1. Ucat taripirinacan sarayäwipan pakallk tunc payan maranjja, chʼajjwanacajj takpach Nefi jakenac taypin takpach uca oraken nuwasïwinac utjañcamaw jucʼampiptäna.

2. Uca jamas lunthat tamaw uca tucqhir ñankha luräwinac lurapcän ucanacajja. Uca nuwasïwisti takpach uca maraw utjäna, uqhämaraqui pakallk tunc quimsan maranjj utjascaquïna.

3. Ucat uca maran Nefejj Tatitur aqhäm sas artʼäna:

4. Tatay, aca marcan espadan tucqhatäñap jan antutcamti, antisas Tatay, aca oraken machʼa utjpan Dios Tatitupar amtasiñ amtayatäñapataqui. Inas juchanacapat jumar cutiquipstapjjchïtam.

5. Ucat Nefin arunacaparjamaw lurasïna; uc-chʼpach orakjjan take Nefi jakenac taypin jachʼa machʼajj utjäna. Ucat pakallk tunca pusin maran machʼajj utjascaquïna; tucqhäwin lurañapasti espadampiw tucuyäna, ucampis machʼïpana jucʼamp sintiruw tucüna.

6. Ucat uca tʼunjäwisti pakallk tunc pheskan maran utjascaquïnwa. Orakejj jawkʼantatjam wañänwa; yaran pachansti yaranajj janiw achcänti. Uqhämaw takpach orakejj jawkʼantatäna, Laman jakenac taypins Nefi jakenac taypinsa jawkʼantatänwa. Jupanacasti jucʼamp ñankha orakewjanacanjja, warank warankaw jiwarapjjäna.

7. Ucat jakenacajj machʼat jiwañampïtap uñjapjjäna, Dios Tatitupat amtasiñ kalltapjjäna. Jupanacasti Nefin arunacapat amtasiñ kalltapjjaraquïna.

8. Ucat jakenacajj jilïr taripirinacaparu sarayirinacaparojj Nefir aqhäm sañanacapataquiw achictʼapjjäna: Nanacajj Diosan jakepätam yatipjjta. Ucat Dios Tatitusar aca machʼa jiwasanacat maysar uñtayañapatac artʼam, take juman tucqhatäñajjatac arsut arunacaman jan phokhatäñapataqui.

9. Ucat taripirinacajj jakenacan munat arunacaparjamaw Nefir parlapjjäna. Ucat Nefejj jakenacan juchanacapat cutiquipstir uñjasina, cotensiot isimp isthapisisin chuymanacapar llampʼuptayatap uñjcän ucqhajja, jupajj Tatituruw aqhäm sas artʼäna:

10. Tatay, aca marcajj juchanacapat cutiquipstiwa; jupanacasti Gadiantonan tamap jupanacat chhaktayañcamaw alisnucupjje, jamas arustʼanacapsti orakeruw imantapjje.

11. Jichhasti Tatay, uca llampʼu chuymanïtap laycuy colerasiñam apakam; cawquïr ñankha jakenacarutejj tucjcta uca tucqhäwimamp colerasiñam apaktayasjjam.

12. Tata, colerasiñam maysar uñtayam. Jïsa, jachʼa colerasiñam maysar uñtayasin aca machʼa aca oraken tucuyamaya.

13. Tata, istʼaquitaya; arunacajjarjam lurasin orakjjarojj jall apayanim oraken ach achuyañapataqui, yaran pachan yaran achuyañapataqui.

14. Tatay, cunapachatejj nayajj machʼajj utjpan espadamp tucqhäwin tucuyañapatac sisct ucqhajja, arunacajjar istʼistawa. Jichhasti nayajj arunacajjar istʼañam yat-twa, cunalaycutejj jumajj sistawa: Aca marcatejj juchanacapat cutiquipstanejja, nayajj jupanacar janiw tucjcäti –sasa.

15. Jichhajj Tata, jupanacar purit machʼa, jachʼa usu, tucqhäwi laycuw juchanacapat cutiquipstatap jumajj uñjta.

16. Jichhasti, Tatay, colerasiñam maysar uñtayasina, janit jupanacan jumar lokañap mayamp yantʼcäta? Uqhamäsp ucajj Tatay, jumajj arsut arunacamarjamajj jupanacarojj qhuyapayasmawa.

17. Ucat pakallk tunc sojjtan maran Tatitojj colerasiñap jakenacat apakasin jall oraker puriyäna. Ucat orakejj yapu pachan ach achuyjjäna, uqhämaraqui yaran pachan yaran achuyaraquïna.

18. Ucat jakenacajj cusisisaw Diosar jachʼar aptapjjäna. Uc-chʼpach orakjjan cusisiñajj phoktʼatäna; jupanacasti Nefirojj janiw jucʼamp jiwayañ munapcänti, antisas jupanacajj jupan jachʼa arjirïtapa, Diosan jakepätapa, Diosat jachʼa chʼamsa, chʼaman cancañs catoker jakëtap amuyapjjäna.

19. Uqhämaraqui Lehi jilapajj asquinac lurañanjj janiw Nefit cunans khepaktcänti.

20. Ucat Nefi jakenacajj wastat uca oraken jachʼaptañ kalltapjjäna. Jupanacasti chʼusawjitanacap cut-tayañ kalltasaw miratatasin chʼekentañ kalltapjjäna, uc-chʼpach orakjjan alay tokens aynach tokens inti jalant toke lamarats inti jals toke lamarcam phokhantañcama.

