Alman Kellkatapa
Jupasti Alman Yokapänwa

1. Ucatsti taripirinacan Nefi jakenacjjar sarayäwipan nayrïr maran ucat ucsaru Mosia pʼekechirejj jiwatäsin asqui nuwasïw nuwasisina Dios nayrakatanjj sum sarnakasina, jupa lant sarayañatac jan qhit jaytasina, ucampis jupajj leyinac ut-tʼayäna; uca leyinacsti jakenacajj waliquiw –sapjjänwa. Ucat jupajj lurcän uca leyinacaparjamaw jupanacajj jacapjjañapäna.

2. Ucat Almajj taripir konuñancän uca nayrïr maranjja, jupa nayrakataruw mä jakejj taripatäñatac irpcatatäna. Uca jakesti jachʼänwa, wali chʼamanit uñtʼataraquïnwa.

3. Jupasti jakenac taypin sarnakasa, Diosan arupaw siscän uc yatiyäna. Jupasti iyawsiri tamat wali ñankh parlaraquïna. Sapa mayni sacerdotemp yatichirimpejj jachʼar apatatäñapaw –sasaw jakenacarojj yatiyäna; jupanacan amparanacapamp jan trabajañapataqui jakenacat jacapjjañapataquiw yatiyaraquïna.

4. Uqhämaraqui, take jakenacajj khep khepa urunjj khespiyatäpjjaniw –sasaw jakenacar ircatäna. Jupajj saraquïnwa: Jakenacajj janiw ajjsaras qhathatipjjañapäquiti. Antisas cusisitaw pʼekenacap waytapjjaspa, cunalaycutejj Tatitojj take jakenacaruw utjayi, take jakenacaruw cutsuyaraqui. Tucuyäwinjj sapakat mayniw wiñay jacäwinïni –sasaw yatiyäna.

5. Ucat jupan ucanac wal yatichatap laycojj waljaniw jupan arunacapar iyawsapjjäna. Jupanacasti jupar kollk churasaw jacayañ kalltapjjäna.

6. Jupasti chuymapanjj jachʼa jachʼaw tucüna; jupajj jila alan isimpiw isthapisiraquïna. Uqhämaraqui jupajj yatiyäwiparjam mä igles ut-tʼayañ kalltäna.

7. Ucat jupajj arupar iyawsirinacar yatiyir sarasaw Diosan iyawsiri tamapanquir mä jakemp jiquisïna. Uca jakesti yatichiriraquïnwa. Ucat jupajj uca yatichirimpiw iyawsiri taman jakenacapar irpakañatac wal tokesiñ kalltäna. Ucampis uca yatichirejj Diosan arunacapamp thoktasisaw jupamp khaktasïna.

8. Uca yatichirejj Gedeonänwa, jupasti uca Limhin jakenacapar mitʼanïtat antutayañatac Diosan amparapan apnakatäcänjj ucänwa.

9. Gedeonan Diosan arunacapamp jupar thurtʼasitap laycuw jupajj Gedeonatac colerasïna; ucat espadap aysusisaw jupar jawkʼanoke. Gedeonasti wali chuymanïtap laycojj janiw uqhäm jawkʼatajj thurtʼascänti, ucat jupajj espadamp jiwayataw uñjasi.

10. Ucat jupar jiwaycän uca jakeruw iyawsiri tamanquirinacajj catjapjjäna, ucatsti Alma nayrakataruw irpapjjäna, juchanac lurataparjam taripatäñataqui.

11. Ucat jupajj Alma nayrakatancasinjja, wali chachjamaw arunacapamp jupa quicpajj arjjatasïna.

12. Ucampis Almajj juparojj sänwa: Janipuniw nayrajj uqhäm sallka sacerdotëñajj aca jakenac taypin utjcänti, janiraquiw sallka sacerdotëñaquïquit juchamajja, jan ucasti, jumajj sallkjäwimjj espadampiw saraytajja. Uca sallka sacerdotëñatejj aca jakenac taypin sarayatäspajja, ucajj jupanacan tucqhatäñapataquïspawa.

