1. Ucat Nefejj uca arunac arscän ucqhajja, jupanacat mä kawkha jakenacaw taripäw konuñar jalapjjäna; jïsa, pheskaniw jupanacat sarapjjäna. Sarcasasti jupanac-camaw sasipjjäna:

2. Jichhajj chekpach uca jaken arjirïtaps jan arjirïtapsa, Diosan uqhäm muspharcañ cunanac jiwasanacar yatiyañapatac camächit churataps jan churataps yatipjjañäni. Janiw jiwasajj Diosan uca camächit churatapjj iyawsctanti; janiraquiw uca jaken arjirïtaps iyawscaractanti; ucampis jilïr taripirit jiwataw –sas uca arunacajj chekänejja, yakha parlat arunacapan chekätap iyawsaraquiñäniwa.

3. Ucat jupanacajj chʼamanacapamp wal jalasaw taripäw konuñar puripjjäna. Ucatsti, jilïr taripirirojj oraker liwitat-tat quicpa wilapan liwisisquir uñjapjjäna.

4. Ucat uc uñjasajja, walpin musphapjjäna oraker liwitat-tañapcama, cunalaycutejj janiw jupanacajj Nefin jilïr taripirit parlat arunacaparojj iyawsapcänti.

5. Ucampis uñjasinjja, iyawsapjjänwa; takpach Nefin arsut taripäwinacan uca jakenacar puriñapat ajjsarañajj jupanacar puriraquïna; ucat jupanacajj qhathatisaw oraker liwirtapjjäna.

6. Jichhajja, taripirejj jiwayatäcän ucspachaw –jilapajj yakha jan uñtʼat isimp isthapisis jupar jununtasinjj jaltjjatayna– taripirin lokerinacapasti jalapjjänwa, ucat jakenacar jupanac taypin jiwayataw –sas yatiyapjjäna.

7. Ucat jakenacajj taripäw konuñ chekaruw tantachasipjjäna –jupanacajj uca pheska oraker liwitat-tat jaker muspharasaw uñjapjjäna.

8. Jichhajja, uca jakenacajj Nefin jardinapar tantachasir walja jakenacat janiw cuns yatipcänti; ucat jupanac taypin sapjjäna: Acanacaw taripirir jiwayapqui uca jakenacajja, Diosasti jupanacan jiwasanacat jan jaltañanacapataquiw jupanacarojj jawkʼcaspas uqhäm jawkʼantpacha.

9. Ucat jupanacar catuntasina, ñachʼantasin carcelar jakontapjjäna. Ucat yatiyäw take toker apayatäna, taripirejj jiwayatawa, jiwayirinacasti catjatawa, ucat carcelar jakontatäpjjewa –sasa.

10. Ucat khepürojj jakenacajj jiwayat jilïr jachʼa taripirin imantäwipan jaqhusiñataqui ayunañataquiw tantachasipjjäna.

11. Uqhämaraqui Nefin jardinancapcäna, jupan arunacap istʼapcän uca taripirinacajja, jiwat imañataquiw tantachasipjjaraquïna.

12. Ucat jakenac taypin aqhäm sasaw jisctʼapjjäna: Jilïr taripirita, jiwataps jan jiwataps yatiñatac qhitat pheskanejj cawquinquisa? Jupanacasti sapjjänwa: Pheskaniruw qhitapjjta, sapquist ucanacatjja, janiw yatipcti; ucampis jiwayirinacäpqui uca pheskanirojj carcelaruw jakontapjjta.

13. Ucat uca taripirinacajj jupanacan irpanitäñap munapjjäna. Ucat jupanacajj irpanipjjäna, jupanacasti uca qhitat pheskanïnwa. Uca taripirinacasti ucat yatiñataquiw jupanacar jisctʼapjjäna. Jupanacasti take cuntejj lurapcän uc yatiyasaw aqhäm sapjjäna:

14. Nanacajj jalapjjtwa, ucatsti taripäwi konuñ chekaruw puripjjta; ucat take cun Nefin yatiyäwiparjam uñjapct ucqhajja, muspharasaw oraker liwitat-tapjjta. Ucat muspharatajjat chʼam catupct ucqhajja, jupanacajj carcelaruw jakontapjjetu.

15. Jichhasti, aca jaken jiwayatätapatjja, janiw qhitin lurataps yatipcti; acaquiw yatipjjta, jumanacan munatanacamarjam jalanisaw Nefin arunacaparjam juparojj jiwat jicjjatapjjta.

16. Ucat uca taripirinacajj ucjjat jakenacaruw khanañchäna. Ucatsti Nefiruw juchañchapjjäna aqhäm sasa: Jichhajja, aca Nefiw mä qhitamp taripirir jiwayañataquejj arustʼaspacha; ucat jupajj jachʼa jakjam Diosan ajllitjam arjirjam ut-tʼayasiñataqui, iyawsäwipar jiwasanacar iyawsayañataquiw uc yatiyapjjestojja.

17. Uqhämasti, uca jak catjapjjañäni; jupajj juchap arsusisin aca taripirir jiwayirin qhitïtaps yatiyapjjestani.

18. Ucat uca pheskanejj imäw urun antutatäjjapjjaniwa. Ucampis jupanacajj taripirinacaruw Nefi contra arsut arunacapat tokenokapjjäna; jupanacasti maynimp maynimp pitusisaw jupanacarojj pejjtuntapjjäna.

