1. Ucat pheska tunc pusin maran iyawsiri tama taypin walja jaychasïwinacajj utjäna, uqhämaraqui jakenac taypin mä chʼajjwäwiw wali wil wartañcam utjaraquïna.

2. Ucat kallcatir jakenacajj jiwarayatäpjjänwa. Ucatsti uca oraket alis-sutäpjjänwa, Laman jakenacan pʼekechiripan ucar sarasaw arjjatayasipjjäna.

3. Ucat jupanacajj Laman jakenacar Nefi jakenacamp nuwasiñataquiw amtayañ munapjjäna. Ucampis Laman jakenacajj wal ajjsarasaw uca kallcatirinacan arunacaparojj jan istʼapcänti.

4. Ucampis taripirinacan pheska tunc sojjtan maranjja, Nefi jakenacat kallcatir jaychasirinacajj Laman jakenacaruw maqhatapjjäna. Jupanacasti uca yakhanacampiw Laman jakenacampir Nefi jakenacampirojj colerasiñ amtayapjjäna; jupanacasti takpach uca maran nuwasiñatac waquichasipjjäna.

5. Ucat pheska tunc pakallkon maranjja, jupanacajj Nefi jakenacamp nuwasiriw jutapjjäna, ucat jiwañar puriyañ kalltapjjäna; uqhämaraqui pheska tunc quimsakallkon maran jupanacajj Zarahemla orak catupjjäna; jïsa, take orakenac Jilarquir orak jacʼa orakcam catupjjaraquïna.

6. Nefi jakenacamp Moronian nuwasiri jakenacapampisti Jilarquir orakcam alis-sutäpjjänwa.

7. Ucanjja, inti jalant toke lamarat inti jals tokecamaw Laman jakenacat jarcʼakasiñatac chʼamañchasipjjäna. Chʼamañchapcän ucasti nuwasiri jakenacap alay toke orakepar arjjatañatac uchapcänsa uca chekanjja, inti jalant toke lamarat inti jals tokecamajj Nefi jakenacataquejj mä ur saränwa.

8. Ucat Nefi jakenacar kallcatirinacajj Laman jake walja nuwasiri tamanacan yanapañapampiw take aynach toke oraken Nefi jakenacan orakenacap catuntapjjäna. Take ucanacasti taripirinacan sarayäwipan pheska tunc quimsakallkon pheska tunc llätuncan maran lurasïna.

9. Ucat taripirinacan sarayäwipan sojjta tunc maranjja, Moroniajj jakenacapampiw walja orakenac catuntäna; jupanacasti Laman jakenacan amparanacapar purit walja marcanac wastat catjjapjjäna.

10. Ucat taripirinacan sarayäwipan sojjta tunc mayan maranjja, chicatpach orakenacap wastat catjjapjjäna.

11. Jichhajja, janitejj Nefi jakenacan ñankhätapamp jupanac taypinquir ajjtcañ luräwinacapampejj utjcasapänjja, uca jachʼa jiwayäwimp jupanac taypinquir jachʼa chhaktäwimpejj janiw utjcasapänti. Uca luräwinacajj Diosaru iyawstwa sas parliri jakenac taypincaraquïnwa.

12. Ucasti chuymanacapan jachʼa jachʼa tucutap laycünwa, wal kamiriptapjjatap laycuraquïnwa. Jïsa, jan cunaninacar tʼakhesiyatap laycünwa, mankʼat awtjatanacar mankʼap jan wajjtʼasa, isit jalstatanacar isip jan churasa, jan cunat llampʼu chuyman jilanacapar ajanut tʼajjllisa, kollan yänacar jiscʼachasa, jutir urunacat yatiyir Diosan yatiyir ajayupar jaychasisa, jiwayasa, lunthatasa, lunthatjasa, cʼarisisa, wachokasa, wal jaychasis kallcatasa, Nefi oraker Laman jakenac taypir maqhatatap laycuraquïnwa.

13. Jupanacan jachʼa ñankhätapa quipca chʼamanacapata, chʼaman jakëpjjtwa –satap laycu, quipca chʼamanacapar jaytjatäpjjänwa. Ucat jupanacajj jan jachʼaptirjamäpcänti, jan ucasti Laman jakenacaw tʼakhesiyäna jiwarayäna, ucatsti nayrakatapat jakonucüna, takpach orakenacap chhakayasiñapcamaw niyapun alis-sutäpjjäna.

