1. Ucat quimsakallk tunc sojjtan maran Nefi jakenacajj ñankha luräwinac lurasipcaquïna; jïsa, wali ñankhapjjänwa. Ucampis Laman jakenacajj Diosan camächitanacaparuw Moisesan leyiparjam wali sum phokhapjjäna.

2. Ucat uca maran Samuel sat Lamanat sarakeri jakejja, Zarahemla oraker jutasin jakenacar yatiyañ kalltäna. Ucat jupajj walja urunacaw jakenacar juchanacat cutiquipstañat yatiyäna, ucampis jupanacajj alisnucupjjänwa; jupasti quipca orakepar cut-tirjamäjjänwa.

3. Ucampis Tatitun arupajj juparuw purïna, jupan wastat cut-tañapataqui, cunatejj chuymapar purcaspa uc arjañapataqui.

4. Ucat jupanacajj janiw jupan marcar mantañap munapcänti. Ucat jupajj marca perka patar maqhatasaw amparap loktasin jachʼa arut artʼäna. Jupasti cuntejj Tatitojj chuymapar uchcän ucanac jakenacar arjäna.

5. Jupasti jupanacarojj sänwa: Naya Samuel sat Lamanat sarakeri jakejja, Tatitojj chuymajjar uchquitu uca arunac yatiyta; chekaparjam taripañan espadapajj aca jakenacjjar aytataw –sas, aca jakenacar sañajjataquiw jupajj chuymajjar uchitu. Janïr pusi patac mara sarakcan ucqhaw, uca chekaparjam taripañan espadapajj aca jakenacar jaljjat-tani.

6. Jïsa, jachʼa tʼunjäwiw aca jakenacarojj suyasqui. Ucasti jupanacarojj purinipuniniwa. Qhititejj chekpachan acapachar jutcani, uqhämaraqui walja cunaymananac tʼakhescani, marcapatac jiwayatäcani uca Jesucrist Tatitur iyawsañampi juchanacat cutiquipstañampiquiw aca jakenacarojj khespiyaspa.

7. Tatitun mä alajjpach qhitapajj uc nayar yatiyitu. Jupasti chuymajjaruw cusisiñ yatiyäwinac apaniraqui; nayasti uc jumanacar yatiyañajjataqui, jumanacan cusisiñ yatiyäwinac catokapjjañanacamatac qhitanitätwa, ucampis janiw catokapquistati.

8. Ucat aqhäm siw Tatitojja: Nefi jakenacan chuymanacapan kalaratätap laycuw arujj jupanacat apakä, janitejj juchanacapat cutiquipstapcan ucajja. Ajayujjsti jupanacat jithektayäwa; jupanacarusti janiw jucʼamp qhuyapaycäti. Nayajj jilanacapan chuymanacap jupanac contraw turcayä, jupanacar timasiñapataqui.

9. Janïr pusi patac marajj sarakcan ucqhaw, nayajj jupanacar jawkʼantayä; nayasti espadampi, machʼampi, jachʼa usumpiw jupanacar sartʼä.

10. Nayajj jachʼa colerasiñajjampiw jupanacar tumpä; pusïr mitanquir timanacamat yakhepanacajj kʼala tʼunjatätam uñjapjjaraquini. Janitejj juchanacamat cutiquipstapcätajja, ucajj chekpachaw jutani –siw Tatitojja, pusïri mitat utjirinacasti tʼunjatäctas uc onjjtayapjjani.

11. Ucampis juchanacamat cutiquipstasin Dios Tatitumar maqhatjjapjjätajja, colerasiñajjarojj maysaruw uñtayjjä –siw Tatitojja. Jïsa, aqhäm siw Tatitojja: Juchanacapat cutiquipstasin nayar maqhatjjapjjetan ucanacajja, qhuyapayatäniwa, ucampis ay juchanacapat jan cutiquipstirinacata!

12. Ay aca jachʼa Zarahemla marcata; asqui jakenac laycuw ucajj khespiyata. Ay aca jachʼa marcata –siw Tatitojja, cunalaycutejj waljaniwa, jïsa, aca jachʼa marcat jilpachaniw chuymanacap nayatac kalaptayapjjani, ucsti nayajj amuytwa –siw Tatitojja.

13. Ucampis juchanacapat cutiquipstapcan ucanacajja, qhuyapayatäpjjaniwa, jupanacarusti janiw tʼunjcäti. Ucampis janitejj uca marcanquir asqui jakenacajj utjcaspajja, nayajj nin alajjpachat sarakayasaw, ucamp uca marcar tʼunjirista.

14. Ucampis asqui jakenac laycuw jan tʼunjatäquiti. Cunapachatejj asqui jakenacar jumanac taypit alisnucupcät ucapachaw tʼunjatäñamajj purinini –siw Tatitojja. Jïsa, ay aca jachʼa marcata, ucanquir ñankha ajjtcañ luräwinac laycu!

