1. Benjamin pʼekechirejj jakenacar parlañ tucuycän ucqhajja, cawquïrinacatejj Diosamp jupan camächitanacapar phokhañatac arsüwir mantapcän ucanacan sutinacap kellkantañan waquisitap amuyasïna.

2. Take uca jakenacatjja jiscʼa wawanacaquiw Diosamp arsüwir jan mantapcänti, Criston sutips catjjarupcaraquïnti. Ucat ucsarojj takpachaniw Diosamp arsüwir mantapjjäna.

3. Ucatsti Benjamin pʼekechirejj take ucanac tucuycän ucqhajja, Mosia yokaparojj uca marcapar sarayirïñapatac pʼekechirïñapatac yakhaktaycän ucqhajja, jupar takpach marcar apnakañapatac camächitanac churcän ucqhajja, jakenacan Diosan camächitanacap istʼañapatac yatiñapatac jupanacar yatichañataqui, lurapcäns uca arsüwipat jupanacar amtasiyañataquiw ucat sacerdotenacar ut-tʼayäna, ucat jupajj jakenacar qhitanucjjäna. Jupanacasti sapakat mayniw famil familia utanacapar cut-tapjjaraquïna.

4. Mosiasti ucapachat ucsarojj tatap lantiw sarayañ kalltäna. Jupajj marcar sarayañ kalltcän ucapachajj quimsa tunc maranïnwa. Niyapuniw pusi patac pakallk tunc sojjtan marajj Lehin Jerusalen marcat mistunitapat sarakjjaraquïna.

5. Benjamin pʼekechiristi quimsa marampiw ucqhat, jacascäna, ucat jiwjjäna.

6. Mosia pʼekechiristi Tatitun thaquipan sarnakäna. Tatitun camächinacaparus leyinacaparus phokharaquïnwa. Cunanactejj Diosajj jupar camächitjam churcän uca take camächitanacarojj phokharaquïnwa.

7. Mosia pʼekechirejj marcapar wal yap lurayäna. Jupa quipcas luraraquïnwa, marcapatac jan jathïñapataqui, ucatsti take cunan awquipajj lurcän ucarjam lurañapataquiraquiw jupa pachpajj yap luraraquïna. Take marcap taypinsti quimsa maraw chʼajjwanacajj jan utjcänti.