1. Simlon oraken mayawjaw utjäna. Ucansti Laman jakenacan phuchanacapaw kʼochuñatac thokoñatac cʼuchirtasiñatac tantachasipjjerïna.

2. Mä urusti jucʼaniquiw kʼochuñatac thokañataquejj tantachasipjjäna.

3. Noe pʼekechirin sacerdotenacapasti Nefi marcar cut-tañat pʼenkasisa, jakenacan jupanacar jiwarayañapat ajjsarasaraquiw, warminacaparus wawanacaparus cut-tañ ajjsarapjjäna.

4. Uqhämasti wasaran kheparapjjäna, ucatsti Laman jakenacan phuchanacapar jicjjatasasti, jupanacar uñchʼuquiñataquiw imantasipjjäna.

5. Cunapachatejj jupanacat mä jucʼanic thokoñatac tantachasipcän ucapachaw jamasawjanacat uñstarapjjäna. Ucatsti caturasaw wasarar jupanacarojj katatipjjäna. Jïsa, pä tunc pusin Laman jakenacan phuchap wasarar katatipjjäna.

6. Laman jakenacasti phuchanacapan chhakatap yatjjatasajja, Lemhin jakenacapataquiw colerasipjjäna, Limhin jakenacapas phuchanacap lunthatapcaspajj uqhäm amuyasitanacap laycu.

7. Ucat nuwasiri tamanacap qhitapjjäna. Pʼekechir pachpaw marcapan nayrakatap sarantäna, jupanacasti Nefi orak uñcatataw sarapjjäna, Limhin marcapar tucqhañataqui.

8. Ucampis, Limhejja, torretpach jupanacar uñjatayna. Nuwasiñatac take waquichasïwinacap uñjaraquïna. Ucat marcapar tantachayäna, jupanacasti yapuns chʼumins Laman jakenacaruw suyantapjjäna.

9. Ucat Laman jakenac purinipanjja, Limhin jakenacapajj jupanacarojj suyäw chekanacat lluscsusaw thokjjatapjjäna, jupanacarusti jiwarayañ kalltapjjaraquïna.

10. Nuwasïwisti wali chʼamampïnwa. Cunjämatejj leonajj mankʼat nuwascaspas uqhämaw jupanacajj nuwasipjjäna.

11. Ucat Limhin jakenacapajj Laman jakenacan jan chicataparücasas Laman jakenacarojj alis-suñ kalltapjjäna. Ucampis jupanacajj jacäwinacap laycuw nuwasipjjäna, uqhämarac warminacap laycu wawanacap laycuraqui. Uqhämasti wal chʼamañchasipjjäna, leonjamaw nuwasipjjaraquïna.

12. Jupanacasti Laman jakenacan pʼekechiriparojj jiwatanac taypit catjapjjäna. Ucampis jupajj janiw jiwatacänti. Jupajj chhojjriñchatänwa ucat nuwasiw oraker jaytanucutäna, marcapan acatjamat lak jaltjjatap laycu.

13. Ucatsti juparojj irptjjapjjänwa, chhojjrinacaparusti ñachʼantapjjänwa. Limhi pʼekechirin nayrakataparusti aqhäm sasaw irpantapjjäna: Acajj Laman jakenacan pʼekechiripajja. Jupajj chhojjriñchataw jiwatanacap taypin liwisitayna, jupanacasti jupar jaytawayapjjataynawa. Nanacasti juman nayrakatamaruw irpanipjjta, jichhasti juparojj jiwtʼayapjjañäni.

14. Ucampis Limhejj jupanacarojj sänwa: Janiw jupar jiwayapcätati. Antisas nayan jupar uñjañajjatac acar irpanipjjam. Ucat juparojj irpantapjjäna, ucat Limhejj jupar säna: Cunas nayan marcajjamp nuwasiñamatac utji? Jumar arscsmas ucjja, marcajjajj janiw pʼacquiti. Ucat cunats nayan marcajjamp jumajj lurcta uca arsüw pʼactajja?

15. Ucat pʼekechirejj säna: Nayajj arsutajj pʼaquint-ta, cunalaycutejj juman jakenacamaw marcajjan phuchanacap lunthati. Ucat colerasisaw marcajjarojj marcamamp nuwasir jutayta.

16. Limhejj janiw ucjjat cuns yatcänti, ucat säna: Marcajj taypin thaktä. Qhititejj uc lurqui ucajja, jiwaniwa. Ucat jupajj marcap taypin thakayäna.

17. Gedeonajj pʼekechirin capitanapänwa. Jupasti uca arunac istʼasinjja, pʼekechirir maqhatasaw säna: Nayajj achictʼsmawa, suytʼjjam. Janis aca marc taypin thakaycam, janirac ucatjj jupanacar juch jakomti.

18. Aca marcajj jiwarayañ muncän, uca awquiman sacerdotenacapat janit amtascta? Janit jupanacajj wasarancapqui? Janit jupanacäqui Laman jakenacan phuchanacap lunthatirejja?

19. Jichhajj pʼekechirin uc saram, take ucanac yatiyam, marcapar ucanac yatiyañapataqui, ucatsti jupanacan jiwasanacamp sumancthapiñapataqui. Cunalaycutejj jichpachaw jupanacajj jiwasanac contra nuwasir jutañataquejj waquichasisipqui. Jiwasanacasti jucʼaniquïpjjtanwa.

20. Jupanacajj waljaniw jutapjjani. Janitejj pʼekechirejj jupanacar jiwasanacatac sumaptaycanejja, tucqhapjjestaniwa.

21. Janit Abinadin jiwasanac contra yatiycän uca arunacapast phokhasqui? Take ucanacajj Tatitun aruparjam jan yäkatas laycuwa, ñankha luräwinacasat jan cutiquipstatas laycuraquiwa.

22. Jichhasti pʼekechirir sumaptayañäni, jumamp luratäc uca arsüwisar phokhapjjaraquiñäni, cunalaycutejj mitʼaniptañasajj waliquïscaniwa, jiwañän ucaw jan walïcaspatejja. Uqhämasti ucatak wil wartañ tucuyaraquiñäni.

23. Ucat Limhejj take cun awquipjjat pʼekechirir yatiyäna. Wasarar jaltapcän uca sacerdotenacat jupar yatiyäna. Phuchanacapar lunthatatanacapat jupanacarojj juch jakoraquïna.

24. Ucatsti pʼekechirejj Limhin marcapataquejj sumaptänwa. Jupanacarusti sänwa: Marcajjamp jiquisirejja, jan armanacampic mistupjjañäni. Nayasti, marcajjan marcamar jan jiwarayañapataquiw juramento lurarapipjjsma.

25. Ucat jupanacajj pʼekechirir arcapjjäna. Jan armanacaniquiw Laman jakenacamp jiquisirejj sarapjjäna, ucat jupanacajj Laman jakenacamp jiquisipjjäna. Laman jakenacan pʼekechiripasti jupanac nayrakatar altʼasaw Limhin jakenacapataquejj achicarapïna.

26. Laman jakenacasti Limhin marcapar jan armanacan uñjapcän ucqhajja, jupanacat qhuyapayasïnwa, ucat jupanacataquejj sumaptaraquïna. Ucatsti pʼekechiripampiw quipca orakeparojj sumancañamp cut-tjjapjjäna.