1. Mosia pʼekechirin marcapanjja, quimsa maraw sumancañajj utjäna. Uca khepatjja jupajj jachʼa Lehi-Nefi orakeru, jan ucajj Lehi-Nefi marcar utjasir sarapcän uca jakenacat yatiñ munäna. Jupanacajj Zarahemla oraket mistupcän ucapachatjja, Mosian jakenacapajj janiw cuns jupanacat istʼapcänti. Marcapasti sapa cutiw Mosia pʼekechirir uca jakenacjjat yatiñ mayipjjäna. Uca mayïwisti juparojj karjayänwa.

2. Ucatsti Mosia pʼekechirejja, tunca sojjtan chʼaman jakenac Lehi-Nefi marcarojj maqhatañap munäna, jilanacapat jisctʼasir maqhatapjjañapataqui.

3. Ucatsti khepärmanthejj maqhatañ kalltapjjäna. Jupanacamp sarcän uca taypinsti, mä jakew saräna, Amon sutini. Jupasti jachʼa tansänwa, chʼamaniraquïnwa. Jupajj Zarahemla jaket sarakerïnwa, jupanacar sarayir jakeraquïnwa.

4. Lehi-Nefi oraker maqhatañatac wasaran cawqhsa tok sarañs janiw yatipcänti. Ucat walja uruw uca wasaran aywinakapjjäna. Pusi tunc ururaquiw aywinakapjjäna.

5. Pusi tunc ur aywinakasinsti, mä kolluruw puripjjäna. Uca kollusti Silom oraket alay tokenquiwa. Ucawjan chʼujlljam carpanacap ut-tʼayapjjäna.

6. Ammonajj quimsa jilapampiw Nefi oraker saräna. Uca quimsa jilasti Amalequi, Helem, Hem sutinïpjjänwa.

7. Ucatsti jupanacajj Silom orakenquir Nefi orakenquir jakenacan pʼekechiripampiw jiquisipjjäna. Pʼekechirin arjjatirinacapajj jupanacarojj muyuntapjjänwa, ucat ñachʼantasaw jupanacarojj carcelar jakontapjjäna.

8. Ucatsti pä ur carcelancapjjatap khepatsti, pʼekechirin nayrakataparuw wasitat jupanacajj irpatäpjjäna, ucatsti ñachʼantatanacap jararapjjäna; pʼekechirin nayrakatapansti, cuna jisctʼanactejj jupajj jisctʼañ muncän ucanacar arsupjjañapataquiw arsüna.

9. Jupajj jupanacarojj sänwa: Nayajj Limhïtwa, Noen yokapa. Jupasti Zenifan yokapänwa, Zenifasti Zarahemla oraket mistüna aca orak tutjam catokañataqui. Aca orakesti awquinacapan orakepänwa. Uca Zenifasti jakenacan aruparjamaw pʼekechirir tucuyatäna.

10. Jichhasti, naya pachpa arjjatirinacajjamp puncuncquipan, cunats marca perk jacʼar jutañcam wal chachachasipjjta? Uc yatiñ munta.

11. Nayan jumanacar uc jisctʼañajjataquiw jumanacar catjjäsisipcsma. Jan uqhamäcaspajja, arjjatirinacajjaruw jumanacar jiwayañatac siriscäyäta. Jichhajj parlañanacamawa.

12. Ucat Ammonajj arsusiñapan purinitap amuyasisin nayrakatar sartasajj pʼekechirin nayrakatapar altʼasïna. Ucat wastat saythapisaw säna: Diosan nayrakatapan wali yuspagarañajjaw utjitu nayan jacascaquïtajjata, parlirjamätajjata, uqhämasti khan parlañataquiw chʼamachasï.

13. Nayajj amuytwa, jumatejj nayar uñtʼitasamänjja, janiw aca phalanacamp ñachʼayquitasamänti. Nayajj Ammonätwa, Zarahemlat sarakeriraquïtwa. Zenifajj Zarahemla oraket apscän uca jilanacajjat jisctʼasiriw acar uca oraket maqhatanta.

