1. Ucat uca pachpa maran Nefejj taripäw konuñ Cezoram sat mä jakeruw catuyäna.

2. Jupanacan leyinacapamp gobiernonacapampejj jakenacan arupan ut-tʼayatäpjjänwa, ñankh ajllirinacasti asc ajllirinacat sipan jucʼampïpjjaraquïnwa. Ucat tucqhatäñataquiw pokosipcäna, takpach leyinacapan ñankhar tucutap laycu.

3. Janiraquiw ucajj takpachäquiti. Jupanacajj jan altʼir marcäpjjänwa. Ucat jupanacajj asqui chekapar uñjañ leyin janiw sarayañjamäcänti, jan ucasti tʼunjatäñapataquiquïnwa.

4. Ucat Nefejj jupanacan ñankhätap laycojj karïnwa. Jupasti taripäw konuñ catuyasinjja, takpach jiltʼa urunacapan Diosan arup yatiyañ catjjarüna. Lehi jilapasti takpach jupan jiltʼa urunacapan quipcac luraraquïna.

5. Cunalaycutejj jupanacajj Helaman sat tatapan jupanacar parlcän uca arunacat amtasipjjäna. Acanacaw arsut arunacapajja:

6. Wawanacajjay, nayajj Diosan camächitanacapar phokhañ amtasipjjañam munta. Jumanacan jakenacar uca arunac yatiyapjjañam munaracta. Nayajj Jerusalen oraket mistunir nayrïr awquinacasan sutinacap churapjjsma, ucjj nayaw lurta, jumpanacan sutinacapat amtasipjjät ucqhajja, jupanacat amtasiñanacamataquiwa. Jupanacat amtasipjjät ucqhasti, luratanacapat amtasipjjaraquïta; ucat luratanacap amtasipjjät ucqhajja, ucanacan asquïtap kellkatätap yatipjjaraquïta.

7. Ucat wawanacajja, nayajj asc lurañanacam munta, cunjämatejj jupanacat satäqui, kellkatäcaraqui, uqhämarac jumanacat satäñataqui kellkatäñataquisa.

8. Jichhasti wawanacajja, nayajj jucʼamp jumanacat munta. Uca munäwijjasti jumanacan jachʼa jakët sañamatac ucanac jan lurapjjañamataquiwa. Antisas alajjpachar imatanac imañanacamataquiw ucanac lurapjjañam munta; ucajj wiñayawa, jan chhakcayawa. Awquinacasar churatapat amuyasiñasatac utjqui uca sinti munat wiñay jacäw wajjtʼäw catokapjjañam nayajj munta.

9. Wawanacajjay, Benjamin pʼekechirin marcapar parlat arunacapat amtasipjjam. Jutcan uca Jesucriston juchanacan tʼakhesiyäwipar phokher wilapanaqui, uca tokequirac jakenacan khespiyasiñan utjatapat amtasipjjam; jïsa, jupan orakenquirinacar cutsuyir jutañapat amtasipjjam.

10. Uqhämaraqui Amulecajj Zeezromar Ammonia marcan parlcän uca arunacapat amtasipjjaraquim; jupajj sänwa: Tatitojj chekpachaw jakenacapar cutsuyir jutani, ucampis jupajj janiw jupanacar juchanacapant cutsuyir jutcani, jan ucasti juchanacapat cutsuyiriw jutani.

11. Juchanacat cutiquipstañ laycu, juchanacapat jupanacar cutsuyañatac chʼamajj Awquin jupar churatawa; ucatjja juchanacat cutiquipstañan waquisitap yatiyiriw jupajj qhitanacap qhitanïna. Ucasti Cutsuyirin chʼamaparuw irpi almanacapan khespiyatäñapataqui.

12. Ucat jichhajj wawanacajja, Diosan Cristo Yokap Cutsuyirisan karkapjjar takanachapjjañamat amtasipjjam. Ucat supayajj jachʼa thayanacap antutnucun ucqhajja, tutucanquir michʼinacaps qhitcan ucqhajja, take chhullojjamp jachʼa chhijchhipampejj jumanacar chhijchhintapcätam ucqhasa, janiw ucajj tʼakhesïw jan tuc-cay llaquisiñ jakher apakañatac jumanacjjar cuna chʼamanïcanisa, ucjjar ut-tʼayatäpcta uca karka laycu. Ucasti chʼollkhe takanawa, jakenacatejj ucjjar utachapjjanejja, janiw tincupcaniti.

13. Ucat ucanacaw Helamanajj yokanacapar yatichcän uca arunacajja; jupasti walja jan kellkat cunaymaninacampit walja kellkat cunaymaninacampit yatichäna.

14. Jupanacasti arunacapat amtasipjjänwa; ucat Diosan camächitanacap phokhasaw jupanacajj Diosan arup takpach Nefi jakenac taypin yatichir Jilarquir marcan kalltasajj sarapjjäna.

