1. Ucat waljaniw Samuel sat Laman jaken marca perkjjat arsut arunacap istʼapjjäna. Ucat kawkhaninacatejj arupar iyawsapcän ucanacajja, sarasaw Nefir thakapjjäna; cunapachatejj jupar jicjjatapcän ucapachajja, juchanacap arsusipjjaraquïna, janiraquiw ajjalnucupcänti, Tatitur bautisasiñ munasina.

2. Ucampis kawkhaninacatejj Samuelan arunacapar jan iyawsapcän ucanacajja, jupataquejj kʼapisipjjänwa, jupanacasti kalanacampiw perka patancquirir cʼupjapjjäna. Waljaniraquiw michʼinacapamp illaptʼapjjäna, jupajj perka patan saytʼatäcän ucqhajja. Ucampis Tatitun Ajayupajj jupampïnwa, ucat kalanacapamp michʼinacapampejj jupar jan wactʼayañjamäcänti.

3. Ucat uca jupar jan wactʼayañjamätap uñjapcän ucqhajja, jucʼamp waljaninacaw arunacapar iyawsapjjäna, jupanacasti Nefin ucaruw bautisayasiñatac sarapjjäna.

4. Uca Nefejj bautisascänwa, Diosan arjasa, jakenacar juchanacamat cutiquipstapjjam –sas artʼasa, unañchanac muspharcañanac uñachayasa, muspharcañ luräwinaca uca jakenac taypin luräna, Criston ucat jucʼa pachar jutañap yatiñanacapataqui.

5. Jucʼa pachar jutañapäcän ucanacat jupajj yatiyäna, ucanacajj jutcasp ucapachajj ucanacat nayra yatiyatap jupanacan yatisin amtasiñanacapataqui, jupanacan iyawsañanacapataqui. Ucat cawquïrinacatejj Samuelan arunacapar iyawsapcän ucanacajja, bautisasiñataquiw juchanacapat cutiquipstasin juchanacap arsusisajj Nefin uc sarapjjäna.

6. Ucampis jilpachajj janiw Samuelan arunacapar iyawsapcänti. Ucat kalanacapampi michʼinacapamp jan wactʼayatap uñjapcän ucqhajja, jilïrinacaparuw artʼapjjäna, sasina: Uca jaker catjasin ñachʼantapjjam. Mä supayaw jupan utji; jupancqui uca supayan chʼamap laycuw kalanacasamp michʼinacasampejj jupar jan wactʼayañjamäquiti; ucat jupar catjasin ñachʼantasin tucqhapjjam.

7. Ucat jupar catjir sarapcän ucapachajja, jupajj perkat thoktʼasaw orakenacapat jaltäna; quipca marcapar sarasinsti, quipca jakenacapar yatichasaw Diosan arjañ kalltäna.

8. Janiraquiw Nefi jakenacajj jupat jucʼamp istʼapcänti. Uqhamäpjjän uca jakenacan luräwinacapajja.

9. Uqhämaw taripirinacan Nefi jakenacapjjar sarayäwipan quimsakallk tunc sojjtan marajj tucusïna.

10. Ucat jakenacat jilpach jachʼa jachʼa tucutapan sarnakepana, jakenacat jucʼpach Dios nayrakatan wali sum uñjasis sarnakepana, taripirinacan sarayäwipan quimsakallk tunc pakallkon marajj tucusiraquïna.

11. Taripirinacan sarayäwipan quimsakallk tunc quimsakallkon maran uqhämaraquïna.

12. Ucat taripirinacan sarayäwipan quimsakallk tunc llätuncan maranjja, jakenacajj mä jucʼac amuythapisipjjäna; jupanacasti ñankha luräwinacan jucʼamp chʼollkheptapjjäna. Cunatejj Diosan jan camächitanacaparjamäcän uc jupanacajj jucʼamp jucʼamp lurapjjäna.

13. Ucat taripirinacan sarayäwipan llätunc tuncan maran wali jachʼa unañchanacamp muspharcañanacampiw jakenacar churatäna. Arjirinacan arunacapasti phokhasiñ kalltaraquïna.

14. Alajjpach qhitanacajj jakenacaru, suma amuyun jakenacarus uñstayasaw jachʼa cusisiñat cusisiyir yatiyäwinac yatiyapjjäna; ucat uca maranjj kellkatanacajj phokhasiñ kalltäna.

15. Ucampis Laman jakenacats Nefi jakenacatsa, jakenacajj chuymanacapar chʼollkheptayañ kalltasaw quipca chʼamapar amuyupar alcatañ kalltapjjäna; jucʼamp iyawsirinacaquiw jan uqhäm lurapcänti. Uca yakhanacasti sapjjänwa:

16. Walja cunaymananacat mä kawkhajj chektʼapjjasapänwa, ucampis take arsut jachʼa muspharcañ luräwinacan jan camächañap yatipjjtan.

17. Jupanacasti jupanac pur amuyasiña, juchhiquiñ kalltapjjäna, aqhäm sasa:

18. Mä Cristjam qhitin jutañapajj janjaw chekpachäcaspati. Uqhamäsp ucajja, arsutäqui uqhäm jupajj Diosan Yokapäcaspajja, alajjpachan acapachan Awquipäcaspajja, cunats jupajj jiwasanacar Jerusalenanquir jakenacarjam jan uñachtʼayasquistani?

19. Jïsa, cunats jupajj aca oraken Jerusalen orakenjam jan uñstcani?

20. Ucampis jiwasanacajj ucan ñankha jichutäñap yatipjjtan; mä jachʼa muspharcañ jutir camächawir iyawsapjjañasataquiw awquinacasajj ucjj catuyapjjestu. Ucajj jiwasanac taypinjj janiw camächcaniti, antisas mä jan uñjat jaya oraken camächani. Ucat jupanacajj jiwasanacar jan yatiñan irpnakapjjestaspa, jiwasanacan quipca nayranacasamp ucanacan chekätap jan uñjañas laycu.

21. Ñankhäqui ucan chʼiqhi jamas jan yatit luräwinacapampiw jupanacajja, mä jachʼa jan amuycay jamas luräw lurapjjani. Ucampisti jiwasanacarow catjjäsipjjestani, arunacapampin jupanacampin lokerip tucuyaraquistani, cunalaycutejj jiwasanacajj jupanacar aru yatichayasiñataquiw alcatapjjtan. Uqhäm jupanacar yäkapjjañänejja, takpach jacäwi urunacasan jiwasanacarojj jan yatiñan irpnakasipcaquistani.

22. Walja yakha jan amuyun inamay cunaymananac jakenacajj chuymanacapan amuyasjjapjjäna; jupanacasti wali pitusitäpjjänwa, Satanasan jupanacar ñankh jan inactʼas lurañ amtayatap laycu. Jupajj sarnakasaw jan wali istʼañanaca, tokesïwinaca, takpach uca oraken chʼekentayäna, cunatejj jutcaspa uca toke, asquïqui uca tokerac jakenacan chuymanacapar chʼollkheptayañataqui.

23. Ucat Tatitun jakenacap pur uñstayat unañchanacamp muspharcañanacampejj utjc-chïnsa, walja jachʼa jupanacan lurat muspharcañ luräwinacajj utjcarac-chïnsa, Satanasajj takpach uca orakjjan jakenacan chuymanacapar wal mantäna.

24. Uqhämaw taripirinacan Nefin jakenacapjjar sarayäwipan llätunc tuncan marajj tucusïna.

25. Uqhämaw Helamanan kellkapajj tucusi, Helamanampin yokanacapampin kellkataparjama.