21. Ucat pakallk tunc sojjtan marajj sumancañampiw tucusïna. Uqhämaraqui pakallk tunc pakallkon marajj sumancañamp kalltaraquïna. Iyawsiri tamasti uc-chʼpach orakjjaruw chʼekentäna; uqhämaraqui Laman jakenacats Nefi jakenacats jilpachaniw iyawsiri tamancapjjäna. Ucat wali jachʼa sumancañajj uca oraken utjäna. Uqhämaw pakallk tunc pakallkon marajj tucusïna.

22. Ucat pakallk tunc quimsakallkon maran sumancañajj utjaraquïna, ucampis mä kawkha pitusïwinacajj arjirinacan churat yatichäwinacjjat utjäna.

23. Ucat pakallk tunc llätuncan maran walja chʼajjwanac utjañajj kalltäna. Ucampis Nefimp Lehimp walja cheka yatichäwinacat yatir jilanacapampejja, Diosat walja yatiyäwinac sapür catokasaw jakenacar yatiyapjjäna; ucat uca pachpa maran chʼajjwäwinacapajj tucuyapjjäna.

24. Ucat taripirinacan Nefi jakenacjjar sarayäwipan quimsakallk tunca maranjja, mä kawkha Nefi jakenacajj walja maranac nayrajj Laman jakenacar maqhatata, Laman jake sas sut catjjarut Nefi jakenacat misturinacampi, uqhämaraqui mä kawkha Laman jakenacat cheka sarakerinacampejj jupanacan colerasiñatac amtayatäsina, jan ucajja, uca misturinacan amtayatäsaw jilanacapamp nuwasiñ kalltapjjäna.

25. Jupanacasti jiwayapjjänwa lunthatjapjjaraquïnwa. Uca luratanacap khepatsti jupanacajj sapa cutiw kollunacaru, wasararu, jamas chekanacar wastat jaltapjjäna. Ucansti jupanacajj jaychasir misturinacan jupanacar maqhatataparjamaw sapür jakenacapar jiljjatäw catokasin jan catjatäñanacapatac imantasipjjäna.

26. Ucat mä kawkha pacharojja, jïsa, jucʼa maranacjjarojj jupanacajj wali jachʼa lunthat tamaruw tucupjjäna; jupanacasti takpach Gadiantonan jamas arustʼanacap thakasaw Gadianton lunthatanacar tucupjjäna.

27. Jichhajja, uca lunthatanacajj wali jachʼa tʼunjäwi, jïsa, jachʼa tucqhäwi, Nefi jakenac taypirus Laman jakenac taypirus puriyapjjäna.

28. Ucat uca tucqhäwir suytʼayañajj waquisïna. Ucat jupanacajj chʼaman jakenaca, wasararus kollunacarus uca lunthat tamar thakasin tucqhañataquiw qhitapjjäna.

29. Ucampis uca pachpa maran jupanacajj kheparuw quipca orakenacapar jit-tayatäpjjäna. Uqhäm taripirinacan Nefi jakenacjjar sarayäwipan quimsakallk tunc marajj tucusïna.

30. Ucat quimsakallk tunc mayan maran kalltäwipan jupanacajj wastat uca lunthat tamjjar sarasin waljaniruw jiwarayapjjäna. Jupanacatsti waljaniraquiw jiwarayatäpjjäna.

31. Jupanacasti uca kollunacan wasaran utjir lunthatanacan sinti waljätap laycuw kollunacat wasarat quipca orakenacapar wastat cut-tapjjañapäna.

32. Uqhämaw uca marajj tucusïna; uqhämaraquiw lunthatanacajj jiljjatasin jachʼaptasipcaquïna, take Nefis Lamans jakenacar saytʼasiñapcama. Jupanacasti jakenacar uc-chʼpach orakjjan wal ajjsarayapjjäna.

33. Jupanacajj take toke orakewjanacar sarasaw ucanacarojj wal tucqhapjjäna. Jupanacajj waljaniruw jiwayapjjäna, walja yakhanacarusti, catuntasin wasarar apapjjäna, jilpachasti warminacapa wawanacapänwa.

34. Jichhajja, uca ñankha luräwinacapat jakenacar purit ñankhajja, jupanacarojj Dios Tatitupat wastat amtasiñ amtayäna.

35. Uqhäm taripirinacan quimsakallk tunc mayan marajj tucusïna.

36. Ucat quimsakallk tunc payan maranjja, jupanacajj wastat Dios Tatitupat armasiñ kalltapjjäna. Quimsakallk tunc quimsan maransti jupanacajj ñankha luräwinacan jachʼaptañ kalltapjjäna. Quimsakallk tunc pusin maran jupanacajj luräwinacar jan asquiptayapcänti.

37. Ucat quimsakallk tunc pheskan maran jupanacajj jachʼa jachʼa tucuñapan ñankha luräwinacapan jucʼamp jucʼamp chʼollkher tucupjjäna. Uqhämaw tucqhäwitaquejj wastat pokosipcäna.

38. Uqhämaw quimsakallk tunc pheskan marajj tucusïna.