1. Jilanaca, wasitat ischʼuquipjjeta, cunalaycutejj jucʼamp jumanacar arsuñ munapjjsma. Nayajj jutir yänacjjat yatiyañ munapjjaracsma.

2. Cuntejj jumanacar arsupcäm ucanacajja, Diosat juti qhitapan nayar yatiyatawa. Uca qhitasti nayarojj situwa: Iquit sartam; ucat nayajj sart-ta, jupasti nayrakatajjan saytʼatänwa.

3. Ucat nayarojj situ: Pʼarjjtam, ucat cuna arunactejj jumar arscäm ucanac istʼam, cunalaycutejj nayajj jachʼa cusisiñat cusisiyir yatiyäwinac yatiyiriw jutsma.

4. Cunalaycutejj Tatitojj mayisïwinacam istʼi, asquïtam amtaraqui. Ucat ucanac jumar yatiyiriw qhitanitu, juman cusisiñamataqui marcaman cusisiñamp phokhatäñapatac jupanacar yatiyañamataquiraqui.

5. Take Chʼaman Sarayir Tatitojja, jaken wawanacap taypiruw orak tabernaculon jacasini, alajjpachat chʼamampiw sarakanini. Ucataquejj janiw jayäcjjeti, ucasti jacʼachasincaraquiwa. Uca Tatituw wiñayan wiñayapcamajj utji, utjaraquini. Jupasti aqhäm jachʼa muspharcañ luräwinac lurasaw jakenac taypin sarnakawayani; jupajj usutanacaruw cʼumaraptayani, jiwatanacaruw sartayani, suchʼunacaruw sarnakayani, juyqhunacaruw uñjayani, okaranacaruw istʼayani, take cunayman usunac kollaraquini.

6. Supayanac alis-suni; uca supayanacasti jaken wawanacapan chuymanacapan utjir ñankha ajayunacawa.

7. Jupajj yantʼäwinacampiw tʼakhesini, janchi usunacampiw usuraquini. Mankʼat awtjayasini, umat pharjayasini, wal chʼajjmisiraquini. Cunjämatejj jupajj tʼakhescan uqhamjja, janiw mä jakes tʼakhescaspati, jan ucajja jiwapunispawa. Jakenacapan ajjtcañ luräwinacap laycu ñankhätap laycuraquiw wil jumpʼiñcamajj tʼakhesini.

8. Jupasti, Jesucristo, Diosan Yokapa, alajjpach acapach Awqui, kalltäwitpach take cun Luriri satäniwa. Taycapasti Maria satäniwa.

9. Jupasti jupanquirinac taypiruw jutani, khespiyasiñan jaken wawanacapar puriñapataqui, sutipar iyawsañ toke. Take ucanac khepatsti jupanacajja, alek jakëcaspas uqhämac jupat amuyapjjani, supayaniw – sasaw sapjjaraquini, juparojj asutʼipjjaniwa, cruzaruw jupar jiwañapcam chʼac-catapjjaraquini.

10. Quimsür jiwatat jactani; uqhämaraqui jupajj oraker taripir saytʼani. Take ucanacasti asqui taripäwin jaken wawanacapar puriñapatac luratawa.

11. Uqhämaraqui, cawquïrinacatejj Adanan ley pʼaquitap laycu tincutäpqui, Diosan munañap jan yatis jiwapqui, jan juch lurapqui ucanacajja, Criston wilapaw jupanacan juchanacapan tʼakhesiyäwipar phokhe.

12. Ucampis Ay! qhitinacatejj yatcasin Diosar cutcatapqui ucanacata! Janitejj uqhämanacajj juchat cutiquipstapcanejja, Jesucristo Tatitur jan iyawsapcaraquinejja, janiw khespiyañajj jupanacar purcaniti.

13. Dios Tatitusti kollan arjirinacaparuw take jaken wawanacap taypir qhitäna, ucanacjjat sapa wila masinacaru, marcanacaru, lajjranacar yatiyañataqui. Uqhämat, qhititejj Criston jutañapar iyawsqui ucajja, juchanacapan pampachäwip catokani, jachʼa cusisiñampiw cʼuchirtasiraquini, Cristojj jupanac taypir niy jutcjjaspas uqhäma.

14. Ucampis Dios Tatitojja, marcapan jan altʼirïtapjj amuyiwa. Ucat jupanacar mä ley churäna, ucasti Moisesan leyipawa.

15. Uqhämaraqui jupan jutäwipat walja uñachayäwinaca, muspharcañanaca, jutäwipar uñtatanacs, chʼiwinacs, jupanacar churäna. Uqhämaraqui kollan arjirinacajj jupan jutäwipat jupanacar arsuraquïna, ucampis chuymanacap chʼollkheptayasipjjäna. Janiraquiw amuytʼäpcänti Moisesan leyipan jan cuna chʼamanïtapa, Criston wilapan juchanac lanti tʼakhesiñan utjataps amuyapcaraquïnti.

