1. Chekpach chekpachaw sapjjsma: Jan cunaninacar yanapapjjañam munirista. Ucampis amuyasipjjam, jan ucjj lurapjjamti, jakenacan nayrakatapan uñjayasiñataqui. Jan ucasti alajjpachanquir Awquimatjja, janiw wajjtʼäwejj jumanacatac utjcaniti.

2. Uqhämasti, jan cunaninacar yanapapcäta ucapachajja, jan nayrakataman pututu phusapjjamti, cunjämtejj cʼari chuymaninacajj sinagoganacansa marca thaquinacansa lurapqui jakenacan wakaychatäñataqui. Chekpachaw sapjjsma: Catokañapjj niy catokjjapjjewa.

3. Jumajj jan cunaninacar yanapcät ucapachajja, chʼeka amparamajj jan yatpati, cuntejj cupi amparamajj lurqui ucjja.

4. Ucat jan cunaninacar yanapatamajj jamasatäniwa. Jamasan uñjir Awquimasti takenin uñjcataw jumar asqui churätam.

5. Diosat mayisipcta ucapachajja, cʼari chuymaninacjam jan lurapjjamti, cunalaycutejj jupanacajj sinagoganacansa, marca thaquin kʼewtʼapans saytʼataw Diosat mayisiñ wal munapjje, jakenacamp uñjayasiñataqui. Chekpachaw sapjjsma: Catokañapjj niy catokjjapjjewa.

6. Jumasti, Diosat mayiscta ucapachajja, utam mankhar mantam, puncum jistʼantasinsti, jamasanquir Awquimat mayisim. Jamasan uñjir Awquimasti taken uñjcataw asqui churätam.

7. Mayisisinsti, jan walja arunacampïcpanti wasa jakenacjama; jupanacajja waljanac arsusaw istʼatäñäni –sasaw amuyapjje.

8. Uqhämasti jan jupanacjamäpjjamti, cunalaycutejj jumanacajj Awquimat janïr mayisipct ucqhaw jupajj yatjje, cunanacatejj jumanacatac waquisqui ucanacjja.

9. Uqhämasti, aqhäm mayisipjjäta: Alajjpachanquir Awquijja, sutimajj kollanaptayatäpan.

10. Munañamajj alajjpachan luratäquisa uqhäm acapachan lurataraquïpan.

11. Manunacajjat pampachapjjeta cunjämatejj nanacajj manusirinacajjar pampachapcta uqhäma.

12. Janiraqui yantʼäwir mantayapjjestati; ñankhat antutayapjjeta.

13. Cunalaycutejja, khapak marcajja, chʼamasa, khapak cancañas wiñayatac jumanquiwa. Uqhamäpan.

14. Cunalaycutejja, jumanacatejj jakenacan juchanacap pampachapjjätajja, alajjpachanquir Awquimajj juchanacam pampachapjjaraquïtamwa.

15. Ucampis janitejj jakenacan juchanacap pampachapcätajja, janiraquiw Awquimajj juchanacam pampachapcätamti.

16. Ayunäpctas ucapachasti, jan cʼari chuymaninacjam llaquit ajanunïpjjamti, cunalaycutejj jupanacajj ajanunacap mayjtʼayasipjje, jakenacar ayunirjam uñstañataqui. Chekpachaw sapjjsma: Jupanacajj catokañap niy catokjjapjjewa.

17. Ucampis jumajj ayuncta ucapachajja, pʼekem jawtʼasim, ajanum jarekasiraquim;

18. Jakenacar jan ayunir uñstañamataqui, ucatsipana jamasanquir Awquimaruqui. Jamasan uñjir Awquimasti, takenin uñjcataw asqui churätam.

19. Acapach orakenjja suma imasiñanac jumanac pachpatac jan imasipjjamti, cawquintejj thuthamp sarumpejj ucanac tucqhapqui, cawquintejj lunthatanacas mantasin lunthatapjjaraqui.

20. Ucatsipana alajjpachar suma imasiñanac jumanac pachpatac imantasipjjam, cawquintejj thuthasa sarusa jan ucanac tucqhapquiti, cawquintejj lunthatanacas mantasin jan lunthatapcaraquiti.

21. Cunalaycutejja, cawqhancquitejj suma imasitanacamajja, ucqhancaraquiw jumanacan chuymanacamajja.

22. Janchin khanapajj nayrawa. Uqhämasti, nayramatejj kʼomänejja, khanajj take janchiman phokharaquïni.

23. Ucampis nayramatejj ñankhänejja, chʼamacajj take janchiman phokharaquïni. Ucatsti, juman utjqui uca khanatejj chʼamacächejja, cunja jachʼas uca chʼamacajja!

24. Janiw qhitis pani patronar lokcaspati, cunalaycutejj maynirojj uñischini yakharusti munchini, jan ucajja, maynir alcatchini yakharusti uñischini. Janiw Diosampir kamir cancañampirojj lokapcasmati.

25. Ucatsti, uca arunac arsusinjja Jesusajj ajllcän uca tunca payaniruw uñtäna, jupanacarusti saraquïnwa: Cawquïr arunactejj arscta ucanac amtasipjjam, cunalaycutejj jumanacaruw ajllipjjsma aca jakenacar chʼamamp yanapañamataqui. Uca laycusti jumanacaruw sapjjsma: Jacañamatjja, jan llaquisipjjamti, mankʼañamatac cun utjañapatsa, umañamatac cun utjañapatsa, janirac janchimats llaquisipjjamti, cunampis istʼasiñäni –sasina. Janit jacañajj mankʼañat sipan jucʼampïqui? Janchisti janit isit sipan jucʼampïcaraqui?

26. Alayanquir jamachʼinacar uñtapjjam. Ucanacajj janiw phawapquisa, yawipquisa, pirwanacarus apthapipquiti, ucampis alajjpach Awquimajj ucanacarojj mankʼayiwa. Janit jumanacajj ucanacat sipan wali sumäpcta?

27. Qhitis jumanacatjja, llaquisisin tansapar mä mujlli uc-chʼamp jiljjatayaspa?

28. Cunats isit llaquisipjjta? Pampa pankaranacan alitapjjat amuyasipjjam. Ucanacajj janiw irnakapquiti, kapupcaraquisa.

29. Ucampis jumanacaruw sapjjsma: Salomonas take khapak cancañapanjja, janiw ucanacat mayjamas isthapiscänti.

30. Uqhämasti, cuna pampa koratejj jichhür utjqui ucat kharürojj kherir willintataraquïn uca korarutejj Diosajj uqhäm isthapiyejja, uqhämaraquiw jumanacarojj isthapiyapjjätam, jumanacajj janitejj pisi iyawsañanïpcät ucqhajja.

31. Jan llaquisipjjamti, cuns mankʼapjjañäni, cuns umapjjañäni, cunampis istʼasipjjañäni? –sasina.

32. Cunalaycutejj alajjpach Awquimajj take ucanacan jumanacatac waquisitapjj yatiwa.

33. Ucatsipana, nayrakatajj Diosan khapak marcapampir jupan asqui cancañapampir thakapjjam. Ucat take uca cunanacajj jumanacarojj yapjjatasiniwa.

34. Uqhämasti, jan kharürut llaquisipjjamti, cunalaycutejj kharür pachpaw cunanacjjat llaquisini. Urun utjiro llaquinacajj uca quicpa urutaquiwa.