1. Ucat Amulon Helam Jerusalen uca orakenacanquiri, jïsa, takpach ucsa toke orakenquiri, Diosar jan cutiquipstata, Anti-Nefi-Lehi suti jan catjjarur Laman jakenacampir amalequir arquirinacampir amulonaru arquirinacampiru amalequir arquirinacamp amulonaru arquirinacampejj jilanacapatac colerasiñ amtayapjjäna.

2. Ucat uñisiñapajj jupanacatac wali jachʼaruw tucüna, jupanacasti pʼekechiripan pʼekechirïñap jan munasaw kallcatañ kalltapjjäna. Ucat Anti-Nefi-Lehi jakenacamp nuwasiñataquejj armanac aptapjjäna.

3. Ucat pʼekechirejj yokapar marc sarayäwjj churäna, juparusti Anti-Nefi-Lehi sutimpiw sutiñchäna.

4. Ucat Laman jakenacajj Diosan jakenacapamp nuwasiñatac waquichasiñ kalltapcän uca pachpa maran pʼekechirejj jiwjjäna.

5. Ucat Ammonamp jilanacapamp jupanac chictʼat jutirinacampejj Laman jakenacan jilanacapar tucqhañ waquichäwinacap uñjasaw, Midian oraker jutapjjäna; ucansti Ammonajj takpach jilanacapampiw jiquisïna. Uca oraket Ismael orakeru Lamonimp Anti-Nefi-Lehi jilapamp Laman jakenac contra saytʼasiñataquejj cuns lurañä pa uc arustʼiriw jutapjjäna.

6. Ucatsti, Tatitur cutiquipstat takpach uca jakenac taypinjja, janiw maynis jilanacapatac armanac aptañ muncänti. Janiraquiw nuwasiñatac cuns waquichasiñ munapcaraquïnti. Uqhämaraquiw pʼekechiripajj jan lurañapatac jupanacar parlaraquïna.

7. Acanacaw jakenacar ucjjat arsut jupan arunacapajja: Munat marcajja, nayajj Diosajjaruw yuspagarta, uca jachʼa Diosasan sumätaparjam aca Nefit sarakeri jilanacas jiwasanac taypir yatiyir ñankha awquinacasan saranacapat iyawsayir qhitanitapata.

8. Acajj nayajj jachʼa Diosajjaruw jupan Ajayupat mä kawkjj chuymanacasar llampʼuchañasatac jiwasanacan Nefi jake jilanacasamp sumancañascam jiwasanacar churatapat yuspagararacta.

9. Uqhämaraqui jupanacamp uca sumancañas toket jiwasanacan walja jiwayatanacasata, juchanacasata, iyawsayatäpjjtan. Ucat Diosajjar yuspagararacta.

10. Uqhämaraqui Diosajjaru, jïsa, jachʼa Diosajjar yuspagararacta, jupan ucanacat cutiquipstañas munatap laycu. Uca walja juchanacasaru, jiwayäwinacasar pʼampʼachatapata, chuymanacasan uca luratasat llaquisïwinacata, Yokapan asquïtap laycu apakatapat yuspagararacta.

11. Ucat jilanaca, walja jiwayäwinacasata, juchanacasat cutiquipstañataqui Diosaru ucanac chuymanacasat apakayasiñatac take chʼamasan waquisitap laycu (cunalaycutejj jiwasanacajj takpach jakenacat sipan jucʼamp chhakatäpjjäyätanwa) manchas apakañapatac Dios nayrakatanjj juchat cutiquipstañasatac janiw jucʼamp lurcasänti.

12. Uqhämasti munat jilanacajja, niyaquitejj Diosajj manchanacas apakchejja, espadanacasan lliphiripas cut-tayataraquïchejja, janiw jucʼamp jilanacasan wilapamp espadanacas manchachapcañäniti.

13. Nayajj jumanacaruw sapjjsma: Espadanacasan jan jilanacasan wilapamp manchatäñapataquiw ucanac imapjjañäni. Jiwasanacatejj wastat espadanacas kʼañuchapjjañänejja, inas ucanacajj juchanacasan tʼakhesiyäwipar phokhañatac wartatäcani uca jachʼa Diosan Yokapan wilapamp inas jan jucʼamp kʼomachatäc-chispati.

14. Jachʼa Diosajj jiwasanacarojj qhuyapayapjjestuwa; jan chhaktañanacasataquiw ucanac yatiyapjjestu. Wawanacasar munqui uqhäm quipca jiwasanacar munatap laycuw jupajj janïr ucanacajj lurascän ucqhajj ucanac yatiyapjjestu. Ucat qhuyapayäwipan alajjpachanquirinac tokejj tumpapjjestu, jiwasanacan khespiyañ arustʼaw yatiñasataqui, jutir mitanacan yatiñapataquisa.

15. Diosajj sinti qhuyapayasiriwa! Jichhajja, manchanacas jiwasanacat apakayasiñatac takpach chʼamasan waquisitap laycu espadanacasan lliphir tucutap laycuraqui, khep khepa urunjj Diosar ircatañatac espadanacasan lliphipirïscaquiñapataqui, jan ucajja, jupa nayrakatar taripatäñasatac irpantatäpcañän uca urunjja, Diosajj arup churapjjest ucamp kʼomachapquistu ucapachatjj, jiwasanacan jan jilanacasan wilapamp espadanacasar manchatasat ircatañapataquiw espadanacas imantapjjañäni.

