1. Ucatsti, istʼapcäns uñjapcäns ucanac yatichasaw Jesusan yatekerinacapajj sarnakapjjäna. Jesusan sutipjjaruw bautisapjjaraquïna. Ucat jupanacajj mayachthapisipjjäna, ucatsti chicpachaw Diosat wali chʼamamp mayisipjjäna, ayunapjjaraquïna.

2. Ucat Jesusajj wastat jupanacarojj uñachayasïna, cunalaycutejj jupanacajj Awquit mayisisipcäna jupan sutipjjaru. Jutasinsti Jesusajj jupanac taypin saytʼäna, jupanacarusti saraquïnwa: Cuns jumanacar nayan churañajj munapjjasma?

3. Jupanacasti juparojj sapjjänwa: Tata, cuna sutimpitejj aca iyawsir tamar sañajjäqui uc yatiyañam munapjjerista, cunalaycutejj jakenac puraw ucjjat chʼajjwäwinacajj utji.

4. Tatitusti jupanacarojj siwa: Chekpach chekpachaw jumanacar sapjjsma: Cunats jakenacajj ucjjat thuthupjje, chʼajjwapjjaraqui?

5. Criston sutip apjjaruñaman waquisitapjjat yatiyir kellkatanac janit arsuyapqui? Cristo sutejj nayan sutijjawa. Uca sutimpiw jumanacajj jawsatäpjjäta, khep khepa urunjja.

6. Uqhämaraqui, take qhitinacatejj nayan sutijj jupjjar catjjarupqui, tucusïwcam thurtʼasipcaraqui ucanacajja, khep khepa urunjja, khespiyatäpjjaniwa.

7. Ucatsti take cunanactejj lurapcät ucanac nayan sutijjarojj lurapjjäta. Ucat iyawsir tamarojj nayan sutijjamp sutiñchapjjäta. Nayan sutijj-jjaruw Awquit mayisipjjaraquïta iyawsir tamar nayïpan qhuyapayañapataqui.

8. Janitejj nayan sutijjat satäcaspajja, cunjämarac nayan tamajjäspasti? Mä iyawsir tamatejj Moisesan sutipat satäspajja, ucajj Moisesan tamapäspawa. Ucatsti mä jaken sutipat satäspajja, ucajj mä jaken iyawsir tamapäspawa. Ucampis uca tamatejj nayan sutijjat satänejja, ucajj nayan iyawsir tamajjäniwa, jupanacatejj asqui yatiyäwijj-jjar ut-tʼayatäpcan ucqhajja.

9. Chekpachaw jumanacar sapjjsma: Jumanacajj asqui yatiyäwijj-jjar ut-tʼayatäpjjtawa. Uqhämasti, take cunanactejj sutiñchapcäta ucanacjj nayan sutijj-jjaruw sutiñchapjjäta. Ucatsti, jumanacatejj iyawsir tamatac Awquit mayisipjjätajja, nayan sutijj-jjar mayisipjjaraquïtajja, Awquejj istʼapjjätamwa.

10. Iyawsir tamatejj asqui yatiyäwijj-jjar ut-tʼayatäcaraquinejja, Awquejj jupan quipca luräwinacap ucsa toket uñachayani.

11. Ucampis janitejj uca iyawsir tamajj asqui yatiyäwijj-jjar ut-tʼayatäcani, antisas jakenacan luräwinacapjjarojja, chekpachaw sapjjsma, mä kawkha pachataquiquiw luräwinacapat cusisipjjani, ucatsti mä uruw tucusïwejj purini. Ucat jupanacajj yawsutäpjjani, ninar jakontatäpjjaraquiniwa, cawqhat-tejj jan cut-tañ thaquejj utjqui ucqharu.

12. Cunalaycutejj luräwinacapajj jupanacaruw arcapjje; luräwinacap laycusti jupanacajj yawsutäpjjewa; uqhämasti, cunanactejj yatiyapcsma ucanac amtasipjjam.

13. Jumanacaruw nayan asqui yatiyäwijj churapjjsma. Churapcsma uca asqui yatiyäwejj aqhämawa: Nayajj orakerojj jut-twa, Awquin munañap lurañataqui, jupan nayar qhitanitap laycu.

14. Awquisti nayarojj qhitanituwa, mä cruzjjar aptatäñajjataqui, ucat cruzjjar aptatätajj khepatjja, take jakenacar nayar jacʼachayañajjataquiwa, cunjämatejj nayajj jakenacan aptatäcäyätjja, Awquin take jakenacar uqhäm aptañapataquiraqui, jupanacan nayan nayrakatajjar saytʼañapataqui, ucatsti luräwinacaparjam taripatäñapataqui, ucanacajj asquïchinisa ñankhächinisa.

15. Uca laycuw nayajj aptatäyätjja. Uqhämasti, Awquin chʼamaparjamajja, take jakenac nayar jacʼachayä, jupanacan luräwinacaparjam taripatäñapataqui.

16. Ucatsti take qhitinacatejj juchat cutiquipstapcani, nayan sutijj-jjarusti bautisasipcaraquin ucanacajja, phoktʼayatäpjjäniwa. Jupanacatejj tucusïwcam thurtʼasipjjanejja, cunüruntejj orakerojj taripañatac saytʼcä ucürun Awquin nayrakatapan nayajj sä: Janiw jupanacajj juchanïpquiti –sasa.

