1. Ucatsti jan iyawsirinacan iyawsiri tamar arcanakäwinacapajj wali jachʼaruw tucüna, iglesiasti arusisaw jilïrinacapar ucanacat yatiyañ kalltäna. Jupanacasti Almaruw yatiyapjjäna; Almasti jupanacataquejj Mosia pʼekechiriruw achictʼäna. Ucat Mosiajj sacerdotenacapamp arustʼäna.

2. Mosia pʼekechiristi take uca orakenjja, yatiynokayänwa; janiw cawquïr jan iyawsiris Diosan iglesiapanquirinacar arcanakañapäquit –sasa.

3. Take uca iyawsiri tamanacaruw chʼama camächitajj churasïna, jupanac taypin arcanakañ jan utjañapataqui, takpach jakenacan quipcäpjjañapataqui.

4. Uqhämaraqui, jupanacajj janiraquiw jachʼa jachʼa tucuñan sumancañapar tucusiyañap munapjjañapäcänti. Sapakat maynejj jake masipar jupa quicpätjam amuyasiñapänwa, quipca amparanacapamp jacapjjañapatac trabajapjjañaparaquïnwa.

5. Takpach sacerdotenacapamp yatichirinacapampejj jacañanacapataquejj quipca amparapamp trabajapjjañapänwa; usutäpcaspas, wali kʼoyäpcaspas ucqhaquiw yanapatäpjjañapäna. Ucanac lurasasti Diosan qhuyapayañapajj waliw utjäna.

6. Ucat uca orakenjj walja sumancañaw utjañ kalltäna. Uca jakenacajj waljanir tucuña, uc-chʼpach orakjjar chʼekentañ ucat ucsarojj kalltapjjäna. Jupanacasti alay tokens, aynach tokens, inti jals tokens, inti jalant tokens, chʼeketatatäpjjaraquïnwa. Uqhämaraqui jachʼa marcanac comunidadanacamp take orak muytat token ucapachat lurañ kalltapjjaraquïna.

7. Tatitusti jupanacar tumpasaw jachʼaptayäna; jupanacasti jachʼa kamir marcaruw tucupjjaraquïna.

8. Ucampis Mosian yokanacapajj jan iyausirinacamp jaqhutänwa. Alman yokanacapat maynïrejj awquipjam Alma satäcän ucajja, ucanacamp jaqhutaraquïnwa. Uca Alma yokasti idolo yakha diosanacar yupaychir wali ñankha jakeruw tucüna, wali arun jakeraquïnwa. Jakenacarusti walja alek jachʼar aptir arunac parlaraquïna. Ucat walja jakenacaruw jupan ñankha luräwinacaparjam lurañar irpäna.

9. Jupasti Diosan iglesiapan jan jachʼaptañapatac jachʼa jarqʼiriruw tucüna; walja jakenacan chuymanacap uca iyawsiri tamat cutekayäna. Jupanac taypin walja pitusïwinac utjayaraquïna. Uca pitusïwinac laycuw Diosan timapajj jupanacjjar chʼamanïsin cunayman lurayäna.

10. Ucat Almajj Diosan iyawsiri tamapar tucqhañatac sarnakcän ucqhajja – cunalaycutejj jupajj Mosian yokanacapampiw jamasat sarnakäna iglesiar tucqhañataqui, Tatitun jakenacapar chekat irpakañataqui Diosan camächitanacapar jan yäkasa, pʼekechirin camächitjam arunacaparus jan yäkasaraqui–

11. Cunjämatejj sapcsma, jupanacajj Diosar kallcatas sarnakapcän ucqhaw, Tatitun qhitapajj jupanacar uñstäna; jupajj kenayanjamäcaspas uqhäm sarakanïna; khejjokhejjöcaspas uqhäm arumpiw jupanacar parläna, ucasti saytʼapcäns uca oraker qhathat-tayaraquïnwa.

12. Jupanacan jachʼa muspharatap laycuw oraker liwitat-tapjjäna, uca qhitajj jupanacar parlcän uca arunacjj janiraquiw amuyapcaraquïnti.

13. Ucampis jupajj wastat aqhäm sas arsüna: Alma, saytʼam; aca chekar jacʼachasinita. Cunats Diosan iyawsiri tamapar arcanakta? Tatitojj siwa: Acajj iyawsiri tamajjawa, nayaw ucjj ut-tʼayaraquï. Janiraquiw cunas ucar atipcaniti, jan ucasti marcajjan juch luratapaquiw ucjj tucqhaspa.

