1. Ucat Nefejj uca arunac arscän ucqhajja, taripirïcän uca Gadiantonan jamas tamapanquir jakenacajj colerasipjjänwa. Jupanacasti jupa contraw jakenacarojj aqhäm sas artʼapjjäna: Cunats aca jaker jan catuntapcäta ucat juchapatjam juchañchatäñapatac jan apapcaraquïta?

2. Cunats aca jaker leyisjjar aca marcjjar ñankh parlir uñjasajj alekac istʼapjjta?

3. Nefisti jupanacar leyipan ñankhätapat parlatayna. Walja jan kellkcay cunaymananac Nefejj jupanacar parläna; janiraquiw cuns Diosan camächitanacap contrajj parlcaraquïnti.

4. Uca taripirinacasti jupanacan jamas chʼamac luräwinacapat khan parlatapat colerasipjjaraquïna. Ucampis quipca amparanacapamp jupar catuntañ ajjsarapjjänwa, jakenacan jupanac contra arsuñapat ajjsarasa.

5. Ucat jakenacar aqhäm sasaw artʼapjjäna: Cunats aca jakemp jiwasanacat ñankh parlayapjjta? Jupajj take aca marcar tucqhatäñataquiw juchañchapjjestu; uqhämaraqui aca jachʼa marcanacasan jiwasanacat aparatäñapataqui, jiwasanacan ucan jan utjañasataquiw juchañchapjjestu.

6. Jichhajja, ucan jan lurcayätap yatipjjtanwa; jiwasanacajj chʼamanïpjjtanwa, marcanacasasti jachʼäpjjaraquiwa. Ucat timanacasajj jiwasanacjjarojj janiw cuna chʼamanïpcaspasa.

7. Uqhäm jupanacajj Nefi contra colerasiñapataquejj jakenacar amtayapjjäna. Jupanac taypinsti chʼajjwanac lurapjjaraquïna, cunalaycutejj yakhepanacajj artʼapjjänwa: Aca jaker antutapjjam, jupajj asqui jakewa. Janitejj jiwasanacajj juchanacasat cutiquipstapcañänejja, cuntejj sisqui ucanacajj chekpachaw phokhasini.

8. Cuna taripäwinacat-tejj jupajj ircatapquistu take ucanacajj jiwasanacaruw puripjjestani; jupan ñankha luräwinacasat chekapat ircatatap yatipjjta. Uca ñankha luräwinacasasti waljawa, jupasti cunjämatejj ñankha luräwinacasat yatqui uqhämaraquiw cunatejj jiwasanacar camächapquistan take ucjj yatiraqui.

9. Janitejj jupajj Diosan arjiripäcasapänjja, janiw ucanacat ircatcasapänti.

10. Ucat Nefir jiwayañ munir jakenacajj ajjsaratap laycojj janiw jupar llamctʼapcänti. Ucat jiltʼirinacan ajjsarañapcam yakhepanacatac sumaptatap uñjasaw wastat jupanacar parlañ kalltäna.

11. Ucat jupajj aqhäm sasaw jucʼamp parlañan waquisitap uñjasin säna: Jilanacajjay, janit jumanacajj Diosan mä jaker chʼam churatap yatipcta? Jïsa, janit Moisesar Wila Lamar umanac acsar ucsar jaljtañapatac jawkʼantañatac chʼam churatapata, Israelit awquinacasan waña orakenjam maqhatatapata, umanacan Egiptonquirinacjjar imthapis chhaktayatapat leyipcta?

12. Jichhajja, Diosatejj uca jaker uqhäm chʼam churchënjja, cunats jumanac taypin pitusisin aqhäm nayat sapjjesta: Janitejj cutiquipstapcañän ucqhajja, jiwasanacar puripquistani uca taripäwinacat yatiñatac Diosajj chʼamjj janiw jupar churquit –sasa?

13. Ucampis janiw nayan arunacajjaruquit jaychasipcta; jan ucasti, awquinacasan take parlat arunacaparu, uqhämaraqui uca jachʼa chʼam catoker Moises jaken arunacaparuw jaychasipjjta. Jupan Mesiasan jutañapat parlat arunacaparus jaychasipjjaractawa.

14. Janit jupajj Diosan Yokapan jutañapat ircatqui? Uqhämaraqui cunjämatejj jupajj bronce catar chʼusa wasaran aytcänjja, uqhämaraquiw jutcan ucajj aytataraquïni.