17. Qhitinacatejj tucusïwcam jan thurtʼasipcan ucanacaw yawsutäpjjani, ninar jakontatäpjjaraquini, cawqhat-tejj janipin cut-tapcaspa, Awquin chekapäñaparjam taripäw laycu.

18. Jupasti uca arjja jaken wawanacaparuw churi. Uca laycuraquiw churqui uca arunacjj phokhe. Janiraquiw cʼarisquiti, antisas take arunacaparuw phokhe.

19. Janiw cuna kʼañus khapak marcapar mantcaniti. Uqhämasti, janiw qhitis samarañapar mantcaniti, jan ucajja, qhitinacatejj iyawsirïtapatjja, take juchanacapat cutiquipstatapatjja, tucusïwcam thurtʼasitapatsa, isinacapjj nayan wilajjan tʼajjsupqui ucanacaquiw samarañapar mantapjjani.

20. Jichhasti, acaw camächitajja: Juchanacat cutiquipstapjjam, take juma orak thiyanacanquirinacajja; nayar jutapjjam, sutijj-jjar bautizasipjjam Kollan Ajay catokasin kollanaptayatäñamataqui, jan kʼañunïsa nayrakatajjar saytʼapjjañamataqui khep khepa uruna.

21. Chekpach chekpachaw jumanacar sapjjsma: Acajj asqui yatiyäwijjawa; cuntejj jumanacajj iyawsir tamajjan lurapjjañamäqui ucanac yatipjjaractawa; cunalaycutejja, cuna lurañanactejj nayar lurir uñjapquistajja, uca quipca luräwinac jumanacajj lurapjjaraquïta; cuntejj nay lurir uñjapquistajja, uc lurapjjäta.

22. Jumanacatejj ucanac lurapjjstajja, qhuyapayatäpjjtawa; khep khepa urunjja alayar aptatäpjjätawa.

23. Cunanactejj istʼapctas uñjapctasa ucanac kellkapjjam, ucampis jarcʼat cunanacjj jan kellkapjjamti.

24. Camisatejj aca jakenacan nayrïr luräwinacapajj kellkatäquejja, uqhämarac aca jakenacan jutir luräwinacapatjj kellkapjjaraquim.

25. Cunalaycutejja, cawquïr kellkatanacatejj kellkatäpjjäna uqhämaraqui kellkatäpjjaraquini, ucanacarjam aca jakenacajj taripatäpjjaniwa, cunalaycutejj ucanac toket jupanacan luräwinacapajj jakenacar yatiyatäni.

26. Take cunanacaw Awquin kellkatajja. Uqhämasti, kellkatäcani uca kellkatanacarjamaw orakejj taripatäni.

27. Ac yatipjjam: Cuna asqui taripañtejj jumanacar churapcäma ucarjamaw aca jakenacan taripiripäpjjäta. Uqhämasti, cunjäm jakenacäpjjañamas jumanacajja? Chekpachaw jumanacar sapjjsma; nayjamäpjjañamawa.

28. Jichhasti Awquiruw sarä. Chekpachaw jumanacar sapjjaracsmajja, take cunataquitejj nayan sutijj-jjar Awquit mayisipcäta ucanacajja, jumanacarojj churatäniwa.

29. Uqhämasti, mayisipjjam, ucat catokapjjätawa. Lektʼapjjam, ucat jistʼaratäpjjätawa, cunalaycutejj take mayisirejj catokewa, lektʼiritaquisti jistʼarasiwa.

30. Jichhasti, jumanacampit aca mitampit cusisiñajjajj wali jachʼawa, jïsa, phokhatpachawa. Jïsa, Awquis cusisiraquiwa, uqhämaraqui take kollan alajjpach qhitanacapajj cusisipjjaraqui, jumanacampit aca mitampita, jan maynins chhakatätap laycu.

31. Amuyapjjañam munirista. Jichhürunacan jacapqui uca mitat parlta. Janiw maynis jupanacat chhaktascaniti. Ucat cusisiñajjajj jupanacat phokhatpach utji.

32. Ucampis aca mitat pusïr saraker mitaw llaquisiyitu, cunalaycutejj jupan catuntatäsin jupanacajj anaquitäpjjani, cunjämatejj chhakatäñan yokapajj jupan irpsutäcän uqhäma, cunalaycutejja, jupanacajj nayaruw aljantapjjetani kollketaqui koritaqui, uqhämaraqui cunarutejj thuthajj chhakayqui, lunthatanacasti mantasin lunthatapcaspa ucataquiraqui. Ucürunsti jupanacaruw tumpä, quipca luräwinacap quipca pʼekenacapjjar cut-tayañataqui.

33. Ucatsti uca arsüwinac arsutapatjja, Jesusajj yatekerinacaparuw säna: Cʼullcʼu puncunjam mantapjjam, cunalaycutejj cʼullcʼuw puncojja; cʼullcʼuraquiw jacañar irpir thaquejja; jucʼaniquiraquiw ucar jicjjatirinacajja. Ucampisa, jiwañar irpir thaquejj anchowa, puncusti jachʼaraquiwa; waljaniraquiw ucanjam saririnacajja, arumajj purcan ucqhacama; uca arumansti janiw qhitis irnakcaspati.