1. Jichhajja, Amaliquiat jupamp chic wasarar jaltirinacat kellkäwisar cut-tañäni. Jupajj jupamp chic saririnac irpasaw Nefi oraker sarasin Laman jakenac taypir mantäna, ucatsti Laman jakenacarojj Nefi jakenac contra colerasipjjañapataquiw amtayäna, Laman jakenacan pʼekechiripan Nefi jakenacamp nuwasir sarañatac tantachasiñatac yatiyäw takpach uca orakeparu, jakenacapar apayañapcama.

2. Ucat yatiyäwejj jupanac taypin yatiyascän uca khepatjja, jupanacajj wal ajjsarapjjäna. Jïsa, jupanacajj pʼekechirir colerayañat ajjsarapjjäna, jacäw chhakañapat ajjsaratap laycuw Nefi jakenacamp nuwasir sarañat ajjsarapjjaraquïna.

3. Ucat pʼekechirejj jupanacan jan yäkatap laycuw wal colerasïna. Ucat Amaliquiar yäker nuwasirinac apnakañapataquiw chʼam churäna, ucatsti jakenacar armanacap aptapjjañapataquiw qhitäna.

4. Ucpi Amaliquiajj munänjja, jupajj ñankh lurañatac wali sallka jakësajja, Laman jakenacan pʼekechirip konuñapat apakañataquiw chuymapan arustʼäna.

5. Jichhajja, jupajj pʼekechirir arquir jakenacjjar sarayäw catoke, ucat jan yäkerinacamp sumancañ munäna. Ucat jupajj Onida sat chekaruw saräna, takpach Laman jakenacan ucar jaltatap laycu. Jupanacasti nuwasiri tamar jutir uñjasajja, jupanacar tucqhir jutapcaspas uqhäm amuyasaw, Onida chekar jaltapjjäna, cawqhanc-cäntejj armanacajj ucaru.

6. Ucat jupanacajj amuyunacapanjj Nefi jakenacamp nuwasir jan waytʼañap munasajja, jupanacjjar sarayir pʼekechiritac mä jak ut-tʼayapjjäna.

7. Ucat jupanacajj Antipas sat kollu pataruw nuwasiñatac waquichasir tantachasipjjäna.

8. Ucampis Amaliquian amuyupajj janiw jupanacamp nuwasiñäcänti, pʼekechirin arsutaparjamajja. Jupajj wali suma jaket Laman jakenacan nuwasiri tamapampejj uñtʼayasiñ munäna, jupanacan pʼekepat saytʼañataqui ucatsti pʼekechirir jakonucuñataqui, orak catuntasiñataquiraqui.

9. Ucat Antipas kollu jacʼa kherwan nuwasiri tamaparojj chʼujllanacap ut-tʼayayäna.

10. Ucat arumtʼcän ucqhajja, jupajj Antipas kolluncapcän uca jakenacan ucaruw mä uñak qhitäna, Lehonti sat jilïripan kollu cayur sarakañapatac mayisa, jupamp parlañ munatap laycu.

11. Ucat Lehontejj uca yatiyäw catokasinjja, kollu cayur sarakañ ajjsaränwa. Ucat Amaliquiajj payïr cutiw jupan sarakañap mayisajj qhitäna, Lehontisti janiw muncänti. Ucat quimsïr cutiw qhitaraquïna.

12. Ucat Amaliquiajj Lehontin kollut sarakañ jan munatap yatisinjja, jupajj niyapuniw Lehontin utjnokäwipcam kollur maqhatäna. Ucat pusïr cutiw Lehontin arjjatirinacapamp-pach sarakañapatac mayisajj yatiyäw apayäna.

13. Ucat Lehontejj arjjatirinacapamp-pach sarakapcän ucqhajja, cawquïr jakenacjjarutejj pʼekechirejj Amaliquiar sarayäw churcänjja, uca jakenacar chʼujllpanacapan muyuntañatac Lehontin nuwasiri tamapamp arum sarakaniñap Amaliquiajj munäna. Ucat Lehontitejj Amaliquiar takpach nuwasiri tamatac payïr sarayirjam ut-tʼayasapänjja, Amaliquiajj uca jakenacar Lehontin amparaparuw catuyasapäna.

14. Ucat Lehontejj jakenacapamp sarakanisaw, Amaliquian jakenacapar muyuntapjjäna. Ucat janïr jupanacajj willjta toker iquit sartapcän ucqhaw, Lehontin nuwasiri tamanacapan muyuntatäjjapjjäna.

15. Ucatsti jupanacan muyuntatätap amuyasisinjja, jilanacapamp mayachasir antutañapataqui, jupanacan jan tucqhatäñanacapataquiw Amaliquiar achictʼapjjäna. Ucän Amaliquian amtatapajja.

16. Ucat jupajj pʼekechirin camächitanacap jan yäkasaw nuwasiri tama catuyäna. Ucsti Amaliquiajj pʼekechirir konuñapat apakañ munatap phokhañataquïnwa.

17. Ucat Laman jakenac taypin sarapajj aqhamänwa: Jilïr sarayiritejj jiwayatäcän ucqhajja, ucjjanquir sarayiriw jupa lantejj jilïrit ut-tʼayatäjjäna.

