1. Ucat tunca llätuncan marana, tunca mayan phajjsina, tunquïr uronjja, Laman jakenacan Ammonia oraker jutir uñjapjjäna.

2. Uca marc wastat luratïpan Moronejj mä nuwasiri tama uca marca thiya ucsar uchäna. Jupanacasti Laman jakenacan michʼinacapat kalanacapat jarqʼiritaquejj lakʼa ucsa tokerojj kotsupjjäna, cunalaycutejj jupanacajj michʼinacapampi kalanacapampiw nuwasipjjäna.

3. Nayajj Ammonia marcajj wastat luratänwa sistwa. Nayajj jumanacaruw sapjjsma: Mä kawkhajj wastat luratänwa; ucat Laman jakenacan mä cutejj jakenacan ñankhätap laycuw tucqhat uñjasïna, ucat wastat uqhäm jasac atipjañäcaspas uqhäm amuyasipjjäna.

4. Ucampis muspharasin cutektäwipajj jachʼapunïnwa. Uca Nefi jakenacajj jachʼa lakʼa kotu jupanacar muytayasajj allsupjjatayna. Ucasti, wali jachʼïpanjja, Laman jakenacajj michʼinacap kalanacap jakosajj janiw wactʼayapcasapänti. Janiraquiw mantäwits yakha chekanjam jupanacar puripcasapänti.

5. Ucat ucapachajj Laman jakenacan jilïr capitananacapajja, Nefi jakenacan suma amuyump jarcʼakasiñ chekanacap waquichatapat wal muspharapjjäna.

6. Jichhajja, uca Laman jakenacan jilïrinacapajj waljanïtap laycu, cunjämtejj ucapachcam lurapcänjja, uqhäm Nefi jakenacar catuntañ amuyasipjjäna. Jupanacasti jirut lekʼsut jarqʼirinacampi chuymatac jarqʼir lekʼsutanacampi, lipʼich isimpi, jïsa, kʼara janchir janjjatasiñatac wali thuru lipʼich isimp waquichasipjjäna.

7. Uqham waquichasitäsinjja, jupanacajj jilanacapar atipjasajja, yucjam mitʼaniptayañajja, jan ucajja, munataparjam jupanacar jiwayañapa, jiwarayañapajj jasaquïcaspas uqhäm amuyasipjjäna.

8. Ucampis wali muspharañampiw uñjapjjäna, cunjämtejj catokañataquejj waquichatäpcän uca. Jupanacasti Lehin wawanacap taypinjja, janipuniw cunapachas uqhäm waquichasipjjerïcänti. Moronin yatichäwiparjamaw Laman jakenacamp nuwasiñataquejj waquichasitäpjjäna.

9. Ucat Laman jakenacajj jan ucajja, Amaliquia jakenacajj nuwasir waquichasïwinacapat wal muspharapjjäna.

10. Jichhajja, Amaliquia pʼekechiritejj nuwasiri tamapan pʼekepan Nefi oraket jutasapänjja, inas jupajj Laman jakenacar Ammonia marcanjj Nefi jakenacar jaljjataychisapäna, cunalaycutejj jupataquejj janiw jakenacapan wilap wartasiñapajj cunäcänsa.

11. Ucampis Amaliquia pachpajj janiw nuwasir jutcänti. Jupan jilïr capitananacapasti Nefi jakenacar Ammonia marcan jaljjatañjj ajjsarapjjänwa, Moronin Nefi jakenac taypin luräwinac turcatap laycu. Uca Laman jakenacasti arjjatat chekanacan munañap jan phokhasaw, jupanacjjar jan jaljjatirjamäpcänti.

12. Ucat jupanacajj wasararuw wastat sarjjapjjäna ucatsti; Noe orakejj Ammonia marca khepat Nefi jakenacar jaljjatañatac jucʼamp suma chekäcaspas uqhäm amuyasaw jakenacapamp uca orak toker sarapjjäna.

13. Jupanacajj Moronin takpach ucsa toke oraken marcanacar chʼamañchatapa, jan ucajj ucanacatac arjjatat pucaranac luratap janiw yatipcänti. Ucat Noe orak tokerojj may chuymtʼasaquiw sarapjjäna; jilïr capitananacapasti, uca marcanquir jakenacar tucqhañataquejj jurament lurapjjäna.

14. Ucampis wasitat muspharapjjäna, Noe marcajj ucapachcamajj jan thurtʼat marcänwa, ucapachasti chʼaman marcaru, jïsa, Ammonia marcats jucʼamp chʼaman marcaruw Moronejj tucuyatayna.

15. Ucasti Moronin suma amuyupänwa; jupajj jupanacan Ammonia marcat ajjsaratanacap amuyäna. Noe marcan ucapachcam ucsa oraket jucʼamp tʼuqha marcätap laycu, ucar nuwasir saratanacap amuyaraquïna; ucasti munañaparjamänwa.

16. Moronisti uca marcanquir jakenacataquejja, Lehiruw jilïr capitanatac ut-tʼayäna. Laman jakenacamp Sidon jawirat inti jals tokenquir kherwan nuwascän uca quipca Lehïnwa.

