1. Cuna arunactejj Tatitun alajjpach qhitapajj Benjamin pʼekechirir churcän ucanac arsuñ tucuycän ucapachajja, jupajj take tokeruw uñatatäna. Uca walja jakenacasti oraker liwirtatäpjjänwa, cunalaycutejj Tatitut ajjsarañapaw jupanacarojj catuntatayna.

2. Jupanac pachpaw janchin irpatätap amuyasipjjäna. Uca utjäwipasti orak lakʼats jucʼaquïnwa. Jupanacajj mä arumpiquiw jachʼat artʼapjjäna, aqhäm sasa: Qhuyapayapjjeta, juchanacajjar pampachañataqui, chuymanacajjar kʼomachañataqui juchanac lanti tʼakhesiñar phokher Criston wilap utjayapjjeta. Nanacajj Diosan Jesucristo Yokaparuw iyawsapjjta. Jupaw take alajjpachsa acapachsa take cuns luri. Jupasti jaken wawanacap taypiruw jutani –sasaw sapjjäna.

3. Jupanacajj uca arunac arsupcän uca khepatjja, Tatitun Ajayupajj jupanacjjaruw jutäna. Juchanacap pampachatïpanjja, cusisiñajj jupanacan phoktʼatänwa. Jupanacan chuymanacapanjja, sumancañaw utjaraquïna, Benjamin pʼekechirin arsut arunacaparjam jutcani uca Jesucristor jachʼa iyawsawinïtap laycu.

4. Benjamin pʼekechirejj wastat lacap jistʼarasaw jupanacarojj arsuñ kalltäna, aqhäm sasa: Jilanacajja, masinacajja, wila masinacajja, marcajja, wastat jumanacar cuna arunactejj jucʼamp arsupcäma ucanac istʼañanacamataqui amuyañanacamatac istʼapjjet –sapjjsma.

5. Cunalaycutejja, Diosan qhuyapayasiñapat yatiñatejj pʼarjjtayapjjstamjja, jumanacan jan walïpjjatama, ñankhäpjjatama, tincutäpjjatamjja,

6. Nayajj jumanacaruw sapjjsma: Jumanacatejj Diosan qhuyapayasiñapat yatiñar puripjjstajja, jan cunamp jakthapcay chʼamapata, suma amuyasiñapata, jaypach suyañapata, jaken wawanacapatac jachʼa chuymanïtapat yatiñar puripjjaracstajja, uqhämaraqui, orak luräwitpach ut-tʼayatäcän uca juchanacan tʼakhesiyäwipar phokhäwit yatiñar puripjjaracstajja– (juchanacan tʼakhesiyäwipar phokhäwisti khespiyañ puriyañataquiwa, qhititejj Tatitur alcatcaspa, camächitanacapar jan apanucus phokhcaraquispa, jacañap tucusiñcama, jan ucajja, aca jiwir janchin jacañ tucusiñapcam iyawsascaquispa ucanacarojja)–

7. Nayajj sistwa: Qhitinacatejj uqhäm lurapqui ucanacaw khespiyasiñjj catokapjjani, juchanacan tʼakhesiyäwipar phokhäwipatjja. Uca phokhäwisti orakejj ut-tʼayatäcän ucapachatpach waquichatawa, Adanan tincutapat utjcän uca jakenacataqui, jichhajj utjqui ucanacataqui, oraken tucusïwipcam utjcan take uca jakenacataquiwa.

8. Uqhämat khespiyasiñajj juti. Janiraquiw ucat jucʼamp yakhan khespiyasiñajj utjquiti. Janiraquiw jumanacar arsutäqui uca luräwinacat yakhanacajj utjquiti, jakenacan khespiyasiñapataquejja.

9. Diosar iyawsapjjam, jupan utjatapar iyawsapjjaraquim. Jupan take cun alajjpachans acapachans luratapar iyawsapjjam. Jupan take acapach alajjpach amuyunïtapar chʼamanïtapar iyawsapjjam. Take cunanactejj Tatitojj amuyqui, jaken ucanac jan amuyatapar iyawsapjjaraquim.

