʼachasisaw säna: Pʼekechiri! Jichhacamajj walja cutiw arunacajj istʼtajja, cunapachatejj Laman jake jilanacasampejj nuwasipctan ucqhasa.

4. Jichhasti Pʼekechiri! Nayajj jan cunatac walïquirists uqhäm jan amuyc-chistajja, jan ucajj jichhacam arunacajjar mä jucʼs istʼstajja, ucanacasti jumatac asquïchejja, jichhajj arunacajjar istʼañam munta. Nayasti lokerimäyäwa; aca marcarusti mitʼanïtapat antutayaraquï.

5. Ucat pʼekechirejj parlañap munäna. Gedeonasti juparojj sänwa:

6. Khepäjj uyüquis ucan mä puncuw khepäjj chek saraquipañajj utji. Ucasti marca khepäjjanquiwa. Laman jakenacajja, jan ucajj arjjatirinacajja, arumajj umarasipquiwa. Takpach aca marcatac mä yatiynokäw mistuyañäni; uywa tamanacap anthapipjjam, ucatsti arumäquipan wasarar anaquiñataqui.

7. Nayasti arsut arumarjamaw khepa impuest vino Laman jakenacar churä ucampiw jupanacajj macharasipjjani. Ucat jupanacajj umatäcani iquirasipcaraquin ucqhaw jiwasanacajj utjnokäwit chekancqui uca jamas mistuwinjam mistjjapjjañäni.

8. Uqhämat warminacasampis wawanacasampis uywa tamanacasampis chʼusa wasarar jaltapjjañäni; uqhämaraqui Silom orak muytʼapjjañäni.

9. Ucat pʼekechirejj Gedeonan arunacapar jaysäna.

10. Limhi pʼekechiristi jakenacaparojj uywa tamanacap anthapiyäna. Uqhämaraqui vinjja Laman jakenacar impuestotac apayaraquïna, ucatsti wajjtʼäwjam jucʼamp vin apayascaquïna. Limhi pʼekechirejj jupanacar apaycän uca vinot walpin umapjjäna.

11. Ucat Limhi pʼekechirin jakenacapajj arumaw uywa tamanacapamp wasarar mistupjjäna, Silom orak wasaranjam muytʼapjjäna, ucat Zarahemla orake toker Ammonampin jilanacapampin irpatajj sarapjjäna.

12. Jupanacajj takpach kollkeps korips cunayman cʼajquirinacaps aptañaparjamaw juyranacamp cun wasarar apapjjäna; jupanacasti uqhämaw sarasipcaquïna.

13. Walja uru wasarancatatjja, Zarahemla orakeruw puripjjäna. Ucatsti Mosian marcapampiw mayachasipjjäna, jupan marcaparuw tucupjjaraquïna.

14. Mosiajj jupanacar cusisiñampiw catokäna; jupanacan kellkatanacaps Limhi jakenacan catjat kellkatanacs catokaraquïnwa.

15. Ucatsti Laman jakenacajj Limhin jakenacapan marcat arum mistüwipat yatisajja, mä nuwasiri tama wasarar jupanacar arctir qhitapjjäna.

16. Jupanacajj mä uru arcasinjja, janiw cayunacap jucʼamp arctirjamäpcänti; ucat chʼusa wasaran chhakapjjäna.