16. Jiscʼa wawanacatac juch lurañajj lurañjamäcasp ucqhasa, janiw khespiyasipcaspati; ucampis nayaw sisma: Jupanacajj qhuyapayatäpjjewa. Cunjämatejj Adan laycu, jan ucajj jaken cunjamätap laycojj tincupqui, ucanacamp-pacharuw Criston wilapajj jupanacan juchanacapan tʼakhesiyäwinacapar phokhe.

17. Uqhämaraquiw saracsma: janiw yakha sutejj churatäcaniti, janiraquiw yakha toket khespiyañajj jaken wawanacapar purcaraquispati; Cristo sutjjaruqui, uca toketaqui khespiyañajj utji. Jupasti take Chʼaman Tatituwa.

18. Jupaw taripi, taripäwipasti chekaparaquiwa; cawquïr wawatejj wawäcasin jiwejja, janiw chhakcaniti; ucampis jakenacajj quipca almapan juchañchatäñapataquiw umasipqui, janitejj chuymanacap llampʼuptayapcani, mä wawjam tucupcan ucqhajja, janirac khespiyasiñajj utjcän ucar iyawsapcani, utjquis ucarus jan iyawsapcani, Cristo Take Chʼaman Tatitun wilap laycu khespiyasiñan utjataparus jan iyawsapcan, ucapacha.

19. Jan turcata jakejja, Adanan tincüwipat ucsarojj Diosan timapawa; janitejj jupajj Kollan Ajayun jawsäwinacap istʼcanejja, wiñayan wiñayapataquiw Diosan timaparaquïni; janitejj uca jakejj jan turcat jakëtap liwinuc-cani, Cristo Tatitun juchanac lanti tʼakhesiñar phokhatap toke kollanar jan tuc-cani, wawjam jan tuc-cani, jaysasiri, llampʼu, altʼat chuymani, jan wapuchasiri, take cun suyiri, munasiñan phoktʼata, cunjämtejj Tatitojj jupar tʼakhesiyañ munqui uqhäm jaysirir tuc-canejja, camisatejj mä wawajj tataparojj take cunan jaysqui uqhäma. Janitejj ucanac lurcanejja, wiñayan wiñayapataquiw Diosan timapäni.

20. Uqhämarac saracsma: Khespiyirit yatiñajj take marcanacaru, wila masinacaru, lajjranacaru jakenac taypin parlatatatäcan ucapachajj puriniwa.

21. Uqhämaraqui ucapachajja, qhititejj juchat cutiquipstcani, Take Chʼaman Dios Tatitun sutipar iyawsañanïcaraquin ucanacamp wawanacampiquiw Dios nayrakatanjj jan juchanejj uñjasipjjani.

22. Jichhasti, cuntejj Dios Tatitumajj camächit churctam, ucat ucanac marcamar yatichcät uca khepatjja, jupanacajj janiw Diosan uñjataparjam jan juchanejj jicjjatatäpcaniti, jan ucasti nayan jumar arsutäqui uca arunacajjarjamaquiw jan juchanejj jicjjatatäpjjani.

23. Jichhajja, Dios Tatitojj nayar camächitjam churquitu, uca arunac arsjjta.

24. Aqhäm saraquiw Tatitojja: Taripäw urun uca arunacajj aca marca contrajj khan ircatani. Uqhämasti, aca jakenacajj taripatäpjjaniwa; takeniw ñankhat asquit luräwiparjam taripatäni.

25. Luräwinacapatejj ñankhäpjjanejja, pachpa juchanacap laycu ajjtcañ lurawinacap laycurac utjcani uca ajjtascañ uñjawir qhitatäpjjaniwa. Uca uñjañapaw llaquisiñampir jan tucuscay tʼakhesïwir jupanacarojj puriyani, Tatitun nayrakatapat jithektayaraquini; uca utjäwitsti janipuniw cutsuñjamäcaniti. Uqhämasti quipca almanacapataquiw juchañchatäñ umapjje.

26. Ucatjja Diosan colerasiñ kerupat umapjje. Cunjämatejj chekapäñajj Adanar jarcʼat achu mankʼatapat tincuñap purcän ucat jan apakquejja, uqhämaraquiw chekapäñajj Diosan colerasiñapjja jupanacat jan apakcaraquispati. Ucat qhuyapayäwejj ucapachat wiñayataquiw jupanacjjarojj jan wactʼäwinïcaniti.

27. Tʼakhesiñapajj nina sancʼa azufre kotjamawa, ucan ninan lawrapasti jan tucuscayawa. Jewkʼepajj wiñay wiñayaw jewkʼe. Uqhäm Tatitojj camächit churitu. Uqhamäpan.