15. Uqhämaraqui cawquïrinacatejj uca catar uñjasin jacapjjänjja, uqhämaraquiw cawquïrinacatejj llampʼu altʼir chuymanïsin Diosan Yokapar iyawsas uñtapcan ucanacajja, wiñayäqui uca jacäwiruw jacapjjani.

16. Jichhajja, janiw Moisesaquit ucanacat ircatqui; jan ucasti takpach kollan arjirinacajj jupan urunacapat Abrahanan urunacapcamaw ucanacat ircatapjjäna.

17. Abrahanasti Mesiasan jutañap uñjänwa, ucat cusisiñan phoktʼatäsin walpin cusisthapïna.

18. Nayasti sapjjaracsmawa: Janiw Abrahanaquit ucanacat yatcäna, jan ucasti Abrahanan urunacap nayräjjajj waljaniw Diosan sucʼaparjam jawsatäpjjäna, jïsa, Yokapan sucʼataparjamaw jawsatäpjjäna. Ucasti jakenacar walja warank maranac janïr jupajj jutcasp ucapachajj cutsuyañan jupanacar puriñapat uñstayañataquïnwa.

19. Jichhajja, nayajj jumanacan Abrahanan urunacapat walja arjirinacan ucanacat ircatatap yatipjjañam munta; jïsa, Zenos arjirejj chachjamaw ircatäna; ucat jiwayatäna.

20. Uqhämaraqui Zenocamp Eziasampi Isaiasampi Jeremiasampejja (Jeremiasajj Jerusalenan tucqhatäñapat ircatcän uca pachpa arjiriwa) ucanacat ircatapjjäna; Jerusalenan Jeremiasan arunacaparjam tucqhatätapjj yatipjjaractanwa. Uqhämasti, cunats Diosan Yokapajj yatiyäwiparjam jan jutcanejja?

21. Jichhajja, Jerusalenan tucqhatätapat jaychasipjjätati? Janiw takpach Sedeciasan yokanacapajj jiwayatäcänti –sasa? Janiw Mulecaquejj jiltʼquit sapjjätati? Janit Sedeciasan wawanacapan jiwasanacampïtapjj Jerusalen oraket alisnucutätapjj uñjapcta? Ucampis ucajj janiw takpachäquiti–

22. Lehi awquisajj ucanacat ircatatap laycuw Jerusalenat alisnucutaraquïna. Nefejj ucanacat ircatäna. Niyapun takpach jichhacam awquinacasaw ucanacat ircatapjjaraquïna; jupanacajj Criston jutañapat ircatapjjäna. Jupanacasti ucar suyasaw jutcan uca urupat cusisipjjäna.

23. Jupajj Diosawa, jupasti jupanacampiwa; jupanacaruraquiw uñachayasi uqhämat jupanacarojj cutsuyi. Jupanacasti jutcan ucat jupar jachʼar aptapjjäna.

24. Jichhajja, ucanac yatisina, ucanacar jaychasiñaman cʼarïtap amuyasaraqui, ucanjj juch lurapjjta; walja ircatäwinac catokcasasa, take ucanacar jaychasisaw jan ucanac catokapctati. Jumanacajj take cun alajjpachanquir cunanacs take acapachanquir cunaymananacs ucan chekätapat ircatir catokapjjta.

25. Ucampis cunatejj chekäqui ucarojj jiscʼachapjjtawa, ucatsti kollan Diosam contraw saytʼapjjta. Alajjpachan imatanac imasiñam lantjja, jichhürpacharaquiw taripäw urutac colerasiñ kotuchasipcta. Alajjpachanjj janiw cunas thujsantquiti, janiraquiw ucarojj cuna kʼañus mantquiti.

26. Jichpachas jiwayäwinacama, kʼañusiñanacama, ñankha luräwinacam laycuw wiñay tucqhäwitac pokosipcta; janitejj juchanacamat cutiquipstapcätajja, ucajj lakaw puripjjätam.

27. Ucajj jichhas puncunacamanquiwa; jïsa, taripäw konuñar sarasin uñjapjjam. Taripirimajj jiwayataw quicpa wilapan liwisisqui. Jupan taripäw konuñan kontʼañ munir jilapaw juparojj jiwayi.

28. Panpachaniw jamas Gadiantonampina, jakenacan almanacapar tucqhañ munqui uca ñankhampin ut-tʼayat jamas tamamanquirïpjje.