10. Jumanacajj juchanacam apanucus ucanacat cutiquipstapjjañamawa. Dios nayrakatan chuymanacamar llampʼuptayasipjjañamawa. Uqhämaraqui takpach cheka chuymampi, juchanacamar jupan pampachañapatac mayisipjjañamaraquiwa. Ucanac iyawsapjjam. Take ucanactejj iyawsapjjstajja, ucanac lurapjjam.

11. Cunjämatejj nayrajj sapcsma, jichhajj wastat uqhäm sapjjaracsma, Diosan khapak cancañapat yatïwir puriñanacamarjamajja, jumanacatejj sumätapat yatipcta, munasiñap uñtʼapcaracta, juchanacam pampachäw catokapcaractajja, uca pampachäwisti jumanacar walpin cusisiyapjjtam. Uqhämanac lurapjjstajja, Diosan jachʼätapat jumanacan jan cunätamat amtasiñam wiñay amtasiñam nayajj munirista. Diosan sumätapjjata, juma jan suma jakenacaru jupan chuymanïtapjjat amtasiñam munaracta. Diosan sutipar sapür mayisisa, cunatejj alajjpach qhitan aruparjamajj jutcani ucar jan apanucusa, iyawsasa, jumanacan chuymanacam llampʼur tucuyasiñanacam munaracta.

12. Nayajj jumanacaruw sapjjsma: Jumanacatejj uqhäm lurapjjätajja, cusisipjjapunïtawa, Diosan munasiñapajj jumanacan phoktʼatäniwa, juchanacamajj wiñay pampachataraquïniwa; qhititejj jumanacar utjayapctam ucan khapak cancañapata, jan ucajja asquïqui ucatjja, jucʼamp jucʼamp yatekapjjaraquïta.

13. Janiraquiw jumanac purajj chhojjriñchasiñs munapcaraquïtati. Antisasinsa sumancañan utjasiñ munapjjäta sapakat maynir wactʼqui ucarjam churañ munapjjäta.

14. Janiraquiw wawanacamar mankʼat awtjata jan isin sarnakañap munapcaraquïtati. Jupanacan Diosan leyinacap jan phokhañapsa, jupanac pura chʼajjwasiñapsa, nuwasiñapsa janiraquiw munapcätati. Janiw jupanacan supayar lokañapsa munapcapuniraquïtati. Uca supayajj juchan sarayiripawa. Lakʼa achilanacasajj ñankha ajayut arsupcän uca ñankha ajayuraquiwa. Jupajj take asquin timapawa.

15. Antisas wawanacamarojj cheka suma amuyir thaquin sarnakañ yatichapjjäta. Jupanac pura munasiñs loktasiñs yatichapjjaraquïta.

16. Cawquïrirutejj yanapañamajj waquisqui ucanacarojja, jumanac pachpaw yanapapjjaraquïta. Cawquïrintejj jan cunas utjqui ucanacarojja, jumanacan yänacamat wajjtʼapjjäta. Janiw mayjasirir inamay mayisiyätati. Janiraquiw chhaktjjañapatac jupar alisnucütati.

17. Inas jumajj sischïta: Jakejj jupa pachpaw quipca tʼakhesiw puriyasi. Ucat amparajj jan loktcäti, janiraquiw jupar mankʼajjats yänacajjats jupan jan tʼakhesiñapatac churcäti, cunalaycutejj tʼakhesïwinacapajj asquiw –sasajja.

18. Ay jakenaca, nayajj jumanacaruw sapjjsma: Qhititejj uqhäm lurcanejja, jupajj juchat cutiquipstañapapuniwa. Janitejj uca luratapat cutiquipstcanejja, wiñayataquiw chhaktani. Janiraquiw Diosan khapak marcapanjja, tut catokcaraquiniti.

19. Janit takpach jiwasanacajj mayjasirinacäpctanjja? Cunatejj jiwasanacan utjqui ucanacsa, mankʼsa, is-sa, korsa, kollksa, jiwasanacan take cunayman cʼajquirinacas-sa. Janit takpach jiwasanacajj take ucanac mä sapa Diosat catokapctanjja?

