Helamanan Nefi Yokapan Jutir Urunacat Yatiyäwipa – Nefi jakenacajj janitejj ñankha luräwinacapat cutiquipstapcanejja, kʼal tucqhatäñapataquiw Diosajj colerasiñapamp jupanacar sartʼañatac arsu. Diosajj Nefi jakenacar jachʼa machʼampiw jawkʼjam jawkʼanti; jupanacajj juchat cutiquipstapjje. Samuel Laman jakejj Nefi jakenacar jutir cunaymananacat yatiyi.
7 jaljatjja, 16 jaljan tucuyäwipcama.
7ri Jalja
Nefejj alay tokenquir jakenacan jan catokatäsaw Zarahemlar cut-ti – Jardin torrepat Diosat mayisi, ucat walja jakenacaruw yatiyi.
1. Ucat taripirinacan Nefi jakenacjjar sarayäwipan sojjta tunc llätuncan marana, Helamanan Nefi yokapajj Zarahemla oraker alay toke oraket cut-täna.
2. Jupajj alay toke oraken utjir jakenac taypir sarasaw Diosan arup yatiyasajj walja jutir cunaymananac yatiyatayna.
3. Jupanacasti janiw cuna arups catokapcänti; ucat jupanac taypin kamañapajj janiw wactʼcänti. Ucat jupajj nacïw orakepar cut-täna.
4. Jupasti jakenacan ajjsarcañ ñankha utjäwincatap uñjasaw uca Gadianton lunthatanacan taripäw konuñanacan konutap uñjasaraqui–jupanacajj uca orakjjar chʼamampi, chʼaman cancañamp catokasinjja, Diosan camächitanacap maysar uchasaw jupa nayrakatan jan jucʼsa asc lurasa, jaken wawanacapar jan cuna chekapar uñjañjamp lurasa;
5. Asquinacar asquïtap laycu juchañchasa, juch luririnacar ñankhanacaru kollkep laycu jan mutuyasa, gobierno ut-tʼayäw catuscaquis munañanacaparjam sarayañanacapataqui, oraken kamiriptañap jachʼar aptatäñap catokañanacapataqui, uqhämat jucʼamp wachokaña, lunthataña, jiwayaña, quipca munañanacaparjam lurañanacapataquiraqui–
6. Uca jachʼa ñankhajj mä jucʼa maranacanac Nefi jakenacar puritayna. Nefejj uc uñjasinjja, chuymapan llaquisiñan phoktʼatänwa, jupasti tʼakhesir chuymapampiw artʼäna:
7. Ay, Nefi awquijjajj Jerusalen oraket mistuncän ucapachac nayajj jaquiriscäyäta jupamp chic arsut oraken cusisiñajjataqui; ucapachajj jupan marcapajj ewjjatäñataquejj jasaquïnwa, Diosan camächitanacapar phokhañataquis thurtʼatäpjjänwa, ñankha lurañar irpakatäñataquis chʼurqhisirïpjjänwa. Jupanacasti jancʼaquiw Tatitun arunacaparojj yäkapjjerïna.
8. Ucürunacajj nayancaquisapäna! Chuymajjajj jilanacajjan asquïtapatjj cusisisapänwa.
9. Ucampis nayajj jichhürunacan jacañajjataqui, jilanacajjan ñankhätapat chuymajjan llaquisiñan phoktʼatäñapatac qhitanitätwa.
10. Jichhajja, ucajj Zarahemla marcanquir jachʼa khat sarir thaqui jacʼana, Nefin jardinapanquir uca saytʼu pucaran ucajj lurasïna.
11. Ucat mä kawkha jakenacajj uca chek sarasaw Nefirojj Diosat take chuymamp artʼasquir uñjapjjäna. Jupanacasti marcaruw jalapjjäna, ucatsti cuntejj uñjapcän ucjjat jakenacar yatiyapjjäna. Ucat uca jakenacajj tam tamaw tantachasipjjäna, cunat-tejj Nefejj jakenacan ñankhätapat uqhäm jachʼa llaquisiñan aykcän uc yatiñataqui.
12. Ucat Nefejj saytʼcän ucqhajja, tantachasit jake tamanac uñjäna.
13. Ucat jupajj lacap jistʼarasaw jupanacar säna: Cunats tantachasipjjta? Nayan ñankha luräwinacamat jumanacar yatiyañajjataquit tantachasipjjta?
14. Jïsa, chuymajjan ñankha luräwinacamat jachʼa llaquimp phoktʼatätapat Diosajjar take chuymamp artʼañajjatac torrejjar maqhatatajj laycuwa!
