1. Naya Zenifajj takpach Nefi jakenacan lajjrapat yatichatätwa. Nefi oraketa, jan ucajja, awquinacajjan nayrïr tuti orakëc ucat yatisa, nayasti Laman jakenac taypir chʼamanacap yatjjatañatac uñakerjam qhitatäsina, nanacan nuwasiri jakenacajjan jupanacar tucqhir sarapjjañapataqui. Ucampis nayajj jupanac taypin sumanac uñjasaw jan tucqhatäñap muncäyät-ti.

2. Ucat jilanacajjampejj wasaran tokesipjjta. Nayajj munäyät pʼekechirijjan Laman jakenacamp sumancañatac mä arusjäw lurapjjañapa; ucampis khoru jakëtap laycu, wil wartir jakëtap laycuraquiw nayar jiwayayañ munitu; ucampis wali wila wartañampiw jiwañat khespta; cunalaycutejj awquejj awquiru nuwasïna, jilasti jilaru nuwasiraquïna. Nuwasiri tamajjat niy jilpachjamaw wasaran tucusi. Qhitinacatejj jiwañat khespipcta ucanacasti, jiwatanacan warminacapampir wawanacapampir yatiyiriw Zarahemla oraker cut-tapjjta.

3. Ucampis nayajj awquinacajjan orakenacap tutjam catokañ walpin munasaw, cawquïrinacatejj uca oraken utjañ munapcän ucanacarojj tantachthapta, ucat nanacajj uca oraker maqhatañajjataquejj wasaranjam sarañ wastat kalltapjjta. Ucampis machʼanacampi, sinti jachʼa tʼakhesïwinacamp tʼakhesiyatäpjjäyätwa, Dios Tatitujjat amtasiñatac jan yäkasirïpjjatajj laycu.

4. Ucampis walja urunac uca wasaran sarnakapjjatajj khepatjja, jilanacajjajj jiwarayatäpcän uca chekan chʼujlljam carpanacajj utachnokapjjta. Uca chekasti awquinacajjan orakep jacʼancänwa.

5. Ucatsti, jakenacajjat pusinimpiw marcar mant-ta, pʼekechirimp jiquisiri, jupan amuyup yatiñataqui, jakenacajjampejj mantirist janicha orak sumat catuntasiñataquejj uc yatiñajjataquiraqui.

6. Ucat pʼekechirin uc nayajj sarta. Jupampisti mä arusjäwiruw puripjjta nayan Lehi-Nefi orakemp Silom orakemp catuñajjataqui.

7. Uqhämaraquiw jupan jakenacapan uca oraket mistuñanacapataquejj arsuraquïna. Nayamp marcajjampisti uca orak catusjjañataquiw mantapjjta.

8. Ucatsti nanacajj utanac utachañ kalltapjjta, uca marca perkanac asquichañ kalltapjjaracta. Jïsa, Lehi-Nefi marcan perkanacap asquichapjjta, uqhämarac Silom marcan perkanacapsa.

9. Ucatsti yap yapuchañ kalltapjjaracta, take cunayman jathanac phawapjjta. Uca jathanacasti; tonko, trigo, cebada, neas, sheum, take cunayman fruta jathanaca, ucanacänwa. Uca orakenjja, waljaniruw miratatañ kalltapjjta.

10. Ucampis Laman pʼekechirejja, sallka chuymampi jan wali amuyunïtap laycuraquiw nanacar mitʼaniptayañataquejj uca orak nanacar churapjjetu uc catuñanacajjataqui.

11. Ucampis, nanac uca oraken tunca payan mar jacapjjatajj khepatjja, Laman pʼekechirejj llacthaptañ kalltäna. Jupajj sänwa: Aca marcatejj chʼamaniptaspajja, janiw cunjämats atipjañjamäcjjaspati janiraquiw mitʼaniptayañjamäcjjaspasa –sasa.

12. Jupanacajj wacʼan diosanacar yupaychir jayra marcänwa. Ucat jupanacajj amparanacajjan trabajopamp kamiriptañ munapjjäna, mitʼaniptayañ munapjjaraquïtäna. Jïsa, jupanacajj nanacan uywa tamanacajjamp-pachat mankʼañ munapjjäna.

13. Ucat uca Laman pʼekechirejj marcapampir marcajjampiruw chʼajjwañatac amtayäna. Ucat uca orakenjj nuwasïwinacamp chʼajjwanacampejj ucapachat utjañ kalltäna.

14. Cunalaycutejj nayan Nefi oraker tunca quimsan mar sarayquipan, Silom oraket aynach tokena, marcajjajj tamanacapar mankʼaycäna, umaycäna, yap lurapcaraquïn ucapachaw walja walja Laman jakenacajj jupanacjjar jutapjjäna. Ucat jupanacarojj jiwayañ kalltapjjaraquïna, uqhämaraquiw uywa tamanacap ansupjjäna, yapu tonkonacap apasiñ kalltapjjaraquïna,

15. Jïsa, jupanacasti jaltjjapjjänwa, qhitinacatejj jaltjjapjjän ucanacasti, Nefi marcaruw jaltjjapjjäna. Nayarusti jupanacar arjjatañajjataquiw mayipjjetu.

16. Nayasti jupanacarojj arconaca, michʼinaca, espadanaca, cimitarranaca, jachʼa lawanaca, kʼorawanaca, take cunayman nanacan lurat armanac jupanacan nuwasiñapatac laquintäyäta. Nayamp marcajjampisti Laman jakenacaru nuwasiñataquiw sarapjjäyäta.

17. Jïsa, Tatitun chʼamapampiw Laman jakenacamp nuwasirejj mistupjjta, cunalaycutejj nayamp marcajjampejja, take chuymampipuniw achictʼasipjjta; timanacajjan amparapat khespiyañapataqui, cunalaycutejj nanacajj lakʼa achilanacajjan khespiyatätapat amtasipjjta.

18. Diosasti achictʼasïwinacajjarojj istʼänwa, mayisïwinacajjarus phokharaquïnwa. Ucat jupan chʼamapamp mistupjjta. Jïsa, nanacajj Laman jakenacaru nuwasir sarapjjta; ucatsti mä urumpin mä arumampinjja, quimsa warank pusi tunc quimsan jakeruw jiwcatayapjjta. Nanacajj jupanacar orakejjat jaksuñcamaw jiwarayapjjta.

19. Naya pachpasti quipca amparajjampiw jupanacan jiwatanacapar imantañ yanapta. Uqhämaraqui pä patac pakallk tunc llätuncan jilanacajjajj jiwarayataraquïna. Ucasti walpun jaqhusiyapjjetu, llaquisiyapjjaraquitu.