14. Qhitajj saraquïnwa: Tatitojj marcapan mayisïwinacaparojj istʼiwa. Uqhämaraqui Alma awquiman lokeripan mayisïwinacaparus istʼaraquiwa. Awquimajj jumjjat jachʼa iyawsañampiw Diosat mayisïna, cheka yatïwir puriyatäñamataqui. Ucat nayajj jut-ta, Diosan chʼamapampit munañan cancañapampit jumar iyawsayiri. Ucatsti lokerinacapan mayisïwinacapasti iyawsäwiparjam phokhasiñataquiraquiwa.

15. Uqhämasti Diosan chʼamapar jaychasismati? Janit nayan arujjajj oraker qhathat-tayqui? Janit nayar juma nayrakatan uñjquista? Nayasti Diosan qhitanitätwa.

16. Jichhasti nayajj jumaruw sisma: Awquinacaman Helam orakens, Nefi orakens catuntatapat amtasis saram, ucatsti cuna jachʼa luräwinactejj jupanac laycojj lurcän ucanacat amtasiraquim. Jupanacajj mitʼanïpjjänwa, ucat jupanacarojj antutayäna. Jichhasti nayajj juma Almaruw sisma: Thaquinjam sarascaquim; iyawsiri tamar jan jucʼamp tucqhañ munamti, jupanacan mayisïwinacapan phokhatäñapataqui. Juma pachpatejj jakonucutäñ muncstasa, arunacajjarjam luram.

17. Ucanacaw Almar khepa arsut qhitan arunacapajja, ucat sarjjäna.

18. Ucatsti Almamp jupa chictʼatanacampejj wastat jachʼa muspharatap laycuw oraker liwitat-tapjjäna; cunalaycutejj jupanacajj quipca nayranacapampiw Tatitun qhitapar uñjapjjäna. Jupan arupajj khejjokhejjojj orak qhathat-tayquejj uqhämänwa. Jupanacasti yatipjjaraquïnwa, Diosan chʼamapaquiw orakerojj jalatat-taycaspas uqhäm qhathat-tayaspa.

19. Alman muspharatapan wali jachʼätap laycusti jupajj amutuptänwa. Janiraquiw lacap jistʼarjjänti; jïsa, jupajj wal tʼuqhartäna. Amparanacaps janiraquiw aytirjamäcänti. Ucat jupamp chictʼatäcän ucanacaw juparojj waytapjje, ucat awquipan ucarojj kʼala thayjtat puriyapjje.

20. Jupanacasti take cunatejj jupar camachcän ucanac awquiparojj yatiyapjjäna. Jupan awquipasti Diosan chʼamapätap yatitap laycojj cusisïnwa.

21. Jupasti walja jakenacaruw tantachayäna, cuntejj Tatitojj yokap laycojj lurcän uc uñjapjjañapataqui, uqhämarac jupamp chicäpcän ucanac laycusa.

22. Jupasti sacerdotenacaruw tantachayaraquïna, jupanacasti ayunañ kalltapjjäna, Dios Tatituparuw achicañ kalltapjjaraquïna. Alman lacap arsuñapatac jistʼarañapataqui, uqhämaraqui amparanacapampin cayunacapampin chʼam catokañapataqui. Take ucanacasti jakenacan nayranacapan jistʼartañapataquïnwa, Diosan qhuyapayasiñapamp khapakapamp uñjañataqui uñtʼañataquiraqui.

23. Ucat jupanacajj pä urump pä arumamp ayunas mayisipjjatap khepat, Alman amparanacapamp cayupampejj chʼam catokapjjäna. Jupasti saytʼasaw jupanacar parlañ kalltäna, sum chuymachasipjjam –sasa.

24. Jupajj jupanacarojj sänwa: Nayajj juchanacajjat cutiquipst-twa. Tatitun cutsuyataraquïtwa; nayajj ajayut nasta.

25. Tatitusti situwa: Takpach jakenacan chachanacas warminacas takpach orakenacas familianacas lajjranacas jakenacas ucanacan wastat naciñapätat jan musphamti. Jupanacajj janchjam tincut utjäwipatjja, asqui utjäwir turcatäsaw Diosat yuripjjañapa, Diosan cutsuyatäsasti jupan yokapar phuchapar tucusa.

