1. Ucat Samuel sat Laman jakejj walja yakha cunaymananac Diosan arjaraquïna. Ucanacasti janiw kellkañjamäquiti.

2. Ucat jupajj jupanacarojj sänwa: Nayajj unañch churapjjsma; pheska mararojj Diosan Yokapajj take sutipar iyawsirinacar cutsuyiriw jutani.

3. Jupajj jutcani ucapach unañchataquiw aqhäm churapjjäma, alajjpachanjj wali jachʼa khananacaw uñstani; ucatjja jutañap nayrakat arumajj janiw chʼamactʼcaniti, jakenacataquisti mä urücaspas uqhamäniwa.

4. Mä urump arumamp yakha urumpi, mä urücaspas uqhäma, arumajj jan utjcaspas uqhamäniwa. Ucajj jumanacataquejj unañchäniwa. Jumanacajj intin jalsuñapat intin jalantañapat amuyapjjäta; ucat pä urumpin mä arumampin utjatap chekpachaw yatipjjäta. Ucampis arumajj janiw chʼamactʼcaniti. Ucasti janïr yurcan uca arumäniwa.

5. Uqhämaraqui mä machak warawaraw uñstaraquini, uqhäm warawarjja, janipiniw nayrajj uñjapctati; ucasti unañcharaquïniw jumanacataqui.

6. Jichhajja, ucajj janiw takpachäquiti; walja unañchanacamp muspharcañanacampiw alajjpachan utjani.

7. Ucat takpach jumanacajj muspharasaw musphapjjäta, oraker liwisiñamcama.

8. Ucat qhitinacatejj Diosan Yokapar iyawsapcan ucanacajja, wiñay jacäwinïpjjaniwa.

9. Jichhajja, nayan jumanacan ucar jutasin uc yatiyañajjataquiw Tatitojj alajjpach qhitap tok camächit churitu; jïsa, jupajj nayan ucanac jumanacar arjañajjataquiw camächit churitu. Jupajj situwa: Aca jakenacarojja, juchanacamat cutiquipstasin Tatitun thaquip waquichapjjam –sasaw artʼäta.

10. Jichhasti, nayan Laman jakëtajj laycuw Tatitojj arsuñajjatac camächit churquitu uca arunac arsutajj laycu ucanacan jumanacatac chʼamätap laycuraquiw nayatac kʼapisisajj jiwayañ chʼamtʼapjjesta; uqhämaraqui jumanac taypit alisnucupjjaraquista.

11. Jumanacasti arunacajj istʼapjjäta; ucataquejj nayajj aca marca perkanacaruw maqhatawayta, jumanacan ñankha luräwinacamat suyapctam uca Diosan taripäwinacapat istʼasin yatipjjañanacamataqui, uqhämaraqui juchat cutiquipstañan cunjamätap yatiñanacamataqui;

12. Uqhämaraqui jumanacan Jesucristo Diosan Yokapa alajjpachan acapachan Awquipa, kalltäwitpach take cunan Luriripan jutañapat yatiñanacamataquiraqui; jupan jutañapat unañchanac yatisina, sutipar iyawsapjjañanacamataquiraqui.

13. Jumanacatejj jupan sutipar iyawsapjjätajja, take juchanacamat cutiquipstapjjätawa, jupan asquïtap toke pampachäw catokañataqui.

14. Ucat mayamp unañch churapjjäma, jiwäwipat unañchsa.

15. Cunalaycutejj khespiyasiñan jutañapataquejja, jupajj chekpachan jiwañapapuniwa. Jiwatanacan jactäwip ut-tʼayañataqui, jakenacan Tatitun nayrakatapar uqhämat irpanitäñapataquiw jupan jiwañapajj wactʼi, waquisiraqui.

16. Jïsa, uca jiwañajja, jiwatat jactañ apani, take jakenacar nayrïr jiwañat cutsuyi, kollan cancañat jarcʼaker jiwañat cutsuyi; cunalaycutejj take jakenacajj Adanan tincutap laycuw Tatitun nayrakatapat jithektayatäpjje, ucatsti acapach cunaymananacats kollan cunaymananacats jiwatäcaspas uqhämawa.

17. Ucampis Criston jactäwipajj jakenacaruw cutsuyi, take jakenacaruw cutsuyi, ucatsti Tatitun nayrakataparuw wasitat irpcati.

