15ri Jalja
Samuel sat Laman jakejj ewjjañ arunacap arsuscaqui – Marcapat mä kawkhanejj jacasipcaquiniwa – Janitejj juchanacapat cutiquipstapcanejja, Nefi jakenacajj tʼunjatäpjjaniwa.
1. Jichhajja munat jilanacajja, nayajj jumanacaruw sapjjsma, janitejj juchanacamat cutiquipstapcätajja, utanacamajj chʼusaptayatäniwa.
2. Janitejj juchanacamat cutiquipstapcätajja, warminacamajj waw ñuñuyapcani ucürun jupanacan jaqhusiñapajj waliw utjani. Jumanacajj jaltañ munapjjäta, ucampis janiw cawqhas jaltañamataqui imantasiñamataquejj utjcaniti. Ay usur jak warminacata, cunalaycutejj jathi puracanïsajja, janiw jaltirjamäpcaniti. Uqhämasti, jupanacajj taquisitäpjjaniwa, jiwañapatac jaytanucutäpjjaniwa.
3. Aca Nefin jakenacapa sat jakenacajj take jupanacar uñachayatäcani uca unañchanac muspharcañanac uñjapcani ucapachajj janitejj juchanacapat cutiquipstapcanejja, ay jupanacata! Jupanacajj Tatitun ajllit marcäpjjänwa; jïsa, jupajj Nefin jakenacaparojj munänwa, uqhämaraqui jupanacar tokenokaraquïna; jupanacajj juch lurapcän ucqhajja, jupajj jupanacar munatap laycuw tokenokäna.
4. Jichhajj jilanacajja, jupajj Laman jakenacaruw luräwinacapan jan tucusis ñankhätap laycojj uñisïna. Uca ñankhätapajj awquinacapan jichuntat luräwinacapan ñankhätap laycuwa. Ucampis Nefi jakenacan yatiyatap toketa khespiyasiñajj jupanacar puri; ucat Tatitojj urunacapjj jucʼampiptayi.
5. Cunanacatejj jupanacar wactʼapqui ucjja, jupanacat jilpachaniw lurapjje, Dios nayrakatan wali sum uñjasisaw sarnakapjje, jupanacasti Diosan camächitanacapa, camächinacapa, leyinacap Moisesan leyiparjam phokhapjje; nayajj uc jumanacan amuyapjjañam munirista.
6. Nayajj sapjjsmawa, jupanacat jilpachaniw uqhäm lurapjje, jupanacajj jan karisaw jiltʼir jilanacapar chekat yatïwir puriyañatac chʼamtʼapjje. Ucat waljaniw kawkhäpquitejj ucjjarojj sapür jiljjatapjje.
7. Uqhämaraqui, uñjatam laycuw jumanac pachpajj yatipjjta, jupanacat cawquïritejj chekat yatïwiru, uqhämaraqui awquinacapan jichuntat luräwinacapan ñankha ajjtcañätapat yatïwir puriyatäpquejja, kollan kellkatanacaru, jïsa, kellkatäqui kollan arjirinacan uca arjäwinacaparu iyawsayatäpquejja, (uca yatiyäwinacasti jupanacar Tatituruw iyawsayapjje juchanacat cutiquipstayapjjaraqui; iyawsañamp juchat cutiquipstañampisti jupanacan chuymanacaparuw turcaraqui) –
8. Ucat kawkhaninacatejj ucar puripqui ucanacaw iyawsäwimpinjja cunampiraquitejj antutayatäpqui ucampin chʼaman thurtʼatäpjje; jumanac pachpaw ucjj yatipjjaracta.
9. Jumanacajj yatipjjaractawa, jupanacajj nuwasiñanacapjj orakeruw imantapjje; jan juch lurañanacapataqui ucanac aptañ ajjsarapjjaraqui. Jumanacajj jupanacan juch lurañat ajjsaratap uñjapjjasma – cunalaycutejj jupanacajj Cristor iyawsatap laycuw espadanacap timanacapjjar jan aptasa, timanacapan jupanacar tʼustʼjas jiwayañap jaytapjjaspa.
10. Jichhajja, cunarutejj iyawsapqui ucarutejj iyawsapqui ucapachajja, ucan chʼollkhëtap laycu, uqhämaraqui yatichatäpqui ucapachajja ucan chʼollkhëtap laycu, Tatitojj jupanacar qhuyapayasaw urunacap jucʼampiptayani, ñankhäpc-chi ucasa.
11. Jïsa, jupanacatejj jan iyawsas tʼuqhartapc-chinisa, Tatitojj arunacap jucʼampiptayani, cunapachat-tejj awquinacasas Zenos arjiris walja yakha arjirinacas arsupqui ucapachan puriñapcama, cunapachatejj Laman jake jilanacasajj chekat yatïwir wastat cut-tayatäpcan ucapachcama.
12. Nayajj sapjjsmawa: Khepa urunacanjja Tatitun arsüwinacapajj Laman jake jilanacasataquiw utjani, uqhämaraqui walja tʼakhesïwinacajj jupanacan utjc-chinisa, acsar ucsaru orakjjan alis-sutäpc-chinisa, thakatäpc-chinisa, jawkʼatäsin take toker chʼeketatatäpc-chinisa, jan cuna chekas imantasiñapataqui utjc-chinisa, Tatitojj jupanacar qhuyapayaniwa.
13. Ucasti Diosan arjäwirjamawa. Uca arjäwisti siwa: Cheka yatiñäqui uca Cutsuyiripata jachʼa cheka awatiripat yatiñaruw jupanacajj puriyatäpjjani, jupan ovejanacap taypin jaqhutäpjjaraquini.
14. Ucat nayajj sapjjsma, janitejj cutiquipstapcätajja, jupanacataquejja, jumanacat sipan jucʼamp sumäniwa.
15. Jumanacar uñachayat jachʼa luräwinacatejj jupanacar uñachayatäsapänjja, jïsa, qhitinacatejj awquinacapan jichuntat luräwinacap laycu jan iyawsasin tʼuqhartapqui ucanacatejj uñachayatäsapänjja, jupanacajj janipiniw jucʼamp jan iyawsasajj tʼuqhartapcasapänti; uc jumanac pachpajj uñjapjjasma.
16. Ucat Tatitojj siwa: Janiw jupanacarojj kʼal tʼunjcäti antisas nayan yatit suma amuyat urun jupanacjj nayar cut-tayä –siw Tatitojja.
17. Jichhasti, Tatitojj Nefi jakenacjjat siwa: Janitejj jupanacajj juchanacapat cutiquipstasin nayan munañajjarjam lurapcanejja, nayajj kʼal tʼunjä jupanacaru, nayan walja jupanac taypina lurat jachʼa luräwinac utjipan jupanacan jan iyawsatap laycu –siw Tatitojja. Cunjämatejj Tatitojj chekpach jaqui, uca pachpa chekarjamaw ucanacajj luratäni –siw Tatitojja.