17. Ucat Laman jakenacajj Lehin uca marcar sarayatap yatjjatasajja, jupat wal ajjsaratap laycuw wastat munañap jan phokherjamäpcänti. Ucampis jilïr capitananacapajj juräwi lurapjjatayna, uca marcar jaljjatañataqui. Ucat nuwasiri tamanacap khepat nayrakatar alistanipjjäna.

18. Jichhajja, Laman jakenacajj uca arjjatat pucaranacapar mantäwiruquiw mantapjjasapäna, kotsut lakʼanacan jachʼätapata, muytat allsut pʼiyanacan pʼiyätap laycu. Uca kotsut lakʼampi allsut pʼiyampejj mantäwinac jan utjaycänti.

19. Uqhämasti Nefi jakenacajj waquichatäpjjänwa, qhitinacatejj pucarar mantañatac maysa chek maqhatañ munapcaspa ucanacar kalamp michʼimp tucqhañataqui.

20. Uqhämaraqui jucʼamp chʼaman jakenacapat mä kawkhanejj espadanacapamp kʼorawanacapamp arjjatat chekapan mantäwipat take mantañ chʼamtʼirinacar jiwayañatac waquichasitänwa; uqhämaw Laman jakenac contra saytʼasiñataquejj waquichasitäpjjäna.

21. Ucat Laman jakenacan capitananacapajj nuwasiri tamanacap mantäw chek toker alistanisaw Nefi jakenacamp arjjatat chekapar mantañatac nuwasiñ kalltapjjäna. Ucampis jupanacajj walja cutiw khepar cut-tayatäpjjäna, waljaniraquiw jiwarayatäpjjäna.

22. Ucat Nefi jakenacar mantäwit jan atipatap amuyasisajja, jupanacajj kotsut lakʼanacar allitatañ kalltapjjäna, nuwasiri tamanacapatac mantäw lurañataqui, jupanacamp quipc nuwasiñanacapataqui. Ucampis uca yantʼäwinacapanjj kalanacamp michʼinacampiw alisnucutäpjjäna. Ucat pʼiyanacapar orak allitatasin phokhantañap lantjja, mä kawkhacamaw jiwatanacapamp chhojjriñchatanacapamp phokhantapjjäna.

23. Uqhäm Nefi jakenacajj timanacapjjar take chʼamanïpjjäna. Uqhämaraqui take jilïrinacapan jiwayatäñapcama, Laman jakenacar Nefi jakenacar tucqhañ yantʼapjjäna. Uqhämaraqui, warankat jucʼamp walja Laman jakenacajj kʼorawanacapamp arjjatat chekapan mantäwipat take mantañ chʼamtʼirinacar jiwarayatäpjjäna, ucampis maysäjjanjja, janiw mä Nefi jakes jiwayatäcänti.

24. Mä pheska tuncaniquiw mantäwina, Laman jakenacan michʼinacapar mantäwin catutäsin chhojjriñchatäna. Ucampis jupanacajj lekʼsut jarqʼirinacapampin chuymatac jarqʼir lekʼsutanacapampin casconacapampin arjjatatäsajja, cayunacapaquiw chhojjriñchatäna; uca chhojjrinacapatsti waljajj sintïnwa.

25. Ucat Laman jakenacajj takpach jilïrinacapan jiwarayatätap uñjapcän ucqhajja, wasararuw jaltjjapjjäna. Jupanacasti Nefi orakeru, nacïwipat Nefi jaket Amaliquia pʼekechiripar jachʼa chhakäwipat yatiyiriw cut-tapjjäna.

26. Ucat jupajj Nefi jakenacjjar janiw yucjam mitʼaniptaycänti, ucat munañap jan phokhatap laycuw jupajj jakenacapatac walpin colerasïna.

27. Jupajj wal colerasisapuniw, Diosata, Moronit ñankhanac parlasa, juräwi luräna, Moronin wilap umañataqui. Ucasti Moronin jakenacapar arjjatañatac waquichasisa, Diosan camächitanacapar phokhatap laycünwa.

28. Ucat maysäjjana, Nefi jakenacajj Dios Tatitupar timanacapan amparanacapat khespiyir toket sipan, jucʼamp chʼamapat yuspagarapjjäna.

29. Uqhämaw taripirinacan Nefi jakenacjjar sarayäwipan tunca llätuncan marajj tucusiwayäna.

30. Diosan arupar jan karis yäkatap laycuw jan tucusis sumancañajj jupanac taypin utjäna, iyawsiri tamansti walja jachʼaptañaw utjaraquïna. Helamanamp Siblonamp Coriantonamp Ammonamp jupan jilanacapampi, jïsa, Diosan kollan sucʼataparjam ut-tʼayatäpcäna, juchanacapat cutiquipstañar bautisatäsina, jakenac taypin yatiyir qhitatäsin take ucanacajj Diosan arup jupanacar yatiyapjjäna.