1. Ucatsti, Korihoran tucusitapatjja, Almajj Zoram jakenacan Tatitun luräwinacap ñankhar tucuyañapat yatiyatäsa, Zoram jilïripan jakenacan chuymanacapar jan arsur wacʼan diosanacar altʼañar irpakatapat yatiyatäsa, jupan chuymapajj jakenacan ñankhätap laycuw wastat usuntañ kalltäna.

2. Jakenacapan ñankhätapat yatiñajj wal Almar llaquisiyäna. Ucat Zoram jakenacan Nefi jakenacat sarakatap laycuw chuymapajj wal llaquisïna.

3. Zoram jakenacajj jupanacan Antionum sat oraken tantachasipjjäna. Uca orakesti Zarahemla oraket inti jals tokencänwa, niyapun Jerson oraket aynach toke lamar iran thiyancasajja, aynach toke Laman jakenacan phoktʼata wasar thiyacamänwa.

4. Uca Nefi jakenacajj Zoram jakenacan Laman jakenacamp sumancayasiñapat wal ajjsarapjjäna. Ucajj walja chhakäwi Nefi jakenacarojj apanispa.

5. Ucampis ar yatiyañan jakenacar asc lurañar wal waytʼatap laycu – jïsa, ucajj espadat sipana, jupanacar camachcän take ucanacat sipan jakenacan amuyunacaparojj jucʼamp asc luräna – ucat Almajj Diosan arupan chʼamapamp yatiyañan waquisitapjj amuyäna.

6. Ucat jupajj Ammonampiru Aaronampiru Omnerampiruw irpäna. Himnirusti Zarahemla iyawsiri taman jaytaraquïna. Ucat uca quimsanir irpasin Melecancän uca Amulecampir Zeezromampir irpasaraquiw jupan yokanacapat pä yokapamp irpäna.

7. Ucampis, jilïr yokaparojj janiw irpcänti, jupasti Helaman satänwa. Ucampis irpcän ucanacan sutinacapajj Siblon Corianton ucanacänwa. Ucanacaw jupamp chic ar yatiyir zoramitanac taypir sarapcän ucanacan sutinacapajja.

8. Uca Zoramar arquirinacasti Nefi jakenacat jithektirinacänwa; ucat jupanacajj Diosan arupatjj yatiyatäpjjänwa.

9. Ucampis jupanacajj wal pantasipjjäna; janiw Diosan camächitanacapar leyinacapar Moisesan leyiparjam phokhapcänti.

10. Janiraquiw iglesian Diosat sapür mayisiñs achictʼañs jan yantʼäwinacar mantañanacapatac luräwinacap phokhapcaraquïnti.

11. Jïsa, jupanacajj walja cutiw Tatitun luräwinacap ñankhar tucuyapjjäna. Ucat Almamp jilanacapampejj jupanacar ar yatiyir uca oraker sarapjjäna.

12. Ucat uca oraker purisajja, Zoram jakenacan sinagoganac utachatap uñjasajj muspharapjjänwa, ucatsti Tatitun arup sat semanan mä uru jupanacan tantachasipjjatap uñjapjjaraqui. Cunjämtejj jupanacajj yupaychapcän ucajj janipiniw Almampin jilanacapampin nayrajj uñjatäcänti.

13. Jupanacajj sinagogap taypin saytʼañatac pʼeket wali alayanquir mä chek lurapjjäna. Uca chekan pataparusti mayni jakequiw maqhatañapäna.

14. Ucat cawquïrinacatejj yupaychañ munapcän ucanacaw uca patar maqhatasajj amparanacap alajjpachar loktasa, jachʼa arut aqhäm sas artʼapjjäna:

15. Kollan kollan Diosay; nanacajj Diosätamjj iyawsapjjtwa, kollanätamjj iyawsapjjaractwa. Juman nayrapach ajayütama, jichpach ajayütama, wiñay ajayütam iyawsapjjaracta.

16. Kollan Diosay, jilanacajjat nanacar jaljtayanitamjj iyawsapjjtwa; janiraquiw jilanacajjan yatita awquinacapan wawjamätap layc catuyatanacapar iyawsapcarac-cti. Antisas juman nanacar kollan wawamatac ajllitamaruw iyawsapjjta; uqhämaraqui jumajj Criston jan utjañap yatiyapjjaraquista.

17. Jumajj masürus jichhürus wiñayataquis quipcätawa. Jumasti khespiyañataquiw nanacar ajllipjjesta; nanacar muyuntatäc ucanacarusti colerasiñaman mankhapachar jakontatäñapataquiw ajlliracta. Uqhäm kollanäñat Diosay yuspagaranipsma. Uqhämaraqui nanacar ajllitamat yuspagaranipjjaracsma, jilanacajjan jan amuyun saranacapar jan irpakatäñanacajjataqui. Ucasti Cristor iyawsayañaruw catunti, juma Diosajjat chuymanacapar wali jay saranucuyaraqui.

