1. Ucat pä mararojja, Abinadejj jupanac taypirojj yakhar uñtataw jutäna. Jupanacasti janiraquiw jupar uñtʼapcaraquïnti, jupasti jupanac taypin jutir cunanacat yatiyañ kalltäna, aqhäm sasa: Tatitojj aqhäm nayar camächit churitu: Abinadi, sarnakcasajj aca marcajjar jutir cunanacat yatiyam, cunalaycutejj jupanacajj nayan arunacajj contrajj chuymanacap chʼollkheptayapjje. Janiraquiw ñankha luräwinacapat nayar cutiquipstapcaraquituti. Ucat colerasiñajjamp jupanacar sartʼä, jachʼa colerasiñajjampiw ñankha ajjtcañ luräwinacapat jupanacar tʼakhesiyä.

2. Ay aca jichha utjir mitata! Tatitusti nayar situwa: Amparam loktam, ucat aqhäm sas yatiyam: Aqhäm siw Tatitojja: Aca jichha utjir mitajj ñankha luräwinacap laycuw catuntat anaquitäpjjani, ajanut tʼajjllitäpjjaraquini. Jïsa, jakenacasti jupanacarojj jakonucupjjaniwa, jiwarayatäpjjaraquiniwa. Siwikʼaranacamp anunacamp lakʼonacampiw jupanacan janchip mankʼapjjani.

3. Ucat Noe pʼekechirin jacäwipajj mä juntʼu ninanquir isjamäniwa; jupasti nayan Tatitütajj yatini.

4. Ucat aca marcajjar jachʼa tʼakhesïwinacampiw jawkʼantä. Machʼampi jachʼa usunacampiw jupanacar tʼakhesiyä. Arumanthit arumcamaw jupanacar awulliyaraquï.

5. Jïsa, nayajj jupanacar qhumumpjamaw qhumuntä. Tarma asnjamaw jupanacajj anaquitäpjjani.

6. Uqhämaraquiw jupanacjjar chhijchhintayaraquï, ucatsti jupanacarojj cʼuphanokaniwa. Inti jals thayaw jupanacar tʼakhesiyani. Jiscʼa lakʼonacasti orakeparuw lakʼontani, yarananacap tucqhapjjaraquini.

7. Jachʼa usumpiw tʼakhesiyatäpjjani; take ucanacsti, ñankha ajjtcañ luräwinacap laycuw lurä.

8. Janitejj jupanacajj juchat cutiquipstapquitanejja, oraket jupanacarojj kʼal tucqhä. Ucampis take ucanacatjja, kellkatanac jaytapjjani; yakha aca oraken utjir jakenacataquiw ucanac nayajj imä. Yakha marcanacar aca marcan ajjtcañ luräwinacap uñstayañajjataquiw ucanac luraraquï. Uqhäm walja cunaymaninac Abinadejj jupanacar khanañchasajj yatiyäna.

9. Ucat jupanacajj jupataquiw colerasipjjäna. Uqhämaraqui jupar catuntapjjäna, ucatsti pʼekechir nayrakataruw ñachʼantat callapjjäna. Pʼekechirirusti sapjjänwa: Aca mä jak nayrakatamar irpanipjjta, jupajj aca marcam contrajj jan walpun parli. Diosajj jupanacar tucqhaniw –sasaw parlaraqui.

10. Uqhämaraqui juman jacäwimjjat ñankh parli. Jacäwimajj ninanquir isjamäniw –sasaw jumjjat parlaraqui.

11. Ucat jucʼamp sascaquiwa: Jumajj waña wiru yapjamäniw sistamwa, uywanacan taquisita, cayunacapamp tacsutaraqui.

12. Ucatsti jumjjat saraquiquiwa: Khanapakon pankarapjamäniwa. Cunapachatejj khanapak pankarajj suma pokotäjje ucat thayajj thaytʼanisin take tok oraker saratatayejja, uqhamäniw sistamwa. Tatitus uqhäm siscaspajj uqhäm parli. Janitejj jumajj juchanacamat cutiquipstcätajja, ñankha luräwinacam laycuw jumjjar jutan –sistamwa.

13. Pʼekechiri, cuna jachʼa ñankhanacarac lurtasti? Cuna jachʼa juchanacarac marcamast luri Diosan juchañchatäñasataquisti? Jan ucajj aca jaken taripatäñasataquisa?

14. Pʼekechiri! nanacajj janiw juchanïpcti. Jumas Pʼekechiri! janiraquiw juch lurctati. Uqhämasti aca jakejj jumarojj cʼarint-tamwa. Inamayaquiw jutirin cunanacatejj lurascasp ucanacatjj parlaraqui.

15. Nanacajj chʼamanïpjjtwa, janiw mitʼaniptayatäpcäti, janiraquiw timanacajjans catuntatäpcaraquïti. Jïsa, cunjämatejj jumajj aca orakenjj jachʼapt-tajja, uqhämjj jachʼaptascaquïtawa.

16. Acajj uca jakejja, jichhajj juman amparamaruw catuyapjjsma. Amuyumarjam jupar luram.

17. Ucat Noe pʼekechirejj Abinadirojj carcelaruw jakontayi. Ucatsti Sacerdotenacan tantachasiñapataquiw arsuraquïna, jupanacamp arustʼasiñataqui, cuntejj Abinadir lurañäcaspa uc amtañataqui.

