1. Munat jilanaca, nayan jumanac taypir jutañatac waquisitap amuyasisaw, nayan arujjat jumanacar parlañatac chʼamtʼasï, ucanacsti quipca lacajjat yatiyapjjäma. Jichhajj nayrïr cutiw nayajj quipca lacajjan arunacapat parlapcsma, cunalaycutejj nayajj taripäw konuñanaqui ucan walja luräwinacanïsaw jumanacan ucar jutañajjajj jan waquiscänti.

2. Janitejj taripäw konuñajj naya lant sarayir yakhar churatäcasapänjja, janiw jichhas jumanacan uc jutquiriscayät-ti. Tatitusti walja qhuyapayäwimpiw jumanacan uc jutañajjatac antutitu.

3. Nayajj jumanacan Dios nayrakatan llampʼuptayasiñanacamaru, jupan qhuyapayañapatac mayisisipcaquiñanacamaru, jup nayrakatan jan juchanïtam jan Zarahemlanquir jilanacasjam ajjsarcañ pächasiñancañam jicjjatañajj wal munasaw suyta.

4. Diosan sutipajj qhuyapayatäpan, cunalaycutejj jupajj nayaru jupanacan wastat asqui thaquin ut-tʼayatätanacapjj yatiñajjatac churitu. Jïsa, uca jachʼa cusisiyir yatiñ churitu.

5. Nayasti nayancqui uca Diosan Ajayuparjama, jumanacjjat cusisiñjj suyaracta. Ucampis nayan jumanacjjat cusisiñajjan Zarahemla marcanquir jilanacatacjam jachʼa tʼakhesiña llaquisiña toket jutañapjj janiw muncti. Cunalaycutejj nayan jupanacjjat cusisiñajjajj walja tʼakhesiñan llaquisiñan sarnakatajj khepat juti.

6. Janquí jumanacajj jilanacamjam jan iyawsir chuymanejj jicjjatasipjjasmati; janiquí chuymanacaman jachʼa jachʼa tucuñap laycojj inamayar tucutäpjjasmati; jïsa, jumanacajj janiw chuymanacamjj uchapcpachätati, kamiriptañaru, oraken jila jil tucuñaru, jïsa, janiw idolonacar yupaychapcpachätati. Jan ucasti, jacquir chekpach Diosaru. Ucatsti, jan thayjtquir iyawsañampiw suyascta, jutcan uca juchanacamat pampachasïwiru.

7. Nayajj jumanacaruw sapjjsma: Walja cunanacaw jutcani. Ucampis takpachat sipan jilaw mayajja – Cutsuyirejj jutcani, marcap taypir jutcani ucapachajj janiw jayancjjeti.

8. Jupajj jiwir janchin utjcän ucapachaw jiwasanac taypir jutani sasajj janiw siscti. Ajayojj janiw uqhämäniw sisquituti. Ucat nayajj jan yatcti; ucampis aqhäm yat-ta, Dios Tatitojj take aruparjam take cunanac lurañataquejj chʼamaniwa.

9. Aqhäm Ajayojj nayar situ: Aca jakenacar aqhäm sas artʼam: Juchat cutiquipstapjjam; Tatitun thaquip waquichapjjam, jupan cheka thaquipan sarnakapjjam. Alajjpach khapak marcajj jacʼanquiwa, Diosan Yokapasti orakjjaruw jutani.

10. Lakʼa achilanacasan orakepäcän uca Jerusalenan jupajj Mariat yurini. Uca Mariajj jan chach uñtʼasa suma munat ajllit catokerïsa, Kollan Ajayun chʼamapajj jupar chʼiwjjatani, ucat jupajj mä yokall waw wawachasini, ucasti quicpa Diosan Yokapäniwa.

11. Uca Yokasti take casta tʼakhesiñ usunaca yantʼäwinac tʼakhesisaw sarnakani; ucasti aqhäm sas arupar phokhañataquiwa: Jupajj marcapan usunacap catjjaruni.

12. Jakenacapar ñachʼarapqui uca jiwañan phalanacap tʼakjjañataquiw jupajj jiwañ catjjaruni. Jupasti jupanacan usunacap catjjaruni jupa mankhan janchirjam qhuyapayäwin phoktʼatäñapataqui, jupan jakenacapar usunacaparjam janchirjam yanapañ yatiñapataquiraqui.

13. Jichhajja, Ajayojj take cun yati; ucampis Diosan Yokapajj janchirjamaw tʼakhesi jupan jakenacapan juchanacap catjjaruñapataqui, jupan antutayasïwipan chʼamaparjam jupanacan camächit pʼaquïwinacapar chhaktayañapataqui. Ucajj nayan utjqui uca ircatäwiwa.

