1. Ucat Almajj Zarahemlan ut-tʼayat iyawsiri tamanquir jakenacar parlañ tucuycän uca khepatjja, jupajj Diosan sucʼataparjamaw amparanacap lokjjatas sacerdotenac amawtʼanacamp ut-tʼayäna iyawsiri tamar sarayañataqui, uñjañataquiraqui.

2. Ucat cawquïr jan iyawsiri tamanquirinacatejj juchanacapat jan cutiquipstapcaraquïnjja, juchat cutiquipstañaruw bautizasipjjäna. Jupanacasti iyawsiri taman catokatäpjjänwa.

3. Uqhämaraqui, cawquïr iyawsiri tamanquirinacatejj ñankha luräwinacapat jan cutiquipstapcänjja, Dios nayrakatan janirac llampʼuptayasipcänjja –sañ muntwa, cawquïrinacatejj chuymanacapan jachʼa jachʼa tucupjjäna –jupanacajj janiw catokatäpcänti, sutinacapasti asqui jakenacan sutinacapamp jan jaqhutäñanacapataqui chhakayatänwa.

4. Uqhäm iyawsiri taman sucʼataparjamajj luräwinac Zarahemla marcan ut-tʼayañ kalltapjjäna.

5. Nayajj jumanacan Diosan arupan takenir antutat walja utjañap amuyasipjjañam munirista. Janiw qhitirus Diosan arupar istʼir tantachasiñataquejj jarcʼatacänti.

6. Uqhämaraqui, Diosan wawanacapar jupanacan wal tantachasipjjañapataqui, Diosar jan uñtʼirinacan almanacapatac ayunas chʼamamp mayisis mayachasipjjañapataquiw camächitajj churatäna.

7. Take uca camächitanac churasinsti, Almajj jupanacat jithektasjjänwa, jïsa, Zarahemla marcanquir iyawsiri tamat mistjjäna, ucatsti Sidon jawirat inti jalsu chekaw maqhatäna, Gedeon sat valleru. Uca chekan mä marcaw utjäna Gedeon sutini. Uca marcajja, Gedeonan sutip apcän uca kherwancänwa, qhitirutejj Nehorajj espadamp jiwaycän uca.

8. Almasti sarasajja, Gedeon kherwan ut-tʼayat iyawsiri tamaruw Diosan arup yatiyañ kalltäna. Awquinacapan arsut arun chekätapat Diosan yatiyäwiparjama, jupan utjcän uca jutir arunacat yatiyir ajayurjama, marcapar juchanacapat cutsuyir jutcan uca Jesucristo Diosan Yokapat ircatäwirjama, kollan sucʼatat jupajj jawsatäcän ucarjamaraquiw jupajj yatiyäna. Uqhäm kellkatawa. Uqhamäpan.