1. Ucat taripirinacan sarayäwipan pusi tunc quimsan maranjja, Nefi jakenac taypin janiw chʼajjwäwinacajj utjcänti, jan ucajja, jakenac taypin mä jucʼa juchhiquiyir jachʼa jachʼa tucuñajj iyawsiri jakenacancänwa, ucasti pusi tunc quimsan maran tucuyäwip toker asquichataraquïnwa.

2. Pusi tunc pusin maranjja, janiw cuna chʼajjwas jakenac taypin utjcänti. Pusi tunc pheskan maranjja, janiraquiw walja chʼajjwäwinacajj utjcänti.

3. Ucampis pusi tunc sojjtan maranjja, walja chʼajjwanacamp jaychasïwinacampiw utjäna; uca laycusti walja waljaniw Zarahemla oraket mistusajj alay toke oraker uc tutjam catokañatac sarapjjäna.

4. Jupanacasti wali jay sarasin jachʼa kotanac jacʼar walja jawiranac thiyar puripjjäna.

5. Jïsa, take uca orak tokeruw chʼekentapjjäna; cawquïr chekanacantejj kokanacajj uca oraken walja nayra utjir jakenacan jan tucqhatäcäna ucat janirac chʼusaptayatäcän ucqharuw jupanacajj chʼekentapjjäna.

6. Jichhajja, janiw cawquïr chektʼas chʼusäcänti; kokanacaquiw uca chekanacan jan utjcänti; ucampis uca orak nayra caturinacan tʼunjäwipan jachʼätap laycuw chʼusa orake –sapjjäna.

7. Ucat jucʼa kokanac uca oraken utjipana, uca sarir jakenacajj cementomp wali sum luririnacaruw tucupjjäna; ucat jupanacajj cementot utanac utachapjjäna, ucanacan utjapjjäna.

8. Ucat jupanacajj miratatasaw chʼekentapjjäna; jupanacasti aynach toke oraket alay toke orakeruw sarapjjaraquïna. Jupanacasti chʼekentasaw take uc-chʼpach oraken utjañ kalltapjjäna, aynach toke lamarat alay toke lamarcama, inti jals toke lamarat inti jalant toke lamarcama.

9. Uca alay toke orakenquirinacasti chʼujlljam carpanacapana, cement utanacan utjapjjäna; ucat cuna koktejj uca oraken jilsur uñjapcän ucjja, sum jilayapjjäna, mä khepürunjj utanacap utachañatac lawanïñanacapataqui, uqhämaraqui marcanacapa, templonacapa, sinagoganacapa, kollan chekanacapa, take cunayman jachʼa utanacap utachañataqui.

10. Ucat cʼullun alay toke oraken jucʼaquïtap laycuw jupanacajj waljanac barcot apayapjjäna.

11. Uqhäm jupanacajj alay toke orakenquir jakenacar marcanac cʼulluts cementots lurapjjañapataquiw yanapapjjäna.

12. Ucat Ammonan nacïwitpach Laman jakenacapajj waljaniw uca oraker sarapjjaraquïna.

13. Jichhajja, uca jakenacan sarnakäwinacapat walja jupanacan kellkat kellkäwinacapaw utji. Ucanacasti sapa sarnakäwinacapat yatiyasajj wali jachʼäpjjewa.

14. Ucampis aca jakenacan sapa patac sarnakäwinacapat janiw mayaquis uchatäcaspati. Jïsa, Laman jakenacan Nefi jakenacan sarnakäwinacapata, nuwasïwinacapata, chʼajjwanacapata, jaychasïwinacapata, yatiyäwinacapata, jutir urunacat yatiyäwinacapata, barcot apayäwinacapata, barconac luräwinacapata, kollan utanac utachäwinacapata, sinagoganac kollan chekanacap utachäwinacapata, asquïtapata, ñankhätapata, jiwayäwinacapata, lunthatäwinacapata, lunthatjäwinacapata, take cunayman ajjtcañ luräwinacapata, wachokaña kʼañusiñ luräwinacapata, janiw patac ucanacat mayas acan kellkatäcaspati.

15. Ucampis take casta walja kellkatanacaw utji, ucanacasti Nefi jakenacan jucʼamp kellkatäpjjewa.

16. Nefi jakenacan juch lurañar jalantañapcama, jiwayatäñap lunthatjatäñap thakatäñapcama, alisnucutäñapa, jiwarayatäñapa, uc-chʼpach oraker chʼekentayatäñapcama, jan jucʼamp Nefi jakenac satäñataqui Laman jakenacamp chʼarkhotäñapcama, ñankhar lakʼjamar ajjsarcañaru, jïsa, Laman jakenacar tucuñapcamaw uca kellkatanacajj mitat mitar catuyata.

17. Jichhasti, wastat kellkäwijjar cut-tä. Take cuntejj siscta ucanacajj phokhasiwa: Jachʼa chʼajjwäwinaca, ojjöwinaca, nuwasïwinaca, Nefi jakenac taypin yakhachasiñanaca.

18. Taripirinacan sarayäwipan pusi tunc sojjtan maraw tucusïna.

19. Uca orakenjj jachʼa chʼajjwanacajj utjascaquïnwa, pusi tunc pakallkon marans pusi tunc quimsakallkon maransa.

20. Ucampis Helamanajj taripäw konuñan asqui chekapar uñjañampiw taripäna. Jupajj Diosan leyinacapar amtat munäwinacaparu, camächitanacaparuw phokhäna. Jupajj Diosan uñjataparjamaw asquïqui ucjj jan inactʼasajj luraraquïna, jupasti awquipan thaquipan uca oraken jachʼaptañapcam sarnakäna.

