1. Ucat Amulonajj Laman jakenacan pʼekechiripamp sumancäna; Laman jakenacan pʼekechiripajja, jupampir jilanacapampiruw jupanacan uca marcapan yatichirïñapatac ut-tʼayäna. Jupanacasti Semlon Silom Amulon uca orakenacanquirinacan yatichirinacapäpjjänwa.

2. Laman jakenacajj takpach uca orakenac catupjjäna, ucat Laman jakenacan pʼekechiripajj take uca orakenacan pʼekechirinac ut-tʼayäna.

3. Laman jakenacan pʼekechiripajj awquipan sutipanïnwa, Laman sata, ucat Laman pʼekechiri satänjja. Jupajj walja jakenacan pʼekechiripänwa.

4. Cawquïr orakenacantejj jupan jakenacapajj utjapcän uca orakenacataquejja, yatichirinacajj Amulonan jilanacapat ut-tʼayatänwa; uqhämat Nefin arupajj ucapachat ucsarojj take Laman jakenacar yatichasiñ kalltäna.

5. Jupanacasti masinacapataquejj suma jakëpjjänwa, ucampis janiw Diosar uñtʼapcänti. Janiraquiw Amulonan jilanacapajj jupanacar Dios Tatitupat cuns yatichapcaraquïnti; Moisesan leyips Abinadin arunacaps janiw jupanacar yatichapcaraquïnti:

6. Antisas jupanacjjat kellkatanac imañ yatichapjjäna. Ucatsti jupanac pur kellkañanacapataquiw yatichapjjaraquïna.

7. Uqhäm Laman jakenacajj cʼajquir kamiriptañanacamp ucapachat jachʼaptañ kalltasajj jupanac pur alaquipasiñ kalltapjjäna. Jupanacajj ucapach ucsar chʼamaniptasaw chʼiqhi lurir marcar tucuñ kalltapjjäna, acapachan yatiñarjama. Jïsa, chʼiqhi jan wali amuyun marcaruw tucüna, cunayman ñankha luräwinacana, lunthatañanacan cusisir marcaruw tucuraquïna; quipca jilanacap taypinac jan uqhamäpcänti.

8. Ucat Amulonajj Almampir jilanacapampir khorutasiñ munañaparjamaw sarayañ kalltäna; Almarusti arcanakaraquïnwa. Ucat Amulonajj wawanacaparojj jupanacan wawanacaparuw arcanakayaraquïna.

9. Amulonajj Almar uñtʼänwa, jupan pʼekechirin sacerdotëtap yatiraquïnwa. Uqhämaraqui jupan Abinadin arunacapar iyawsas pʼekechirin ucat alisnucutätap yatiraquïna. Ucat Almataquejj colerasïna. Amulonajj Laman pʼekechiriruw jaysäna, ucampis jupanacar sarayasajja, chʼama lurañanac jupanacar churäna, ucatsti jilakatanacjam jupanacataquejj ut-tʼayaraquïna.

10. Uca tʼakhesïwinacapan jachʼätap laycuw jupanacajj Diosar take chuymamp artʼasiñ kalltapjjäna.

11. Amulonajj jupanacan arnakasitanacap amuctʼayañ munäna. Ucat soldadonac jupanacar uñchʼuquir uscüna; qhitinacatejj Diosar artʼasquir catjatäcän ucar jiwayañataqui.

12. Ucat Almamp jakenacapampejj Dios Tatitupar jachʼat jan artʼasipcänti. Antisas chuymanacapan jupar artʼasipjjäna; jupasti chuymanacapan amuyäwinacap yatïna.

13. Ucat Tatitun arupajj tʼakhesïwinacap taypin jupanacarojj aqhäm sas purïna: Pʼekenacam waytapjjam, sum chuymachasipjjaraquim. Cuna arusjäwtejj nayamp lurapctas ucjj yat-twa. Nayaw marcajjampejj arusjäwir mantä, ucatsti mitʼanïtapat antutayaraquï.

14. Nayasti jiqhaniman kʼepinacap sujaptayä, janis kʼeptʼatäpcasmajj uqhäm amuyasiñanacamataqui. Mitʼanïpcätas uc-chañcamaw ucjj lurä, ucsti jumanacan jichhat ucsar nayat ircatapjjañamataquiw lurä. Uqhämaraqui, naya Dios Tatitun marcajjan tʼakhesïwinacapan tumpirïtajj yatiñanacamataquiw luraraquï.

15. Ucat Almampir jilanacapampir uchat kʼepinacajj sujaptayatäna. Tatitojj jupanacaruw chʼam churäna, jupanacan kʼepinacap jan jiwtas kʼepiñanacapataqui. Jupanacasti cusisiñampi llampʼu chuymampiw Tatitun take munañapar iyawsapjjäna.

16. Ucat jachʼa iyawsañanïtap laycu, llampʼu chuymanïtap laycuraquiw Tatitun arupajj wastat jupanacar purïna: Chuymachasipjjam, cunalaycutejj kharüruw mitʼanïtamat apsupjjäma.

17. Almarusti sänwa: Jumajj aca marcan nayrakatap saräta; nayasti jumamp sarasaw aca marcar mitʼanïtapat apsü.

18. Ucat Almamp marcapampejj arumaw uywa tamanacaps yarananacaps apthapisipjjäna; jïsa, arum pakariw tamanacap anthapipjjäna.

19. Ucat willjta tokeruw Tatitojj Laman jakenacarojj jachʼa iquimp iquirayäna. Takpach jilakatanacapas jiwatjamaw iquirapjjäna.

20. Almamp jakenacapampisti wasararuw mistupjjaraquïna. Ur jornal sarasinjja, mä vallen chʼujlljam carpanacap ut-tʼayapjjäna. Alman jupanacar irpatap laycuw, uca vallerojj Alman sutipamp sutiyapjjäna.

21. Uca Alma sutin kherwajja, Diosan jupanacar qhuyapayatapata, kʼepinacap sujaptayatapata, mitʼanïtapat mistuyatap laycuw jupar wal yuspagarapjjäna. Cunalaycutejj jupanacajj mitʼanïpjjänwa, janiraquiw qhitis jupanacar antutaycasapänti, jan ucajja, Dios Tatituquiw ucat jupanacar antutayasapäna.

22. Jupanacasti Diosaruw yuspagarapjjäna; arsurjamäpcän uca chachanacas warminacas wawanacas takeniw Diosarojj jachʼar aptapjjäna.

23. Tatitusti Almarojj sänwa: Jumamp aca jakenacampejj acawj oraket lak mistupjjam, cunalaycutejj Laman jakenacajj iquit sartapjjewa. Jichhasti jumanacaruw arctanipjjtam; uca laycu acawj oraket mistupjjam. Nayaw Laman jakenacarojj aca vallen saytʼayä, aca marcar jan jucʼamp arctasipcañapataqui.

24. Ucat jupanacajj vallet mistsusaw wasaranjam sarapjjaraquïna.

25. Tunca payan uru wasarancasinsti, Zarahemla orakeruw puripjjäna. Mosia pʼekechiristi jupanacarojj cusisiñampiw catokaraquïna.