1. Ucatsti llätunc tunc mayani marajj sarakatänwa. Lehejj Jerusalenat mistcänsa uchapachatjja, sojjta patac maraw sarakascäna, cunapachatejj Lachoneusajj uca oraken jilïr taripirïcän sarayirïcaraquïn uca maranaraqui.

2. Helamanan Nefi yokapasti, Zarahemla oraket mistutayna, ucat jilïr yokapäqui uca Nefiruw catuyatayna, kʼellu alquimiat lurat Tʼalpha Lekʼetanaca, take cuna kellkatanacatejj imatäcän ucanaca, Lehin Jerusalenat mistuncän ucqhatpach take cunatejj kollanjam imatäcän ucanac catuyaraquïna.

3. Ucat jupajj uca oraket mistüna. Cawqharutejj sarcäns ucjj janiw qhitis yatquiti. Jupa lantiw Nefi yokapajj kellkatanac imäna, jïsa, aca jakenacan kellkatanacap imäna.

4. Ucatsti llätunc tunc payan mara kalltanjja, Diosan arjirinacan arjäwinacapajj jucʼamp phokhataw phokhasiñ kalltäna. Ucapachatjja jucʼamp jachʼa unañchanaca, jucʼamp jachʼa muspharcañ luräwinacaw jakenac taypin lurasïna.

5. Ucampis yakhepanacajj aqhäm sañ kalltapjjäna: Samuel sat Laman jaken arsut arunacapan phokhasiñ urupajja, niy sarakjjewa.

6. Jupanacasti jilanacaparuw larchʼuquiñ kalltapjjäna, aqhäm sasa: Phokhasiñ urojj niy sarakjjewa. Samuelan arunacapasti janiw phokhasquiti. Ucjjat cusisiñamajj inamayaquïtaynawa, ucar iyawsañamas inamayaquïraquïtaynawa.

7. Ucatsti jupanacajj jachʼa ojjöw uc-chʼpach oraken utjayapjjäna. Iyawsir jakenacasti sint llaquisiñ kalltapjjaraquïna, inas uca arsut cunanacajj mä cunjämats jan purinc-chiniti –sasina.

8. Ucampisa, mä urumpi, arumampi, yakha urumpi, cawquïritejj mä urjamäcaspas jan arumanïcaspasa, ucaruw jupanacajj jan onjjtañamp suyapjjäna, iyawsañapan jan inamayätapat jupanacan yatiñapataqui.

9. Ucatsti jan iyawsirinacajj mä ur ajllipjjäna. Sapjjaraquïnwa: Samuel arjirejj churcän uca unañchatejj jan uca urut nayräjj purcanejja, take uca jichuntat iyawsirinacaw jiwarayasini –sasina.

10. Ucatsti, Nefin Nefi yokapajja, jakenacapan ucatak ñankhätap uñjasinjja, chuymapan walpun llaquisïna.

11. Ucatsti, qhitinacatejj awquinacapan jichuntatanacapar iyawsatap laycu niy tucqhatïrjamäpcän uca jakenacapataquiw Nefejj ankar mistusin orakcam altʼasisin jachʼa chʼamamp Diosapar artʼäna.

12. Ucatsti ur jornalaw jupajj Tatitur jachʼa chʼamamp artʼäna. Ucat Tatitun arupajj jupar purïna, aqhäm sasa:

13. Ucapachan puriniñapajj jacʼanquiwa. Jichhasti pʼekem waytam. Wal cusisiraquim. Jichhärmaw unañchajj churatäni; arumanthiw nayajj oraker jutä, take cuntejj kollan arjirinacajjan lacap toket arsuyctjja, nayan take ucanac phokhañajjat take oraker uñachayañataqui.

14. Jïsa, orak ut-tʼayäwitpach jaken wawanacapar yatiyctsa uca cunanac phokhañajjataquiw nayanquir jakenacajjar jutä. Ucsti luräwa, Awquina uqhämarac Yokana munañap lurañajjataqui – Awquin munañap nayïpana, Yokan munañapsti janchijjïpana. Jichhasti pachajj niy jacʼanquiwa. Jichhärmaw unañchajj churasini.

15. Ucatsti Nefir purcän uca arunacajj phokhasïnwa, cunjämatejj arsutäcän uqhäma, cunalaycutejj int jalantipan janiw chʼamacajj utjcänti. Ucjjat jakenacasti musphapjjänwa, arumäcäns ucqhas jan chʼamacan utjatapata.

16. Diosan arjirinacan arunacaparojj waljaniw jan iyawsirinacajj oraker liwirtapjjäna, jiwatäcaspas uqhämaw tucupjjaraquïna, cunalaycutejj jupanacan iyawsirinacar tʼunjañatac jachʼa arustʼapan inamayar tucutap yatipjjäna, cunalaycutejj churat unañchajj niy puritaynawa.