21. Jupansti pä yokaw utjäna. Jilïrirojj Nefi sutimpiw sutiñchäna, sullquïrirusti Lehi sutimpiw sutiñcharaquïna. Jupanacasti Diosan jilañ kalltapjjäna.

22. Ucat taripirinacan Nefi jakenacjjar sarayäwipan pusi tunc quimsakallkon mara tucuyäwipan uca chʼajjwäwinacamp nuwasïwinacampejj Nefi jakenac taypin mä jucʼa tucuyañ kalltäna.

23. Taripirinacan sarayäwipan pusi tunc llätuncan maranjj jan tucusir sumancañajj uca oraken ut-tʼayatänwa. Jucʼamp marcachat orakewjanacan Gadianton lunthatan ut-tʼayata chekanacaquiw jan camächatäcänti, gobiernon pʼektʼirinacan ucapach jan yatitap laycuw uc-chʼpach orakejj jan tʼunjatäcänti.

24. Ucat uca pachpa maranjja, walja warankanacajj iyawsiri jakenacampi chicaptasis juchanacapat cutiquipstañataquiw bautisasipjjäna. Uca laycusti wali jachʼaptañajj iyawsiri taman utjänwa.

25. Ucat iyawsiri jakenacan jachʼaptäwipan jachʼätapata, jakenacjjar wartat qhuyapayäwinacan waljätapat jilïr sacerdotenacas yatichirinacas jan tuptʼcayaw musphapjjäna.

26. Ucat Tatitun luräwipajj jachʼaptänwa. Warank warank jakenacaw bautisasipjjäna, ucatsti Diosaru iyawsiri tamaru mantasaw jachʼaptäna.

27. Ucat cawquïrinacatejj cheka chuymamp Tatitun kollan sutipar artʼapqui ucanacar qhuyapayatap uñjtan.

28. Ucat alajjpachan puncupan takeniru, Jesucristo Diosan Yokapan sutipar iyawsirinacarus jistʼaratap uñjaractan.

29. Ucatsti uñjaractanwa, qhitinacatejj munqui ucanacajja, Diosan arup catupjjaspawa. Ucasti jacasquiriwa chʼamanira quiwa, takpach supayan chʼiqhi arustʼäwinacap sipitanacap sallkjañanacap tʼun tʼunjani, ñankhanacar chhaktayañatac waquichat wiñay tʼakhesïw jakhenjam Criston jakepar cheka cʼullcʼu saräwin maqhatayasaw irparaquini.

30. Ucasti almanacaparu, jïsa, jan jiwir almanacaparu, alajjpach khapak marcana, Abrahanamp Isaacamp Jacobomp take kollan awquinacasamp Diosan cupëjjapar konuñapatac jan jucʼamp mistuñanacapataquiw puriyani.

31. Uca maransti Zarahemla orakena, take ucsa orakenacana, take Nefi jakenacan catut orakenacan jan tucusir cusisiñajj utjäna.

32. Ucat pusi tunc llätuncan maran tucuyäwipcamaw sumancañamp wali jachʼa cusisiñampejj utjäna, uqhämaraqui taripirinacan sarayäwipan pheska tunquïr maran jan tucusir sumancañamp jachʼa cusisiñampejj utjaraquïna.

33. Ucat taripirinacan pheska tunca mayan maran sumancañajj utjaraquïna, ucampis jachʼa jachʼa tucuñajj iyawsiri jakenac taypiru mä jucʼa mantañ kalltäna–Diosaru chekapun iyawsiri jakenac taypir janiw mantcänti, jan ucasti Diosaru iyawstwa–saquiri jakenacan chuymanacaparuw mantañ kalltäna–

34. Jupanacasti jachʼa jachʼa tucuñ chuymaniw tucupjjäna, walja jilanacaparuw arcnakapjjäna. Ucajj jucʼamp llampʼu chuyman jakenacatac walja arcnakäwinacamp tʼakhesïwinacamp wali jachʼa tʼakhesiyir ñankhänwa.

35. Ucampis uca llampʼu chuymaninacajj wal ayunasin, mayisisaw jucʼamp jucʼamp llampʼu chuymaniptapjjäna. Ucatsti, jucʼamp jucʼamp Cristor iyawsäwipan thurtʼasipjjäna, chuymanacapan cusisiñan chuymachañan phoktʼatäñapcama, jïsa, jupanacan chuymanacapan kollanaptayatäñapcam kʼomachatäñapcamasa, uca kollanaptayañasti chuymanacap Diosar yäkayatap laycuw juti.

36. Ucat pheska tunc payan maraw sumancañamp tucusiraquïna, jakenacan chuymanacapar mantcän uca walja jachʼa jachʼa tucuñaquiw sumancañar jarcʼäna. Uca jachʼa jachʼa tucuñasti, kamiriptañapa uca oraken wali jachʼaptatap laycünwa. Ucasti sapüruw jupanacan jilaraquïna.

37. Ucat taripirinacan pheska tunc quimsan maran Helamanajj jiwjjäna, jilïr Nefi yokapasti jupa lantiw sarayañ kalltaraquïna. Jupasti taripäw konuñan asqui chekapar uñjañampiw taripäna; jupajj Diosan camächitanacapar phokhasaw awquipan thaquipan sarnakäna.