Helamanan Kellkatapa
Nefi jakenacan sarnakäwinacapa, nuwasïwinacapa, chʼajjwäwinacapa, jaychasïwinacapa. Walja kollan arjirinacan, Cristojj janïr jutcän ucapach jutir urunacat yatiyäwinacapa, Helamanan Helaman yokapan kellkataparjama, jupan yokanacapan Criston jutäwipcam kellkatanacaparjamaraqui. Walja Laman jakenacajj Diosaruw cutiquipstapjje. Diosar cutiquipstatapat kellkata. Laman jakenacan asquïtapata, Nefi jakenacan ñankha ajjtcañ luräwinacapata, Helamanampin yokanacapampin kellkataparjam kellkata, Criston jutäwipcama. Ucasti Helamanan Kellkatapa satawa; uqhämanacampi.
1ri Jalja
Pahoranan yokanacapajj taripäwi konuñjjat nuwasipjje – Pahoran yokajj Quiscumenan jiwayatawa – Coriantumr kallcatiri – Zarahemlajj catuntatawa, wastat catutäjjaraquiwa.
1. Ucat taripirinacan Nefi jakenacjjar sarayäwipan pusi tunc maran kalltäwipana, Nefi jakenac taypin jachʼa pʼekeñ usuw utjañ kalltäna.
2. Pahoranajj jiwjjänwa, camisatejj takpach orakenquirinacajj sarjjän uqhäma, ucatsti taripäw konuñan qhitir wactʼañat wali jachʼa juchhiquïwiw Pahoranan yokanacap taypin utjañ kalltäna.
3. Acanacaw taripäw konuñat nuwasqui, jakenacar chʼajjwayqui ucanacan sutinacapajja: Pahoran, Paanqui, Pacumeni.
4. Ucanacajj janiw takpach Pahoranan yokanacapäquiti (jupajj walja yokanacanïnwa) jan ucasti jupanacaw taripäw konuñjjat nuwasipcän ucanacajja; ucat jakenacarojj quimsaruw jaljtayapjjäna.
5. Ucampis Pahoranajj jakenacan arupan Nefi jakenacjjar jilïr taripir sarayiritac ut-tʼayatänwa.
6. Ucat Pacumenejj taripäw konuñ jan catokañap amuyasisajja, jakenacan arupampiw mayachasïna.
7. Ucampis Paanquejj jup sarayiritac munir jakenacampejj wal colerasïna. Ucat jupajj uca jakenacar jilanacapar kallcatañatac amtayañampïnwa.
8. Ucat uc lurañampïcän ucqhajja, jupajj catuntataw uñjasi, ucatsti jakenacan aruparjamaw taripasïna, jiwayatäñapataquiw juchañchatäna, cunalaycutejj jupajj kallcatasaw jakenacan antutäwipar tucqhañ munäna.
9. Ucat uca Paanqui sarayiritac munir jakenacajj jupan jiwayatäñapatac juchañchatätap uñjasinjja, colerasipjjänwa: Ucat Quiscumen sat mä jakeruw Pahoranan taripäw konuñapar qhitapjjäna, ucatsti Pahoranajj taripäw konuñan koncän ucqhaw jupar jiwayapjjäna.
10. Ucat Pahoranan lokerinacapajj Quiscumenar arctapjjäna, ucampis Quiscumenan wali lak jaltatap laycojj janiw cawquïr jakes jupar catjirjamäcänti.
11. Ucat jupajj jupar qhitirinacan uc saräna; jupanacasti mä arusjäwiruw mantapjjäna, wiñay Luririp laycu juramento lurasa, jan qhitirus Quiscumenan Pahoranar jiwayatapat yatiyañataqui.
12. Quiscumenajj Nefi jakenac taypin, Pahoranar jiwaycän ucapach yakhar uñtatätap laycojja, janiw uñtʼatäcänti. Ucat Quiscumenamp jakenacapampejj jakenac taypin jan catjatäñanacapataquiw chʼarkhontapjjäna; ucampis cawquïrinacatejj catjatäpcän ucanacajja, jiwayatäpjjänwa.
13. Ucat Pacumenejj jakenacan aruparjamaw jakenacjjar sarayiritac jilïr taripiritac Pahoran jilap lant sarayañatac ut-tʼayatäna, ucasti wactʼäwiparjamänwa. Take ucanacajj taripirinacan sarayäwipan pusi tunc maran lurasïna; ucasti tucusiraquïnwa.
14. Ucat taripirinacan sarayäwipan pusi tunc mayan maranjj Laman jakenacajj jan jactʼcay jakenac nuwasir tantachthapipjjäna. Jupanacarusti espadanaca, cimitarranaca, arconaca, michʼinaca, pʼek arjjatir casconaca, chuym arjjatir jarqʼirinaca, take cunayman casta jarqʼirinac laquintapjjäna.
15. Jupanacasti wastat jutapjjäna Nefi jakenacamp nuwasiri; jupanacasti Coriantumr sat mä jaken sarayatäpjjänwa. Jupajj Zarahemlat sarakeri Nefi jakenacat jithektirïnwa; jupasti jachʼa chʼaman jakeraquïnwa.
