1. Limhi pʼekechirejj waljanac marcapar parläna, ucanacatsti mä kawkhac aca librorojj kellkta. Ucat jupajj marcapar uqhäm parlañ tucuyasinjja, Zarahemla orakenquir jilanacapat jupanacar khanañchäna.

2. Ucatsti Ammonarojj jakenac nayrakataruw saytʼayäna, Zenifajj oraket mistcän ucapachat jupa quipcas oraket mistuncän ucapachcamajj cunanacatejj jilanacapar camächcän ucanac yatiyañapataqui.

3. Uqhämaraquiw Ammonajj Benjamin pʼekechirin khepïr jupanacar yatichat arunacap yatiyaraquïna. Uca arunacjja, Limhi pʼekechirin marcaparuw khanañchäna take uca arsut arunac amuyapjjañapataqui.

4. Take ucanac luratatsti, Limhi pʼekechirejj uca walja jakenacaruw qhitanucjjäna. Sapakat mayniruw utanacapar cut-tayjjaraquïna.

5. Ucat jupan marcapan sarnakäwinacapajj Zarahemla oraket mistüwipat ucsarojj ucan kellkatäcän uca tʼalpha lekʼetanac Ammonar apayanïna, jupan ucanac leetʼañapataqui.

6. Ammonan uca kellkatanac leetʼatapatjja, uca pʼekechirejj juparuw jisctʼäna, arunac jakoquipasmat –sasa. Ammonasti janiw jakoquipquirist-ti –sasaw arsuraquïna.

7. Pʼekechiristi juparojj sänwa: Marcajjan tʼakhesïwinacapat llaquisisajja, pusi tunc quimsan jakeruw wasaranjam qhitäyäta Zarahemla orak catjjapjjañapataqui, mitʼanïtajjat antutayañapataqui, jilanacajjat mayiñataquiraqui.

8. Uca jakenacajj walja uruw wasaranjam chhakapjjäna, ucampis jupanacajj uca orak catjañataquejj chʼamachasisipcaquïnwa. Jupanacasti janiw Zarahemla orak catjapcänti. Ucampis aca orakeruw cut-tanjjapjjäna. Jupanacajj uca orakenjja, walja uma kota taypinjam sarapjjaraquitayna. Uca chekanacansti jake chʼaqhanacamp uywa chʼaqhanacamp phokhantat jicjjatapjjatayna. Ucanjja take casta lakay tʼunjat utanac jicjjatapjjäna. Ucatsti, Israelan walja tama jakenacapajj cawqhantejj jacapcän uca orak jicjjatapjjaraquitayna.

9. Sapcän ucanacan chekätap ircatañataquejja, jupanacajj pä tunc pusin tʼalpha lekʼetanac apanipjjäna. Ucanacasti kellkatanacamp phokhantatänwa. Uca Tʼalpha Lekʼetanacasti koricamaquiwa.

10. Chuym jarqʼir lekʼsutanac apanipjjaraquïna. Ucanacasti jachʼawa, broncet cobret lekʼsutaraquiwa, suma imatäcaspas uqhamäsquiwa.

11. Jupanacajj espadanac apanipjjaraquïna. Uca espadanacan catuñanacapajj chhakatawa, cuchill jirunacapajj wali saruntataraquiwa. Aca orakenjj janiw qhitis uca arurus tʼalpha lekʼetanacancqui uca kellkatarus jakoquipcaspati. Ucat jisctʼsma arunac jakoquipasmat –sasina.

12. Wastat sisma: Mä jakoquipirir uñtʼtacha? Nayajj aca kellkatanacan jiwasan arusar jakoquipatäñap munta. Inas ucanacajj uca tucqhat marcan jiltʼirinacapat yatïychistaspa, cunalaycutejj jupanacat aca kellkatanacajj juti. Jan jupanacat khanañchquistanejja, inas uca tucqhat jakenac pachpat yatïychistani. Cunats tucqhatäpjjpachäna? Uc nayajj yatiñ munirista.

13. Ammonajj juparojj sänwa: Nayajj chekpachaw mä jaket yatiyirisma, oh pʼekechiri! Jupaw uca kellkatanacjj uñtʼat lajjrar jakoquipaspa. Jupanjja, nayra take kellkatanac jakoquipañatac cunamp uñjañas utjiwa. Ucasti Diosan wajjtʼäwipawa. Ucanacasti arsuyirinac satäpjjewa. Janiw qhitis jan camächitampejj ucanacar uñjcaspati. Uqhäm jan camächitamp uñjcaspajja, cunataquitejj jan uñjañapäc ucatac uñjasp ucajja, jiwaspawa. Qhitirutejj ucanac uñjañapatac camächitajj churatäc ucajja, uñjiri satawa.

14. Zarahemla orakenquir jakenacan pʼekechiripajj ucanac lurañatac camächit catoker jakewa. Jupasti uca jachʼa Diosan wajjtʼäwipaniwa.

15. Ucat pʼekechirejj säna: Mä uñjirejj arjirits jucʼamp jachʼawa.

16. Ucat Ammonajj säna: Uñjirejj Diosan yatiyiriwa, arjiriraquiwa. Janiw qhiti jakes jachʼa wajjtʼäwinïcaspati, janitejj Diosan chʼamapanïcasp ucajja. Janiw cawquïr jakes Diosan chʼamapanïcaspati. Ucampis Diosajj jachʼa chʼamjj mä jaker churaspawa.

17. Ucampis mä uñjirejj nayra cunaymaninacat yatispa, jutir cunaymaninacat yatiraquispa. Uñjir toket take cunanacajj yatiyatäni, jan ucajja jamasar imatanacajj khanar apsutäniwa. Imatanacajj khanar mistuyataraquïniwa. Cunatejj jan yatiyatäqui ucajja, uñjir toket yatitäni. Cunanacatejj jan cunjämats yatiyascasp ucanacaw jupa toket yatiyatäni.

18. Diosajj uqhäm mä thac waquichi jakenacan jachʼa muspharcañanac iyawsañ tok lurañapataqui, ucatarac uca jakejj jake masinacapataquejj jachʼa asqui.

19. Ammonan uca arunac arsuñ tucuyatapatjja, pʼekechirejj walpin cusisïna. Jupasti Diosarojj aqhäm sasaw yuspagaräna: Mä jachʼa jan yatitäc ucaw aca tʼalpha lekʼetanacancpacha. Uca arsuyirinacajj take uqhäm jan yatitanac jaken wawanacapar yatiyañatac waquichatäpachawa.

20. Cunj muspharcañas Diosan luräwinacapajja! Kawkha jaya pachas jupajj marcapataquejj pʼek chʼoktʼasi. Jïsa, jaken wawanacapan amuyunacapajja, wali jan mantcay juyqhuwa. Uca jakenacajj janiw suma amuy thakapquiti, janiraquiw ucan jupanacjjar sarayañap munapcaraquiti.

21. Jupanacajj chʼumi mankhan utjir uywa tamjamäpjjewa, awatiripat jaltirinacaraquiwa. Ucat chʼeketatapjje, alisnucutäpjje chʼumi lakʼonacan mankʼantatäpjjaraqui.