18. Ucajj juchanacat cutiquipstañan utjañap ut-tʼayi, qhitinacatejj juchanacapat cutiquipstapqui ucanacan yawsutäsin ninar jan jakontatäñanacapataqui. Ucampis qhitinacatejj juchanacapat jan cutiquipstapqui ucanacajja, yawsutäsin ninar jakontatäpjjani; jupanacarusti kollan cancañat jarcʼaker jiwañaw wastat purini, jïsa, payïr jiwaña. Jupanacajj asqui yänacat wastatamp jithektayatäpjjani.

19. Uqhämasti, cutiquipstapjjam, jan wali lurañat asqui lurañar cutjtjjapjjam, ucanac yatcasatejj jan phokhapcätajja, juchañchäwiruw puripjjäta ucatsti payïr jiwañar katatitäpjjätawa.

20. Ucampis cunjämatejj nayajj yakha unañchat parlapcsma, jupan jiwañapat unañchata, jupajj jiwcani ucürunjja, intejj chʼamactʼaniwa, khanapsti janiw jumanacar churapcätamti; phajjsimp warawaranacampejj chʼamactʼaraquiniwa. Quimsüruw acapachan khanajj jan utjcaniti. Jiwatap ucsaru, jiwatat jactcan ucapachcama.

21. Jupajj ajayup churcjjani ucapachajja, khejjokhejjompi llijullijumpiw walja horasatac utjani; orakesti onjjtasin qhathat-tani. Orakenquir karkanacan chʼollkhëtapa jan chʼijutätapa, jan ucajja, jilpachan mä chʼollkhe karkätapjj jichhürun yatipjjtawa. Orak alayans orak aynachans orak patanquir take uca karkanacasti jiscʼa jiscʼa tʼunjatäniwa.

22. Jïsa, ucanacajj payaruw jaljtani, ucapachat ucsaruw chʼijus chʼijurayata, chamktata, take ac-chʼpach orakjjan aynachans alayans jicjjatatäni.

23. Jachʼa thayanacaw utjani, walja kollunacasti kherwjam qhusqhachatäniwa; walja jichhajj kherwa sat chekanacajj wali jachʼa kollunacaruw tucupjjaraquini.

24. Walja jachʼa thaquinacaw kontu kontuptayatäsin chhaktayatäni; walja marcanacasti chʼusaptayatäpjjaniwa.

25. Walja amay imäwinacaw jistʼartani, walja jiwatanacaparuraquiw catuyapjjani; walja kollananacasti waljaniruw uñstapjjaraquini.

26. Uqhäm alajjpach qhitajj nayar arsutu. Jupajj situwa: Jaypachaw khejjokhejjomp llijullijumpejj utjani.

27. Jupasti saraquituwa: Khejjokhejjomp llijullijump jachʼa thayamp utjascan ucapachaw ucanacajj luratäni; takpach orakjjansti quimsüruw chʼamacäni.

28. Alajjpach qhitasti sascaquituwa: Waljaniw ucanacat jucʼamp jachʼa cunaymananac uñjapjjani, uca unañchanacampin muspharcañanacampin take uca orakjjar camächañap iyawsapjjañapataqui, jaken wawanacap taypin jan iyawsañan jan utjañjamäñapataqui.

29. Qhitinacatejj iyawsapcan ucanacan khespiyasiñanacapataquiw ucajja; qhitinacatejj jan iyawsapcan ucanacasti, asqui taripäwin jupanacar puriñapataquiraquiwa. Uqhämaraqui, jupanacatejj juchañchatäpjjanejja, quipca juchañchatäwiparuw puriyasipjje.

30. Jichhajj jilanacajja, amtasipjjam amtasipjjam, qhitinacatejj chhaktapcanejja, jupanac quipcat chhaktapjjani. Qhitinacatejj ñankh lurapjjanejja, jupanac quicpaw ñankh lurasipjjani, cunalaycutejj antutatäpjjtawa; munañamarjam lurañataquiw antutatäpjjtajja. Diosajj mä yatïw jumanacar churasaw antutat uchapjjtam.

31. Jupajj asquits ñankhats yatiñanacamataquiw churapjjtam. Jupajj jacañats jiwañats ajlliñanacamataquiw churapjjaractam; jumanacasti asc lurasaw asquir cut-tayatäpjjasma, jan ucajj asquejj jumanacaruw cut-tayatäspa; jan ucasti ñankh lurasaw ñankh jumanacar cut-tayasipjjasma.