15. Nayan jachatajjat jaqhusitajjat jumanacajj tantachasipjjta, ucat muspharapjjtajja. Uqhämaraqui muspharañanacamataquejj waliw utji; jumanacajj supayan chuymanacamar wal mantañapcam catuyasipjjatamats muspharapjjañamawa.
16. Almanacamar wiñay tʼakhesir jaqhusïwir jakontañ munqui ucan jawsäwipar cunjäms irpakayasipjjasma?
17. Ay, juchanacamat cutiquipstasin cutiquipstapjjam! Cunats jiwapjjäta? Dios Tatitumar cutiquipstasin cutcatjjapjjam, Cunats jupajj jaytjapjjtam?
18. Ucajj chuymanacam chʼollkheptayatam laycuwa. Jumanacajj suma awatirin aruparojj janiw istʼañ munapctati; jumanacajj jupar kallcatasaw jumanac contra colerasiyapjjta.
19. Ucat janitejj jumanacajj juchanacamat cutiquipstapcätajja, jupajj jumanacar tantachthapiñ lantejj chʼeketatayapjjätamwa, anunacampin lakʼonacampin mankʼapar tucuñanacamataqui.
20. Diosamajj khespiyapctam uca quipca urun, cunjämarac jupat armasipjjtasti?
21. Ucampis ucajj kamiriptañataqui, jakenacan jachʼar aptatäñataqui kors kollks catokañanacamataquiwa. Jumanacajj oraken kamiriptañanacapat inamay cunanacat chuymanacaman munasaw lupʼipjjta. Ucanacataquisti jiwayapjjta, lunthatjapjjta, lunthatapjjta, masinacamar cʼarintas ircatapjjta, take cunayman ñankha luräwinac lurapjjta.
22. Ucata, janitejj juchanacamat cutiquipstapcätajja, ay jumanacata! Janitejj juchat cutiquipstapcätajja, aca jachʼa marcamp take acsa toke catut orakesanquir jachʼa marcanacampejj aparatäniwa, jumanacan ucanacan jan utjañanacamataqui; Tatitojj janiw jichhacam chʼam churapctam uqhäm timanacamar thurtʼasiñatac chʼam churapcätamti.
23. Cunalaycutejj aqhäm siw Tatitojja: Nayajj ñankhanacarojj janiw chʼamajj uñachaycäti, janiw maynirojj maynit sipan jucʼamp uñachaycäti. Juchanacapat cutiquipstasin arunacajjar istʼas yäkerinacaruquiw chʼamajj uñachayä. Uqhämasti jilanacajja, janitejj juchanacamat cutiquipstapcät ucajja, Laman jakenacataquejja jumanacat sipan jucʼamp sumäñap amuyapjjañam nayajj munta.
24. Uñjapjjam, jupanacajj jumanacat sipan jucʼamp asquïpjjewa, cunalaycutejj jumanacajj catokapcta, uca jachʼa yatïw tok jupanacajj janiw juchanac lurapquiti; ucat Tatitojj jupanacar qhuyapayaniwa. Janitejj jumanacajj juchanacamat cutiquipstcät ucqhajja, kʼal tucqhatäpcät uc-chañcamaw jupanacan urunacap jachʼaptayani, wawanacap jucʼampiptayaraquini.
25. Ay jumanacata! jumanac taypir jilayat jachʼa ajjtcañanacata. Jumanacasti ucampiw mayachasipjjta. Jïsa, Gadiantonan ut-tʼayat jamas tamampiw mayachasipjjta.
26. Ay jumanacata! uca jachʼa jachʼa tucuñ chuymamar mantayapjjatamata, ucamp jachʼar tucupjjatamata, wali kamiripjjatam laycuraquiw tʼakhesiñajj jumanacar puripjjätam.
27. Ay jumanacata, ñankha ajjtcañ luräwinacamata!
28. Janitejj juchanacamat cutiquipstapcätajja, chhaktapjjätawa. Orakenacamasti jumanacat aparatäniwa; jumanacasti acapach oraket tucqhatäpjjaraquïtawa.
29. Jichhajja, nayajj ucanacaw utjan sasajja, janiw naya pachpat siscti, cunalaycutejj janiw naya pachpat ucanac yatcti; jan ucasti Dios Tatitun ucanac nayar yatiyatap laycuw ucanacan chekätap yat-ta. Ucat ucanacan utjañapat ircat-ta.