26. Uqhämat jupanacajj machak jaker tucupjje; janitejj uqhäm lurapcanejja janiw cunjämats Diosan khapak marcap tutjam catokapcaspati.

27. Nayajj jumanacaruw sapjjsma: Janitejj uqhäm lurapcanejja, jakonucutäpjjaniwa. Nayajj ucjj yat-twa, cunalaycutejj nayajj niyapuniw jakonucutäyäta.

28. Ucampis walja tʼakhesïwinac taypin uñjasisajja, niy jiwañcam juchat cutiquipstasaw, Tatitojj qhuyapayäwipampi wiñay naqhantañat nayar khespiyitu. Ucat nayajj Diosat nasta.

29. Almajjajj cʼallcʼu mulljam cʼallcʼuncatapat ñankha luräwinacan phalanacapats cutsuyatawa. Nayajj take cunat sipan jucʼamp chʼamac jakhe mankhancäyätwa, ucampis jichhajj Diosan muspharcañ khanaparuw uñjta. Almajjajj wiñay tʼakhesiyäwimp tʼakhesiyatänwa, ucampis jichhajj cat-thapitätwa. Almajjasti janiraquiw jucʼamp uscjjeti.

30. Nayan cutsuyirijjarojj janiw muncäyät-ti, uqhämaraqui cuntejj awquinacasajj arsupcän ucjja, janiw chekäquit saraquïyätwa. Ucampis jichhajja, jutañaps take jupan luratapat amtasiñaps ucat nayr uñjañanacapataquiw jupajj takenir uñachtʼayasini.

31. Jupa nayrakatanjja, sapa konkoriw quilltʼasini. Sapa lajjraw arusiraquini. Khep khepa urun take jakenacaw jupan taripatäñanacapatac saytʼapcan ucapachajja, jupan Diosätap arsusipjjani. Ucat Diosamp oraken jan utjirinacajj jupanacjjar wiñay tʼakhesiñatac taripäwin chekar uñjañarjamätap arsusipjjaraquini. Jupanacasti ajjsarthapisaw lakhakes qhathatipjjaraquini, jupan take cun uñjir nayrapan uñjataparjama.

32. Ucatsti, Diosan qhitapajj uñstcän ucürut ucsaruw, Almamp jupamp chicäpcän ucanacampejj marcar yatichañ kalltapjjäna, take uca orake tokenacar sarasa cuntejj uñjapcän istʼapcaraquïn, ucanacat take jakenacar yatiyasa, walja tʼakhesiñ taypin Diosan arup yatiyasa, jan iyawsirinacan wal arcanakatäsa, jupanacat waljanimp jawkʼjjatäsaraqui.

33. Ucampis take ucanacampiw jupanacajj iyawsiri tamar wal chuymachapjjäna, iyawsañanacapar chʼamañchasa, pʼek chʼoktʼasisa, chʼamachasisa. Diosan camächitanacapar phokhapjjañapatac ewjjasa.

34. Jupanacat pusinejj Mosian yokapänwa. Sutinacapasti; Ammon, Aaron, Omner, Himni, ucanacänwa, Mosian yokanacapajj uqhäm sutinïpjjänwa.

35. Jupanacasti takpach Zarahemla orakenjam sarapjjäna, ucatsti cawquïr jakenacatejj Mosia pʼekechirin sarayatapcän, take ucanac taypin sarapjjaraquïna. Cuna chhojjrinactejj jupanacajj iyawsiri tamar lurapcän ucanac asquichañatac wal lurasa, takpach juchanacap arsusisa, cunanactejj uñjapcän ucanacat yatiyasa, cawquïrinacatejj istʼañ munapcän ucanacarojja, jutir cunanacat yatiyäwinacs kellkatanacs khanar apsusaw sarapjjaraquïna.

36. Uqhämat khepa yatïwir waljanir puriyañataquejj Diosan amparapan apnakatäpjjäna; jïsa, cutsuyiripat yatïwir puriyañataqui.

37. Cunj qhuyapayatas jupanacajja! Sumancañ yatiyapjjäna; asqui suma yatiyäwinac yatiyapjjaraquïna; jakenacarusti Tatituw sarayi –sapjjaraquïnwa.