13. Jumasti aca marca taypin walja asquinac lurir asqui jaken wilap wart-ta; nanacatejj jumar antutapjjerismajja, jupan wilapajj luräwinacajjarjamaw puripjjetaspa.

14. Jichhasti Mosia khepa pʼekechirisan churat leyirjam jumajj jiwañamawa. Uca leyirusti aca marcan waliquiw satap laycuw jupanacajj ucarjam lurapjjañapa.

15. Ucat jupanacajj jupar catuntapjjäna. Jupasti Nehor satänwa. Ucat Manti kollu pataruw jupar callapjjäna, ucan jupajj arsuyatänwa, jan ucasti, alajjpachampin orakempin taypipancasaw, cuntejj jupajj jakenacar yatichcän ucanac Diosan jan aruparjamätap arsusïna. Ucan jan qhitin uñjjatataw tucusïna.

16. Ucampis janiw ucampejj sallka sacerdotëñan uca oraken chʼekentañaparojj tucuycänti, cunalaycutejj waljaniw oraken jila jil tucur cunaymananacap munapjjäna. Jupanacasti cʼari yatichäwinac yatichapjjäna, kamiriptañanacapatac wakaychatäñanacapataquiw yatiyapjjaquïna.

17. Ucampis janiw khan cʼarisiñ munapcänti leyir ajjsaratap laycu; cunalaycutejj cʼarisirinacajj mutuyatänwa. Ucat iyawsäwijjarjamaw yatiyt sasajj jan cʼarïcaspajj uqhäm parlapjjäna. Leyisti janiw mä jaken iyawsäwipjjarojj chʼamanïcaspati.

18. Uca leyir ajjsaratap laycuw lunthatasiñat ajjsarapjjäna. Uqhäm luririnacajj mutuyatänwa. Uqhämaraqui lunthatjañata, jiwayañat ajjsarapjjaraquïna; cawquïrinacatejj jiwayapcän ucanacajj jiwayatäpjjänwa.

19. Ucampis cawquïrinacatejj jan Diosan iyawsiri tamapancapcän ucanacajja, Diosan iyawsiri tamapanquir Criston sutip catjjarupcän uca jakenacaruw arcanakañ kalltapjjäna.

20. Jupanacar llampʼu chuymanïtap laycu arcanakasasti, take cunayman arunacampiw tʼakhesiyapjjäna; cunalaycutejj jupanacajj janiw jachʼa jachʼa tucupcänti. Diosan arup jupanac puras jan alaru jan kollkeruw churasipjjäna. Ucat jupanacar arcanakapjjäna.

21. Uca Diosar iyawsiri jakenacanjja, mä chʼama leyiw utjäna, cawquïr iyawsiri jakenacan jan iyawsiririnacar jan arcanakañanacapataqui, janirac jupanac purajj arcanakasiñapataqui.

22. Ucampis waljaniw jupanac purajj jachʼa jachʼa tucuñ kalltapjjäna. Jupanacasti timanacapampejj nuwasiñapcamaw wal pitusipjjäna. Jïsa, jupanac purajj chʼactasipjjänwa.

23. Ucanacajj Alman sarayäwipan payïr maran utjäna. Iyawsiri tamarusti ucanacajj wal tʼakhesiyäna; uqhämaraqui iyawsiri tamar wal yantʼäna.

24. Waljanin chuymanacap chʼollkheptatïpana, jupanacan sutinacapajj jan jucʼamp Diosan jakenacapamp amtasitäñapatac chhaktayatäpjjänwa. Uqhämaraqui waljaniw jupanac taypit mistupjjaraquïna.