14. Nayajj jumanacaruw sapjjsma: Juchat cutiquipstasa, wastat nacipjjañamawa, cunalaycutejj Ajayojj siwa: Janitejj jupanacajj wastat nacipcanejja, janiw alajjpach khapak marcjja tutjam catokapcaniti. Uqhämasti jutapjjam, juchat cutiquipstasin bautizasipjjam, juchanacamat jarekasiñanacamataqui, uqhämaraqui oraken juchanacap apakqui, take jan asqui luräwinacat khespiyañatac kʼomachañatac jachʼa chʼamanïqui, uca Diosan Chitapar iyawsañanacamataquiraqui.

15. Nayajj jumanacaruw sapjjsma: Jan ajjsaras jutapjjam, jumanacar lak jaljjatapctam tucqhatäñatac ñachʼantapctam take uca juchanac maysar apanucupjjam. Jutapjjam ucat juchanacamat cutiquipstañ munapjjatama, Diosan camächitanacapat phokhañatac arsüw lurañ munapjjatam Diosamar uñachayapjjam. Ucsti jichhüru bautizasiñ umar mantatamampiw jupar uñachayapjjäta.

16. Cawquïrinacatejj uc lurapcanejja, ucapachat camächitanacapar phokhapcaraquinejja, jupanacajj nayan jupanacar satajjat amtasipjjaraquini; nayan ircatqui uca Kollan Ajayun ircatäwiparjamajja, jumanacajj wiñay jacäwinïpjjätawa.

17. Jichhajja, munat jilanaca, ucanac iyawsapjjtati? Nayajj sapjjsmawa: Ucanacar iyawsapjjatamjj yat-twa, nayancqui uca Ajayun yatiyäwip toket jumanacan ucar iyawsapjjatam yat-ta. Jichhasti ucata, jïsa, cuntejj nayajj sisct ucanacata, iyawsañam jachʼätap laycuw cusisiñajjajj jachʼaraqui.

18. Nayajj kalltat sapjjsma, jilanacamjam pächasiñan utjäwincañamjj janiw muncayät-ti; jichhasti suyatajjan phokhasitap jicjjat-ta.

19. Nayajj jumanacan asqui thaquincatamjj amuyaractwa. Nayajj jumanacan jupan thaquipar chekaptayatamjj amuytwa.

20. Jupajj janiw lincʼu lincʼu thaquinacanjam sarnakcaspati, cuntejj arsqui ucatsa janiraquiw saranuc-caspati; janiraquiw cupir chʼekaru, chekat jan chekaru muyuñ chʼiwipanïcaraquisa. Uqhämasti, saräwipajja wiñayas muycaspajj uqhämawa. Jichhasti jupan arupan ircatäwip toke ucanac yatiñar puripjjatam yat-ta.

21. Jupajj jan kollan templonacanjj janiw utjquiti, janiraquiw jan kʼomäqui cuna kʼañüqui ucajj Diosan khapak marcapar catokatäcaniti. Ucat nayajj sapjjsma: Cawquïrinacatejj kʼañüpqui ucanacajja, kʼañütapan kamapcani ucapachajja, jutaniwa, ucasti khep khepa urüniwa.

22. Munat jilanaca, jumanacan Diosatac lurañ wactʼapctam ucat amtasipjjañamataquiw ucanac sapjjsma, jan juchan jupa nayrakatan sarnakapjjañamataqui, ucarjam jawsatäpcta uca Diosan kollan sucʼataparjam sarnakañanacamataquiraqui.

23. Jichhajja, jumanacan llampʼu chuymanïpjjañama, jaysirïpjjañama, jallallanqhäpjjañam munta. Ewjjanac sum yäkerïpjjañama, llampʼu chuymamp jan mäc pʼek pasayasiñamp phoktʼatäpjjañama, take cun tupus lurapjjañama, cuntejj catokapct ucat Diosar yuspagarapjjañampun munirista. Diosan camächitanacapar jan tucusis sapa cut phokhapjjañama, cunatejj ajayutjam janchitjam waquisctam ucatac mayisipjjañama.

24. Uqhämaraqui iyawsäwin suyäwin qhuyapayasïwinïpjjam, ucat suma lurañanac sumpin lurapjjäta.

25. Tatitusti jumanacar qhuyapaypan; uqhämaraqui tucuyäwinjja Abrahanampi, Isaacampi, Jacobompi, oraken kalltäwipatpach utjcän takpach uca kollan arjirinacampi jumanacan isinacamajj jupanacan isinacapjam jan manchanïs jumanacan alajjpach marcat jan jucʼamp mistuñanacamatac kontʼasir irpantatäñanacamataqui, jupajj isinacam jan manchan impan.

26. Jichhajja, munat jilanaca, nayan ircatqui uca Ajayurjamaw aca arunac arsupjjsma; arujjar wali sum yäkatanacam laycuw chuymajjajj walpin cusisi.

27. Jichhasti, Diosan sumancañapajj jumanacampïpan, uqhämaraqui utanacamampi, orakenacamampi, uywa tamanacamampi, take yänacamampi, wawanacamampi, iyawsäwimarjam suma luratanacamarjam jichhat ucsarojj kampan. Uqhäm nayajj arsta. Uqhamäpan.