63ri Jalja
Siblonajj Helaman lantiw kellkatanac catu – Moronejj jiwjjewa – barconac lurir Hagota – Alay toke oraker Nefi jakenacan saräwinacapa – Helamanan Helaman sat yokapajj kellkatanac imi – Moroniajj Laman jakenacaruw atipi – Alman kellkatapajj tucuyiwa.
1. Ucat taripirinacan Nefi jakenacjjar sarayäwipan quimsa tunc sojjtan maran kalltäwipana, Siblonajj Alman Helamanar catuyat kollan cunanac catüna.
2. Siblonajj asqui jakënwa, wali sum Dios nayrakatan sarnakäna. Jupasti sapa cut asc lurasaw, Dios Tatitupan camächitanacapar phokhäna. Jilapasti quipc luraraquïna.
3. Ucat Moronejj jiwjjaraquïna. Uqhämaw taripirinacan sarayäwipan quimsa tunc sojjtan marajj tucusïna.
4. Ucat taripirinacan sarayäwipan quimsa tunc pakallkon maran kalltäwipana, walja chachanacajj pheska warank pusi patacan jaqhutäsina, warminacapamp wawanacapamp Zarahemla oraket mistusaw, alay toke oraker sarapjjäna.
5. Ucat Hagotajj wali chʼiqhi jakësaw, wali jachʼa barco luräna, Jilarquir orak thiyanacan Chʼusa jaytanucut orak ucsana. Ucat inti jalant lamararu alay toke oraker sarir cʼullcʼu simpa ucsan ucjj lamarar nuqhuntäna.
6. Ucarusti walja Nefi jakenacaw mantapjjäna, uqhämaraqui walja juyranacamp walja warminacamp wawanacampi, ucatsti, alay tok uñcatataw lamaranjam sarapjjäna. Uqhämaw quimsa tunc pakallkon marajj sarakas tucusïna.
7. Ucat quimsa tunca quimsakallkon maranjj uca jakejj yakha barconac luräna. Nayrïr barcosti cut-taniraquïnwa; ucat walja yakha jakenacaw ucar mantapjjäna. Ucat wastat walja juyranac apasaw alay toke oraker sarapjjaraquïna.
8. Janiw jucʼamp jupanacat yatiscänti. Nanacasti lamaran pʼiyanacapan jiwatap amuyapjjaracta. Ucat mayamp barcojj mistüna, ucampis cawqhar sarataps janiw yatipcti.
9. Ucat uca maranjj walja jakenacaw alay toke oraker sarapjjäna. Uqhäm quimsa tunca quimsakallkon marajj tucusïna.
10. Ucat taripirinacan sarayäwipan quimsa tunc llätuncan marana, Siblonajj jiwjjaraquïna. Coriantonasti alay toke orakeruw mä barcot saratayna uca oraker sarir jakenacar juyranac apañataqui.
11. Ucat Siblonajj janïr jiwcän ucapachajja, uca kollan cunanac awquipan sutipat Helaman sat Helamanan yokapar catuyañapaw waquisïna.
12. Ucat Helamanan take catut kellkatanacajj kellkatäsaw, take jaken wawanacap taypiru takpach uca oraker apayatäna. Almajj jan apayatäñapatac camächit churcän ucanacaquiw jan apayatäcänti.
13. Ucampis ucanacajj kollanjam imatäñapänwa, mitat mitar catuyatäñaparaquïnwa. Ucat uca maranjj Siblonajj janïr jiwcän ucqhajja, ucanacajj Helamanar catuyatänwa.
14. Uqhämaraqui uca maranjja, mä kawkha jaychasirinacaw Laman jakenacar maqhatapjjäna. Jupanacasti wastat Nefi jakenacatac colerasiñ amtayatäpjjänwa.
15. Uca pachpa maran jupanacajj wali jachʼa nuwasiri tamamp Moronia jakenacjjaru, jan ucajja, Moronian nuwasiri tamapjjar nuwasiriw jutapjjäna. Ucampis jupanacajj atipatäpjjänwa, ucatsti quipca orakenacapar alis-sutäpjjänwa, waljaniraquiw jiwarayatäpjjäna.
16. Uqhämaw taripirinacan Nefi jakenacjjar sarayäwipan quimsa tunc llätuncan marajj tucusïna.
17. Uqhämarac Almana, Helaman yokapana, Siblon yokapan kellkatapajj tucusiraquïna.