25. Ucanacajj wali thurtʼat iyawsirinacataquejj jachʼa yantʼawïnwa. Ucampis jupanacajj thurtʼatäpjjänwa, Diosan camächitanacapar phokhañat jan jithektasirïpjjaraquïnwa. Jupanacan arcanakäwinacapar llampʼüsaw thurtʼasipjjäna.

26. Sacerdotenacajj trabajopjj jakenacar Diosan arup yatiyañatac jaytapcän ucqhajja, jakenacajj trabajopjj Diosan arup istʼañataquiw jaytapjjaraquïna. Sacerdotenacajj jupanacar arup yatiyapcän uca khepatjja, takpachaniw trabajonacapar mäc cut-tapjjäna. Sacerdotesti pachpa amuyuparjamajja, istʼirinacapat sipan janiw jucʼamp jachʼacänti. Janiraquiw yatichirejj yatekerit sipan jucʼamp jachʼacänti. Uqhäma, takpachaniw quipcäpjjäna, uqhämaraqui sapakat mayniw chʼamaparjam trabajaraquïna.

27. Uqhämaraqui, kʼoyanacaru, pistʼayasirinacaru, tʼakhesiriru, sapakat mayniw yänacaparjam yänacapat wajjtʼapjjäna. Jupanacajj janiw jila alan isimp isthapisipcänti, ucampis suma jiwa kʼomaquïpjjänwa.

28. Uqhäm iyawsiri taman luräwinacap ut-tʼayapjjäna; uqhäm walja arcanakäwinacapas utjc-chïnsa, jupanacanjj wastat jan tucusisaw sumancañajj ucapachat utjañ kalltäna.

29. Ucat iyawsiri taman thurtʼatätap laycusti cunanacatejj jupanacar waquiscän ucanac wal utjipan jupanacajj kamiriptañ kalltapjjäna. Walja uywa tamanaca, take casta chʼaman uywanaca, kori, kollke, cʼajquirinaca, walja sedanaca, suma sawut lienzonaca, take cunayman sawutanacaw utjaraquïna.

30. Uqhäm kamiriptasasti janiw isit jalstatarojj uqhämac uñcatapcänti, janiraquiw mankʼat tʼakhesirinacarusa, umat pharjayasirinacarusa, usutanacarusa, jan mankʼatanacarus alis-supcänti. Janiraquiw chuymanacapanjj cʼajquirinac munapcänti. Ucat takeniru; chuymaniru, wawaru, mitʼaniru, jan mitʼaniru, chacharu, warmiru, iyawsiri tamanquiriru, jan iyawsiri tamanquiriru, takenirus quicpac amuyasaw take chuym wajjtʼapjjäna.

31. Uqhäm jachʼaptapjjäna. Jan iyawsiri tamapanquirinacat sipan wali jucʼamp kamiriptapjjäna.

32. Jan iyawsiri tamapanquirinacjjar jan walinac lurañaruw uchasipjjäna: Laykantaña, wacʼan yakha diosanacar yupaychaña, jan ucajj jayrasiña, ina chʼusar parlaña, munapayaña, chʼajjwaña, ucanac lurapjjäna. Jupanacajj jila alan isimp isthapisipjjäna, quicpa nayranacapan jachʼa jachʼaw tucupjjaraquïna. Jupanacajj cʼarisiña, lunthataña, lunthatjaña, kʼañusiña, jiwayaña, take uca cunayman ñankha lurañanac lurapjjäna. Ucampis ley pʼaquirinacajj ley wactʼäwirjamaw mutuyatäpjjäna.

33. Uqhäm sapakat mayniw lurataparjam mutuyatäsa, leyin jupanacjjar chʼamamp puritap laycuw amuctʼapjjäna. Ñankha luräwinacapat qhitis yatisapänjja, ucat ucanac lurañat ajjsarapjjäna. Ucat taripirinacan sarayäwipan pheskër maracamaw suman utjayasiñajj Nefi jakenacan taypin utjäna.