20. Jichpachaw jumanacajj jupan sutipar artʼasa juchanacam pampachayasiñataquejj mayjasipjjtajja. Jupasti inamay mayisiyapjjtamti? Janiwa. Jupajj Ajayup jumanacjjarojj wartani. Chuymanacamarusti cusisiñampiw phoktʼayi. Uqhämaraqui sinti jachʼa cusisiñamïpana, lajjranacamar saytʼayi jan arsuñamcama.

21. Diosaw jumanacarojj utjayapjjtam; take jumanacan utjqui ucanacsa, cunäpcta ucsa, jumanacar churapjjtam. Jichhajja cuna asquitaquitejj catokañamar iyawsas Diosat iyawsañamp mayipcta ucjja, jupaw jumanacarojj churapjjtam. Uqhämasti, janit jumanac purajj yänacamat wajjtʼasipjjañamajj waquisqui?

22. Jumanacatejj jan chhaktañatac wajjtʼit sir jaker juchañchañcam taripapjjätajja, cunj jachʼänis jumanacan juchañchäwimajja, yänacamat jan wajjtʼatam laycu? Cunalaycutejj yänacamajj janiw jumanacancquiti, antisas ucanacajj Diosanquiwa. Jacäwimas jupancaraquiwa. Ucampis janiw cuns juparojj wajjtʼit sasajj sapctati, janiraquiw luratamats cutiquipstapcaractati.

23. Nayajj sapjjsmawa: ay uca jaketa, yänacapajj jupamp chicaw chhaktani. Cawquïrinacatejj orak yänacapamp kamirïpqui ucanacaruw ucanacjj sista.

24. Ucjjarusti, jan cunanïpcta ucanacaruw sapjjsma, ucampis urut urur kamañamataquejj janiw pistʼapctamti, cawquïrinacatejj jan utjirinïpjjatam laycojj achictʼasirinacar jan churapcta ucanacaruw sapjjsma, chuymanacaman aqham sañam munirista: Nayajj jan cunanïtajj laycuw jan churcti, ucampis nayan utjaspajja churaraquiristwa.

25. Jumanacatejj chuymanacaman uqhäm sapjjätajja, janiw juchanïpctati. Ucampis janitejj uqhäm lurapcätajja, juchañchatäpjjätawa, cunalaycutejj cunanactejj jan catokapctas ucanac munapayapjjtajja.

26. Cunanactejj arsupcsma ucanacataqui – sañ muntwa, urutjam urutjam juchanacamar pampachäwinïñamataqui, Diosan nayrakatapan jan juchan sarnakapjjañamataqui – jumanacan jan cunaninacar yänacamat wajjtʼapjjañanacam munirista, sapakat maynejj utjapctam ucarjama. Uca wajjtʼäwinacamasti aqhämawa; awtjayasirinacar mankʼayaña, isit jalstat jakenacar isiyaña, usutanacar tumpaña, jupanacar ajayurjam janchirjam munañanacaparjamarac chuymachaña.

27. Take ucanacsti amuyumpi waquisitarjam sum lurapjjam. Mä jaken chʼamapajj kawkhatejj utjqui ucat jucʼamp jalañapajj janiw waquisquiti. Ucampis uca jaken wajjtʼäw catokañapataquejja, take chuymamp lurañapaw waquisi. Uqhämasti take cunas waquisitaparjam wali sum luratäñapawa.

28. Cawquïritejj jake masipat mä cuns maytʼasqui ucajja, uca arsutaparjam cut-tayjjañapawa. Jan uqhäm lurcanejja juch lurani. Uqhämaraqui inas jake masipar juch lurayarac-chini. Ucanacat amtasiñam munaracta.

29. Take jucha lurañanac janiw nayajj khanañchapquirismati; cunaymaniw juch lurañanacajja. Nayataquisti juch lurañanacajj janiw jaqhuñjamäquiti.

30. Ucampis aqhäm sapjjerisma: Janitejj jumanacpach uñjasipcäta, janirac lupʼïwinacamaru, arunacamaru, luräwinacamarus uñjasipcäta, Diosan camächitanacapar phokhapcaraquïta, Tatitusan jutañapat istʼapct ucar jiwañcam iyawsasipcaquïtajja, jumanacajj chhaktapjjätawa. Jichhasti, jakenaca, amtasipjjam, jan chhaktapjjañamataqui.