14. Limhejj Ammonan arunacapar istʼcän ucqhajja, walpin cusisïna, ucat saraquïna: Jichhajj chekpachaw yat-ta, Zarahemlanquir jilanacajjan jacascaquitapjja. Jichhasti nayajj cusisïwa. Kharüruw marcajjar cusisiyaraquï.

15. Nanacajj Laman jakenacan mitʼanipäpjjtwa. Jupanacasti mä chʼama pagañ impuesto nanacar churapjjetu. Jichhajj jilanacajjaw mitʼanipätajjat antutayapjjetani, jan ucajja Laman jakenacan amparapat antutayapjjetani. Nanacasti jilanacajjan mitʼanipäpjjäwa; antisas waliquïniw Nefi jakenacan mitʼanipäpjjañajjajja, Laman jakenacan pʼekechiripar impuest pagañanacajjat sipana.

16. Ucat Limhi pʼekechirejj arjjatirinacaparuw säna, Ammonampir jilanacapampir jan jucʼamp ñachʼantañapataqui. Antisas Silomat alay tokenquir kollur qhitasaw Ammonan jilanacapar marca mankhar irpantayaraquïna, jupanacan mankʼañapataqui, umañapataqui, saräwipan tʼakhesïwinacapat samarañapataqui. Jupanacajj uca saräwin walja cunaymaninac tʼakhesipjjäna; jupanacajj mankʼat awtjayasipjjäna, umat pharjayasipjjäna, karjataw uñjasipjjaraquïna.

17. Ucatsti khepärmanthejj Limhi pʼekechirejj take jakenacap taypin mä yatiynokäwi templor tantachasipjjañanacapatac apayäna, cuna arunactejj jupajj parlcani ucanac istʼañanacapataqui.

18. Jupanacan tant-thapisipjjatap khepatsti, jupajj aqhäm sasaw parläna: Oh marcajjay, pʼekenacam waytapjjam chuymachasipjjaraquim! Cunalaycutejj puriniñapäcän ucapachajj jacʼachasiniwa, mä arunjja janiw ancha jayancquicti. Janiw timanacasampejj catjjäsiyascjjäñäniti. Jumanacajj yatipjjtawa, walja cutiw chʼajjwtan, inamayataquiquiw nuwastan; ucampis amuytwa, jichha mayanjja, nuwasiñasajj janiw inamayäcaniti.

19. Ucat pʼekenacam waytapjjam, cusisipjjaraquim, Diosarusti, Abrahanan Isaacan Jacobon Diosapäcän uca Diosar iyawsapjjam; uqhämaraqui Israelan wawanacapar Egipto oraket irpsuncän ucat wila lamar tayp wañjam maqhataycäna, jupanacaru manamp chʼusa wasaran jan chhakapjjañapatac mankʼaycaraquïn uca Diosar iyawsapjjam. Walja cunaymaninacamp jupanacataquejj luraraquïna.

20. Uca pachpa Diosaw lakʼa achilanacasarojj Jerusalen oraket irpsunïna. Ucatsti jichhacamaw marcapar imasajj uñjaraquistu. Uqhämaraqui jiwasanacan ñankha ajjtcañ luräwinacas laycu mitʼaniptayapjjestu.