14. Ucampis Moroniajj jakenacar ñankha luräwinacap laycojj walja cunaymananac yatiyäna; Helamanan Nefimp Lehimp yokanacapajj jakenacar walja cunaymananac yatiyapjjaraquïna. Jupanacasti jakenacan ñankha luräwinacapata, juchanacapat jan cutiquipstapcasp ucqhajja, jupanacar jan walinac purcaspas ucjjat wal yatiyapjjäna.

15. Ucat jupanacajj juchanacapat cutiquipstapjjäna. Ucatsti cutiquipstapjjataparjamaw jupanacajj jachʼaptañ kalltapjjäna.

16. Cunalaycutejj Moroniajj jupanacan juchanacapat cutiquipstatap uñjasinjja, mä chekat yakha chekaruw irpäna, uqhämaraqui marcat marcar irpasaw sarayäna, yänacapat take orakenacapat chicat wastat cutsuyasiñapcama.

17. Uqhämaw taripirinacan sarayäwipan sojjta tunca mayan marajj sarakasin tucusïna.

18. Ucatsti taripirinacan sarayäwipan sojjta tunc payan maranjja, Moroniajj janiw jucʼamp orakenac Laman jakenacat apakerjamäcänti.

19. Ucat jupanacajj jiltʼa orakenacap wastat catuñ munañanacap apanucjjapjjäna, Laman jakenacan waljanïtap laycu, Nefi jakenacan jupanacat jucʼamp orakenac catuñan jan lurcayätap laycu. Ucat Moroniajj nuwasir tamanacap wastat catut orakenacar arjjatañataquiw uscüna.

20. Ucat Laman jakenacan waljanïtap laycuw Nefi jakenacajj atipatäsina, tʼustʼjatäsina, jiwarayatäsin tucqhäwipat wal ajjsarapjjäna.

21. Jupanacajj Alman jutir urunacat yatiyäwinacapat amtasiñ kalltapjjäna, Mosian arunacapat amtasiñ kalltapjjaraquïna. Jupanacasti jan altʼir marcätapa, Diosan camächitanacapajj jan cunäcaspas uqhäm amuyirïtap amuyasipjjäna.

22. Jupanacajj Mosian leyinacap taquisipjjatap amuyasipjjäna, jan ucajja, jakenacar churañatac Tatitojj jupar camächit churcän ucanac tʼustʼjatap amuyasipjjaraquïna; jupanacasti leyinacapan ñankhar tucutapa, jupanacan ñankha marcar tucutapa, Laman jakenacjam ñankha marcätap uñjapjjäna.

23. Jupanacan ñankha luräwinacap laycuw iyawsiri tamajj tʼuqhartañ kalltäna. Jupanacasti jutir urunacat yatiyir ajayuru, Diosan yatiyir ajayupar jan iyawsañ kalltapjjaraquïna; Diosan taripäwinacapasti jupanacjjancänwa.

24. Jupanacasti Laman jake jilanacapjam tʼuqhartatapa, Tatitun Ajayupan jupanacar jan jucʼamp imatap uñjapjjäna. Jïsa, uca Ajayojj jupanacat jithektänwa, cunalaycutejj Tatitun Ajayupajj jan kollan kollan utanacanjja, janiw utjquiti.

25. Ucat Tatitojj muspharcañ taket sipan jucʼamp chʼamapamp jupanacar imañat jaytanucüna, jupanacan jan iyawsir ajjsarcañ ñankha utjäwir puritap laycu. Jupanacasti Laman jakenacan jupanacat wali jucʼampïtap uñjapjjäna, uqhämaraqui Dios Tatitupar janitejj cat-thapisipcänjja, tucusiñapan waquisitap amuyasipjjäna.

26. Jupanacajj Laman jakenacan chʼamapan jupanacan chʼamapamp jaket jaketaqui quicpätap amuyasipjjaraquïna. Uqhäm uca jachʼa juch lurañar jalantapjjäna; uqhäm jucʼa maranacan juch luratap laycojj tʼuqhartapjjäna.