15. Uca marcat Gid marcaru, Gidat Mulec marcaru;

16. Marcat marcaru takpach aynach orakenquir Nefi jakenac taypin sarañapcamaw sarapjjäna; ucawjatsti Zarahemla orakeruw Laman jakenac taypir sarapjjäna.

17. Ucat jupanacajj jachʼa chʼamampiw yatiyapjjäna, walja Nefi jakenacat kallcatir misturinacar pejjtuntañapcama. Ucanacasti jutasin juchanacap arsusipjjäna, ucatsti juchat cutiquipstañaruw bautisasipjjäna. Ucat ucspachaw Nefi jakenacar lurat jan walinac asquichañatac jupanacan ucar cut-tapjjäna.

18. Ucat Nefimpin Lehimpin uqhäm jachʼa chʼamamp, chʼaman cancañamp Laman jakenacar yatiyatap laycu. Chʼamamp chʼaman cancañampejj jupanacar parlañapatac churatänwa, uqhämaraqui cuntejj parlapjjañapäcän ucajj jupanacar churataraquïna.

19. Ucat jupanacajj Laman jakenacan jachʼa muspharañapcamaw jupanacar iyawsayatäñapcam parlapjjäna. Ucat quimsakallk warank Zarahemla orakenquir ucsa tokenquir Laman jakenacajj juchat cutiquipstañar bautisasisa, awquinacapan saranacapan ñankhätapat iyawsayatäpjjäna.

20. Ucatsti Nefimp Lehimpejj uca orakenacat Nefi oraker sarapjjäna.

21. Ucatsti jupanacajj Laman nuwasir jakenacan catutäsin carcelar jakontatäpjjäna. Ammonamp jilanacapampejj Limhin lokerinacapan jakontatäpcän uca pachpa carcelaruw Nefimp Lehimpejj jakontatäpjjäna.

22. Ucat jupanacajj walja uru jan mankʼat carcelancapcän ucqhajja, Laman jakenacajj uca carcelaruw jupanacar jiwayañatac irpsur sarapjjäna.

23. Ucat Nefimp Lehimpejj ninampïcaspas uqhäm muyuntatäpjjänwa, Laman jakenacasti naqhantatäñat ajjsarasaw jupanacar llamctʼañ ajjsarapjjäna. Ucampis Nefimp Lehimpejj janiw naqhantatäpcänti; jupanacasti nina taypin saytʼasaw jan naqhantatäpcänti.

24. Ucat Nefimp Lehimpejj ninan muyuntatapa, ucan jupanacar jan naqhantatap uñjapcän ucqhajja, chuymanacapan kamas catupjjäna.

25. Jupanacajj Laman jakenacan jupanacar llamctʼañat ajjsaratap uñjapjjäna. Laman jakenacasti jupanac jacʼar jutañat ajjsarasaraquiw musphañan amuctʼayatäpcaspas uqhäm saytʼapjjäna.

26. Ucat Nefimp Lehimpejj saytʼasin jupanacar parlañ aqhäm sas kalltapjjäna: Jan ajjsarapjjamti, cunalaycutejj Diosaw aca muspharcañ uñachayäw uñachayapctam ucajja. Ucanjja nanacar catusin jiwayañatac jan chʼamanïtamaw jumanacar uñstayata.

27. Ucat uca arunac arsupcän ucqhajja, orakejj walpin qhathat-täna, carcel perkanacasti oraker llokhertañampïpcaspas uqhämaw onjjtapjjäna. Ucampis ucanacajj janiw llokhertapcänti, uqhämaraqui carcelancapcän ucanacajj Laman jakenacamp Nefi jakenacat misturinacampïpjjänwa.

28. Ucat jupanacajj chʼamac kenayan muyuntataw jicjjatasipjjäna, jachʼa ajjsarañaw jupanacarojj puriraquïna.

29. Ucat mä arojj chʼamac kenayat alayanc-caspas uqhämat aqhäm sirejj istʼasïna: Juchanacamat cutiquipstasin cutiquipstapjjam; nayan jumanacar suma yatiyäwinac yatiyañatac qhitat lokerinacajjar jan jucʼamp tucqhañ chʼamtʼapjjamti.

30. Ucat uca ar istʼapcän ucqhajja, uca arun jan khejjokhejjötap amuyapjjäna, janiraquiw jachʼat artʼir arütaps amuyapcaraquïnti, antisas ucajj suma phokhat llampʼu arünwa, jiscʼat parlcaspas uqhamänwa, chuymacamaw puriraquïna.

31. Ucat uca arojj llampʼüc-chïnsa, orakejj walpin qhathat-täna. Carcel perkanacasti oraker llokhertañampïpcaspas uqhämaw wastat onjjtapjjäna. Jupanacar imjjatcän uca chʼamac kenayasti janiw chhaktcänti.

32. Ucat arojj wastat aqhäm sas purïna: Juchat cutiquipstasin cutiquipstapjjam, cunalaycutejj alajjpach khapak marcajj jacʼanquiwa. Lokerinacajjarusti jan jucʼamp tucqhañ chʼamtʼapjjamti. Ucat orakejj wastat qhathat-täna, perkanacasti onjjtaraquïnwa.

