1. Acanacaw Amulecan Ammonia orakenquir jakenacar yatiyat arunacapajja. Jupajj sänwa:

2. Nayajj Amulecätwa. Nayajj Aminadit Ismael sarakerin Gidona sat yokapan yokapätwa. Uca pachpa Aminadejj Diosan lucʼanapan kellkat kollan uta perkanquir kellkat arsuyqui ucawa.

3. Uqhämaraqui Egipto oraker jilanacapan amparapamp aljatäcänjja, uca Josean Manases yokapat Jerusalenat mistut Lehi sarakerin Nefi yokapat sarakerïn Aminadejja.

4. Nayar uñtʼquitu, ucanac taypinjja, nayajj jachʼa jakëtwa; nayajj walja familianacanïtwa, amigoniraquïtwa, nayan amparajjamp wal luratajjat walja kamir cunaymananac catokaracta.

5. Ucampis take uqhamäcasasa, nayajj Tatitun thaquipata, jupan jan amuyatanacata, muspharcañ chʼamapats janiw wal yatcayät-ti. Nayajj sistwa, janiw ucanacat wal yatcäyät-ti; ucampis nayajj pantastwa, cunalaycutejj arunacapajj kellkatawa. Diosat jan amuyat cunanacata, jupan muspharcañ chʼamapatjj waljanac uñjta, jïsa, aca jakenacan jacäwinacap imataps uñjaractwa.

6. Ucampis chuymajj chʼollkheptayta, walja cutiw nayajj jawsatäyäta, ucampis janiw istʼañ muncäyät-ti. Ucat aca taripirinacan sarayäwipan tunquïr maran pakallkör phajjsina, pusïr urucamas chuymajjan ñankhätaparjamaw Diosar kallcatascaquïyäta.

7. Nayajj jacʼa familiajjar tumpir sarascäyät ucqhaw, Tatitun qhitapajj aqhäm sas nayar uñstitu: Amulec, utamar cut-tʼam; Ucan Tatitun arjiripar mankʼayäta. Jupajj kollanawa, Diosan ajllit jakewa. Jupajj aca marcan juchanacap laycuw walja ur ayuni, ucat mankʼat jupar awtji. Jumajj utamaruw jumajj catokäta, mankʼayaraquïta. Jupasti jumampir utamampiruw qhuyapayani. Tatitun bendicionapajj jumana, utaman utjani.

8. Ucat nayajj qhitan arupar yäkasaw utajjar cut-tʼäyäta. Ucar sarascäyät ucqhaw, qhitit-tejj qhitajj nayar sisquitu: Jumajj utamaruw jupar catokäta – sasajja, uca jakeruw jicjjat-ta. Uca jakesti Diosan cunaymananacapat parlapctam uca pachpa jakeraquiwa.

9. Qhitasti nayarojj situwa: Jupajj kollan jakewa; ucat nayajj qhitïquitejj uc yat-ta, cunalaycutejj uqhäm Diosan qhitapajj khanañchi.

10. Uqhämaraqui, cunanacat-tejj jupajj ircatqui ucanacan chekätap yatiracta. Nayajj jumanacaruw sapjjsma: Tatitojj chekpachaw jacasqui; uca pachpa chekampisti jupajj qhitaparuw ucanacat yatiyir qhitanitu. Aca Almajj utajjan kamqui ucapachaw Tatitojj ucanac luri.

11. Jupajj utajjaruw qhuyapayi, nayaru, warminacajjaru, wawanacajjaru, awquijjaru, familianacajjaruw qhuyapayipjjetu. Jïsa, jupajj takpach familianacajjaruw qhuyapayi, jupan arsut arunacaparjamaraquiw Tatitun qhuyapayäwipajj nanacjjar jutaraqui.

12. Ucat Amulecajj uca arunac parlcän ucqhajja, uca jakenacajj muspharañ kalltapjjäna, jupanacanc-cän uca jutir urunacat yatiyir ajayurjama, juchanacapat jutir cunaymananacat yakha ircatirin jucʼamp utjatap uñjasa.

13. Ucampis uca jakenac taypin yakhepajja, chʼiqhi jan wali amuyupampiw jisctʼañ amtapjjäna; jupanac contra ircatirinac jicjjatañataqui, ucatsti taripirinacapar leyiparjam jiwayatäñapataqui, jan ucasti carcelar jakontatäñapataqui, jupanacan juchap uñstayataparjama, jan ucajj jupanac contra ircatataparjama.

14. Jupanacar tucqhañ chʼamtʼapcän ucanacajja, ut-tʼayat taripäwinacapana, jan ucajja, jakenacan juchanacapar taripirinac nayrakatan taripäwinacapan ley uñjañatac alantat abogadonacäpjjänwa.

15. Uca abogadonacajj uca jakenacan takpach luräwinacap sallkjäwinacap apnakañ yatipjjäna; ucasti jupanacan yatïwip sum lurapjjañapataquïnwa.