16. Ucat Laman jakenacan Ammoronan Tubalot sat yokap pʼekechiripajj Coriantumran jachʼa chʼaman jakësinjja, Nefi jakenacar chʼamapamp wali suma amuyupamp thurtʼasiñapat amuyasa, jupar qhitasin Nefi jakenacjjar chʼamanïcaspas uqhäm amuyasa.
17. Ucat jupanacar colerasiñapataquiw amtayäna. Jupasti jakenacap tantachthapisaw Coriantumrar jilïripatac ut-tʼayäna; ucat Zarahemla oraker Nefi jakenacamp nuwasir jupanacar qhitäna.
18. Ucat gobiernonquir jachʼa chʼajjwäwin pʼekeñ usunacampin utjatap laycojja, Zarahemla oraken jucʼa arjjatirinacac jaytapjjäna. Jupanacajja, Laman jakenacas orakenacap taypir jachʼa Zarahemla marcar jaljjatir jutañat ajjsarapcaspas uqhäm amuyasipjjäna.
19. Ucampis Coriantumrajj walja jakenacap nayrakat sarasajja, uca marcanquir jakenacjjaruw jutäna; uqhämaraqui, wali lak jutatap laycojja, janiw Nefi jakenacan nuwasir tamanacap tantachthapiñapatac tiempojj utjcänti.
20. Ucat Coriantumrajj marca mantäwinquir arjjatirinacar jiwarayasaw take nuwasir jakepampi marcar mantäna. Jupanacasti take jupanacar saytʼasir jakenacaruw jiwarayapjjäna, takpach marc catuntañapcama.
21. Pacumeni jilïr taripirejj Coriantumr nayrakatat marca perkanac-camaw jaltäna; ucat Coriantumrajj perkarpachaw jiwañapcam jupar jawkʼantäna. Uqhämaw Pacumenin urunacapajj tucusjjäna.
22. Ucat Coriantumrajj takpach Zarahemla marc catutap uñjasina, Nefi jakenacan jupanac nayrakatat jaltatap uñjasina, jupanacan jiwayatap uñjasina, catjatäsin carcelar jakontatap uñjasina, takpach uca oraken jucʼamp chʼaman marc catutap uñjasaraquiw jupajj chuymapan kamas catüna. Jupasti ucat takpach uca orakjjar catuntañampïscäna.
23. Jichhajja, jupajj janiw Zarahemla oraken kamnokcänti, antisas walja jakenacapampi Jilarquir marc tokeruw saräna. Jupan may amtat munäwipajj espadamp chakos alay tok orakenac catuñatac sarañänwa.
24. Jupanacan jucʼamp jachʼa chʼamapajj uca orak taypinc-caspas uqhäm amuyasaw jupajj saräna, tantachthapiñatac jan tiempo churasa, jan ucasti, jucʼa tamanac tantachthapisipjjañapataquiquiw tiemp churäna. Uqhämat jupanacarojj jaljjatasin tucqhañataqui.
25. Ucampis Coriantumran uca orak taypir saräwipajj Moroniar wal yanapäna, jiwarayat Nefi jakenacajj waljanïpc-chïn ucasa.
26. Laman jakenacajj uca orak taypir jutañat ajjsarapcaspas uqhäm amuyäna, ucatsti ucapachcam thiyanacanquir marcanacar jaljjatapcaspas uqhäm Moroniajj amuyaraquïna. Ucat Moroniajj chʼaman jakenacap ucsa thiyanacar arjjatir uscüna.
27. Ucampis Laman jakenacajj janiw jupan munäwiparjam ajjsarapcänti. Jupanacajj uca orak taypir jutasaw jilïr Zarahemla marc catuntapjjäna. Jupanacasti jilïr orakewjanac taypir sarasaw waljanir jiwarayapjjäna, chacharus warmirus wawanacarus wal jiwarayäna, walja marcanac pucaranac cat-thapipjjaraquïna.
28. Ucampis Moroniajj uc yatjjatasinjja, ucspachaw Lehiru nuwasiri jakenacampi qhitäna, Jilarquir oraker janïr puripcaspas ucapach jupanacar jarqʼiri.
29. Uqhäm luräna; jupanacajj janïr Jilarquir oraker puripcän ucqhaw jupajj jupanacamp jiquisisin nuwasïna, Zarahemla marca toker cut-tañapcama.
30. Ucat Moroniajj cut-täwipanjj jupanacar jarcʼasaw jupanacamp nuwasïna, wali wil wartañ nuwasïwir tucuñapcama. Waljaniw jiwarayatäpjjäna. Jiwatanac taypinsti Coriantumrajj jicjjatasiraquïnwa.
31. Jichhajja, uca Laman jakenacajj janiw cawqharus sarapcasapänti. Janiw alay tokerus aynach tokerus inti jals tokerus inti jalant tokerus jit-tapcasapänti, take token Nefi jakenacan muyuntatätap laycu.
32. Uqhäm Coriantumrajj Laman jakenacar Nefi jakenac taypir mantayäna, Nefi jakenacan catuntatäñapcama. Jupa pachpasti jiwayatänwa; uca Laman jakenacasti Nefi jakenacan amparanacaparuw catuyasipjjaraquïna.
33. Ucat Moroniajj wastat Zarahemla marc catuntasin, catuntat Laman jakenacar uca oraket sumancañamp mistuyäna.
34. Uqhämaw taripirinacan pusi tunc mayan marajj tucusïna.