1. Ucat Lamoni pʼekechirejj lokerinacapar take cuntejj ucat uñjapcän ucanacat ircatañataquiw nayrakatapar saytʼayäna.

2. Ucat jupanacajj uñjapcän ucanacat takpachan ircatapcän ucata, Ammonan uywa tamanacapar imir suma lokerïtapat yatisa, Ammonan jupar jiwayañ munirinacamp nuwasir jachʼa chʼamapat yatcaraqui ucqhajja, musphasaw säna: Chekpachan jupajj jaket jucʼampiwa. Janit jupajj aca jakenacar jiwayäwinacap layc tʼakhesiyqui uca jachʼa Ajayüqui?

3. Ucat jupanacajj aqhäm sapjjäna: Jupan jachʼa ajayütapsa jakëtapsa janiw yatipcti; ucampis aqhäm yatipjjta, jupajj pʼekechirin timanacapan janiw jiwayatäcaspati. Jupan jachʼa chʼamapa, suma amuyunïtap laycusti, nanacampïc ucqhajja, janiw uca timanacajj pʼekechirin uywa tamanacap chhuqhutatayapcaspati. Ucat jupan pʼekechirimp sumancatapjj yatipjjta. Jichhasti pʼekechiri, janiw nanacajj mä jaken uqhäm chʼamanïtapar iyawsapcti; cunalaycutejj jupan jan jiwaycayätap yatipjjta.

4. Ucat pʼekechirejj uca arunac istʼcän ucqhajja, jupajj jupanacaruw säna: Jichhajj nayajj jupan Jachʼa Ajayütap yat-ta; jumanacan jacäwinacam imañataquiw sarakani, jilanacamarjam nayan jan jiwañajjataqui. Acapí awquinacasan parlatäqui uca jachʼa Ajayojja.

5. Ucapí Jachʼa Ajayun utjatapat Lamonejj awquipat catokcän uca sarajja. Ucampis uca Jachʼa Ajayur iyawsapc-chïnsa cuntejj lurapcän ucajj asquïcaspas uqhäm amuyasipjjäna. Ucampis Lamonejj uca lokerinacar jiwayatäpcän jan asquïcaspas uqhäm amuyasisaw wal ajjsarañ kalltapjjäna.

6. Jupajj waljaniruw jiwarayatayna, umarapcän uca tamanacapar chhuqhutatayatap laycu, tamanacar chhuqhutatayapjjatap laycuw jiwarayatäpjjäna.

7. Laman jakenacajj yat-tʼatänwa Sebus umanac jacʼan jakenacan uywa tamanacap chhuqhutatayañatac saytʼirejja, uqhämat chhakat tamanacapar quipca orakepar anaquiñataqui. Uqhämat jupanac taypin lunthatjañajj utjäna.

8. Ucat Lamoni pʼekechirejj lokerinacaparojj aqhäm sasaw jisctʼäna: Uca jachʼa chʼaman jakejj cawqhanquisa?

9. Ucat jupanacajj jupar sapjjäna: Jupajj caballonacamaruw mankʼayasqui. Janïr uca lokerinacajj uywa tamanacapar umayir sarapcän ucqhaw pʼekechirejj jupanacar caballonacapa, carronacapa waquichañanacapataqui Nefi oraker irpayasiñataquiw säna. Uca Nefi orakenjja, Lamonin takpach uca oraketac pʼekechir awquipaw jachʼa mankʼäw utjayäna.

10. Ucat pʼekechirejj Ammonan caballonaca, carronaca waquichascatap istʼasajja, Ammonan wali suma phokherïtapat aqhäm sasaw jucʼamp musphäna: Chekpachana, takpach lokerinacajjata, janiw mayni lokerijjas aca jakjam suma phokherïcänti. Jupajj takpach arunacajjar phokhañat amtasi.

11. Jichhasti, nayajj jupan Jachʼa Ajayütapjj yatipuntwa; jupan nayan uc jutañap munirista, ucampis ajjsartwa.

12. Ucat caballonaca, carronaca pʼekechiritac lokerinacapatac waquichatapatjja, Ammonajj pʼekechirin ucaruw mantäna. Jupajj pʼekechirin uyñakapan mayjätap uñjäna; ucat jupajj pʼekechirin nayrakatapat cutekañampïscänwa.

13. Ucat pʼekechirin mä lokeripajj juparojj Rabana sänwa. Ucajj sañ munejja, chʼamani, jan ucajj jachʼa pʼekechiri, cunalaycutejj jupanacan pʼekechirinacapajj chʼamanïpcaspas uqhäm amuyasitap laycuw uqhäm jupar säna: Rabana, pʼekechirejj juman kheparañam muni.

14. Ucat Ammonajj pʼekechirin uc cut-tasaw aqhäm juparojj säna: Cuna lurañajjs munt pʼekechiri? Ucat pʼekechirejj mä horjamaw jan camsañ yatitap laycojj jan arscänti.

15. Ucat Ammonajj juparojj wastat säna: Cuns nayan lurañajj munta? Ucampis pʼekechirejj jupar janiw arscänti.

16. Ucatsti Ammonajj Diosan Ajayupan phoktʼatäsaw, pʼekechirin lupʼïwinacap amuyäna. Ucat jupar säna: Nayan uywa tamanacamar lokerinacamar arjjatatajjata, pakallk jilapar espadamp kʼorawamp jiwayatajjat uywa tamanacamar lokerinacamar arjjatas yakhanacan amparanacap apakatajjat istʼatam laycut lupʼta? Ucatt musphartajja?