16. Ucat jupanacajj Amulecar cʼarisiyañataqui, arsut arunacapat maysar uñtayañapataquiw jiscsuñ kalltapjjäna.

17. Jupanacajj Amulecan jupanacan munañap yatitapjj janiw yatipcänti. Ucat jupanacajj jiscsuñ kalltapcän ucqhaw jupajj amuyäwinacap yatjjatasa, jupanacar säna: Jumanaca ñankha, asquit cutekat mita, juma abogadonaca, cʼari chuymaninaca, jumanacajj supayataquiw takan takanachapjjta; jumanacajj sipitanac Diosan kollananacapar catjañanacamataquejj uchapjjta.

18. Jumanacajj asqui thaquir ñankhar tucuyañataquiw arustʼapjjta. Aca jakenacan kʼala tucqhatäñapcamaw Diosan colerasiñap pʼekenacamar apaniñatac lurapjjaracta.

19. Mosia, jiwasanacan khepïr pʼekechirisajj sarayäw catuyañampïscän ucqhajja, qhitirus uc catuyañatac jan utjcänsa, marcapar quipca arupamp sarayañap lurasa, walic jupajj säna, jïsa jupajj walic säna: Aca jakenacan arupajj ñankha luräwinac ajllcän ucapachatejj purinispajja, juch lurañarutejj jalantapcasp ucapachaw jupanacajj tʼunjañatac pokotäpjjaspa.

20. Nayajj jumanacaruw sapjjsma: Tatitojj ñankha luräwinacamat sum amuyasaw taripi; walic alajjpachanquirinacap tokejj aca marcar aqhäm sas artʼasquejja: Juchat cutiquipstas cutiquipstapjjam, cunalaycutejj alajjpach khapak marcaw jacʼanqui.

21. Jïsa, walic alajjpach qhitanacapan arup tokjj yatiyasquejja: Marcajj taypirojj amparajjanquir chekar uñjañampi asquimpiw sarakanï –sasajja.

22. Nayajj jumanacaruw sapjjsma: Janitejj aca orakenquir asqui jakenacan mayisïwinacapajj utjcaspajja, jichhajj kʼala tucqhäwimp sartʼatäpjjasamänwa. Ucampis uca tucqhäwejj janiw Noen urunacapanjam umampïcaspati. Jan ucasti, machʼampi jachʼa usunacampi espadampïspawa.

23. Ucampis asquinacan mayisïwinacap laycuw jacasipcactajja. Ucat jumanacataquejj asqui jakenac jumanac taypit alis-supjjätajja, Diosajj amparap janiw aythapiscaniti. Antisas jupajj jachʼa colerasiñapampiw jumanacjjar jutapjjätam; ucat machʼampi, jachʼa usunacampi, espadamp tʼakhesiyatäpjjätawa. Janitejj juchat cutiquipstapcätajja, ucapachajj niyaw jacʼanqui.

24. Ucat jakenacajj Amulecat jucʼamp colerasisaw aqhäm sas artʼapjjäna: Aca jakejj asqui leyinacasata, suma amuyun ajllit abogadonacasat ñankha parli.

25. Ucat Amulecajj amparap loktasaw, jucʼamp jachʼat jupanacar aqhäm sas artʼäna: Juma ñankha, asquit cutekat mita, cunats satanasajj chuymanacamar sintipun catjjäsi? Cunats jupan jumanacjjar chʼamanïñap munapjjta, arsut arunacar chekaparjam jan amuyañanacamataqui nayranacaman juyqhuptañapcama?

26. Nayajj leyim contrat parlta? Janiw amuyapctati; jumanacajj leyejj contraw parltajj sapjjestawa, ucampis janiw uqhäm parlcti. Antisas leyimat asc parlta, uca leyin jumanacar juchañchañapcama.

27. Jichhajj nayajj sapjjsmawa: Abogadonacaman taripirinacaman ñankhätapajj aca marcan tucqhäw takanap takanachañ kallti.

28. Ucat, Amulecajj uca arunac arscän ucqhajja, jakenacajj jupa contraw aqhäm sas artʼapjjäna: Jichhajj yatipjjtwa, aca jakejj supayan wawapawa, cunalaycutejj cʼarintistuwa. Jupajj leyis contraw parli, jichhasti janiw uca contrajj parlcti –siwa.

29. Uqhämaraquiw abogadonacasata, taripirinacasat ñankha parli.

30. Ucat abogadonacajj chuymanacapan ucanac jupa contra amtasiñanacapataquiw amtayapjjäna.

31. Jupanac taypinsti Zeezrom sat mä jakew utjäna. Jupajj jakenac taypin walja lurañanïsa, suma yatsut lurirïsaw Amulecampir Almampir yakhanacats jucʼamp juchar jakontäna.

32. Uca abogadonacan munañapajj kollk catokasin kamiriptañataquïnwa; jupanacajj luräwipat kollk catokapjjäna.