17. Ucapachat yatjjapjjäna Diosan Yokapan niy jutirjamätapa. Jïsa, chekpachan take uc-chʼpach orakenquir jakenacajja, jalsut jalantcama, alay toke orakena, aynach toke orakensa, takeniw oraker liwirtañcam sint musphapjjäna.

18. Cunalaycutejja, arjirinacan walja maranac ucanacjjat arsutanacapat yatipjjäna. Churat unañchan niy puritapat yatipjjaraquïna. Jupanacasti ajjsarañ kalltapjjäna, ñankhäpjjatap laycu, jan iyawsatap laycuraqui.

19. Ucatsti uca arumanpach janiw chʼamacajj utjcänti; antisasinsa, chica urücaspas uqhäm khanänwa. Ucatsti khepärmanthiw intejj wasitat jalsüna, cunjämirïcäntejj uqhäma. Ucatsti, churatäcän uca unañch laycu, cunüruntejj Tatitojj yuriñapäcän ucan ucürütap yatipjjäna.

20. Arjirinacan arunacaparjamaw phokhasiraquïna, jïsa, take cunanacaw phokhasïna. Janiraquiw mä jiscʼas pisïcänti.

21. Ucatsti arurjamaw mä machak warawarajj uñstaraquïna.

22. Ucatsti ucapachat ucsaruw Satanasajj jakenac taypin cʼarinac sartayäna, jakenacan chuymanacapar chʼollkheptayañataqui, uñjapcän uca unañchanacaru, muspharcañanacar jupanacan jan iyawsañanacapataqui. Ucampis uca sallkjañanacamp cʼarinacamp utjc-chïnsa, jakenacatjja jilpachaniw iyawsapjjäna, Tatitur cutiquipstapjjaraquïna.

23. Ucatsti Nefimp walja mayninacampejja, jakenac taypiruw juchat cutiquipstañatac bautisas sarapjjäna, uqhämat jachʼa juch pampachäw utjayasa. Uqhämat jakenacajj wasitat oraken sumancañ utjayañ kalltapjjäna.

24. Janiraquiw chʼajjwäwinacajj utjcänti, jan ucajj mä kawkhaniquiw kellkatanac toket yatichañ kalltapjjäna, Moisesan leyip phokhañan jan jucʼamp waquisitap uñachayañataqui. Ucampis uc yatichasajj pantasipjjänwa, kellkatanac jan sum amuytʼatap laycu.

25. Ucampis jupanacajj lakaw Diosar cutiquipstapjjäna; pantasitapat amuyayataraquïna. Leyin janïr phokhasitapjjat jupanacar yatiyatäna. Leyin kʼal phokhasiñan waquisitapjjat jupanacar yatiyataraquïna. Jïsa, leyin phokhasiñapan waquisitapjjat yatiyir aruw jupanacar purïna. Jïsa, cunatejj leyin utjquis ucanacat janiw mä jiscʼa kellkas jiscʼa arus sarakcaniti leyin kʼal phokhasiñapcamajja. Uqhämaw jupanacar yatiyatäna. Ucat uca quipca maran jupanacajj pantjasitapat amuyayatäpjjäna. Jupanacasti jan wali luräwinacapat arsusipjjaraquïna.

26. Uqhämaw llätunc tunc payan marajj sarakäna, jakenacar cusisiyir yatiyäwinac apaniraquïna, take kollan arjirinacan arjäwi arunacaparjam uñstcän uca unañchanac laycu.

27. Ucatsti sumancañ utjipana, llätunc tunc quimsan marajj sarakäna. Ucampis Gadianton lunthatanacajj kollunacan jacasin oraker chʼekentapjjäna. Jakenacajj janiraquiw jupanacar atipañatac chʼamanïpcänti, jupanacan pucaranacapans jamasawjanacapans wali chʼamañchatätap laycu. Ucat walja jakenac jiwayapjjäna; jakenac taypin wal jiwarayapjjaraquïna.

28. Ucatsti llätunc tunc pusin maranjja, walpin miratatañ kalltapjjäna, Nefi jakenacat jupanac taypir jalcatjjer chʼurqhisirinacan walïtap laycu. Ucasti oraken kheparir Nefi jakenacaruw wal llaquisiyaraquïna.

29. Laman jakenac taypin llaquinacajj utjaraquïnwa. Jupanacajj walja wawanïpjjänwa; ucanacasti jiltapjjänwa jachʼa jaker tucuñapcama. Ucat mä kawkha Zoram jakenacajja alek cʼarinacampi, jachʼar aptir arunacampiw jupanacat waljanir irpakapjjäna, uca Gadianton lunthatanacar mayachasiñanacapataqui.

30. Uqhämaw Laman jakenacajj tʼakhesipjjaraquïna. Iyawsañapa asqui cancañap chhaktayañ kalltapjjaraquïna, machak mitan ñankhätap laycu.