16. Jichhasti jilanaca, jilanacasatejj tucqhañ munquistanejja, jiwasanacajj espadanacas imantapjjañäniwa; khep khepa urunjj jiwasanacan jan ucanacamp nuwasiñasat ircatañatac lliphipirïscaquiñapataquiw orak mankhar ucanac imantapjjañäni. Jilanacasatejj jiwasanacar tucqhapjjestanejja, Diosar sarasaw khespiyatäpjjañäni.

17. Ucat pʼekechirejj uca arunac tucuycäna, takpach jakenac tantachasitäpquipana ucqhaw jupanacajj takpach espadanacap jaken wilap wartañatac take armanacap orak wali mankhar imantapjjäna.

18. Ucsti janipuniw jucʼamp jaken wilap wartañatac armanacapamp nuwasiñapat Diosampir jakenacampir ircatäwïcaspas uqhäm amuyasisaw lurapjjäna. Jilanacapan wilap wartañ lanti, jupanacan quipca jacäwinacap churañ munañapata, mä jilat apakañ lanti jupar churañ munañapata, urunacapan jayrasiñ lanti amparanacapan wal lurañ munañapat Diosar arsus ircatasaw uc lurapjjäna.

19. Ucat uca Laman jakenacajj chekat yatïwir puriyatäsinjja, jupanacajj thurtʼasipjjänwa, juch lurañ lantejj jiwañcamaw tʼakhesiñ munapjjäna. Ucsti jiwasajj uñjtanwa. Ucat jupanacan sumancañ armanacapa, sañ munta, jupanacan nuwasiñ armanac sumancañatac imantatap uñjaractanwa.

20. Ucat Laman jake jilanacapajj nuwasiñatac waquichasisaw, pʼekechirir tucqhañataqui jupa lant yakh uchañataqui, uc-chʼpach oraket Anti-Nefi-Lehi jakenacar tucqhañataquiw Nefi oraker jutapjjäna.

21. Ucat jakenacajj jupanac jutir uñjasajja, jupanacamp jiquisir sarasaw, orakcam quilltʼas altʼasa, Tatitun sutipar artʼañ kalltapjjäna. Ucat Laman jakenacajj jupanacar jaljjatasin, espadamp jiwarayañ kalltapcän ucqhajja, jupanacajj uqhäm altʼatäpjjänwa.

22. Ucat jan thurtʼasipan Laman jakenacajj warank pheskaniruw jiwarayapjjäna; ucampis jupanacan bendicitätapjj yat-tanwa, Diosapamp utjir saratap laycu.

23. Ucat Laman jakenacajj jilanacapan espadatac jan jaltatapata, cupir chʼekar jan uñtatapata, liwisis jiwatapata, espadan jiwas Diosar yupaychatap uñjapcänjja –

24. Laman jakenacajj uc uñjasaw, jupanacar jiwarayañat cutektapjjäna; waljanin chuymanacapajj espadan jiwarayat jilanacapat llaquisisaw jachäna, jupanacan luratanacapat cutiquipstatap laycu.

25. Ucat jupanacajj armanacap liwinucupjjäna. Jupanacan lurat jiwayäwinacap laycu pisayasisa, janiw jucʼamp uca nuwasiñ armanacap aytañ munapcänti; jupanacasti jilanacapjam altʼasa, cawquïrinacatejj amparanacap jupanacar jiwayañatac aytapcän, ucanacan qhuyapayasïwiparuw alcatapjjäna.

26. Ucat ucürojj jiwayatanacajj kawkhäcäntejj ucat jucʼampiw Diosan jakenacapamp mayachasipjjäna; uca jiwayatanacan asqui jakëtap laycuw jupanacan khespiyasitapat jan pächasiñajj utjquistuti.

27. Janiw mä ñankha jakes jupanac taypin jiwayatäcänti, antisas warank jilaw chekat yatïwir puriyatäpjjäna. Uqhämat Tatitun marcapar khespiyañatac walja cunaymananac toket luratap uñjtan.

28. Laman jakenacat jilpach jilanacapar jiwayapcän ucanacajj Amalequir arquirinacamp Amulonaru arquirinacampïnwa; jupanacat jilpachajj Nehoranacjam iyawsäwinïpjjänwa.

29. Jichhajja, Diosan jakenacapamp mayachasirinac taypin janiw amalequir arquirinacas amulonaru arquirinacas utjcänti. Janiraquiw Nehorar arquir jakenacajj utjcaraquïnti, antisas jupanacajj cheka Lamanat Lemuelat sarakerinacäpjjänwa.

30. Jichhajja jiwasajj uñjtanwa, mä marcajj Diosan Ajayupan yatichatätapatjja, ucat asqui cunaymananacat jachʼa yatïwinïsina, ucat juch lurañar jalantapqui ucqhajja, jupanacajj jucʼamp chʼollkheptapjje; jupanacan sarnakäwipajj janis yatcasapän ucat jucʼamp jan waliruw tucuraqui.