18. Wastat ajllita kollan marcätajjat yuspagaranipjjsma, Diosay. Uqhamäpan.

19. Ucat Almamp jilanacapamp yokanacapampejj uca mayisïwinacar istʼasinjja, jan tuptʼcayaw muspharapjjäna.

20. Sapakat maynejj maqhatasaw uca pachpa mayisïwinac arsüna.

21. Uca chekarusti Rameumpton sutimpiw uchapjjäna. Ucasti sañ muni, kollan pulpito.

22. Ucatsti, uca pulpitotpach sapa mayniw quicpa mayisïwimpejj Diosat mayisïna: Jupanacajj ajllitäpjjatapat jupar yuspagarapjjäna. Jilanacapan saranacapan khepap jan irpatapatarac yuspagarapjjäna. Ucatsti, cuntejj jan yatipcän jutir urunacan lurasiñapatjja, ucanacan chuymanacapar jan mantatapat yuspagarapjjaraquïna.

23. Ucat takpach jakenacan uqhäm yuspagaratapatjja, jupanacajj Diosapar kollan pulpito token yuspagarañatac wastat tantachasiñapcamaw jupat jan parlasajj utanacapar cut-tapjjäna.

24. Almasti uc uñjasinjja, llaquisiñaw chuymapar phoktʼäna. Jupanacan ñankha, asquit cutekat marcätap yatiyäna. Jupanacan chuymanacapajj korincatapa, kollkencatapa, take cunayman suma yänacancatap amuyäna.

25. Jupanacan chuymanacapan jachʼa jachʼa tucutap laycu, nayajj jachʼa jakët sañapcam aytasitap jupajj amuyaraquïna.

26. Ucat jupajj alajjpachar artʼas säna: Cunapachcamas Tatay, lokerinacamaru janchina, jaken wawanacap taypin aqhäm jachʼa ñankha luräwinac uñjir utjayapjjetäta?

27. Diosay jumaruw artʼasinipjjtam, ucampis jachʼa jachʼa tucutapan chuymanacapajj chhakti. Jupanacajj jumaruw Diosay lacanacapamp artʼasinipjjtam, ucampis oraken jilar tucuyirinacapampiw chuymanacapajj jachʼar tucu.

28. Diosajjay jupanacan jila alan isinacapa, anillonacapa, kori cʼachachasiñanacapa, take jila alaninacamp cʼachachatapqui ucjj uñjtawa. Jupanacan chuymanacapasti ucac munasipqui, ucampis jumar artʼasisaw sapjjtam: Yuspagaranipjjsmaw Diosay, nanacajj ajllit marcamäpjjtwa, mayninacasti tucusipjjaniwa –sasa.

29. Uqhämraqui jumajj Criston jan utjañap yatiyapjjest sapjjaractamwa.

30. Dios Tatay, cunapachcamas uqhäm ñankha luräwinacan aca jakenac taypincañap antutäta? Tatay chʼam churita, nayan tʼuqhätajjar thurtʼasiñajjataqui. Nayajj tʼuqhätwa; aca jakenac taypinquir jachʼa ñankhajj chuymajjar usucharaquiwa.

31. Tatay chuymajjajj walpin llaquisi; Criston chuymajjar chuymacham. Tatay chʼam churita, nayan aca jakenacan ñankhätap layc jutquitani uca llaquisïwinac llampʼu chuymamp tʼakhesiñajjataqui.

32. Tatay chuymajjar chuymacham; atipäw churita, nayamp chicäpqui uca yanapirijjarusa – Ammon Aaron Omner Amulec Zeezrom uqhämaraqui pä yokajjar – churanipjjeta. Jïsa, take jupanacar chuymacham Tatay; chuymanacapan Criston chuymacharaquim.

33. Jupanacar chʼam churam, aca jakenacan ñankhätap layc jutcani uca llaquisïwinac llampʼu chuymamp tʼakhesipjjañapataqui.

34. Tatay, Criston jupanacar jumar irpaniñajjatac atipäw churapjjeta.

35. Tatay almanacapajj wali munatawa, waljaniraquiw jupanacat jilanacajjäpjje. Ucat Tatay uca jilanacajjar jumar wastat irpaniñajjatac suma amuyump chʼamamp churapjjeta.

36. Ucat Almajj uca arunac arscän ucqhajja, amparanacap take jupamp chictʼatanacar lokjjatäna. Ucat amparanacap jupanacar lokjjatcän ucapachajja, jupanacajj Kollan Ajayun phoktʼatäpjjänwa.

37. Ucatsti, sapa mayniw take toker saratatjjapjjäna, janiraquiw llaquisipcänti cuntejj mankʼapcani, umapcani, isisipcani ucata.

38. Ucat Tatitojj jupanacan jan awtjayasiñanacapataqui, jan pharjayasiñanacapataquiw jupanacatac utjayäna. Uqhämaraqui jupanacan cunayman tʼakhesiyäwinacat jan tʼakhesiñanacapataqui, jan ucajja uca tʼakhesiñanacapan Cristot cusisiñaru chhaktañapatac chʼam jupanacar churaraquïna. Ucajj Alman mayisïwiparjamänwa, iyawsas mayisitap laycuraqui.