19. Ucampis jupanacajj Nefir catjayasina, ñachʼantayasinarac uca walja jakenac nayrakatar irpayanipjjäna, walja tokenacat jiscsuñataqui, jupar cʼarisiyañataqui, jiwañapatac juchar jakontañanacapataqui.

20. Juparusti sapjjänwa: Jumaw yakhamp mayachaspachäta; qhitis taripirir jiwayqui ucajja? Jichhajj nanacar yatiyas jucham arsusim. Juparusti sapjjaraquïnwa: Acajj kollkejja; jumatejj yatiyapjjetätajja, jupamp lurat amtäwimat arsusïtajja, janiw jiwayapcämati –sasa.

21. Ucampis Nefejj jupanacarojj sänwa: Ay, juma jan amuyuninaca, juma jan circuncidatjam chuymaninaca, juma juyqhunaca, jumanac jan altʼir marcajja, Dios Tatitun aca juch lurañ thaquin sarnakañam cunapachcamatejj antutcan uc yatipjjtati?

22. Jumanacajj janitejj juchanacamat cutiquipstapcätajja, jichpach suyapctam uca jachʼa tucqhäwit aykoñs jaqhusiñs kalltapjjañamawa.

23. Jumaw mä jakemp jupan Seezoram jilïr taripirir jiwayañapatac amtäw lurpachätajj –sasaw jumanacajj sapjjesta. Ucampis nayajj sapjjsmawa: Ucajj nayan jumanacar ucat yatiñanacamatac ircatatajj laycuwa; ucasti nayan jumanac taypinquir ñankha ajjtcañ luräwinacat yatitajjat jumanacar ircatañataquiwa.

24. Nayan uc luratajj laycuw, jumanacajj jumamp mä jakempiw jupan uc lurañapatac amtäw lurpachätajj –sapjjesta. Jïsa, nayan uca uñachayäw jumanacar churatajjat nayatac colerasisin jacañajj apakañ munapjjesta.

25. Jichhajj nayajj yakha uñachayäw churapjjäma. Ucat nayar jiwayañ munatams jan munatams uñjañäni.

26. Nayajj sapjjsmawa: Seezoraman Seantum jilapan utapar sarasin jupar sapjjam:

27. Aca marcat walja ñankhanac parlir cʼari arjirijj jumampit Seezoram jilamar jiwayañamatac amtäw luri?

28. Jupasti jumanacarojja, janiwa –sapjjätamwa.

29. Juparusti sapjjätawa: Jumat jilamar jiwayta?

30. Ucat jupajj ajjsarañatjj janiw camsañs yatcaniti. Ucatsti janiw lurcti –sapjjätamwa. Ucat muspharcaspas uqhämaw yanasini. Ucampis janiw juchanïcti –sapjjätamwa.

31. Ucat jumanacajj jupar uñaquipapjjäta, capotepansti wil jicjjatapjjaraquïta.

32. Ucat uc uñjasaw sapjjäta: Aca wilajj qhitinquisa? Janit nanacajj acan jilaman wilapätap yatipcta –sapjjaraquïtawa.

33. Ucat jupajj qhathatisaw jiwañajj jupar purcaspas uqhäm wila chʼarir tucuni.

34. Ucat jumanacajj sapjjäta: Uca ajjsaratam laycu, ajanum wila chʼarir tucur uñjasaw juman juchanïtam yatipjjta.

35. Ucat jucʼamp jupajj ajjsarani. Ucatsti jupajj arsjjaniwa, jupa sapan jiwayatapac arsjjaraquini.

36. Ucat jupajj sapjjaraquïtam: Janiw ucjjat Nefin cuna lurataps yatcti, Diosaquiw chʼamapamp ucjj yatiyitaspa. Ucat nayan jan cʼarisir jakëtajj Diosan jumanacar qhitanitätajj yatipjjäta.

37. Ucatsti, jupanacajj sarapjjänwa, ucat cunjämtejj Nefejj jupanacar siscän uca arunacaparjamaw lurapjjäna. Jupan arunacapasti chekaraquïnwa, cunalaycutejj uca arunacaparjamaw Seantumajj cʼarisïna; uca arunacaparjamaw arsjjaraquïna.

38. Ucat jupa pachp jiwayirïtap uñtʼayasipan uca pheskanimp Nefimpejj antutatäpjjäna.

39. Ucat yakhep Nefi jakenacajj Nefin arunacapar iyawsapjjänwa. Uqhämaraqui yakhepanacajj pheskanin ircatatapat iyawsapjjaraquïna; uca pheskanisti carcelancapcän ucqhajj Diosaruw cutiquipstapjjäna.

40. Ucat jakenacat yakhepajj: Nefejj arjiriw –sapjjänwa.

41. Yakhanacasti sapjjänwa: Jupajj diosawa, cunalaycutejj janitejj jupajj mä diosäcaspajja, janiw take cun yatcaspati. Jupajj chuymanacasan lupʼïwinacapat yatiyasaw jiwasanacar yakha cunaymananac yatiyaraquistu; uqhämaraqui quipca jilïr taripirisar cheka jiwayirin qhitïtapats yatiyapjjaraquistu.