15. Jïsa, ay Gedeon marcata, ucanquir ñankha ajjtcañ luräwinac laycu.

16. Jïsa, ay take toke orakenquir Nefi jakenacan catut marcanacata, ucanquir ñankha ajjtcañ luräwinac laycu.

17. Uqhämaraqui, aca orakerojj mä ñankhachäwiw purini, aca orakenquir jakenac laycu; jïsa, jupanacan ñankha ajjtcañ luräwinacap laycu; –siw Arctirinacan Tatitupajja.

18. Arctirinacan Tatitupasti, jïsa, jachʼa cheka Diosasajj siwa: Qhitinacatejj imatanac oraker imantapcan ucanacajja, uca oraken jachʼa ñankhachatätap laycojja, janiw ucanac jucʼamp catjapcaniti, janitejj imantqui ucajj asquïcan ucajja, janirac Tatitun asquipatac imantcan ucajja.

19. Tatitojj siwa: Jupanacan imatanacapajja, nayan amtäwijjatac imatäñap munta. Cawquïrinacatejj imatanacap nayan amtäwijjatac jan imantapcanejja, ñankhachatäpjjaniwa. Cunalaycutejj asqui jakenacaquiw imatanacap nayan amtäwijjatac imantapjje. Qhitinacatejj imatanacap nayan amtäwijjatac jan imantapcanejja, jupanacamp imatapampejj ñankhachatawa. Oraken ñankhachatätap laycusti, janiw qhitis uc cutsuycaspati.

20. Ucat chuymanacapan kamiriptañanac munatap laycuw, imatanacap imantapcan ucürojj purini. Jupanacan chuymanacapan kamiriptañanac munatap laycu, cunapachatejj jupanacajj timanacap nayrakatat jaltapcani ucapachajja, nayaw imatanacap imantä; nayan amtäwijjatac ucanac jan imantatap laycuw jupanacamp imatanacapampejj ñankhachatäni. Ucürunjja jupanacajj jawkʼantatäpjjaniwa –siw Tatitojja.

21. Uñjapjjam, aca jachʼa marcanquir jakenaca, arunacajjar istʼapjjam; jïsa, cuna arunactejj Tatitojj arsqui uca arunacar istʼapjjam. Kamiriptañanacam laycuw ñankhachatäpjjta; uqhämaraqui kamiriptañanacam chuymanacaman munatam laycu, uqhämaraqui qhititejj jumanacar churapctam jupan arunacaparu jan istʼatam laycuw kamiriptañanacamajj ñankhachatäpjjaraqui –siw jupajja.

22. Cunanactejj jupajj churapctam ucanacat lupʼisajj janiw jumanacajj Dios Tatitumat amtasipctati; ucampis kamiriptañanacamatjja, amtasipjjapuntawa, Dios Tatitumar ucanacat jan yuspagarasa. Chuymanacamajj janiw Tatitur loktäpquiti, antisas jachʼa jachʼa tucuñamp phoktʼatäpjjewa, jachʼa jakët saña, jachʼa aytat jaker tucuña, kʼenasiña, chʼajjwaña, uñisiña, arcnakaña, jiwayaña, take cunayman ñankha luräwinac lurañcama.

23. Ucat Dios Tatitojj aca oraker kamiriptañanacamar ñankhachäw puriyi; ucajj ñankha luräwinacam laycuwa.

24. Jïsa, ay aca jakenacata! Jumanacajj Diosan arjirinacapar alisnucupcta uca urojj puriniwa. Jupanacaruw jiscʼachapjjta, kalampiw cʼuphapjjta, jupanacaruw jiwayapjjta, cunjämatejj nayrapach jakenacajj lurapcän uqhämarac take cunayman ñankha luräwinac jupanacar lurapjjta.

25. Jumanacajj parlapct ucqhajja, aqhäm sapjjtawa: Jiwasanacatejj nayra awquinacasan urunacapan jacapjjasänjja, janiw Diosan arjirinacar jiwayapcasänti, janiw jupanacar kalamp cʼuphasajj alisnucupcasänti.

26. Ucampis jumanacajj jupanacats jucʼamp ñankhäpjjtawa, cunalaycutejj Tatitojj chekpachaw jacasqui, uqhäm chekampiw sapjjsma, mä arjiritejj jumanac taypir jutasin Tatitun arunacap khanañchi, uca arunacaw ñankha luräwinacamat ircati, ucatsti jumanacajj jupataquejj colerasipjjtawa, juparusti, alisnucupjjtawa. Take cunaymananac jupar tucqhañatac lurapjjaracta. Jupajj cʼari arjiriwa, supayat juti, juch luririw sapjjtaw jumanacajja, luratanacaman ñankhätapat jupan ircatatap laycu.