21. Jichhürojj jumanacajj ircatirinacäpjjtawa, aca marcan pʼekechiripäcän uca Zenifajj awquinacapan orakep tutjam walpin catokañ munasaw, Laman pʼekechirin uc saräna, ucatsti Laman pʼekechirejja, sallkjjañ chuymampiw mä arsüwir Zenif pʼekechirimp mantäna, ucsa oraket mä kawkhjj Zenifan amparapar catuyasa, jan ucajja Lehi-Nefi marcamp Silom marcamp ucsa tok muytir orakenacamp jupar catuyasa–

22. Take ucanac Lamanajj aca marcar mitʼaniptayañataquiquiw luräna. Jiwasanacasti jichpachas Laman jakenacan pʼekechiripar impuest pagapjjtan. Uca impuestosti take cunat chicat churañawa; tonkosata, cebadasata, take casta yarananacasata cuna castäpasa. Uqhämaraquiw uywa tamanacasan mirakatapat chicat churaractan. Take cunanacatejj jiwasanacan utjqui ucanacatjja, Laman jakenacan pʼekechiripajj chicatpach apakestu. Jan uqhäm churapcañänejja, jacäwinacas apakestani.

23. Janit ucajj kʼepisjam jathïqui? Janit uca tʼakhesïwisajj jachʼäqui? Uñjapjjam, cunanacat jaqhusiñasas utjejja.

24. Nayajj jumanacaruw sapjjsma: Jachʼanacaw utji jiwasanacasan jaqhusiñasataquejja. Kawkha jilanacasas jiwarayatäpjjäna? Wilapasti inamayaw wartasïna. Take ucanacasti ñankha luräwinac laycuwa.

25. Janitejj aca marcajj juch lurapcasapänjja Tatitojj aca jachʼa ñankhanacjja, janiw jumanacjjar puriycasapänti. Ucampis jupanacajj janiw arunacapar yäkapcänti. Antisas purapat wil wartasiñapcamaw chʼajjwanac jupanac purajj uñstayäna.

26. Tatitun mä arjiriparuw jiwayapjjaraquïna, jupasti Diosan ajllit jakënwa. Jupajj jupanacarojj ñankha ajjtañanacapata, walja jutir cunanacat khanañchasaw yatiyaraquïna. Criston jutäwipats yatiyänwa.

27. Jupasti jupanacarojj sänwa: Cristojj Diosawa, take cunan Awquiparaquiwa, jupajj jakjam uynak catuni; uca uynak quipcaquiw kalltäwin jakenacajj utjayatäpjjäna, jan ucajj jupajj sänwa: Jakenacajj Diosan uynakap quipc utjayatäpjjänwa; Diosajj jaken wawanacap taypiruw sarakanini; jupajj janch wil catuni, orak patan sarnakaraquini.

28. Jupan uqhäm satap laycuw jupanacajj juparojj jiwayapjjäna. Walja cunaymaninacamp lurapjjaraquïna, ucanacasti Diosan colerasïwip jupanacjjar puriyäna. Ucatjja qhitis muspharaspa jupanacan mitʼanïtapats jachʼa tʼakhesiyäwinacamp tʼakhesïwipatsa?

29. Tatitojj sänwa: Marcajjatejj juch lurapcan ucürojja, janiw jupanacar yanapcäti. Antisas thaquinacap jarcʼantä, jupanacan jan jachʼaptañapataqui. Luräwinacapasti lanktañ kaljamäpjjaniw jupanacataquejja.

30. Jupajj saraquiwa: Marcajjatejj kʼañunac phawanejja, trabajonacapat chʼallphac tutucan catokani, ucasti venenjamawa.

31. Wastat jupajj sascaquïna: Marcajjatejj kʼañunac phawanejja, inti jals thay trabajonacapat catokani. Uca thayasti ucspachaw tucqhañ apanini.

32. Jichhasti, Tatitun arsüwipajj phokhasiwa. Jumanacajj jawkʼantatäpjjtawa, tʼakhesiyatäpjjaractawa.

33. Ucampis Tatiturutejj takpach chuymamp cutiquipstapjjäta, juparutejj alcatapjjäta, juparutejj take amuytʼa chuymamp lokapjjäta, jupan quipca munañaparjama, munataparjam lurasa. Uqhäm lurapjjät ucajja, catuntäwit antutnucuyapjjätam.