33. Ucat quimsïr cutiw arojj jupanacar purïna, jaken jan arscay muspharcañ arunac parlaraquïna. Perkanacasti wastat onjjtäna. Orakejj waljar jaljtcaspas uqhämaw qhathat-taraquïna.

34. Ucat Laman jakenacajj jupanacar imjjatcäns uca chʼamac kenayïpanjja janiw jaltirjamäpcänti. Jïsa, ajjsarañamp atipjayasisinjja janiw onjjtirjamäpcänti.

35. Jichhajja, jupanac taypin nacïwipatpach mä Nefi jakew utjäna. Nayrajj Diosaru iyawsiri tamänwa. Ucampis jupanac taypit mistutäjjänwa.

36. Ucatsti jupajj cutiquipstasaw Nefimpin Lehimpin ajanunacap chʼamac kenayanjam uñjäna. Ucanacasti alajjpach qhitanacan ajanunacapjamaw walpin lliphipïna. Jupasti jupanacan alajjpach toker uñcatatätap uñjäna, jupanacasti parlcaspas, jan ucajja, mä jupanacan uñjat qhitir arsupcaspas uqhamäpjjänwa.

37. Ucatsti uca jakejj uca waltʼat jakenacaruw artʼäna, cutiquipstasin uñjañanacapataqui. Ucat jupanacar chʼam churatïpan cutiquipstasin uñtasaw Nefimpin Lehimpin ajanunacap uñjapjjäna.

38. Jupanacasti uca jakerojj sapjjänwa: Camsañs mun take acanacajja? Qhitimpis uca jakenacajj parlapjje?

39. Jichhajja, uca jaken sutipajj Aminadabänwa. Aminadabasti jupanacarojj sänwa: Jupanacajj Diosan angelanacapampiw parlasipqui.

40. Ucat Laman jakenacajj jupar sapjjäna: Aca chʼamac kenayan imjjatatap apakañataquejj camächapjjäsa?

41. Aminadabasti jupanacarojj sänwa: Jumanacajj juchanacamat cutiquipstasin arur artʼapjjañamawa, Almamp Amulecamp Zeezromampin jumanacar yatichatäcän uca Cristor iyawsañamcama. Cunapachatejj uc lurapjjätajja, chʼamac kenay imjjatatajj jumanacat apakatäniwa.

42. Ucat takpach jupanacajj orak qhathat-taycän ucan aruparuw artʼañ kalltapjjäna; chʼamac kenayan chhaktañapcamaw jupanacajj artʼapjjäna.

43. Ucat jupanacajj uñtapcän ucqhajja, chʼamac kenayan jupanacar imjjatatäcän ucan chhaktatap uñjapjjäna. Ucatsti, jupanacan muyuntatäpjjänwa, jïsa, sapa mayniw ninan muyuntatätap uñjapjjäna.

44. Nefimp Lehimpejj jupanac taypincapjjaraquïnwa; jupanacajj muyuntatäpjjänwa. Jupanacasti lawrir nina taypincapcaspas uqhamäpjjänwa, ucampis ucajj janiw jupanacar cuns camächaycänti; janiraquiw carcel perkanac naqhantcaraquïnti. Jupanacasti jan arscaya, khapakan phoktʼat cusisiñan phoktʼatäpjjänwa.

45. Ucat Diosan Kollan Ajayupajj alajjpachat sarakanisaw jupanacan chuymanacapar mantäna; jupanacasti ninanäcaspas uqhäm phoktʼatäpjjänwa, muspharcañ arunac arsupjjaraquïna.

46. Ucatsti, mä ar istʼapjjäna, jïsa, mä suma aru, jiscʼats arscaspajj uqhäm arsusaw jupanacar aqhäm sas purïna:

47. Sumancañajj jumanacampïpan oraken kalltäwipat utjir Wali Munatajjar iyawsatanacam laycu.

48. Ucat uc istʼasaw jupanacajj arun cawqhat istʼasitap uñjañataquïcaspas uqhämaw uñtapjjäna. Jupanacasti alajjpach jistʼartir uñjapjjäna. Angelanacasti alajjpachat sarakanisaw jupanacar yanapas tumpapjjäna.

49. Niyapun quimsa patac jakew ucanac uñjasajj istʼapjjäna; jupanacasti jan muspharas jan pächasis sarañanacapataquiw camächit catokapjjaraquïna.

50. Ucat jupanacajj sarapjjäna, jakenacar yatiyasaw yatichapjjaraquïna. Cuntejj istʼapcäna uñjapcäna, take ucanacat take ucsa toke orakenjam yatiyapjjäna, ucat Laman jakenacat jilpachaniw jachʼa catokat uñachayäwinac laycojj ucanacar iyawsapjjäna.

51. Ucat cawquïrinacatejj iyawsayatäpcän ucanacajja, nuwasiñ armanacap uñisiñanacap awquinacapan saranacap maysaruw uscupjjäna.

52. Ucat Nefi jakenacarojj catut orakenacap churjjapjjäna.