17. Nayajj sismawa: Cunats wal musphta? Nayajj jakequïtwa, lokerimaquïtwa. Ucat cuna asctejj muntajja, uc nayajj lurä.

18. Ucat pʼekechirejj uca arunacar istʼasinjja, jupan lupʼïwinacap Ammonan amuyirïtap amuyäna, ucat wastat musphäna. Ucampis Lamoni pʼekechirejj lacap jistʼarasaw aqhäm juparojj säna: Qhitïtas jumajja? Take cun yatquis uca Jachʼa Ajayütati?

19. Ucat Ammonajj sänwa: Janiw ucäcti.

20. Ucat pʼekechirejj säna: Cunjämats chuymajjan lupʼïwinacap yat-ta? Jan ajjsaras parlascaquim, ucanacatsti nayar yatiyita. Uqhämaraqui cuna chʼamampitejj uywa tamanacajjar chhuqhutatayir jilanacajjan amparanacap tʼiscuraycta, jupanacar jiwaycta, uc yatiyaraquita.

21. Jumatejj ucanacat yatiyitätajja, cuntejj muncta uc churäma. Uqhämaraqui waquisisp ucajja, nuwasiri tamanacajjampiw arjjatirisma, ucampis nayajj takpach jupanacat sipan jucʼamp chʼamanïtam yat-ta; ucat cuntejj nayat catokañ muncta, uc churäma.

22. Ammonasti suma kʼoma amuyumpiw Lamonir säna: Nayatejj cuna chʼamamp ucanac lurcta, uc yatiyämajja, arunacajjar yäkätati? Uc nayajj jumat munta.

23. Ucat pʼekechirejj juparojj säna: Jïsa, take arunacamaruw iyawsä. Ucat jan sum amuyasisaw arsüna.

24. Ucat Ammonajj jupar kamasamp parlañ kalltasajj säna: Mä Diosan utjatapar iyawstati?

25. Ucat juparojj säna: Ucajj camsañs muni? Janiw nayajj yatcti.

26. Ucat Ammonajj säna: Jachʼa Ajayun utjatapar iyawstati?

27. Jupasti, jïsa sänwa.

28. Ammonasti sänwa: Ucapí Diosajja. Ammonasti jupar saraquïnwa: Diosäqui uca jachʼa Ajayun take cun alajjpachan acapachan luratapar iyawstati?

29. Jupasti sänwa: Jupan acapachan take cun luratapar iyawstwa; ucampis alajjpachat janiw cuns yatcti.

30. Ucat Ammonajj jupar säna: Alajjpachajj Diosamp take kollan qhitanacapampejj utjqui uca chekawa.

31. Ucat Lamoni pʼekechirejj säna: Oraket alajjanquiti?

32. Ucat Ammonajj säna: Jïsa, jupajj take jaken wawanacaparuw uñtaniraqui; jupasti chuyman takpach lupʼïwinacap munäwinacap yati, cunalaycutejj jupan amparapan takeniw kalltäwit lurata.

33. Ucat Lamoni pʼekechirejj säna: Nayajj take uca arsutanacamaruw iyawsta. Jumajj Diosan qhitanitätati?

34. Ammonasti jupar sänwa: Nayajj jakequïtwa; jakenacasti kalltäwinjja Dios quipc luratänwa. Nayajj jupan kollan Ajayupan ucanac aca jakenacar yatichir jawsatätwa, cunatejj chekäqui cunatejj asquïqui uc yatïwir puriñanacapataqui.

35. Mä kawkhaw uca Ajayut nayan utji; ucasti Diosan iyawsatajjarjama munañajjarjamaw yatïwimp chʼamamp churitu.

36. Ucat Ammonajj uca arunac arscän ucqhajja, jupajj orak luratata, Adanar luratat yatiyañ kalltasaw take cun jakenacan tincutapat yatiyaraquïna. Juparusti Lehi awquipajj Jerusalenat mistcän ucapachcam arjirinacan arsutäcän uca jakenacan sarnakäwinacapat kellkatanacap kollan kellkatanacap uñachayasaw yatiyäna.

37. Uqhämaraqui jupanacaru (cunalaycutejj pʼekechirimpir lokerinacapampiruw yatiyäna) awquinacapan chʼusa wasaranjam takpach saräwinacapata, take mankʼata, umata, sarañata, take uqhämanacan tʼakhesïwinacapat yatiyaraquïna.

38. Uqhämaraqui Lamanampin Lemuelampin kallcatäwinacapata, Ismaelan yokanacapan kallcatäwinacapata, takpach uca kallcatäwinacapat jupanacar yatiyäna; uqhämaraqui Lehejj Jerusalenat mistcän ucapachatpacha, ucürcam take uca sarnakäwinacapat kellkatanacs kollan kellkatanacs jupanacar khanañchäna.

39. Ucampis ucajj janiw takpachäquiti. Jupajj oraken kalltäwipat waquichatäcän uca cutsuyir arustʼäwit jupanacar khanañcharaquïna. Uqhämaraqui Criston jutäwipata, Tatitun takpach luräwinacapat jupanacar yatiyäna.

40. Ucat jupajj take ucanac arsusaw pʼekechirir ucanac khanañchcän uca khepatjja uca pʼekechirejj takpach arunacapar iyawsäna.

41. Ucat Tatitur artʼasajj aqhäm sañ kalltäna: Tatay qhuyapayita; juman Nefi jakenacar wal qhuyapayatamarjama, nayampir marcajjampir qhuyapayapjjeta.

42. Ucat uca arunac arsquipanjam, jupajj jiwatäcaspas uqhäm oraker liwitat-täna.

43. Ucat lokerinacapajj juparojj warmipan ucaruw mä iquiñar callapjjäna. Jupasti pä urump pä arumampiw jiwatäcaspas uqhäm liwisïna. Warmipamp yokanacapamp phuchanacapampisti Laman jakenacan luräwinacaparjamaw jupan chhaktañapat wali llactʼat jaqhusipjjäna.