27. Ucampis mä jaketejj jumanac taypir jutasin aqhäm sanejja: Ac lurapjjam, janiw ñankha luräwïquiti, ac lurapjjam, janiw mutuyatäpcätati; jïsa, jupajj sanejja: Quipca chuymanacaman jachʼa jachʼa tucutaparjam sarnakapjjam. Nayranacaman jachʼa jachʼa tucutaparjam sarnakasin, cuntejj chuymajj munqui uc lurapjjam – mä jaketejj jumanac taypir jutasin uqhäm sanejja, jupar catokasinjja, jupaw Diosan arjirejj –sapjjätawa.

28. Juparuw aytapjjäta, yänacamat jupar churapjjaraquïta; jumanacajj korimata kollkemata jupar churasaw, jila alan isimpi jupar isiyapjjäta. Jupan alek jachʼar aptir arunac jumanacar satap laycu, take cunajj waliquiw satap laycu, janiw jupanjj juch jicjjatapcätati.

29. Jumanaca ñankha, asquit cutekat mita, juma chʼollkhe jan altʼir marca, cunapachcamas Tatitun jumanacjjar jachʼa chuymanïñap amuyasipjjasma? Cunapachcamas jan amuyun juyqhu irpirinacamp irpayasipjjäta? Cunapachcamas khana lanti chʼamac ajllipjjäta?

30. Tatitun colerasiñapajj jumanacatac kalltjjewa; jupajj aca orakerojj ñankhachiwa, jumanacan ñankhätam laycu;

31. Uqhämaraqui, cunapachatejj kamiriptañanacamaru, llustʼäñapataqui jumanacan ucanac jan catuñanacamatac ñankhachcan ucapachajj puriraquiniwa; tʼakhe urunacamanjj janiw ucanac catupcätati.

32. Tʼakhe urunacamanjja Tatituruw artʼapjjäta, ucampis inamayaw artʼapjjäta, cunalaycutejj jumanacan chʼusar tucuñamajj purinjjapjjätamwa, tucqhañasti chekpachaw puripjjätam. Ucürun aykosaw wararipjjäta –siw Arctirinacan Tatitupajja. Ucapachajj jaqhusisaw sapjjäta:

33. Ah, nayajj juchanacajjat cutiquipstacpachäna, Diosan arjirinacarojj janic jiwayquiriscät-ti, janic kalampejj cʼuphiriscäyät-ti, jupanacarojj janic alisnucuriscäyät-ti. Jïsa, ucürun sapjjäta: Cunapachatejj Dios Tatitusajj kamiriptañanacas churapquistu ucürunjja, jupat amtasipjjaquisäna, ucat ucanacajj jiwasanacan chhaktayasiñasataqui, janiw tuc-casapänti llustʼañaru. Jichhasti kamiriptañanacasajj jiwasanacat apakatawa.

34. Jiwasanacajj mä irnakañ acar apnokapjjtan ucat khepürojj janiw ucancquiti; uqhämaraqui nuwasiñatac ucanac munapctan ucürun espadanacasajj jiwasanacat apakatäpjje.

35. Jiwasanacajj imatanacas imantapjjtan, ucanacasti oraker ñankhachäw laycuw jiwasanacat llustʼarti.

36. Ay, cunüruntejj Tatitun arupajj purincän ucürojj juchanacasat cutiquipstapjjaquisäna. Ay orakejj ñankhachatawa. Take cun llustʼïpansti janiw ucanac catupcsnati.

37. Jiwasanacajj supayanacan muyuntatäpjjtanwa, jïsa, jiwasanacar tucqhañ munapquistu ucan arquirinacapan muyuntatäpjjtanwa. Ñankha luräwinacasajj jachʼawa. Ay Tata, janit colerasiñam nanacat apakapjjetasma? Uqhäm purincan uca urunacanjj arsusipjjäta.

38. Ucampis yantʼañ urunacamajj sarakatäjjaniwa. Jumanacajj khespiyasiñ urjja, kheparuw jit-tayapjjäta, ucürun jan wastat puriñapcama; ucat tucqhatäñamasti chekpachaw purinini. Jumanacajj take jacäwiman urunacapanjja, cuntejj jan catokañäqui uc munapjjta; cunalaycutejj jumanacajj ñankha lurasaw cusisiñ munapjjta, ucasti janiw jachʼa Wiñay Pʼektʼirisanquir asqui cancañan cunjamäquitejj ucarjamäquiti.

39. Ay juma aca orakenquir jakenaca, arunacajjar istʼapjjaquisamäna! Tatitun colerasiñapan jumanacat maysar uñtayatäñapataqui, jumanacan juchanacamat cutiquipstasin khespiyasipjjañamataquiw nayajj mayista.