18. Uca Sacerdotenacasti pʼekechirirojj sapjjänwa: Nanacan jisctʼañajjatac acar irpayanim –sasa. Ucat pʼekechirejj jupanacar irpaniñatac arsuraquïna.

19. Abinadirojj jiscsuñ kalltapjjäna, cunjämats jupar juch jakoñ munasa. Ucampis jupajj jisctʼäwinacarojj chachjamaw arsüna, take jisctʼanacaparus arsutapampejj tucqharaquïnwa. Jïsa, jupanacarojj kʼal muspharayäna, cunalaycutejj jupajj take jisctʼanacapampiw khaktasïna, take arsutanacaparuw pituntaraquïna.

20. Ucat jupanacat maynejj jupar säna: Camsañs muni cunatejj awquinacasan kellkatäqui yatichatacaraqui uca arunacajja? –sasa.

21. Cunj jiwaquis kollu patanacan asqui yatiyäw apanirin cayunacapajja, qhititejj sumancañ yatiyqui, cusiscañ asqui yatiyäwinac apanqui, khespiyasiñan utjatap yatiyqui, Sionar sisqui: Diosamaw sarayi.

22. Uñjirinacamajj jachʼat artʼapjjani. Mä arutjam kʼochupjjani, cunalaycutejja, Tatitojj wastat Sionar cut-tayancan ucqhajja, jupanacajj sum uñjapjjani.

23. Cusisthapipjjam, mayachthapisis kʼochupjjam, juma Jerusalenan chʼusawjanacapa. Cunalaycutejj Tatitojj jakenacaparojj chuymachiwa, Jerusalenarusti cutsuyiwa.

24. Tatitojj take orakenacan nayranacaparojj kollan amparap uñstayi, take orak thiyanacasti Diosasan khespiyäwiparuw uñjapjjani.

25. Ucat Abinadejj jupanacar säna: Jumanacajj sacerdotenacäpjjtawa. Nanacaw aca jakenacarojj jutir urunacat yatiyir ajayutjj yatichapjjta –sapjjaractawa. Ucampis ucanacajj camsañtejj munqui ucjja, nayat-ti yatiñ munapjjesta?

26. Nayajj jumanacar sapjjsmawa: Tatitun luräwinacap ñankhar tucuyatam laycu, ay jumanacata! Jumanacatejj ucanac amuyapstajja, janiw ucanac yatichapctati. Ucat Tatitun luräwinacap ñankhar tucuyapjjtajja.

27. Janiw chuymanacamamp amuyasiñatac chʼamachasipctati. Uca laycusti, janiw suma amuyunjam lurapctati. Uqhämast cunarac aca marcarust yatichapjjtasti?

28. Jupanacasti sapjjänwa: Moisesan leyip yatichapjjta.

29. Ucat jupajj wastat jupanacarojj säna: Jumanacatejj Moisesan leyip yatichapjjstajja, cunats uc jan phokhapcta? Cunats kamiriptañanacat chuymanacaman lupʼipjjta? Cunats wachokañan kʼañusiñan sarnakapjjta, kʼañusir warminacampis chʼamam thayjtayasipjjta? Cunats aca marcar juch lurayapjjta, Tatitun aca marcar yatiyir nayar qhitaniñapcamajja? Jïsa, nayajj jachʼa ñankha jupanacjjat yatiyta.

30. Janit nayan chek parlatajj yatipcta? Jïsa, jumanacajj nayan chek parlatajj yatipjjtawa. Dios nayrakatan qhathatipjjañamäspawa.

31. Ñankha luräwinacamïpan tʼakhesiyatäpjjäta, nanacajj Moisesan leyip yatichapjjta, sapjjatam laycu. Cuns yatipjjta jumanacajj Moisesan leyipatjja? Khespiyasiñajj Moisesan leyip toket-ti juti? Camsapjjtasa?

32. Jupanacasti arsupjjänwa: Jïsa, khespiyasiñajj Moisesan leyip tokew juti –sasina.

33. Ucat Abinadejj jupanacar säna: Nayajj yat-twa: Jumanacatejj Diosan camächitanacapar phokhapjjätajja, khespiyatäpjjätawa. Cuna camächitanactejj Tatitojj Moisesar Sinai kollun churcän ucanacar phokhapjjäta ucajja, khespiyatäpjjätawa. Jupajj siwa:

34. Nayaw Dios Tatitumätjja, nayaw Egipto orakets mitʼan utats irpsunsma.

35. Janiw nayat ucsarojj yakha Diosanïcätati.

36. Janiw jumatac cuns nayar uñtat amparamamp lurasïtati. Janiraquiw alajjpachanquir aynach orakenquir cunaymaninac uñtats lurascaraquïtati.

37. Ucat Abinadejj jupanacar säna: Take ucanac lurapjjtati? Nayasti, janiw lurapctat sapjjsmawa. Aca marcarusti take ucanac lurañanacapatac yatichapjjtati? Nayajj, janiw yatichapctat sapjjsmawa.