18. Ucat Amaliquiajj mä lokeripampiw venen jucʼat jucʼat Lehontir churayäna, Lehontin jiwañapcama.

19. Ucat Lehontejj jiwatäcän ucqhajja, Laman jakenacajj Amaliquiar sarayiritac jilïritaquiw ut-tʼayapjjäna.

20. Ucat Amaliquiajj nuwasiri tamanacapamp (jupajj munañaparjam luratayna) Nefi orakeru, Nefi sat jilïr marcaruw saräna.

21. Ucat pʼekechirejj arjjatirinacapampiw jupamp jiquisir jutäna. Amaliquiajj camächitanacaparus phokhcaspa, ucatsti jachʼa nuwasiri tamar Nefi jakenacamp nuwasir sarañatac tantachaycaspas uqhäm jupajj amuyasïna.

22. Ucampis pʼekechirejj jiquisir jutascän ucqhaw, Amaliquiajj lokerinacapar pʼekechirimp jiquisir qhitäna; ucat jupanacajj jachʼätap laycojja, yupaychapcaspas uqhämaw jupa nayrakatar altʼapjjäna.

23. Ucat Laman jakenacan sumancañ uñachayäwjam Nefi jakenacat yatekat yatitaparjamaw jupanacar waytañatac amparap loktäna.

24. Ucat nayrïrir oraket waytcän ucqhaw, jupajj pʼekechirirojj chuymat jununtäna; jupasti orakeruw liwitat-täna.

25. Ucat pʼekechirin lokerinacapajj jaltapjjäna. Ucat Amaliquian lokerinacapajj aqhäm sasaw artʼapjjäna:

26. Pʼekechirin lokerinacapaw jupar chuymat jununti. Liwisir uñjasaw jupanacajj jaltjjapjje; uñtapjjam jutasin uñjjatapjjam.

27. Ucat Amaliquiajj pʼekechirir cunatejj camachcän uc uñjiriw nuwasiri tamanacapar sarayäna. Ucat uca chekar purisasti, pʼekechirirojj wilap taypin liwisit jicjjatapjjäna, Amaliquiasti colerascaspas uqhämaw säna: Qhitinacatejj pʼekechirir munapcän ucanacajja, lokerinacapar jiwayañatac arctapjjpan.

28. Ucat, uca arunac istʼasinsti cawquïrinacatejj pʼekechirir munapcän ucanacajja, nayrakatar jutasaw pʼekechirin lokerinacapar arctapjjäna.

29. Ucat pʼekechirin lokerinacapajj mä nuwasiri tama jupanacar arctir uñjasinjja, wastat ajjsarasaw wasarar jaltjjapjjäna. Ucat Zarahemla oraker jutasaw Ammonan jakenacapamp mayachasipjjäna.

30. Ucat jupanacar arctir nuwasiri tamajj cut-tjjänwa, inamayaw jupanacar arctäña. Uqhäm Amaliquiajj sallkjañ chuymampejj uca jakenacan chuymanacap jupa toker quipstayäna, munayasiñ laycu.

31. Ucat khepürojj jupajj nuwasiri tamanacapamp marcar mantasaw Nefi marcar catuntäna.

32. Ucat pʼekechirin warmipajj pʼekechirin jiwatapat istʼasinjja, – cunalaycutejj Amaliquiajj pʼekechirin warmipan ucarojj mä qhitaruw qhitäna, aqhäm sañapataqui: Pʼekechirin lokerinacapaw jiwayi, ucat Amaliquiajj nuwasiri tamanacapamp jupanacar arcti. Ucampis uca arctäwejj inamayawa, jupanacajj jaltjjapjjewa–sasa.

33. Ucat pʼekechirin warmipajj uc istʼasinjja, Amaliquian uc marcanquirinacar jan tucqhañapatac mayiriw qhitäna. Uqhämaraqui jupan uc jutañap munaraquïna; ucatsti, ircatirinac jupamp chic irpasa, pʼekechirin jiwäwipat ircatapjjañapataquiw mayiraquïna.

34. Ucat Amaliquiajj pʼekechirir jiwaycän uca lokerimp take jupamp chictʼatäpcän ucanac irpasaw, pʼekechirin warmipajj koncän uca chekar saräna. Ucat sapakat mayniw pʼekechirin quipca lokerinacapan jiwayatapat ircatapjjäna; jupanacasti sapjjaraquïnwa: Jupanacajj jaltjjapjjewa; janit ucajj jupanacat jiwayatap ircatqui? Uqhäm pʼekechirin warmipar pʼekechirin jiwatapat iyawsayapjjäna.

35. Ucat Amaliquiajj pʼekechirin warmipamp sumthapisaw, jupar warmipaptayasïna. Uqhäm chuymamp apjasa, sallka chʼiqhi amuyun lokerinacapan yanapapampejj marc sarayäw catüna. Jupajj takpach uca oraken pʼekechirit uñtʼayasjjäna, Laman jakenac taypina, Lemuel jakenac taypina, Ismael jakenac taypina, Nefi jakenacat misturinac taypina. Nefin marc sarayäwipat jichhacamaw uca pʼekechirit uñtʼatäjjaraqui.

36. Jichhajja, uca misturinacajj Nefi jakenacamp quipca yatichäwin lokerinacapan jiwayatïpana, Amaliquiajj nuwasiri tamanacapampiw jupanacar arcti. Yatiyäwinïcasa, quipca Tatitut yatïwit yatichatäcasa, take ucampis jupanacan mistüwinacapat jucʼa pacharojj jupanacajj Laman jakenacat jucʼamp chʼollkheru, jan juchanacapat cutiquipstirir jucʼamp ñankha ajjsarcañ lakʼjamaw tucupjjäna; Laman jakenacan saranacapamp chharkhosaw, jayrasiñarus take jan tupump munapayasiñarus catuyasipjjäna, Dios Tatitupat kʼal armasisa.